Read Southern Dagaare Mat 1 Bible Online

Mat 1 - Southern Dagaare bible

Mat 1

¹Yeezu, a Mɛzaaya[1] sããkommine dɔge-tu-taa yoe la ama; O da waa la Davil bie, ka Davil meŋ waa Aboraham bie.

²Aboraham dɔge la Aziki, ka Aziki dɔge Gyekɔb, ka Gyekɔb dɔge Gyuda ane o yɔɔmine.

³Ka Gyuda de Taama a dɔge Pɛrɛze ane Zɛra, ka Pɛrɛze dɔge Hɛzeron, ka Hɛzeron dɔge Aram,

⁴ka Aram dɔge Aminadab, ka Aminadab dɔge Nasɔn, ka Nasɔn dɔge Salmɔn.

⁵Ka Salmɔn de Urahabu a dɔge Boaze, ka Boaze de Urut a dɔge Obɛdi, ka Obɛdi dɔge Gyesi,

⁶ka Gyesi dɔge Naa Davil. Ka Davil de Yuriya pɔge a dɔge Solomɔn,

⁷ka Solomɔn dɔge Urehoboam, ka Urehoboam dɔge Abigya, ka Abigya dɔge Asafu,

⁸ka Asafu dɔge Gyɛhosafa, ka Gyɛhosafa dɔge Gyoram, ka Gyoram dɔge Uzaaya,

⁹ka Uzaaya dɔge Gyotam, ka Gyotam dɔge Ahazi, ka Ahazi dɔge Hɛzɛkaya,

¹⁰ka Hɛzɛkaya dɔge Manaasɛ, ka Manaasɛ dɔge Emɔse, ka Emɔse dɔge Gyozaaya,

¹¹ka Gyozaaya dɔge Gyɛkoniya ane o yɔɔmine, a saŋ na ba naŋ nyɔge ba fere gaa ne Baabilɔŋ.

¹²A ba Baabilɔŋ nyɔge fere gaabo puoriŋ, Gyɛkoniya dɔge la Salateɛl, ka Salateɛl dɔge Zɛrubabɛl,

¹³ka Zɛrubabɛl dɔge Abide, ka Abide dɔge Eliyakim, ka Eliyakim dɔge Azɔ,

¹⁴ka Azɔ dɔge Zadɔke, ka Zadɔke dɔge Akim, ka Akim dɔge Eludi,

¹⁵ka Eludi dɔge Eliyaza, ka Eliyaza dɔge Maatan, ka Maatan dɔge Gyekɔb,

¹⁶ka Gyekɔb dɔge Yuzɛb, a Mareya serɛ. A Mareya la dɔge a Yeezu, ba naŋ boɔlɔ a Mɛzaaya.

¹⁷Azuiŋ a sããkommine dɔge-tu-taa a piili Aboraham te tɔ Davil da e la pie ne anaare, a yi Davil te ta saŋ na ba naŋ da nyɔge ba fere gaa ne Baabilɔŋ teŋɛ da waa la sããkommine dɔge-tu-taa pie ne anaare. A pãã la yi ba Baabilɔŋ nyɔge fere gaabo puoriŋ a te ta a Mɛzaaya dɔgebo saŋ, da waa la sããkommine dɔge-tu-taa pie ne anaare.

¹⁸Ŋaa la ka Yeezu, a Mɛzaaya dɔgebo da tu. A saŋ na O ma Mareya ne Yuzɛb naŋ da eŋ noɔre ka ba na kuli la taa, ba da naŋ ba laŋ kpɛ sɛre kyɛ ka a Vooroŋ Soŋ e ka Mareya taa poɔ.

¹⁹A o serɛ Yuzɛb naŋ da waa nemmeŋɛ zuiŋ, o da ba boɔrɔ ka o eŋ o vi noba poɔ. Lɛ la ka o da nare ka o sɔgle bare o.

²⁰Kyɛ o naŋ da wa nare a yɛlɛ ama biŋ baare la ka a Daana maleke da wa o zie zannoo poɔ, a wa yeli ko o, “Yuzɛb, Davil bie, ta zoro dabeɛ̃ ka fo de a Mareya ka o waa fo pɔge, bonso, a poɔ o naŋ taa yi la a Vooroŋ Soŋ zie.

²¹O na dɔge la bidɔɔ ka fo pore O yuori ka Yeezu, bonso, O na faa la O noba a yi ne ba yelbebe poɔ.”

²²A yɛlɛ ama zaa da eɛɛ la ka ka a Daana yelbie O naŋ da tu a Ŋmen-yelmanna zie kyɛ yeli, na tu a tuubu:

²³“Nyɛ, bitoro[2] na taa la poɔ a dɔge bidɔɔ ka ba pore o yuori Emaawɛl,” a tɛgɛ la, “Naaŋmen be la te zie.”

²⁴A Yuzɛb naŋ da wa iri a o goɔŋ poɔ, o da e la a lɛ a Daana maleke naŋ da yeli ka o e. O da de la a Mareya ka o e o pɔge,

²⁵kyɛ o da ba baŋ o sɛŋ poɔ, kyɛ ka o te dɔge o bidɔɔ dɛndɛŋ; ka o pore O yuori Yeezu.