Read South Giziga 1SA 5 Bible Online

1SA 5 - South Giziga bible

1SA 5

¹Filistihey a zuɓaka akoti ngi Buymisemuŋ le so. A zuɓaka baɗ a Ebeŋ-Ezer nga Asdof.

²Filistiheye, a cam ti akoti ngi Buymisemuŋ ng'ar hay ngi kuli taŋ Dagoŋ, ara ɗuvaka taˀ a ciki Dagoŋ.

³Put ngi miprik prik ngi li naŋ muwun na, mizli Asdotoy a slikiɗam, a ram, ara lumaka na, Dagoŋ a diɗ le ɓaˀ a ruwuy a mbuŋ akoti ngi Buymisemuŋ. A zuɓaka Dagoŋ, waɗ a cicaka deŋ ar li naŋ a muŋ.

⁴Put ngi miprik naŋ mekelem ma na, a slikiɗam, a ram, keɗ ma na, Dagoŋ ɓaˀ a ruwuy a mbuŋ akoti ngi Buymisemuŋ. Hirnga ngi Dagoŋ ati haŋhaya, i mingilahay le ɓaˀɓaˀ ar hohoy ngi miviŋ ngi hay naŋ vuna. Sey mindir na, i dumvu ngi Dagoŋ tewle.

⁵Migi mikuli ngi Dagoŋhoy ati mizli gar macam ng'ar hay ngi Dagoŋ a Asdoto, ko ti dana kwana, taŋ anta a ɗuvaka sar ar hohoy ngi miviŋ ngi hay ngi Dagoŋ ta na, vurˀe.

⁶Gidaŋ ngi Bumbulvuŋ ara kuta Asdotoyo kuyta wãˀ, yo ara ngizla taŋ. A ga taŋ jiji ngi tandaw, da taŋ Asdotoy ati li mugun ngi ciki taŋhay gar.

⁷Mizli Asdotoyo mupuraka gwat mindilo taŋ nah na, a ɓam: «Anja akoti ngi Buymisemuŋ a ndir a hay ndra aka ta, asi a ɗuvo haŋ naŋ le hirasl ti gidaŋ ar ndra, ar ndra vuna, yo ar kuli ndra Dagoŋ!»

⁸A ziloko buy ngi Filistiheye gar, ɓa a kusom a hay taŋ, a ɓaka taŋ na: «Akoti ngi Bumbulvuŋ ngi Israyel na, i gaka mbrike?» Taŋ a mbiɗaka taŋ di: «Zuɓaka akoti ngi Buymisemuŋ ngi Israyeleye, mam di nga Gat.» Dar a mam ti akoti ngi Buymisemuŋ ngi Israyele.

⁹Amma naŋ mindil ndil ar walahaya na, gidaŋ ngi Bumbulvuŋ naŋ da ar mizli ngir walahaya. Mizli ngir walahay a zluwunam kirkir. Buymisemuŋ a ngizla mizli ngir walahaya, mizli madiɗahay ati ziri gar. A ga taŋ jiji ngi tandaw.

¹⁰A dirba nah, a slinam ti akoti ngi Buymisemuŋ nga Ekroŋ, amma naŋ mindil ndil a diga na, mizli Ekroŋhoy a cam widi, a ɓam: «A soko ti akoti ngi Buymisemuŋ ngi Israyele le ngi hay ndra, ɓa a ngizla ndra gar ndra.»

¹¹Mizli Ekroŋhoy kwana, a ziloko buy ngi Filistiheye gar, a kusom, a ɓaka taŋ na: «Mam ti akoti ngi Buymisemuŋ ngi Israyel a muŋ, vur naŋ masa ngizla ndra gar ndra.» Naŋ kine, walahay gar Bumbulvuŋ mukutataŋ le kuyta wãˀ gar na, a muɗa taŋ membezleŋ muwãˀ makiɗ vu vagay.

¹²Mizli mumicamay ta na, a luuma taŋ jiji ngi tandaw le si, hã widi ngi bonoy ngi walahaya, a ndil sesẽŋ a muŋ.