Read Southern Dagaare Mat 21 Bible Online

Mat 21 - Southern Dagaare bible

Mat 21

¹Ba naŋ da wa te peɛle Gyɛruzɛlɛm, kyɛ ta Bɛtefage naŋ be a Oliva Taŋ seɛ, Yeezu da toŋ la a O potuuribo bayi,

²a yeli ko ba, “Yɛ gaa a tembile na naŋ be yɛ niŋesogɔ, tɔntɔbaalɛ yɛ na nyɛ la boŋɔ kaŋ ane o bile naŋ leŋ are, yɛ lori a taa wa ko ma.

³Ka neɛzaa wa soorɔ yɛ, yɛ deɛ yeli ŋaa, ‘A Daana la boɔrɔ a.’ A soba na bare a la ka yɛ taa wa ko ma wieouŋ lɛ.”

⁴A ŋaa da eɛɛ la ka a na tu lɛ a Ŋmen-yelmanna naŋ da yeli:

⁵“Yeli ko a Zaayɔn pɔgeyaa, Nyɛ, a fo naa waana la fo zie, a sigri O meŋɛ, a zɔŋ boŋɔ, ane boŋlee, ka a ma waa boŋ-nyaŋaa.”

⁶A potuuribo da gaa te e la lɛ a Yeezu naŋ da yeli ko ba.

⁷Ba da taa la a boŋ-ma ane o bile wa ne, a wa yɛre ba bonsuuri pare a zu, ka O zɔŋ.

⁸Nembeɛoŋ da yɛre la ba bonsuuri a sori zu, ka ba mine ŋmaara teere ulbili a yɛre a sori zu.

⁹A nembeɛoŋ naŋ da de weɛ ane banaŋ naŋ da be puori da kyaara la yaga zaa a yele: “Hozaana[36] Davil Bidɔɔ! Soba na naŋ waana a Daana yuori eŋɛ nyɛ la maaloo! Ka Naaŋmen naŋ be sazu tɔɔre zaa nyɛ puubu!”

¹⁰A Yeezu naŋ da wa kpɛ a Gyɛruzɛlɛm, buriburi da kpɛ la a teŋkpoŋ deme zaa, ka ba soorɔ, “Nembuo la a ŋa?”

¹¹Ka a nembeɛoŋ da yele, “Yeezu a Ŋmen-yelmanna naŋ yi Naazɛrɛ naŋ be a Galili paaloŋ poɔ la.”

¹²Lɛ la ka a Yeezu da kpɛ a Naaŋmen die a te digi banaŋ zaa naŋ da dire daa yi ne a Naaŋmen die poɔ, kyɛ nyɔge a libi-tɛgrebɛ tabolɔ willi kyigi, kyɛ teɛ a banaŋ naŋ koɔrɔ naŋmama kogri lɔɔ.

¹³O da yeli ko ba la, “Ba sɛgɛɛ la: ‘Ba na boɔlɔ la N yiri puoruu yiri’; kyɛ ka yɛ e ka o leɛ nannyig-kpeɛne sɔgloozie.”

¹⁴A zɔnne ane gbɛrɛɛ da wa la O zie a Naaŋmen die poɔ, ka O da saŋ ba.

¹⁵Kyɛ a Naaŋmen bagmaalkare ane a Naaŋmen bege wulwulibo naŋ da wa nyɛ a toŋkpeɛne a Yeezu naŋ toŋ, kyɛ woŋ a bibiiri naŋ kyaara a Naaŋmen die poɔ, “Hozaana, a Davil Bidɔɔ”, ba suuri da iree la,

¹⁶ka ba yeli ko O, “Fo woŋ la lɛ ba naŋ yele?” Ka a Yeezu yeli sɔge ba, “Õõ, yɛ daŋ ba sɔre a yelbiri a ŋmen gane poɔ, ‘Bibiiri ane bi-ɛnne nɔɛ poɔ la ka fo nare fo meŋɛ dannoo’?”

¹⁷O da bare ba la, kyɛ yi a teŋkpoŋ poɔ a gaa Bɛtani te gaŋ a be ka zie nyaa.

¹⁸A baguo saŋ O naŋ da leɛ gɛrɛ a Gyɛruzɛlɛm teŋkpoŋ, kɔŋ da kpɛ O la.

¹⁹O naŋ da wa nyɛ kaŋkanteɛ ka o are a sori noɔreŋ, O da gaa la a teɛ pare kyɛ O da ba nyɛ wɔne zaa ka vaare yoŋ naane. Lɛ la ka O yeli ko a teɛ, “Fo daŋ koŋ la wɔŋ wɔne zaa!” Ka a kaŋkanteɛ deɛ ko o zaa daadaalɛ.

²⁰A potuuribo naŋ da nyɛ a lɛ, nɔmaa da kpɛ ba la, ka ba yele, “Wola ka a kaŋkanteɛ deɛ ko wieouŋ lɛ?”

²¹Ka a Yeezu yeli sɔge ba, “Yelmeŋɛ ka N yele korɔ yɛ, ka yɛnee taa yeldeebo a ba bonnɔ, a ŋaa N naŋ e a kaŋkanteɛ yoŋ naane ka yɛ na toɔ̃ e, kyɛ ka yɛnee wa yeli ko a taŋ ŋa, ‘Iri gaa le mane koɔ̃ poɔ, a na e la a lɛ’.

²²Bonna zaa yɛ naŋ puoro sɔrɔ ne yeldeebo, yɛ na nyɛ la.”

²³A Yeezu naŋ da kpɛ a Naaŋmen die, a wullo a noba, a Naaŋmen bagmaalkare ane a noba nembɛrɛ da wa la O zie a wa soore O, “Yeŋ ka fo nyɛ a kpeɛ̃õ ŋa a tonɔ ne a toma ama? Nembuo la ko fo a kpeɛ̃õ ŋa?”

²⁴Ka a Yeezu yeli ko ba, “N meŋ na soore yɛ la soorebi-yenaa; ka yɛnee wa iri a noɔre ko ma, N meŋ pãã na yeli ko yɛ la zie na N naŋ nyɛ a kpeɛ̃õ tonɔ ne a toma ama.

²⁵A Gyɔɔn suobu da yi la Naaŋmen zie bee nensaalba zie?” Ka ba da ŋmeɛrɛ nɔkpeɛne ne taa a yele, “Ka tenee yeli, ‘Naaŋmen zie la,’ O na soore te la, ‘Boŋ pãã so ka yɛ da ba sage de a Gyɔɔn yɛlɛ?’

²⁶Kyɛ ka tenee yeli, ‘Nensaalba zie la,’ te zoro la a noba dabeɛ̃, bonso, ba zaa sage deɛ la ka Gyɔɔn waa la Ŋmen-yelmanna.”

²⁷Lɛ la ka ba yeli sɔge a Yeezu, “Te ba baŋ.” Ka a Yeezu meŋ yeli ko ba, “Ka lɛ N meŋ koŋ yeli ko yɛ zie na N naŋ nyɛ a kpeɛ̃õ tonɔ ne a toma ama.”

²⁸“Wola ka yɛ teɛre? Dɔɔ kaŋ la da taa bidɔbɔ bayi; a da te yeli ko a bidɔɔ kpoŋ soba, ‘N bie, gaa a weɛ zenɛ te kɔ.’

²⁹Ka a bie yeli ko o, ‘N koŋ gaa’; kyɛ a lɛ puoriŋ ka o leɛ o teɛroŋ a gaa a weɛ.

³⁰A saa da gaa la a bayi soba zie a te yeli a lɛ ne o zu; ka o yeli sɔge, ‘N na gaa la’; kyɛ da ba gaa.

³¹A ba bayi poɔ, buo soba la da e lɛ o saa naŋ boɔrɔ?” Ka ba yeli, “A dɛndɛŋ soba na.” Ka Yeezu yeli ko ba, “Yelmeŋɛ ka N yele korɔ yɛ, a zuyɔɔ-derebɛ ane a gyɛnterre daŋna yɛ la kpeɛrɛ a Naaŋmen naaloŋ poɔ.

³²A Gyɔɔn da wa la yɛ zie, a wa wullo yɛ a mennoŋ sori, kyɛ ka yɛ ba sage de o yɛlɛ, kyɛ ka a zuyɔɔ-derebɛ ane a gyɛnterre sage de o yɛlɛ. Haali yɛ naŋ nyɛ a ama zaa kyɛ yɛ ba leɛ yɛ teɛroŋ a de o yɛlɛ.”

³³“Yɛ la kyɛlle woŋ a sekpɔgre kaŋ. Dɔɔ kaŋ la da bebe a taa weɛ, a sɛle dããteere o poɔ, a mele o zaa gyeere, kyɛ mɛ dãã maaloo zie a weɛ poɔ, a mɛ guguribo zemmo zie a be. A pãã da de a weɛ ko noba mine ka ba kaara kyɛ ka o yɔ gaa paaloŋ yuo.

³⁴A tewɔmɔ pɔroo saŋ naŋ wa ta, o da toŋ la o gbaŋgbaare ka ba gaa a wɛkaareba zie ka ba tere a o weɛ boma ka ba wa ko o.

³⁵Kyɛ a wɛkaareba da nyɔge la a gbaŋgbaare, a ŋmɛ kaŋ, a ko kaŋ, kyɛ za a kaŋ ne kubo.

³⁶Ka o laboreŋ toŋ a gbaŋgbaare mine ka ba gaŋ a dɛndɛŋ deme na, ka ba te e ba meŋ a lɛ ne o zu.

³⁷A baaraa zaa, o da toŋ la o meŋɛ bidɔɔ ba zie a yele, ‘Ba na ko la a n bidɔɔ gyeremɛ.’

³⁸Kyɛ a wɛkaareba naŋ da wa nyɛ a bidɔɔ la ka ba da yeli ko taa, ‘A gbandire la ŋa; yɛ wa ka te ko o kyɛ de a o gbandiruŋ[37] boma.’

³⁹Lɛ la ka ba da nyɔge o tage yi ne a weɛ poɔ a te ko.

⁴⁰Ka a weɛ daana wa leɛ wa, boŋ ka o na e a wɛkaareba bama?”

⁴¹Ka ba yeli ko O, “O na e la ka ba ko a nenfaare bama nembaalkoobo kyɛ ka o la de a weɛ ko neŋyobo naŋ na ko o a weɛ boma a deebo saŋ.”

⁴²Ka a Yeezu yeli ko ba, “Yɛ mɔɔ daŋ ba sɔre a gansoŋ poɔ nyɛ be: ‘A kuuri na a mɛmeɛrebɛ naŋ zagre bare la leɛ a yiri pare kuuri, a Daana tontonne la, a e la nɔmaa ko te.’

⁴³Azuiŋ N yele korɔ yɛ la: Ba na de la a tenvelaa[38] naaloŋ yɛ zie a ko noba naŋ na wɔŋ a naaloŋ wɔmɔ.

⁴⁴A soba na naŋ na le a kuuri ŋa zu na kɔɔre la puropuro; kyɛ neɛ na meŋ zaa zu a kuuri naŋ na le na ŋmore la.”

⁴⁵A Naaŋmen bagmaalkare ane a Faraziimine naŋ da wa woŋ a O sekpɔgre ŋa, ba da baŋɛɛ la ka bana la ka O da yeli kyaare ne.

⁴⁶Ba da boɔrɔ la ka ba nyɔge o, kyɛ da zoro a nembeɛoŋ dabeɛ̃, bonso, ba zaa da sage ka O waa la Ŋmen-yelmanna.