Read Southern Dagaare Mat 17 Bible Online

Mat 17 - Southern Dagaare bible

Mat 17

¹A beri ayoɔbo puoriŋ, Yeezu da taa la Piita, Gyimisi ane o yɔɔ Gyɔɔn, a do ne taŋ wogi kaŋ zu ba yoŋ tɛgɛ.

²A Yeezu da kyilli la O meŋɛ ba niŋesogɔ, ka O niŋe nyegrɛ aŋa ŋmenaa, kyɛ ka O bonsuuri pɛle a zaa parepare lɛ.

³Tɔntɔbaalɛ, ka Moozul ane Elaagya deɛ daa sãã, ka ba ne O yele yɛlɛ.

⁴Lɛ la ka Piita yeli ko a Yeezu, “Daana, a soma la ka te be a kyɛ. Ka fõõ wa boɔrɔ, N na ti la segre ata, ka fo so kaŋ, ka Moozul so kaŋ, ka Elaagya meŋ so kaŋ.”

⁵Piita naŋ da naŋ yele a yɛlɛ, a daadaalɛ la ka zunzug-pelaa deɛ wa pilli pɔge ba, kyɛ ka kɔkɔre yele yɛlɛ a zunzugri poɔ, “A N Bidɔɔ la a ŋa, N Poyɛŋ Bie; N poɔ pɛle ne O la; yɛ kyɛllɛ O yɛlɛ!”

⁶A potuuribo naŋ da wa woŋ a yɛlɛ ama, dabeɛ̃ da kpɛ ba la yaga, ka ba le vɔgle teŋɛ.

⁷Ka a Yeezu wa seene ba, a yele, “Yɛ iri, yɛ ta zoro dabeɛ̃.”

⁸Ba naŋ da wa gbole kaa, ba ba la nyɛ neɛzaa ka a Yeezu yoŋ naane.

⁹Ba naŋ da wa yi a taŋzu sigre, a Yeezu da kpãã ba la, “Yɛ ta wa manna a nyaabo ŋa yɛ naŋ nyɛ korɔ neɛzaa, kyɛ te ta lɛ saŋ a Nensaala Bie naŋ na leɛ-iri yi a kũũ poɔ.”

¹⁰Ka a potuuribo soore O, “Ka boŋ pãã la so ka a Naaŋmen bege wulwulibo yeli ka feroo la ka Elaagya daŋ de weɛ wa sɛre?”

¹¹Ka O leɛ yeli, “Elaagya sereŋ waana la, a na wa leɛ maale boma zaa eŋ ka a waa lɛ a naŋ seŋ ka a waa.

¹²Kyɛ N yele korɔ yɛ la ka a Elaagya daŋ de la weɛ wa, kyɛ ka a noba ba baŋ o, a e o lɛ ba naŋ boɔrɔ. A lɛ meŋ la ka a Nensaala Bie na nyɛ dɔgɛɛ a ba nuuriŋ.”

¹³Lɛ la ka a potuuribo pãã da baŋ ka Gyɔɔn Bati yɛlɛ la ka O da yele korɔ ba.

¹⁴Ba naŋ da wa ta a neŋyaga zie, dɔɔ kaŋ da wa la a Yeezu zie, a wa le gbi dumo O niŋesogɔ,

¹⁵kyɛ yeli, “Daana, zo n bidɔɔ nembaaloŋ, o lere la kunkunni, a nyɛrɛ woore yaga. Gbɛɛ yaga ka a naŋ wa iri o, a maŋ zeɛ o la lɔɔ eŋ vũũ bee koɔ̃ poɔ.

¹⁶N taa o la wa ko a fo potuuribo, kyɛ ba ba toɔ̃ saŋ o.”

¹⁷Ka a Yeezu leɛ yeli, “Yɛnee noba naŋ ba taa yeldeebo, ane noba naŋ tuli a ba derɛ Naaŋmen yɛlɛ. N na be la yɛ zie kɔɔre seŋ wola? N na di la kannyiri ne yɛ te ta boŋ saŋ? Yɛ taa a bie wa ko ma.”

¹⁸Ka a Yeezu tanne a sefaa, ka o da wa yi a bie eŋɛ kyɛ ka o nyɛ o sammo daadaalɛ.

¹⁹Lɛ la ka a potuuribo da wa soore a Yeezu ba yoŋ zie, “Bonso ka tenee da ba toɔ̃ digi a sefaa ka o yi a bie eŋɛ?”

²⁰Ka O yeli ko ba, “A yɛ yeldeebo naŋ ba seŋ bon la so a lɛ. Yelmeŋɛ ka N yele korɔ yɛ, ka yɛnee taa yeldeebo ka o waa bile a seŋ tɔɔbiri, yɛ na toɔ̃ yeli ko la taŋ ŋa, ‘Sɛre yi a kyɛ a gaa kyɛ,’ ka o gaa. Yelzaa koŋ zuo yɛ faŋ.”

²¹[Kyɛ a sefaa ŋa tɔ koŋ baŋ yi, ka puoruu ane nɔleŋ naane.]

²²Ba naŋ da wa laŋna taa Galili poɔ, a Yeezu da yeli ko ba la, “Ba na de la a Nensaala Bie eŋ nensaalba nuuriŋ,

²³ka ba ko O, kyɛ a beri ata daare O na leɛ-iri yi la a kũũ poɔ.” Ka ba poore da sãã yaga zaa.

²⁴Ba naŋ da wa ta Kapanum, a Naaŋmen die zuyɔɔ-derebɛ da wa la Piita zie, a wa soore o, “A yɛ Wulwullo ba maŋ yɔɔ a Naaŋmen die zuyɔɔ be?”

²⁵Ka o yeli, “O maŋ yɔɔ la.” Kyɛ O naŋ da wa ta yiri, a Yeezu da daŋ soore la Piita a yɛlɛ, “Saamon, Wola ka fo teɛre? Aŋ mine zie la ka a teŋɛzu namine maŋ de zuyɔɔ? Bamenne biiri zie bee saama zie la?”

²⁶A Piita naŋ da wa yeli, “Saama zie la,” ka a Yeezu yeli ko o, “Lɛ eŋ a ba fere ka a biiri yɔɔ wɛ.”

²⁷Kyɛ ka te ta wa sãã ba poɔ zuiŋ, iri sigi a mane a te lɔɔ zompii, zoma na zaa fo naŋ wa daŋ nyɔge, ka fõõ wa yuo o noɔre fo na nyɛ la warbiri, iri wa ko ba, ka a e fõõ ne maa zuyɔɔ.