Read South Giziga 1SA 4 Bible Online

1SA 4 - South Giziga bible

1SA 4

¹Joˀ Samuyele, ɓi Buymisemuŋ miɓaŋ di gar na, a ɓa da Israyeley gar. Ngi pas numuŋ ada na, Israyeley a bam nga gi vurum ati Filistihey. A ra pam sar ti gwat ngi vurum taŋhay a ciki Ebeŋ-Ezer, yo Filistiheye kwana, a Afek.

²Filistiheye, a cinjaham ngi kiɗa vu ati Israyeleye, kiɗa vu a ci le, joˀ Filistihey a kiɗaka Israyeleye. Ar li kiɗa vu nah na, a kiɗam gwat ngi mizli durmuk mufaɗ.

³Mizli mulohokohoy mumoko ng'ar li taŋ mipam tuwa na, mizli micawwahay, a ɓam: «Buymisemuŋ a pula Filistihey a kiɗam ndra dana vur mike? Akum i ra supoko akoti ngi jumoˀay ngi Buymisemuŋ a Silo: anja i soko di nga wuzla ndra, ɓa a laha ndra ti haŋ mesene ndrahay na!»

⁴A slinam mizli nga Silo. A soko ti akoti ngi jumoˀay ngi Buymisemuŋ, misi gidaŋ wãˀ, muar kerubeŋhey. Zir ngi Elihey mucuw, Hofni ati Pinas tuwa, t'ada a ciki akoti ngi jumoˀay ngi Bumbulvuŋ.

⁵Akoti ngi jumoˀay ngi Buymisemuŋ mindilo ndil ar li taŋ mipam sar tuwa si na, Israyeley gar, a zluzluɓam ti ji salalay cǝruw cǝruw cǝruw, hã hirwuy a wus hiɓik hiɓik.

⁶Filistihey micinaka na, a ɓam: «Zluzluɓ ti ji salalay micǝruw cǝruw misi ar li Heberey mipam sar na, a mbiɗiavra mbrike?» A sinaka le akoti ngi jumoˀay ngi Buymisemuŋ a ndilo le ar li pi sar taŋ.

⁷Filistihey a zluwunam, vur a ɓam na: «Bumbulvuŋ a ndilo le ar li pi sar taŋ.» Joˀ a ɓam: «I sa puraka bonoyo!» Asi dumbuŋ zleˀe na, naŋ anta a diga ta.

⁸I bonoy avu ndra. Bumbulvuŋ migidaŋ nah, masa laha ndra tisi haŋ naŋ i waka? I Bumbulvuŋ nah muso ti bonoy ti sukwi wal wal da Eziptehey a wuzlaɓuh mikirɗak kirɗak na.

⁹Filistihey, a kum, i zluwunam ta, gukum zil, da i murom tak ta na, i tiram beke ngi Heberey, kaɓa taŋ mitiram beke ndrahay zleˀe na ya. Gukum zil, kiɗukum taŋ.

¹⁰Filistihey a cam kiɗa vu. A kiɗaka Israyeleye, hã ko wa gar a kil ng'ar guɗuk naŋ, kiɗa vu a gi le tuwaˀ haɗa teˀe: a kiɗam asi Israyeleye, mizli durmuk kukur makir.

¹¹Akoti ngi jumoˀay ngi Bumbulvuŋ, a zuɓaka le, yo ziri ngi Elihey mucuw, Hofni ati Pinasa, a micam le ya.

¹²Ngi hin nah vuna, mbur ada asi sukwi ngi Benjameŋ, a loho tir li kiɗa vu, a kilawa, a ndilo a Silo. Zana mingirahay le, yo hirnga gar i murɓuk.

¹³Ti naŋ mindilo na, naɓa Eli naŋ da ar janga naŋ, a ciki jiviɗi, a ro slimiɗ jakka, asi didak ara muɗaŋ vur akoti ngi Buymisemuŋ na. Mbur tuwa, a so til mi ti labara nah ar walahaya. Dar akẽh, mizli ngir walahayaya gar a hizigaka widi ngirzliŋŋe.

¹⁴Eli micina widi tuwa na, a ɓi a kwacay naŋ: «Zigiduw mawidi hana a mbiɗiavra mbrike?» Mbur tuwa, a wuso vu, a so ɓa labara nah da Eli.

¹⁵Naɓa Eli naŋ ti vi kukur ngoltir nga dangafaɗa. Naŋ hiri ngirimme, naŋ anta pur gu mata.

¹⁶Mbur tuwa, a ɓa Eli: «Yi ndilo ani tir li kiɗa vu. Yi kilo ti kil, ngadana ngadana vuna si.» Eli a ɓaŋ: «Ani, i mi migi a diga na ska mangal ɗu?»

¹⁷Mbur tuwa, a mbiɗaŋ di: «Kay, Israyeleye, a kilam le a mbuŋ Filistiheye, yo a kiɗam le asi Israyeleye haɗa teˀe, waɗ ma na, ziri ɗikey mucuw, Hofni ati Pinas a micam le ya. Yo a zuɓaka akoti ngi Buymisemuŋ le ma.»

¹⁸Hirak ti mbur muslufaŋ ɓi ngi akoti ngi Buymisemuŋ na si na, Eli a diɗ murdirba tir janga naŋ nga mivay ngi miviŋ. A ngila ˀaya, a mucu, asi a gi gal le, yo dumvu naŋ dudok dudoko. A cifi le i madiɗa ngi Israyeley diga vi kukur mufaɗa.

¹⁹Dideˀ naŋ, ngwas ngi Pinasa, naŋ ti hur zleˀe gweˀ ngi yi. Ti naŋ micina, a zuɓaka akoti ngi Buymisemuŋ le, yo dideˀ naŋ Eli ati zil naŋ a micam le na, a cici deŋ gu mata, kwacay a zla a jaŋ, dar a yi.

²⁰Naŋ migweˀ ngi muc tuwa na, ngwas miyi naŋhay a ɓakaŋ: «Ki zluwun ta, ki yo di i mangal mizile.» Ko a mbiɗa neˀ ta, yo a jik slimiɗ aseˀe ta.

²¹Amma a zila mangala Ikabot, mbiɗeˀvra: dudok anta mata. A ɓi: «dudok anta ar hirwuy Israyele mata.» Kanaha asi taŋ muzuɓaka akoti ngi Buymisemuŋ, yo waɗ asi muc ngi dideˀ naŋ ati ngi zil naŋ na.

²²Naŋ miɓi dudok anta ar hirwuy Israyele mata na, asi akoti ngi Buymisemuŋ a zuɓaka le.