Read Southern Dagaare Mat 12 Bible Online

Mat 12 - Southern Dagaare bible

Mat 12

¹A saŋ na, Yeezu da tu la kyi weɛ poɔ tɔlɔ a pɛnnoo bebiri daare. Kɔŋ da kpɛ la a O potuuribo, ka ba da piili ŋmaara a kazuri mine foɔrɔ ɔɔrɔ.

²A Faraziimine naŋ da wa nyɛ a lɛ, ba da yeli ko la a Yeezu, “Nyɛ, a fo potuuribo erɛ la yɛlɛ naŋ ba tu sori ka ba e a pɛnnoo bebiri daare.”

³Ka a Yeezu da leɛ soore ba, “Yɛ mɔɔ ba sɔre a gane poɔ a nyɛ lɛnɛɛ Davil naŋ da e a saŋ na kɔŋ naŋ da kpɛ o ne o noba be?

⁴O da kpɛ la a Naaŋmen yiri a te ɔɔ a Boroboro na ba naŋ maŋ de ko Naaŋmen, kyɛ ka o ne o noba da ba taa sori ka ba ɔɔ. A Naaŋmen bagmaale nembɛrɛ yoŋ la da taa sori ka ba ɔɔ a.

⁵Kyɛ bee yɛ ba kanne a begɛ poɔ, ka a pɛnnoo bebiri daare a Naaŋmen bagmaale nembɛrɛ naŋ be a Naaŋmen die poɔ, maŋ sãã la a pɛnnoo bebiri kyɛ ka a ba taa yelsaanaa zaa be?

⁶Maa yele korɔ yɛ, bonkaŋ naŋ gaŋ a Naaŋmen die be la kyɛ.

⁷Kyɛ ka yɛnee da baŋ a yɛlɛ ŋa tɛgɛ, ‘Nimibaaloŋ la ka N boɔrɔ, a ba e bagmaale,’ yɛ da koŋ duoro noba ane yɛlɛ ba naŋ ba sãã.

⁸Bonso, a Nensaala Bie la a pɛnnoo bebiri daana.”

⁹A Yeezu da yi la a be a te kpɛ a ba puoruudie;

¹⁰ka dɔɔ kaŋ kpaŋkpane naŋ kpi da be a be. Ba naŋ da boɔrɔ ka ba bɔ yɛlɛ dɔgle a Yeezu la so ka ba soore O, “A tu la sori ka ba saŋ neɛ a pɛnnoo bebiri daare be?”

¹¹Ka a Yeezu leɛ soore ba, “Yɛ buo la na taa o peyenaa ka o le bulee poɔ a pɛnnoo bebiri daare ka o koŋ te iri o?

¹²Kyɛ nensaala ba seɛ a peroo yaga zaa! Azuiŋ, a tu la sori ka neɛ e yelsoŋ a pɛnnoo bebiri daare.”

¹³Lɛ la ka O pãã da yeli ko a dɔɔ, “Teɛ a fo kpaŋkpane.” Ka a dɔɔ teɛ a o kpaŋkpane, ka o deɛ leɛ kpaŋkpaŋkpeɛŋaa aŋa a kaŋ na.

¹⁴Kyɛ a Faraziimine da yi te bo la lɛ ba naŋ na e te ko a Yeezu.

¹⁵A Yeezu naŋ da wa te baŋ ne a lɛ, O da bare ba la kyɛ gaa. Noba yaga da tu O la ka O da saŋ ba zaa,

¹⁶kyɛ ka O da kpãã ba ka ba ta wa vɛnɛ ka noba banna O yɛlɛ.

¹⁷A ŋaa da eɛɛ la ka ka a Ŋmen-yelmanna Azaaya yeluu na tu a tuubu:

¹⁸“A N tontonɔ N naŋ kaa-iri la ŋa, A N poyɛŋ neɛ, ona la ka N poɔ pɛle ne. N na de la N Vooroŋ Soŋ eŋ O, ka O na moɔle N sɛrɛɛdiibu naŋ tori ko a Nemboore-yobo.[22]

¹⁹O koŋ ŋmɛ nɔkpeɛne, bee a koŋ ka a yi, ka neɛzaa koŋ woŋ O kɔkɔre a sobie zu.

²⁰O koŋ baŋ neɛ kɛkɛre naŋ ŋmɛre ka o kɔɔ, bee a kpinni fentelɛ vũũ naŋ e tõõ a te ta saŋ na O naŋ na e ka mennoŋ zɔɔtoɔ̃ bonzaa.

²¹Kyɛ a O yuori poɔ la ka a Nemboore-yobo na taa teɛretɔroo.”[23]

²²Lɛ la ka ba da taa dɔɔ kaŋ sefaare naŋ be o eŋɛŋ ka o zɔŋ kyɛ e muu a wa ne a Yeezu zie ka O da saŋ o, ka a muu ŋa da toɔ̃ yele yɛlɛ kyɛ leɛ nyɛrɛ.

²³A noba zaa nɔɛ da maaɛ la ka ba soorɔ, “A Davil Bidɔɔ mɔɔ naane a ŋa be?”

²⁴Kyɛ a Faraziimine naŋ da wa woŋ a lɛ, ba da yelee la, “Bɛlezɛbu, a sefaare zaa naa la ko a neɛ ŋa soba kpeɛ̃õ ka O digre ne a sefaare bara.”

²⁵A Yeezu naŋ da baŋ a ba poteɛrɛ la ka O yeli ko ba, “Paaloŋ zaa wɛltaa naŋ be o poɔ na wɛ la. Ka teŋɛ zaa bee yiri zaa wɛltaa naŋ be koŋ baŋ are.

²⁶Ka Setaana wa digre Setaana bara, a lɛ wuli ka wɛltaa be la a Setaana naaloŋ poɔ. Wola ka o naaloŋ pãã na e are?

²⁷Ka maa digre sefaare bara ne Bɛlezɛbu kpeɛ̃õ, nembuo kpeɛ̃õ pãã la ka yɛ sefa-digribe meŋ digre ne a sefaare bara? A ŋaa zuiŋ ba na e la yɛ sɛrediribe.

²⁸Kyɛ ka a naŋ wa e Naaŋmen Vooroŋ kpeɛ̃õ ka N digre ne a sefaare bara, ka lɛ yɛ baŋ ka Naaŋmen naaloŋ wa la yɛ zie.

²⁹Kyɛ bee wola ka neɛ na toɔ̃ kpɛ gandaa die a te ŋma o boma, ka o naŋ ba daŋ leŋ a gandaa sɛre? A lɛ ka o sereŋ na toɔ̃ ŋma a yiri.

³⁰Soba na zaa naŋ ba laŋ ne ma, ba are ko ma, ka soba na naŋ ba boɔrɔ lanna N deme poɔ, ŋmeɛrɛ yaara.

³¹Azuiŋ, N yele korɔ yɛ la, yelbieri bee zone zaa noba naŋ na to Naaŋmen, na nyɛ la sudi, kyɛ zone na zaa naŋ kyaare a Vooroŋ Soŋ koŋ nyɛ sudi.

³²Soba na zaa naŋ yeli yelfaa zaa kyaare ne a Nensaala Bie, na nyɛ la sudi, kyɛ soba na zaa naŋ yeli yelfaa zaa kyaare ne a Vooroŋ Soŋ, koŋ nyɛ sudi, a o teŋɛzu nyɔvore saŋ, bee a o kũũ puoriŋ.”

³³“Ka teɛ wa veɛlɛ a o wɔmɔ maŋ veɛlɛ la, kyɛ ka a teɛ wa waa faa a wɔmɔ meŋ maŋ waa la faa, bonso, fo maŋ baŋ la teɛ a yi o wɔmɔ zie.

³⁴Yɛnee dompane boorɔ ŋa! Yɛ naŋ waa nenfaare, wola ka yɛ na toɔ̃ yeli yelsonne? Bonso, bonna naŋ be a sukyiri poɔ la ka a noɔre maŋ yele.

³⁵Nemmeŋɛ maŋ iri la bonsonne yi o nabonsonne poɔ, ka nenfaa meŋ maŋ iri bonfaare yi o nabonfaare poɔ.

³⁶Maa yele korɔ yɛ, a sɛrɛɛdiibu daare, fo na iri la noɔre a kyaare ne yelfoglo na zaa fo naŋ yeli;

³⁷bonso, a fo yelbie zie ka fo na le sɛrɛɛ poɔ bee ka fo koŋ le.”

³⁸Lɛ la ka a Naaŋmen bege wulwulibo ane a Faraziimine yeli ko a Yeezu, “Wulwullo, te na boɔrɔ la ka te nyɛ yelmannaa yi fo zie.”

³⁹Ka O leɛ yeli sɔge ba, “Yelfa-erebɛ ane noba naŋ ba zoro Naaŋmen la boɔrɔ yelmannaa ka ba nyɛ, kyɛ ba koŋ nyɛ yelmannaa zaa ka a Ŋmen-yelmanna Gyona yelmannaa naane.

⁴⁰A ŋa lɛ Gyona naŋ da be a mane zonkpoŋ na poɔ beri ata, ŋmenaa ane tensogɔ, lɛ ka a Nensaala Bie meŋ na gaŋ a bogzeɛ poɔ beri ata, ŋmenaa ane tensogɔ.

⁴¹A Ninevɛ noba na vaa-iri la a sɛrɛɛdiibu daare a ko a zenɛ noba saanaa, bonso, a Ninevɛ noba da leɛ la ba eebo a Gyona naŋ da moɔle a yelbiri ko ba. Kyɛ nyɛ, bonkaŋ naŋ gaŋ Gyona be la a kyɛ.

⁴²A sɛrɛɛdiibu daare, a Kɔmpare paaloŋ pɔgenaa ne a zenɛ noba na laŋ iri la a kuuni poɔ, ka o ko ba saanaa, bonso, o da yi la tateŋɛ wa ka o woŋ a Solomɔn yɛŋ yɛlɛ, kyɛ nyɛ, neɛ kaŋ naŋ gaŋ Solomɔn be la a kyɛ!”

⁴³“Ka sefaa wa yi neɛ eŋɛ, o maŋ yɔ yoɔrɔ la dondoli zu, a boɔrɔ pɛnnoo zie, kyɛ ka o naŋ ba wa nyɛ zie,

⁴⁴o pãã maŋ yeli la, ‘N na leɛ gaa la a yiri na poɔ N naŋ da yi na.’ Ka o naŋ wa leɛ wa nyɛ ka a zie e zaglaa, ka ba peere o, a maale o velaa,

⁴⁵o pãã maŋ leɛ gaa la, a te taa o taaba mine ayopoĩ naŋ waa faare gaŋ o meŋɛ wa ne, ka a zaa wa kpeɛrɛ be, kyɛ a neɛ ŋa yɛlɛ pãã na maaleŋ waa la faa yaga a gaŋ o koroŋ na. Lɛ meŋ ka a na waa ko a zenɛ yelfaare noba.”

⁴⁶A Yeezu naŋ da naŋ kyɛnɛ yele yɛlɛ korɔ a noba la ka O ma ne o yɔɔmine wa are yeŋ poɔ a boɔrɔ ka ba yeli yɛlɛ ko O.

⁴⁷Ka neɛ kaŋ yeli ko O, “Nyɛ, fo ma ne fo yɔɔmine are la yeŋ poɔ a boɔrɔ ka ba yeli yɛlɛ ko fo.”

⁴⁸Kyɛ ka O leɛ soore a neɛ na naŋ yeli a yɛlɛ ŋa, “Nembuo la N ma, ka aŋ mine la N yɔɔmine?”

⁴⁹O da teɛ la O nu tɔgle a O potuuribo kyɛ yeli, “N ma ane N yɔɔmine la bama!

⁵⁰Bonso, soba na zaa naŋ erɛ a N Saa naŋ be tenvelaa[24] poɔ poboɔbo la N yɔɔ ane yɔɔpuulee ane N ma.”