Read Southern Dagaare Mat 19 Bible Online

Mat 19 - Southern Dagaare bible

Mat 19

¹A Yeezu naŋ da wa yeli a yɛlɛ ama baare, O da yi la a Galili teŋɛ a gaa te kpɛ Gyudiya paaloŋ, a te gaŋ a Gyɔɔdan do gaa.

²Nembeɛoŋ da yi tuuro o la, ka O da saŋ ba a be.

³A Faraziimine da wa la O zie, kyɛ ba naŋ da boɔrɔ ka ba e O a nyɛ la, ka ba da soore O, “A tu la sori ka dɔɔ bare o pɔge yelzaa zuiŋ be?”

⁴Ka o yeli sɔge, “Yɛ mɔɔ ba kanne ka a soba na naŋ iri ba a piiluu saŋ, ‘iri ba la dɔɔ ne pɔge,’

⁵kyɛ yeli, ‘A ŋaa zuiŋ, dɔɔ na bare la o saa ne o ma, kyɛ te laŋ ne o pɔge, ka ba bayi leɛ eŋgan-yeni.’?

⁶Azuiŋ ba ba la e noba bayi, ba e la eŋgan-yeni. A lɛ zuiŋ, bonna Naaŋmen naŋ wa lantaa, nensaala zaa ba taa sori ka o wɛle a taa.”

⁷Ka a Faraziimine la soore O, “Ka wola pãã la so ka Moozul da tere sori ka ka dɔɔ wa boɔrɔ ka o bare o pɔge, ka o ko o pɔg-bare gane kyɛ bare o?”

⁸Ka a Yeezu yeli ko ba, “A yɛ sukyie naŋ dare zuiŋ la so ka a Moozul da tere sori ka yɛ bara yɛ pɔgeba. Kyɛ a da ba waa lɛ a piiluu saŋ.

⁹Kyɛ maa yele korɔ yɛ, ka neɛzaa wa bare o pɔge, ka moɔrɔ zuiŋ naane, kyɛ la de pɔge yuo, o soba toŋ la moɔrɔ toma.”

¹⁰Ka a O potuuribo yeli ko O, “Ka a naŋ waa ŋaa dɔɔ ne o pɔge zie, ka neɛ vɛŋ pɔge deebo a naŋ seɛ.”

¹¹Ka O yeli ko ba, “Neɛzaa naane na baŋ sage a wuluu ŋa, ka banaŋ yoŋ Naaŋmen naŋ ko a wuluu ŋa deebo faŋ naane.

¹²A noba mine waa la nenvarre a yi ba dɔgebo saŋ, ka ba mine meŋ waa nenvarre ba nensaaltaaba naŋ vare, ka ba mine meŋ waa nenvarre a tenvelaa[32] naaloŋ yɛlɛ zuiŋ. Vɛŋ ka neɛ naŋ na toɔ̃ tu a yeli ŋa sage de a lɛ.”

¹³Lɛ la ka noba da taa bibiiri waana ne a Yeezu zie ka O na de O nuuri pare ba zuri kyɛ puori ko ba. A O potuuribo da mii la a noba na naŋ da taa a bibiiri wa ne zu.

¹⁴Ka a Yeezu yeli, “Yɛ bare a bibiiri ka ba wa N zie, yɛ ta pigi ba sori; bonso, a bama taaba la so a tenvelaa naaloŋ.”

¹⁵Kyɛ da de O nuuri pare ba zuri, a kyɛ la tu O sori gɛrɛ.

¹⁶Lɛ la ka neɛ kaŋ da wa a Yeezu zie a wa yeli, “Wulwullo, boŋ tonsoŋ la ka N na toŋ a taa nyɔvore naŋ ba taa baaroo?”

¹⁷Ka O yeli ko o, “Bonso ka fo soorɔ ma bon naŋ e soŋ yɛlɛ? Neŋyeni kaŋ yoŋ la bebe a e soŋ. Ka fõõ wa boɔrɔ ka fo kpɛ nyɔvore poɔ, tuuro a Naaŋmen nɔɛ.”

¹⁸Ka a pɔlbile soore O, “A Naaŋmen nɔɛ abobo?” Ka Yeezu yeli, “Ta ko neɛ, ta toŋ moɔrɔ toma, ta zuuro, ta dire danse-zirii;

¹⁹eŋnɛ fo saa ne fo ma, kyɛ nɔŋ fo tɔ seŋ fo naŋ nɔŋ fo meŋɛ lɛ.”

²⁰Ka a pɔlbile yeli ko O, “N tu la a nɔɛ ama zaa; boŋ la kyɛre ka N na e?”

²¹Ka Yeezu yeli ko o, “Ka fõõ wa boɔrɔ ka fo maaleŋ e soŋ yaga, gaa te koɔre fo boma zaa a de a libie ko nembaalba, kyɛ wa tuuro ma, fo pãã na taa la bondaaboma tenvelaa poɔ.”

²²A pɔlbile naŋ wa woŋ a yelbiri ŋa, o da leɛ gaa ne la posaanaa, bonso, o da taa la boma yaga.

²³Lɛ la ka a Yeezu da yeli ko O potuuribo, “Yelmeŋɛ ka N yele korɔ yɛ, a na waa la tuo yaga ko bondaana ka o kpɛ a tenvelaa naaloŋ poɔ.

²⁴Ka N la yeli ko yɛ: A e la mɔlɔ ka bontaŋ tu fumini[33] voɔre yi, a gaŋ bondaana naŋ na kpɛ a Naaŋmen naaloŋ.”

²⁵A potuuribo naŋ da woŋ a yɛlɛ ama, ba nɔɛ da maaɛ la yaga, ka ba yeli, “Ka lɛ, aŋ la na baŋ nyɛ faabo?”

²⁶Ka Yeezu leɛ kaa ba kyɛ yeli, “Nensaala eŋ zie a yɛlɛ ama waa la kpeɛŋaa, kyɛ Naaŋmen zie yelzaa na baŋ nyɛ la eebo.”

²⁷Lɛ la ka Piita leɛ yeli sɔge, “Nyɛ, te bare la bonzaa kyɛ wa tuuro fo. Boŋ ka te na nyɛ?”

²⁸Ka Yeezu yeli ko ba, “Yelmeŋɛ ka N yele korɔ yɛ, a saŋ na a boma zaa naŋ na leɛ e paala, ka a Nensaala Bie zeŋ o puubu nakogi zu, yɛ meŋ na zeŋ la nakogri pie ne ayi zu a dire a Izerayɛl boorɔ pie ne bayi na sɛrɛɛ.

²⁹Kyɛ neɛzaa naŋ bare o yie, bee o yɔɔmine, bee o yɔɔpuuli, bee o saa, bee o ma, bee bibiiri, bee wɛre, N yuori zuiŋ, a soba na nyɛ a la a dɔgle gbɛɛ kɔɔ kyɛ la nyɛ nyɔvore naŋ ba taa baaroo meŋ poɔ.

³⁰Kyɛ noba yaga naŋ de weɛ na leɛ la puori deme, kyɛ ka a puori deme leɛ danweɛ deme.”