Read Southern Dagaare Mat 10 Bible Online

Mat 10 - Southern Dagaare bible

Mat 10

¹Lɛ la ka a Yeezu da boɔle O potuuribo pie ne bayi lantaa, a ko ba kpeɛ̃õ sefaare zu, ka ba digre a bara, kyɛ saŋna baaloŋ boorɔ zaa.

²A apostoliimine pie ne bayi na yoe la ama: a dɛndɛŋ soba la Saamon, ka o yuori kaŋ di Piita ane o yɔɔ Anduru, Gyimisi ane o yɔɔ Gyɔɔn, a Zɛbɛdii bidɔbɔ;

³Filipi ane Batolomi, Tɔmaase ane Matio naŋ da waa zuyɔɔ-derɛ, Gyimisi a Alfeo bidɔɔ ane Tadiyo;

⁴Saamon naŋ da poɔ Zɛlɔte laŋne noba poɔ ane Gyudase Ezekarɔte, a soba na naŋ da yi a Yeezu puori.

⁵Yeezu da toŋ la a pie ne bayi bama a ko ba noɔre ŋa, “Yɛ ta wa gɛrɛ a Nemboore-yobo[16] tenne. Yɛ ta gaa a Samareya noba meŋ teŋɛ kanzaa,

⁶kyɛ yɛ gaa a Izerayɛl peere naŋ bɔre na zie.

⁷Ka yɛnee wa gɛrɛ, yɛ manna a Ŋmen-yelnoore a yele, ‘A tenvelaa[17] naaloŋ peɛlɛɛ la.’

⁸Yɛ saŋna baalba, a sennɛ kuuni, a saŋna kɔnkɔnne kyɛ digre sefaare bara. N ko yɛ la a kpeɛ̃õ ŋa weɛlɛ, yɛ meŋ de saŋna ne noba weɛlɛ.

⁹Yɛ ta de libie eŋnɛ yɛ ganlɔgre poɔ.

¹⁰Yɛ ta de woore, bee kparre ayi, bee nɔɔteɛ, bee dabɔle na gu ne yɛmenne; bonso, a seŋɛɛ la ka tontonɔ zaa nyɛ o noɔre bondiraa.

¹¹Ka yɛnee wa kpɛ teŋkpoŋ bee tembile zaa poɔ, yɛ maŋ daŋ bɔ neɛ naŋ na baŋ de yɛ saanoŋ, ka yɛ kpeɛrɛ a be a te ta saŋ na yɛ naŋ na yi a teŋɛ poɔ.

¹²Ka yɛnee wa kpɛ yiri zaa poɔ, yɛ maŋ puori a yideme.

¹³Ka a yideme wa sage de yɛ saanoŋ, yɛ vɛŋ ka yɛ maaroŋ be ba zie. Kyɛ ka ba naŋ ba wa de yɛ saanoŋ, yɛ leɛ ne a yɛ maaroŋ.

¹⁴Ka neɛzaa ba wa de yɛ saanoŋ bee a sage ka o kyɛlle woŋ a yɛ yelbie, ka yɛnee wa yire a yiri bee a teŋɛ na poɔ, yɛ piŋ piŋ yɛ gbɛɛ uuruŋ bare a be.

¹⁵Yelmeŋɛ zaa ka N yele korɔ yɛ, a sɛrɛɛdiibu daare, Naaŋmen na zo la Sodom ane Gomora tenne nembaaloŋ a gaŋ a teŋɛ na poɔ ba naŋ zagre yɛ bare.”

¹⁶Yɛ nyɛ, N tonɔ yɛ la aŋa peere a eŋnɛ gboŋgboe poɔ, azuiŋ yɛ taa yɛŋ aŋa weere, kyɛ e baaloŋ aŋa ŋmama.

¹⁷Yɛ baŋ ne ba yɛlɛ, ba na taa yɛ la gaa ne sɛrediribe zie, a feɛ yɛ a ba puoruuderi pooreŋ;

¹⁸ba na taa yɛ la gaa ne a gɔbena mine ane namine zie N zuiŋ, ka a e danseɛ ko ba ane a Nemboore-yobo.

¹⁹Ka ba naŋ wa taa yɛ gaa ne sɛrediribe zie, yɛ ta wa miine lɛ yɛ naŋ na yeli, bonso, ka a saŋ wa ta, ba na wuli yɛ la lɛ yɛ naŋ na yeli;

²⁰a ba e ka yɛnee la na yeli a yɛlɛ, kyɛ a yɛ Saa Naaŋmen Vooroŋ la na tu a yɛ zie a yeli a yɛlɛ.

²¹Neɛ na maŋ de la o yɔɔ tere ka ba ko. Ka saa de o bie tere ka ba ko, ka bibiiri iri zɔɔrɔ ne ba dɔgrebɔ, a e ka ba ko ba;

²²kyɛ ka a noba zaa kyiiri yɛ a N yuori zuiŋ. Kyɛ soba na naŋ di kannyiri te ta a baaraa saŋ na nyɛ la faabo.

²³Ka ba naŋ wa dɔgrɔ yɛ teŋɛ kaŋ poɔ, yɛ zo gaa teŋyuo. Yelmeŋɛ ka N yele korɔ yɛ, yɛ koŋ baŋ kyɔle a Izerayɛl tenne zaa sɛre kyɛ ka a Nensaala Bie leɛ wa.

²⁴“Zanzanna ba ganna o wulwullo, bee ka gbaŋgbaa ganna soba naŋ so o.

²⁵A seŋɛɛ la ka zanzanna boɔrɔ ka o zanne te ta o wulwullo, ka gbaŋgbaa meŋ boɔrɔ ka o waa ŋa o daana. Ka ba naŋ pãã boɔle a yidandɔɔ Bɛlezɛbu[18], ba koŋ boɔle a yideme yofaare gaŋ a lɛ bee!”

²⁶“Azuiŋ yɛ ta zoro ba dabeɛ̃; bonso, bonzaa ba kyebe a sɔgle ka ba koŋ yuo ka o sãã. Yelsɔglaa zaa meŋ kyebe ka ba koŋ yeli ka noba baŋ.

²⁷A yɛlɛ na zaa N naŋ yele korɔ yɛ lige poɔ, yɛ yeli a kyaane poɔ. Yɛlɛ na zaa meŋ yɛ naŋ woŋ ka N waale yeli, yɛ do peere zu a te moɔle a gboligboli.

²⁸Yɛ ta zoro banaŋ naŋ na toɔ̃ iri a nensaala nyɔvore kyɛ kontoɔ̃ ko o seɛ. Kyɛ yɛ zoro onaŋ naŋ na toɔ̃ iri a nensaala nyɔvore kyɛ naŋ toɔ̃ de o seɛ meŋ eŋ dazugovũũ poɔ.

²⁹Ba ba maŋ koɔre daviime ayi pɛsewa yenaa be? Kyɛ a kanzaa koŋ baŋ kpi ka a yɛ Saa ba baŋ ne a.

³⁰Haali gba a yɛ zukɔɔloŋ zaa noɔre ka O baŋ.

³¹Azuiŋ yɛ ta zoro dabeɛ̃. Yɛ taa la tɔnɔ yaga zaa a gaŋ a daviime.”

³²“Soba na zaa naŋ sage ka o baŋ ma la neŋyaga poɔ, N meŋ na sage ka N baŋ o la N Saa naŋ be tenvelaa poɔ niŋeŋ;

³³kyɛ onaŋ soba zaa naŋ na zagre ma neŋyaga poɔ, N meŋ na zagre la o soba N Saa naŋ be tenvelaa poɔ niŋeŋ.”

³⁴Yɛ ta wa teɛrɛ ka N wa ne la maaroŋ a teŋɛzu; N ba wa ka N tere maaroŋ, kyɛ zɔɔre la ka N wa ne.

³⁵N waɛ la ka N tɔ zɔɔre eŋ bie ane o saa, a tɔ zɔɔre eŋ pɔgeyaa ane o ma, a tɔ zɔɔre eŋ naapɔge[19] ane o serɛ ma;

³⁶ka neɛ dɔndɔnne na waa o meŋɛ yideme.

³⁷Soba na zaa naŋ nɔŋ o saa bee o ma yaga a gaŋ ma, ba seŋ ne N tuubu. Soba na zaa meŋ naŋ nɔŋ o bidɔɔ bee o pɔgeyaa yaga a gaŋ ma ba seŋ ne N tuubu;

³⁸ka soba na zaa naŋ ba de o dagaraa tuo tuuro ne ma, meŋ ba seŋ ne N tuubu.

³⁹Banaŋ zaa naŋ boɔrɔ bamenne nyɔvoɛ, na kɔŋ la ba nyɔvoɛ, kyɛ banaŋ zaa meŋ naŋ kɔŋ ba nyɔvoɛ N zuiŋ, na leɛ nyɛ la ba nyɔvoɛ.

⁴⁰“Soba na zaa naŋ de yɛ saanoŋ, de ma la saanoŋ, ka soba na zaa meŋ naŋ de ma saanoŋ, de a soba na naŋ toŋ ma saanoŋ.

⁴¹Soba na zaa naŋ de Ŋmen-yelmanna saanoŋ o naŋ e Ŋmen-yelmanna zuiŋ, na nyɛ la Ŋmen-yelmanna san-yɔɔ. Soba na zaa meŋ naŋ de nemmeŋɛ saanoŋ o naŋ e nemmeŋɛ zuiŋ, na nyɛ la nemmeŋɛ san-yɔɔ.

⁴²Yelmeŋɛ ka N yele korɔ yɛ; soba na zaa naŋ na ko a bibile ŋa kanzaa kɔmmaaroŋ ka o nyu, o naŋ waa N potuuro zuiŋ, na nyɛ la o san-yɔɔ.”