Read South Giziga 1SA 7 Bible Online

1SA 7 - South Giziga bible

1SA 7

¹Joˀ mizli ngi Kiryat- Yeˀarimey a soko so, a zuɓaka akoti ngi Buymisemuŋ ngi hay taŋ, dar a cam di ng'ar hay ngi Abinadap ar li miɗingir. Akẽh na, a wunaka Elazar, mangal ngi Abinadapa, ɓa a jigina akoti ngi Buymisemuŋ.

²Zle avu taŋ muɗuvaka akoti ngi Buymisemuŋ a Kiryat-Yeyarim na, hin a cuh le haɗa. A gi le vi kukur cuw si. Akẽh Israyeley a zlaka tuwuy ng'avu Buymisemuŋ, ɓa a jina taŋ.

³Dar Samuyel a ɓa mizli Israyeleye gar: «Da ki moko ng'avu Buymisemuŋ ti mevel purla na, susuyumoko kuli mulakay ati kuli Astartehey na. Ɗuvaka mevel kum ar Buymisemuŋ, yo huruk hurukam avu naŋ pal naŋ tewle, naɓa a sa luhukum tisi haŋ ngi Filistiheye.»

⁴Israyeley a ki rahaka gwat ngi huruk huruk a mbuŋ naŋ, Baˀalay ati Astartehey avra, a huruk hurukam avu Buymisemuŋ pal naŋ tewle.

⁵Akẽh na, Samuyel a ɓi: «Kusoko Israyeleye gar a Mispa, ɓa i sa tumbulo Buymisemuŋ vur kumo.»

⁶Joˀ Israyeley a kusom a Mispa. A nuwam yam, a puslaka yam a ruwuy a mbuŋ Buymisemuŋ. Tapasa a gam dalyam, yo a njikaka mungra taŋhaya a ɓam: «I gam mungra le avu Buymisemuŋ.» Samuyel a tiri buy ngi Israyeley na, a Mispa a diga.

⁷Akẽh na, Filistihey a cinaka na, Israyeley a kusom le a Mispa, joˀ buy Filistihey a bam ɓa aa kiɗaka Israyeleye. Israyeley micinaka ɓi nah na, a zluwunam le ti Filistiheye.

⁸Israyeley a ɓaka Samuyele: «Ki cifi teˀteˀ ta. Ki pula ndra ta. Til mi ng'avu Bumbulvuŋ Buymisemuŋ, ndra, ɓa a laha ndra tisi haŋ ngi Filistiheye.»

⁹Akẽh na, Samuyel a wuɗ tumuŋ masi ɗuwa aruŋ, a gi di mikuli mizlam zlam wãˀ da Buymisemuŋ. Samuyel a til mi ng'avu Buymisemuŋ vur Israyeleye, yo Buymisemuŋ a cinaŋ di le.

¹⁰Naŋ kine, ti Samuyel mira ga mikuli mizlam zlam wãˀ da Buymisemuŋ tuwa ti ge aruŋ na, Filistiheye ara ndiloko ɓa ngi kiɗa vu ati Israyeley. Amma tapas nah na, Buymisemuŋ a ndislo vuŋ ng'ar Filistiheye. A ga gigisl da soje Filistiheye, mbak Israyeley a kiɗaka taŋ.

¹¹Soje Israyeley a bam ti Mispa, a sipaka Filistiheye ti kiɗ sesẽŋ a duba Bet-Kar, a tikaka taŋ ˀay le wãˀ.

¹²Samuyel a zuɓ ɗugur waɗ a ng'akaˀ ar wala ngir Mispa ati Daŋ. A vula slimiɗ da li nah Ebeŋ-Ezer, mbiɗeˀvra ‹ɗugur mijini›, asi a ɓi na: «Buymisemuŋ mijino ndra na sesẽŋ aka.»

¹³Naŋ kine, Filistihey a hinam hirnga a ruwuy, ko a gufam gaf le ngi co ar hirwuy Israyele mata. Angi hin ngi siifa ngi Samuyel gar na, gidaŋ ngi Bumbulvuŋ naŋ da ar taŋ.

¹⁴Walahayay Filistihey muzumaka taŋ zleˀe gar na, a moko ng'asi haŋ ngi Israyeley a muŋ, zle a Ekroŋ sesẽŋ a Gat. Hirwuy ngi walahay tayna gar, Israyeley a tiɓaka taŋ tisi haŋ ngi Filistiheye ma. Waɗ ma na, Israyeley ati Amoriheye, a ndiram zuy zuy ar wala taŋ.

¹⁵Samuyel a cifi i buy ngi Israyeley, hã hin ngi siifa naŋ gar.

¹⁶Vi gar na, a cuh le ar walahay Betel, Gilgal waɗ Mispa, yo a ga kiita da Israyeley angi li tayna gar.

¹⁷Yo a mi brok le a Rama, walahay misi hay naŋ a diga. A ga kiita da Israyeley a diga, yo a ndir li gi mikuli da Buymisemuŋ a diga.