Read South Giziga 1SA 9 Bible Online

1SA 9 - South Giziga bible

1SA 9

¹Ti di nah, angi hirwuy Benjameŋ na, mbur Benjameŋ ada, a zilaka Kis, i mbur mugop. Kis mangal ngi Abiyel, Abiyel vuna i mangal ngi Seror, dideˀ ngi mukutur ti kutur ngi Bekora, yo dideˀ ngi popurok ngi Afiya.

²Kise naŋ da ti mangal mukuy haɗa. Angi hirwuy Israyele, ko mbur mufunaŋ ti kuy anta. Deŋ ngi vu naŋ i mezle, yo gil naŋ a pur cõht fineˀ mizli gar.

³Ngi hin mekelem ada na, zungu madiya ngi Kisey, cine ngi Sawul a zizam le. Kis a ɓa mangal naŋ Sawulo: «Zuɓ mbur purla a wuzla gawla ɗikey na, ɓa ki ram a puroko zunguhoy na.»

⁴Sawul ati gawla naŋ, a bulaka hirwuy sarmuwã Efrayim waɗ hirwuy Salisa bal bal, ko a lumam gwat ta. A bulaka hirwuy Saˀalim ma, gar ngatara na si. Yo a bulaka hirwuy Benjameŋ, ko a lumam gwat ta.

⁵Ti taŋ mindilam angi hirwuy Suf na, Sawul a ɓa gawla naŋ tuwa: «Mukum, a kum le ngi hay. Yi wa na, baha anta lik di i zungu madiya naŋhay na mata, a lik di ndra.»

⁶Gawla naŋ tuwa, a ɓaŋ: «Na, mijiviɗ ngi Bumbulvuŋ ada ar walahay hana vuna. Slimiɗ ngi mbur nah ada zil haɗa. Gwat naŋ muɓuw di le gar na, a gi kanah vuna gisiŋ. Akum ng'ava ɗagay so. Asinta, a sa biga ndra di, zuwen i zuɓam jiviɗ kini ti ka, nga luuma zunguhoy na kwani.»

⁷Sawul a mbiɗa da gawla naŋ: «Kuy, a kum nga diga. Amma, mbur nah vuna i sa rakaŋ ti mi a haŋ ska? Ani ɗaf anta ar gabal ndraˀahaya mata ma, yo mbur ngi Bumbulvuŋ ma na, ɓa ngi vulaŋ gwat ngi zum ngi jiviɗ ngi mulak na, a zlir ta takwa! Ko ndr'anta ti gwat neˀ ta mayse.»

⁸Gawla naŋ tuwa, a mbiɗaŋ di «Y'ani ti suloy pal. I sa vula da mijiviɗ ngi Bumbulvuŋ, ɓa a sa biga ndra jiviɗ ndra masa zuɓaka.»

⁹Zleˀe, angi hirwuy Israyele, da mizli ara ram nga cufuɗa Bumbulvuŋ na, mizli ar sirik taŋ a ɓam: «Soko, akum ng'avu mbur mupur.» Asi mbur mazilaka dana ‹mijiviɗ› na, a zilaka zleˀe ‹mbur mapur.›

¹⁰Sawul a ɓa gawla naŋ tuwa: «Ki ɓa le kuy, sawa akum ng'avaŋ.» Joˀ a ram ng'ar walahay, mbur mupur misi a diga tuwa so.

¹¹A jam hirnga a jiviɗe ti ziri diilihey mapoko sar tir walahay, nga nuwa yam. A cufuɗaka taŋ: «Mbur mapur na, naŋ aka kwa?»

¹²Diilihey a ɓaka taŋ: «Hĩ, naŋ neˀ a mbuŋ kum akẽh. Amma sey ki wusam vu kutum, asi a so le dana ar walahay, vur mike na, dana i hin ngi gi mikuli ngi mizli ngir walahay ar li miɗingir.

¹³Kum mindilam le ndil ar walahay si na, ɓa hã naŋ masa jiɗ tikeˀe nga zuma ɗaf ngi mikuli ar li miɗingir magam mikuli a diga na, naɓa ki lumaka le si. Vur da a so t'aruŋ na, mizli anta zlaka zuma ɗafa ta, asi mike na, sey maɗuwul mi ar ɗaf ngi mikuli i naŋ, ɓa a dirba nah, mizli mizila ti ziley a zumam ɗafa far. Wurenna a ram, asi dana, ki lumakaŋ.»

¹⁴Joˀ Sawul ati gawla naŋ a ram ng'ar walahaya so. Ti taŋ mira cam ng'ar walahaya ti ci aruŋ si na, Samuyel ara bo ani a mbuŋ taŋ, ɓa a jiɗ ng'ar li miɗingire.

¹⁵Dambalaka, dumbuŋ angi so ngi Sawul na, Buymisemuŋ a ɓa ɓi nah le ɗaˀ le da Samuyele si. A ɓaŋ le zleˀe:

¹⁶«Tiprik, kasl ti pas hana, i sa slinuw ti mbur baɗ angi hirwuy Benjameŋ, yo kisa paŋ mal a hirnga, ɓa a cifi buy ngi sukwi ɗu angi hirwuy Israyele, yo ɓa a sa laha sukwi ɗu Israyele tisi haŋ ngi Filistiheye. Asi i pura ɓi ngi mizli ɗuwoyo le, yo tuwuy taŋ a ndilo le gbaˀ avu ya.»

¹⁷Samuyel mupura Sawulo keɗ si na, Buymisemuŋ a ɓaŋ: «Mbur, ya muɓuw di tuwa, n'ani: masa wa sukwi ɗu Israyel tuwa i naŋ so.»

¹⁸Sawul a kirahawa ng'avu Samuyel a mizlingre ngi walahaya, a cufuɗaŋ: «Ambuh, bigiy hay ngi mbur mapur na takwa?»

¹⁹Samuyel a mbiɗaŋ di: «Mbur mapur na i ya vuna. Sawa, ki a mbuŋ, jiɗukum bummoˀ so ng'ar li miɗingire. I sa zumam bummo dana ati kumo. Tiprik na, i sa puluw jiviɗ ki ru, yo i sa buguw gwat masa giruw a mevel ɗike gar.

²⁰Vur ɓi ngi zungu madiya ɗikey mizizam, migam ani hin makir na, ki wulka mata, a lumaka taŋ le. Na so na, gwat mimezle gar angi hirwuy Israyel na, i ngi waka? I ngi ɗiki, yo i ngi mizli ngi hay bunukoy gar ta kwa?»

²¹Sawul a mbiɗaŋ di: «Yi mbur Benjameŋ, sukwi mimeciɗek ngi wuzla sukwi ngi Israyeley takwa? Yo ma na, muy ɗuwoy i ngi dirba wãˀ a wuzla sukwi ngi Benjameŋ takwa? Ki ɓiy ɓi misi kanah mbri mbri maka?»

²²Amma Samuyel a zuɓa Sawul ati gawla naŋ tuwa, a ci taŋ ng'ar li zuma ɗafa, a vula taŋ nga taŋ i li cifi mupuɗaw puɗaway nga taŋ a mbuŋ mizli mizilahaya, a gam le gwat ngi mizli kukur makir.

²³Samuyel a ɓa mbur midi ɗafa: «Useˀ, ya muɓuw zleˀe: ‹ɗuva taˀ mirciki› tuwa na, so di.»

²⁴Mbur midi ɗafa, ara zuɓo tuwal naŋ ati dangwal naŋ. A so di, a ɗuva taˀ a mbuŋ Sawulo. Akẽh Samuyel a ɓa Sawulo: «Muwukuw di vu da ka ar hin misenna i hana: ɗuva a mbuŋ ɗike, zumaka ati mizli ya mizilo taŋ.» Tapasa, Sawul a zumam gwat ati Samuyele bummo.

²⁵A dirba nah, a pam sar baɗ tir li miɗingire ng'ar walahaya, joˀ Samuyel a kiɗam slir ati Sawulo, taŋ a hirnga gbale.

²⁶Ngi li naŋ muwun na, Sawul ati gawla naŋ a slikiɗam cẽẽt. Hirak ti li mawuɗ a wun na, Samuyel a zila Sawulo nga hirnga gbale tuwa. A ɓaŋ: «Zuɓa jiviɗ, y'ani i ra kisuw neˀe.» Joˀ Sawul a slikiɗ a zuɓa jiviɗe le, dar Samuyel a kisaŋ, taŋ cuw taŋ ara ram.

²⁷Ti taŋ mindilam ng'ar kiɗa mi ngi walahay na, Samuyel a ɓa Sawulo: «Ɓa gawla ɗik na, ɓa a cuh a mbuŋ ndra.» Dar Samuyel a ɓaŋ ma: «Na, ka so na, cici deŋ muduba, ɓa i ɓuw ɓi ngi Buymisemuŋ.»