Read Southern Dagaare Mat 16 Bible Online

Mat 16 - Southern Dagaare bible

Mat 16

¹A Faraziimine ane a Sadusiimine da wa la a Yeezu zie, ba naŋ da boɔrɔ ka ba e o nyɛ la so ka ba da yeli ka O e yelmannaa naŋ yi tenvelaa[28] wuli ba.

²Ka O yeli sɔge ba, “Zimaane saŋ, yɛ maŋ yeli la, ‘A zie na soma la, bonso, a saluoni moɔɛ la.’

³Ka baguo saŋ meŋ, ka yɛ yeli, ‘Sakpoŋ na wa la, bonso, a saluoni mɔrɔ la.’ Yɛ baŋ la lɛ yɛ naŋ maŋ toɔ̃ kaa a saluoni a baŋ bon naŋ na e, kyɛ pãã kontoɔ̃ kaa a baŋ a bebie ŋa yelwulii.

⁴A zenɛ noba yelbe-erebɛ ane noba naŋ ba zoro Naaŋmen la boɔrɔ yelmannaa ka ba nyɛ, kyɛ ba koŋ nyɛ yelmannaa zaa, ka a Gyona yelmannaa naane.” Lɛ la ka O da bare ba kyɛ gaa.

⁵A potuuribo naŋ da wa ta a mane konkoori na kaŋ, ba da innee la ka ba de boroboro.

⁶Yeezu da yeli ko ba la, “Yɛ gu yɛmenne velaa a baŋ ne a Faraziimine ane a Sadusiimine gagarre yɛlɛ.”

⁷Ka a potuuribo da leɛ yeli ko taa, “Te naŋ ba taa boroboro la so ka o yeli a ŋaa.”

⁸Kyɛ a Yeezu naŋ da baŋ bonna ba naŋ yele la ka O yeli, “Yɛnee yelde-fẽẽ deme, bonso ka yɛ yele yɛ naŋ ba taa boroboro yɛlɛ?

⁹Yɛ naŋ ba baŋ a tɛgɛ be? Yɛ ba teɛre a boroboro anuu N naŋ da de ko a noba turi anuu, ane pɛre awola yɛ naŋ da wuo a boŋkpaa ka a pa?

¹⁰Bee a boroboro ayopoĩ N naŋ da de ko noba turi anaare, pɛre awola la ka yɛ da wuo?

¹¹Bonso ka yɛ ba toɔ̃ baŋ ka boroboro yɛlɛnaane ka N yele? Yɛ gu yɛmenne a Faraziimine ane a Sadusiimine gagarre yɛlɛ!”

¹²Lɛ la ka ba pãã da baŋ ka a Yeezu da ba yeli ko ba ka ba baŋ ne a boroboro dããbelɛ yɛlɛ, kyɛ ba guuro bamenne velaa a yi a Faraziimine ane a Sadusiimine wuluu.

¹³A Yeezu naŋ da wa te kpɛ Sezaareya Filipae teŋɛ paaloŋ, O da soore la a O potuuribo, “A noba yeli ka nembuo la a Nensaala Bie?”

¹⁴Ka ba yeli, “Ba mine yeli ka Gyɔɔn Bati la, ka ba mine ka fo waa la Elaagya, ka ba mine meŋ naŋ yeli ka fo waa la Gyɛremaaya, bee a Ŋmen-yelmanneba na kaŋ.”

¹⁵Ka a Yeezu leɛ soore ba, “Kyɛ yɛ meŋ yeli ka nembuo la ma?”

¹⁶Ka Saamon Piita yeli sɔge, “Fõõ la a Mɛzaaya,[29] a Naaŋmen-vore Bidɔɔ.”

¹⁷Ka Yeezu yeli ko o, “Fo nyɛ la maaloo, Saamon, Gyona bidɔɔ! Bonso, eŋgane ane zẽẽ naane wuli fo a yeli ŋa tɛgɛ, kyɛ N Saa naŋ be tenvelaa poɔ la wuli fo.

¹⁸Maa yele korɔ fo, fõõ la Piita,[30] kyɛ a piiri ŋa zu la ka N na mɛ a N puoruu laŋne, ka Dazugovũũ kpeɛ̃õ zaa kontoɔ̃ o.

¹⁹N na ko fo la a tenvelaa naaloŋ safobie, bonna zaa fo naŋ na leŋ a teŋɛzu kyɛ, ba na leŋ o la a tenvelaa poɔ, bonzaa meŋ fo naŋ na lori a teŋɛzu kyɛ ba na lori o la a tenvelaa poɔ.”

²⁰A Yeezu pãã da kpãã la a potuuribo ka ba ta wa yele korɔ neɛzaa ka Ona la a Mɛzaaya.

²¹A yi a lɛ saŋ gɛrɛ, Yeezu da piili yele la weliweli korɔ a O potuuribo, ka feroo la ka O gaa Gyɛruzɛlɛm, a te nyɛ dɔgɛɛ yaga a nembɛrɛ ane a Naaŋmen bagmaalkare ane a Naaŋmen bege wulwulibo nuuri poɔ, ka ba ko O, kyɛ a beri ata daare ka O leɛ-iri yi a kũũ poɔ.

²²Lɛ la ka Piita boɔle a Yeezu tage yi ne a noba poɔ a te nyare O zu a yele, “Daana! Naaŋmen ta sage ka a e a lɛ. Ka a yeli ŋa daŋ ta pɔge fo zaa.”

²³Ka a Yeezu leɛ yeli ko a Piita, “Tage yi be N zie, Setaana! Fo waa la begraa N zie, bonso, fo ba de fo teɛroŋ eŋ Naaŋmen boma eŋɛ, kyɛ fo de eŋ la nensaala boma eŋɛ.”

²⁴Lɛ la ka a Yeezu da yeli ko a O potuuribo, “Ka neɛzaa wa boɔrɔ ka o tuuro ma, o daŋ zagre o meŋɛ yɛlɛ bare, kyɛ de o dagaraa tuo tuuro ne ma.

²⁵Bonso, banaŋ zaa naŋ boɔrɔ ka ba faa ba nyɔvoɛ na wɛ la. Kyɛ banaŋ zaa meŋ naŋ sage ka ba kɔŋ ba nyɔvoɛ N zuiŋ, ba na nyɛ la ba nyɔvoɛ.

²⁶Boŋ tɔnɔ ka ba na nyɛ ka ba naŋ so a tendaa zaa kyɛ ba taa nyɔvore? Bee boŋ ka ba na toɔ̃ de tɛgɛ ne ba nyɔvoɛ?”

²⁷“A Nensaala Bie ne O malekere na wa la a O Saa veɛloŋ poɔ. A pãã wa ko neɛzaa san-yɔɔ a seŋ lɛ o naŋ toŋ.

²⁸Yelmeŋɛ ka N yele korɔ yɛ, yɛ mine be la kyɛ a naŋ koŋ kpi sɛre, kyɛ nyɛ a Nensaala Bie ka O waana ne O naaloŋ.”