Read South Giziga 1SA 8 Bible Online

1SA 8 - South Giziga bible

1SA 8

¹Ti Samuyel migi gal na, a cifa ziri naŋhay i buyoy angi hirwuy Israyele.

²A zilaka mangal naŋ madiɗa Zoˀel, yo meciɗeke Abiya. A cifam i buyoy a Berseba.

³Amma ziri mizile ngi Samuyeley a sipaka sar ngi cine taŋ ta, asi may dala avu taŋ, gwatay masaka taŋ di ngatara na, a tiɓaka taŋ, yo taŋ anta slaka kiitakaslsla ta.

⁴Akẽh na, mizli micawwahay gar a kusom, a soko lumaka Samuyel a Rama.

⁵A ɓakaŋ na: «Samuyel, ani wurenna ki gi gal le, na ziri ɗikey na anta sipaka sar ɗike ta. Wurenna, vula ndra buy ɓa a wa ndra, kaɓa naŋ magi avu sukwi mekelemey gar na ya.»

⁶Taŋ miɓam: Vula ndra buy ɓa a wa ndra na, Samuyel a cin di ndum ta. Joˀ Samuyel a zla a dir dibiɗ da Buymisemuŋ.

⁷Buymisemuŋ a ɓa Samuyele na: «Sukwi hana, mi taŋ masa ɓukuw di gar na, cine taŋ di. Asi mike na, a hizigam di avra i ka ta, a hizigam di i yaha. Asi taŋ anta wuɗam ɓa i zum buy ar taŋ mata.

⁸Zle ti hin ya mubo taŋ ti Ezipte hã ndilo dana, gwat taŋ migikiy di, a wuɗam a gukuw di ya. Gwat taŋ migikiy di na ani: A pulikiy mbak ɓa a huruk hurukam avu gwat mekelemey ngi huruk huruk a mbuŋ taŋ.

⁹Wurenna so na, taŋ maɓukuw na, cine taŋ di. Amma sey ka taŋ mumuyuŋ zay sla ɓaˀ le a slimiɗe. Buy masa wa taŋ na, a sa zum buy ar taŋ kahana kahana na, ɓa taŋ di ɗaˀ ɗaˀ le.»

¹⁰Samuyel a sipa mingiɓi ngi Buymisemuŋ gar da mizli mucufuɗam buy ava na.

¹¹A ɓa taŋ: «Buy masa zum buy ar kum na, a sa wukum anihĩ: A sa hil mekelemey a wuzla ziri kum mizileheye ngi misi mota ngi vurum naŋhay, yo ngi misi pilis naŋhay, a sa kilam a mbuŋ mota ngi vurum naŋ.

¹²A sa hila mekelemeye, ɓa a cifam buy ngi mizli durmuk durmuk malla kukur zlum kukur zlum, numuŋhoyo, ɓa ngi huvaŋ guva, ɓa ngi gaŋ sifi ngi gwatay, ɓa ngi vuɗakaŋ gwat ngi vurumoy waɗ gwat ngi juwa mota ngi vurum naŋhay.

¹³A sa hil ziri kum mongoso mekelemeye, ɓa ngi lihiɗa urdihey, ngi di gwatay waɗ ngi di ɗafahay.

¹⁴Guva kumoy, guva ngi gudubun kumoy waɗ guva ngi tutumbur kumoy mimezleheye, a sa tiɓa taŋ avu kumo. A sa tiɓa taŋ, a sa vula taŋ da gawla naŋ madiɗahay.

¹⁵Gwat ngi migam kumoy ati gudubun kumoy gar na, a sa muɗa mukuruˀ taŋhaya, a sa vula da mizli madiɗa ngi mbuŋ naŋhay ati gawla ngi slra naŋhay.

¹⁶Migi slra kumoy, ziley ati ngwasaya, a sa hila taŋ da naŋ. Migidaŋ gidaŋ ngisi gawla kumoy, yo zungu kumoyo, a sa hila taŋ ngi gi slra naŋ.

¹⁷A sa zuɓa mukuruˀ ngi gezleŋ ngi ginew kumoyo. Ngi kiɗa mi naŋ wãˀ naŋ so na, kum vuna, kisa tiram beke naŋhay.

¹⁸Tapasa, buy kum muwunakaŋ ɓa a cifi i buy kum na, kisa tuwam di, amma Buymisemuŋ naŋ anta sa cine tuwuy kumo ta.»

¹⁹Ti nah gar na, ko Israyeley a ngumam cine mingiɓi ngi Samuyele ta. Joˀ a ɓam: «zuy, ndr'i wuɗam di i buy si.

²⁰Ɓa ndra kwana, i sa tiram kaɓa sukwi mekelemey gar na ya. Buy ndra a sa ga ndra kiita, a sa kiɓaˀ a mbuŋ vurum ndra, yo a sa kiɗ vu ar vurum ndraˀahaya.»

²¹Sukwi hana, mingiɓi naŋ gar na, Samuyel a cine le, a sipa ɓi nah da Buymisemuŋ ɓa a cinaŋ.

²²Akẽh na, Buymisemuŋ a ɓa Samuyele na: «Cina mingiɓi taŋ na, yo vula taŋ buyo.» A dirba nah, Samuyel a ɓa Israyeleye: «Anja mbur gar na, a mi ng'ar walahay naŋ.»