Read Southern Dagaare Mat 13 Bible Online

Mat 13 - Southern Dagaare bible

Mat 13

¹A bebiri na zaa daare, Yeezu da yi la a yiri poɔ a te zeŋ a mane noɔreŋ.

²Nembeɛoŋ da ŋmaagyili O la, ka O da kpɛ zeŋ gbori poɔ, kyɛ ka a noba zaa are a mane noɔreŋ.

³O da lɔɔ la sekpɔgɔ a yeli yɛlɛ yaga ko ba, a yele, “Yɛ kyɛllɛ! Boreborɔ kaŋ la da yi ka o te bore o weɛ.

⁴O naŋ da borɔ, a bombie mine da le la sobiri zu ka nuuli wa de di.

⁵Ka a bombie mine le pikubo zu, a be da ba taa tɛne yaga, ka a da buli wieouŋ zaa, a tɛne naŋ da ba e zuluŋ zuiŋ.

⁶Kyɛ ŋmenaa naŋ da wa do, a bombulo da zoɔlɛɛ la, a ko, a naŋ da ba taa nyaga zuiŋ.

⁷A bombie mine da le la goore poɔ, ka a goore baa fogle a.

⁸A bombie mine meŋ da le la tɛnnoɔ poɔ, a maale velaa. Ka a bonzuri mine eŋ bie kɔɔ, amine lezaata, amine lezare ne pie.

⁹Vɛŋ ka soba na zaa naŋ taa tobo kyɛlle woŋ!”

¹⁰Lɛ la ka a potuuribo wa soore O, “Bonso ka fo lɔɔrɔ sekpɔgɔ korɔ a noba?”

¹¹Ka O yeli sɔge, “Yɛnee, ba ko yɛ la a bammo ka yɛ na baŋ a tenvelaa[25] naaloŋ yelsɔglɔ, kyɛ ba ba ko bana eŋ.

¹²Banaŋ zaa naŋ taa, ba na ko ba la bon-yaga poɔ, ka ba taa ka a gore ba. Kyɛ banaŋ naŋ ba taa bonzaa, haali gba bon ba naŋ taa, ba na de a la yi ba zie.

¹³Bon naŋ so ka N yele a yɛlɛ ne sekpɔgɔ korɔ ba la, ‘ba kaara la, kyɛ ba nyɛrɛ, a wono kyɛ ba kyɛllɛ, bee a baŋ a tɛgɛ.’

¹⁴A ba zie la ka a Ŋmen-yelmanna Azaaya yelbie na sereŋ tu a tuubu, a seŋ o naŋ yeli: ‘Yɛ sereŋ na kyɛllɛ la, kyɛ daŋ koŋ baŋ a tɛgɛ, yɛ sereŋ na kaara la, kyɛ daŋ koŋ nyɛ.

¹⁵A noba ŋa sukyie darɛɛ la, ka ba tobo e kpeɛne a ba wono yɛlɛ, ka ba ũũ ba nimie; ka ka ba na ta kaa ne ba nimie, a woŋ ne ba tobo, a baŋ a tɛgɛ ne ba sukyie kyɛ leɛ ba eebo, ka N na saŋ ba.’ ”

¹⁶Kyɛ yɛ nimie ane yɛ tobo nyɛ la maaloo, bonso, yɛ nimie nyɛrɛ la, ka yɛ tobo meŋ wono.

¹⁷Yelmeŋɛ ka N yele korɔ yɛ, Ŋmen-yelmanneba yaga ane nemmenne yaga da boɔrɔ la ka ba nyɛ bon yɛ naŋ nyɛrɛ kyɛ ba nyɛ a, a da boɔrɔ ka ba woŋ a yɛlɛ ama yɛ naŋ wono, kyɛ ba woŋ a.

¹⁸“Yɛ pãã woŋ a boreborɔ sekpɔgre tɛgɛ.

¹⁹A bombie anaŋ ba naŋ da bore a sori zu la neɛzaa naŋ woŋ a naaloŋ yelbiri kyɛ ba baŋ a tɛgɛ, a sebɛlbɛllɛ maŋ wa zeɛ la a bonna ba naŋ bore o sukyiri poɔ gaa ne.

²⁰A anaŋ ba naŋ bore a pikubo poɔ, la soba na naŋ woŋ a yelbiri a de o wieouŋ zaa ane kyelloo;

²¹kyɛ a soba ŋa tɔ ba taa nyaga, o maŋ taa la kannyiri belaa lɛ, kyɛ ka yelwonaa bee dɔgroŋ kaŋ wa kpɛ o a Naaŋmen yelbiri zuiŋ, o yeldeebo maŋ le la wieouŋ zaa.

²²A bombie na ba naŋ da bore goore poɔ, la soba na naŋ woŋ a yelbiri, kyɛ ka a teŋɛzu yeltarre ane bombɔ nɔmmo maŋ fogle a yelbiri taa ka o koŋ wɔŋ bonzaa.

²³Kyɛ a anaŋ ba naŋ bore tɛnnoɔ poɔ, la a soba na naŋ woŋ a yelbiri a baŋ o tɛgɛ, a sereŋ wɔŋ a eŋ bie, amine bie kɔɔ, amine lezaata, amine lezare ne pie.”

²⁴A Yeezu da la lɔɔ la sekpɔgre kaŋ ko ba, a yeli, “A tenvelaa naaloŋ waa seŋ ŋa, koɔraa kaŋ naŋ bore bombi-sonne o weɛ poɔ;

²⁵kyɛ saŋ na neɛzaa naŋ wa te gbiri, a dɔndɔmɔ da wa bore la narse eŋ a kyi poɔ kyɛ gaa.

²⁶A bombulo naŋ wa baa, a dɔge eŋ bie, a narse meŋ pãã da sããɛ la.

²⁷Ka a koɔraa tontonema wa soore o, ‘Daana, bombi-sonne yoŋ naane ka fo da bore a weɛ poɔ be? Ka yeŋ pãã ka a narse ŋa meŋ yi a kyi poɔ?’

²⁸Ka o yeli sɔge, ‘A dɔndɔmɔ la e a lɛ.’ Ka a tontonema soore o, ‘Fo na boɔrɔ la ka te gaa te vɔ a narse bare be?’

²⁹Kyɛ ka o leɛ yeli sɔge ba, ‘Ai! Bonso, ka yɛnee voɔrɔ a narse, yɛ na erɛ la wa laŋ vɔ ne a kyi meŋ.

³⁰Yɛ vɛŋ ka a zaa laŋ baara te ta a kyi kyeɛbo saŋ. A kyi kyeɛbo saŋ, N na yeli la a kakyeɛrebɛ; Yɛ daŋ vɔ a narse leŋ lantaa a nyege. Kyɛ pãã kyɛ a kyi a eŋ n bugo poɔ.’ ”

³¹A Yeezu da la lɔɔ la sekpɔgre kaŋ ko ba, “A tenvelaa naaloŋ waa seŋ ŋa tobiri neɛ kaŋ naŋ de bore o weɛ poɔ;

³²a tobiri sereŋ waa la a teere zaa poɔ bombi-bile, kyɛ ka o naŋ wa te baa baare o maŋ waa la kpoŋ gaŋ a teere zaa, a leɛ teɛ ka nuuli maŋ wa wuo a kyogri o ulli[26] zu.”

³³O da la lɔɔ la sekpɔgre kaŋ ko ba, “A tenvelaa naaloŋ waa seŋ ŋa pɔge kaŋ naŋ de dããbelɛ eŋ zɔŋ ŋmannɔɛ ata poɔ, ka a iri pi a zaa.”

³⁴A Yeezu da yeli la a yɛlɛ ama zaa ko a nembeɛoŋ ne sekpɔgɔ. O da ba yeli yelzaa ko ba ka sekpɔgɔ yoŋ naane.

³⁵A ŋaa da eɛɛ la ka ka a Ŋmen-yelmanna yeluu na tu a tuubu: “N na haa la N noɔre a lɔɔ sekpɔgɔ; N na manne la a yelsɔglɔ zaa, a yi a tendaa piiluu saŋ a ko ba.”

³⁶Lɛ la ka a Yeezu da bare a nembeɛoŋ kyɛ iri kpɛ die. A O potuuribo da wa la O zie a wa yele, “Iri a weɛ narse sekpɔgre pare ko te.”

³⁷Ka a Yeezu yeli sɔge, “A neɛ na naŋ bore a bombi-sonne la a Nensaala Bie;

³⁸a weɛ la a andonɛɛ, ka a bombi-sonne meŋ waa a naaloŋ biiri, ka a narse meŋ waa Setaana biiri.

³⁹A dɔndɔmɔ na naŋ bore a narse la a sebɛlbɛllɛ. A boma kyeɛbo saŋ la a teŋɛ baaroo, ka a kakyeɛrebɛ e a malekere.

⁴⁰Aŋa lɛ ba naŋ vɔ a narse leŋ lantaa a nyege vũũ na, lɛ ka a na waa a teŋɛ baaroo saŋ.

⁴¹A Nensaala Bie na toŋ la O malekere ka ba wa gbaale banaŋ zaa naŋ erɛ ka noba erɛ yelbebe ane yelbe-erebɛ zaa yi ne a O naaloŋ poɔ,

⁴²ka ba de ba lɔɔ eŋ vũũ kpoŋ poɔ, zie na ba naŋ na kono kyɛ nyerɛ nyemɛ.

⁴³A lɛ la ka a nemmenne pãã na nyegrɛ aŋa ŋmenaa a ba Saa naaloŋ poɔ. Vɛŋ ka soba na zaa naŋ taa tobo kyɛlle woŋ.”

⁴⁴“A tenvelaa naaloŋ waa seŋ ŋa nabontegroŋ kaŋ ba naŋ sɔgle weɛ poɔ, ka neɛ kaŋ nyɛ o, a de maaleŋ sɔgle, kyɛ ka o poɔ pɛle yaga, ka o leɛ gaa te koɔre o boma zaa a wa da ne a weɛ.

⁴⁵“Laboriŋ, a tenvelaa naaloŋ waa ŋa yɛreyɛrɛ naŋ boɔrɔ salema;

⁴⁶o naŋ wa te nyɛ kaŋ daaroŋ naŋ ba wono, ka o gaa te koɔre o boma zaa a wa da ne.

⁴⁷“Lamaaleŋ, a tenvelaa naaloŋ waa ŋa zonkyogi ba naŋ de lɔɔ eŋ mane poɔ, a nyɔge zomparɛɛ parɛɛ zaa.

⁴⁸A zonkyogi naŋ da wa paale, ka a zonnyɔgrebɔ tage yi ne dondoli, a te zeŋ teŋɛ kyɛ tuuri a bonveɛle eŋ peɛ poɔ, kyɛ de a bonfaare lɔɔ bare.

⁴⁹Lɛ ka a na waa a andonɛɛ baaroo saŋ. A malekere na wa wɛle la a nenfaare yi a nemmenne poɔ,

⁵⁰a de ba lɔɔ eŋ vũũ kpoŋ poɔ, zie na ba naŋ na kono kyɛ nyerɛ nyemɛ.

⁵¹“Yɛ baŋ la a yɛlɛ ama zaa tɛgɛ be?” Ka ba yeli sɔge, “Õõ.”

⁵²Ka O yeli ko ba, “A lɛ zuiŋ, a bege wulwullo zaa ba naŋ wuli a tenvelaa naaloŋ yɛlɛ, waa seŋ ŋa yidandɔɔ naŋ yage bompaala ane bonkorɔ yi ne o naboma poɔ.”

⁵³A Yeezu naŋ da wa lɔɔ a sekpɔgɔ ama baare, O da yi la a be gaa.

⁵⁴A Yeezu da leɛ wa la O meŋɛ teŋɛ poɔ a wa piili wullo a noba ba puoruuderi pooreŋ. A noba zaa nɔɛ da maaɛ la ka ba yele, “Yeŋ ka a dɔɔ ŋa nyɛ a yɛŋ ŋa tɔ, ane a toŋkpeɛne ama?

⁵⁵A kapenta bidɔɔ mɔɔ naane a ŋa be? O ma naane ka ba boɔlɔ Mareya? O yɔɔmine naane Gyimisi, Yuzɛb, Saamon ane Gyudase be?

⁵⁶Te ne a O yɔɔpuuli zaa naane be a kyɛ be? Ka yeŋ pãã la ka a dɔɔ ŋa nyɛ a ama zaa?”

⁵⁷Ka ba poore da sãã ne O. Kyɛ ka a Yeezu yeli ko ba, “Ŋmen-yelmanneba daŋ ba nyɛ yuori bamenne tenne ane ba yie poore, ka teŋyobo poore naane.”

⁵⁸A Yeezu da ba toŋ toŋkpeɛne yaga a be, ba naŋ da ba taa yeldeebo zuiŋ.