Read South Giziga 1SA 6 Bible Online

1SA 6 - South Giziga bible

1SA 6

¹Akoti ngi Buymisemuŋ a zik a hirwuy Filistiheye, a gi kiya tarnaˀa.

²Filistihey a kam zil ng'avu mizli taŋhay, masayay ati mupura daˀasay, a ɓaka taŋ: «Akoti ngi Buymisemuŋ na, i gaka mbrike? Ɓa i mam di nga hirwuy naŋ a muŋ na, sey mbrike, bigam ndra wer naŋ.»

³Masayay ati mupura daˀasay a ɓaka taŋ na: «Akoti ngi Bumbulvuŋ ngi Israyele, da ki wuɗam mi di le na, ki mam di haŋ njoŋ kine ta. Amma sey ki rakaŋ ti gwat ngi mikuli ngi ɗiya malambaˀ kumo. Dar kisa mbulom, Bumbulvuŋ makutukum kuyta wãˀ na vur mike na, kisa sinakaŋ.»

⁴Filistihey a cufuɗaka taŋ: «I gam di i sukwi mikuli wana ngi ɗiya malambaˀ ndra vunaka?» Masayay ati mupuroy a ɓaka taŋ: «Ndiram gwat kaɓa jiji ngi tandaway zlum ti ɓiri mazilakaɓiri tapasl tapasl waɗ kotokomoy zlum ti ɓiri tapasl tapasl vuna ma, kaslsla a hirnga buy ngi Filistiheye, vulaka taŋ da Bumbulvuŋ. Asi mike mulumukum na, i jiji mupurla nah vuna, kum ati buy kumoyo gar.

⁵Ki sa ndiram gwat kaɓa tandaw waɗ gwat kaɓa kotokomoy muhumbuɗaka gwat ngisi hirwuy kum na, yo kisa vulaka dudok da Bumbulvuŋ ngi Israyele kahana. Asinta, kum ati kuli kumoy waɗ hirwuy kum gar na, naŋ anta sa kutukum ta kwani.

⁶Buy madiɗa ngi Ezipte ati Eziptehey zleˀe a cifam le hirnga gidaŋ, ki gam ka taŋ vur mike? Kum ada wulkaka ya, Buymisemuŋ a ga taŋ bonoy, ɓa hã a sa pulaka jiviɗ da Israyeley a cohom.

⁷Wurenna, ɗiyam saret ma nawaya, yo hilam madiya slahay cuw misi ti ziri asi taŋ, yo muluwaka taŋ galalaŋ ɗaˀ t'aruŋ. Ki sa luwaka sarete law da slahay tuwa, yo kisa gwahaka ziri taŋhay avra, kisa gicaka taŋ giceˀ ar gezleŋ.

⁸Ki sa zuɓaka akoti ngi Buymisemuŋ, joˀ kisa ɗuvaka ar saret tuwa. Gwatay kum miɗiyaka taŋ ti ɓiri tapasl tapasl ngi gi mikuli da Bumbulvuŋ tuwa na, kisa paka taŋ sek ar akoti meciɗek waɗ taˀ a ciki akoti ngi Bumbulvuŋ tuwa, dar kisa pulakaŋ a ru.

⁹Akẽh so na, i sa purakaŋ: a slahay ara zuɓam di jiviɗ ng'ar hirwuy Israyel, kini nga Bet-Semes na, naɓa i Bumbulvuŋ ngi Israyel nah miga ndra hiryi madiɗa nah na. Da a zuɓam di jiviɗ kanah ta na, naɓa i sinaka le mugo ndra hiryi madiɗa nah na i naŋ ta, kite i mendere mindilo kanah si.»

¹⁰Filistihey a gaka le kanah. A hilam sla madiyahay cuw misi ti ziri asi taŋ. A luwaka taŋ sarete waɗ a tikaka ziri taŋhay a hay.

¹¹A ɗuvaka akoti ngi Buymisemuŋ ar sarete, yo waɗ akoti meciɗek misi ti kotokom ngi ɓiri tapasl tapasl waɗ foto miɗiyahay ngi biga jiji mivizivizi tuwaŋ.

¹²Slahaya a zuɓam jiviɗ deŋŋe nga Bet-Semes. A sipam di i jiviɗ mupurla bal ti tuwuy, ko anta ngizlam ti gula malla ti hazum ta. Buy ngi Filistihey ara sipaka taŋ ɓaˀ a dirba taŋ, hã ar maakway ngi Bet-Semes.

¹³Naɓa mizli ngi Bet-Semesey ara njikom daw taŋ alkamari ar sozo. Taŋ muzuɓaka hiri a puraka akoti tuwa keɗ na, a cinam ndum haɗa teˀe.

¹⁴Sarete mindil ar guva ngi Zozuwe a Bet-Semes na, a cici. Naɓa ɗugur madiɗa ada akẽh. Mizli a puɗkaka dum ngi sarete tuwa, a gam mikuli ti sla madiyahay tuwa da Bumbulvuŋ, mikuli mizlam zlam wãˀ.

¹⁵Akoti ngi Bumbulvuŋ ati akoti meciɗek, foto miga taŋ ti ɓiri tapasl tapasl misi anga tuwa, levihey a pam taŋ sar avra tir sarete. A ɗuvaka taŋ ar ɗugur madiɗa tuwa. Mizli ngi Bet-Semeseye, angi hin nah na, a gam mikuli mizlam zlam wãˀ waɗ mikuli ngi jumoˀay, a gaka nah gar da Bumbulvuŋ.

¹⁶Angi hin nah vuna si na, buy Filistihey muzlum mupuraka slra nah na, a mam nga Ekroŋ.

¹⁷Gwat mindira muzlumoy ti ɓiri tapasl tapasl ngi bigi jiji ngi tandaw, Filistihey muvulaka taŋ da Buymisemuŋ ar deɗe ngi mikuli tuwa t'anihĩ: walahay madiɗahay gar a soko di pal pal, walahay Asdot a so di pal, Gaza pal, Askaloŋ pal, Gat pal waɗ Eskroŋ pal.

¹⁸Yo kotokom ngi ɓiri tapasl tapasl tuwa kwana, a soko taŋ weˀe weˀe avu lihey, buy Filistihey zlum micifam ar taŋ na, berne muguno hirnga taŋhaya le ti mohol, hã avu walahay manja guno hirnga taŋhaya ti moholo. Hirwuy taŋ a ndoho hã sesẽŋ avu ɗugur madiɗa ar guva ngi Yosuwa, taŋ muɗuvaka akoti ngi Buymisemuŋ anga na, hã dana kwana ɗugur tuwa, a ro ar guva ngi Yosuwa a Bet-Semes.

¹⁹Buymisemuŋ a ga bonoy da mizli ngi Bet-Semeseye asi taŋ mupuraka akoti ngi Buymisemuŋ na. A kiɗ asi taŋ mizli kukur tarnaˀ a wuzla mizli durmuk kukur zlumo. Akẽh na, mizli gar a roko ti tuwuy, asi Buymisemuŋ a ga taŋ bonoy le haɗa wãˀ.

²⁰Dar mizli Bet-Semesey a ɓam: «Bumbulvuŋ Buymisemuŋ, mipal hana, masa cici a mbuŋ naŋ gu i waka?» Yo Anja a kirih kileŋ avu ndra, na ngi hay waniy ka?

²¹Joˀ a slinam ng'avu mizli ngi Kiriyat-Yeˀarimey ɓa a ɓaka taŋ: «Filistihey a moko ti akoti ngi Buymisemuŋ le. Soko ɓa ki zuɓaka ngi hay kum.»