Read Southern Dagaare Mat 24 Bible Online

Mat 24 - Southern Dagaare bible

Mat 24

¹A Yeezu naŋ da wa yi a Naaŋmen die poɔ a kyɛnɛ gɛrɛ, a O potuuribo da wa la O zie a wa teɛ wullo O a Naaŋmen die.

²Lɛ la ka O soore ba, “Yɛ nyɛ la a ama zaa, bee yɛ ba nyɛ a? Yelmeŋɛ ka N yele korɔ yɛ, ba koŋ bare a yiri ŋa kusi-yenaa zaa ka o dɔgle o tɔ zu. A zaa pabo ka ba na daalɔɔ.”

³A Yeezu naŋ da wa zeŋ a Oliva Taŋzu, a O potuuribo da wa la O zie ba yoŋ tɛgɛ, a wa soore O, “Yeli ko te, boŋ saŋ la ka a yeli ŋa na e? Ka boŋ la na wuli ka a fo leɛ-waabo ane a teŋɛ baaroo saŋ taɛ la?”

⁴Ka a Yeezu yeli sɔge ba, “Yɛ gu yɛmenne velaa ka neɛzaa ta wa bɛlle yɛ.

⁵Bonso, noba yaga na wa la N yuori eŋɛ, a yele, ‘maa la a Mɛzaaya!’[44] kyɛ na bɛlle noba yaga ka ba bɔre.

⁶Yɛ na woŋ la zɔɔre yɛlɛ, ane zɔɔre yɛlɛ ba naŋ na waala yele; yɛ ta vɛŋ ka dabeɛ̃ kpɛ yɛ. Ama zaa na e la kyɛ ka a teŋɛ naŋ koŋ baare sɛre.

⁷Bonso, paaloŋ na maŋ iri zɔɔrɔ ne la o paaloŋ tɔ, ka namine iri zɔɔrɔ ne ba namin-taaba. Kɔŋkpoŋ na le la a ziiri zaa, kyɛ ka a teŋɛ gbigre a ziiri yaga poore:

⁸kyɛ a ama zaa waa seŋ ŋa pɔg-poɔ naŋ ta dɔgebo ka a o poɔ piili beɛrɛ.”

⁹“Ba na de yɛ la tere ka ba dɔgre, kyɛ ko yɛ, ka a tenne zaa kyiiri yɛ, a N yuori zuiŋ.

¹⁰Noba yaga na zagre la a Naaŋmen yɛlɛ a lɛ saŋ, a yire taa poe, kyɛ kyiire taa.

¹¹Kaŋwaa Ŋmen-yelmanneba yaga na yi la, a bɛlle noba yaga ka ba bɔre.

¹²Kyɛ potuoloŋ naŋ na do zu yaga zuiŋ, noba yaga nɔmmo na maa la.

¹³Kyɛ soba na zaa naŋ na di kannyiri te ta a baaroo saŋ, na nyɛ la faabo.

¹⁴Ba na moɔle la a Naaŋmen naaloŋ yelnoore a tendaa zaa zu, ka a e danseɛ a noba zaa zie kyɛ ka a baaroo pãã ta.”

¹⁵Azuiŋ, ka yɛnee wa nyɛ a kyiiruŋ kpoŋ kpoŋ ka o are a Naaŋmen die zisoŋ poɔ, aŋa lɛ a Ŋmen-yelmanna Daneɛl naŋ da daŋ yeli, (vɛŋ ka neɛ naŋ sɔre a gane baŋ a tɛgɛ),

¹⁶a ferɛɛ la ka banaŋ naŋ be Gyudiya paaloŋ zo kpɛ a tanne poore.

¹⁷Soba na naŋ be peɛzu ta la sigi ka o te de o boma naŋ be a die poɔ.

¹⁸Soba na naŋ be weɛ poɔ ta wa leɛ kulo ka o te de kparoo.

¹⁹Pɔgpoore ane banaŋ naŋ taa bilɛɛre ka ba ɛnnɛ a bebie na poɔ yuori la we!

²⁰Yɛ puoro ka a yɛ zoobu ta wa le a sakyɔre saŋ, bee a pɛnnoo bebiri daare.

²¹Bonso, a lɛ saŋ dɔgɛɛ kpoŋ ba naŋ daŋ ba nyɛ o tɔ a yi a tendaa piiluu saŋ a wa ta zenɛ, bee a daŋ na la nyɛ a dɔgɛɛ ŋa tɔ, na wa la.

²²Kyɛ ka ba naŋ da ba ŋmaa a bebie ama kyɛlɛɛ bare, nensaala zaa da koŋ nyɛ faabo. Kyɛ a neŋkaa-irri zuiŋ, ba na ŋmaa la a bebie mine bare.

²³Ka neɛzaa pãã wa yeli ko fo, ‘Nyɛ! a Mɛzaaya la kyɛ!’ Kyɛ bee O be la kyɛ! Yɛ ta sage de.

²⁴Kaŋwaa mɛzaaya mine ane kaŋwaa Ŋmen-yelmanneba na wa la, a wa erɛ yelwulii kyɛ tonɔ toŋkpeɛne, ka ba bɛlle noba ka ba tuli, ka ba naŋ na toɔ̃, ba na e la ka a neŋkaa-irri meŋ gba tuli.

²⁵Yɛ kaara velaa, N daŋ yeli ko yɛ la.

²⁶A lɛ zuiŋ ka ba naŋ wa yeli ko yɛ, ‘Nyɛ! O be la wɛgyɛŋ poɔ,’ yɛ ta wa yire be, bee ka ba yeli, ‘Nyɛ! O be la a dikpaareŋ,’ yɛ ta sage de.

²⁷Aŋa saa nyegroo naŋ maŋ yi sapare, ka a sapii toɔ̃ wa te gaa saniŋe, lɛ ka a Nensaala Bie waabo na waa.

²⁸Benee zaa bonkũũ naŋ gaŋ, be la ka gyugmo[45] na lantaa.

²⁹“A paretɛloŋ lɛ, a dɔgɛɛ ama puoriŋ, a ŋmenaa na ligi la, ka a kyuu veɛloŋ meŋ koŋ kyaane; a ŋmarbie na yi la a sazu le, kyɛ ka a sazu boŋkpeɛne zaa zɛŋ.

³⁰A lɛ ka a Nensaala Bie yelwulaa pãã na sãã a saluoni poɔ, ka a tendaa nemboorɔ zaa koŋ, kyɛ ka ba pãã nyɛ ‘a Nensaala Bie ka O yi a sagama poɔ waana’ ne kpeɛ̃õ ane puubu.

³¹O na toŋ la O malekere ka ba wa peɛle eelɛ gboligboli, a boɔle a O neŋkaa-irri zaa lantaa a yi a tendaa lamboe anaare zaa, a yi a saluoni baaraa te ta a kaŋ.”

³²“Yɛ zanne a wuluu ŋa yi a kaŋkanteɛ zie: ka o ulli[46] pɔrɔ wa te bɔrɔ vaare, yɛ maŋ baŋ ka sẽɛ saŋ peɛlɛɛ la.

³³A lɛ ne o zu, ka yɛnee wa nyɛ a yɛlɛ ama zaa, yɛ baŋ ka a Nensaala Bie waabo pãã doŋɛɛ la, a gba be a dendɔre noɔreŋ.

³⁴Yelmeŋɛ zaa ka N yele korɔ yɛ, a zenɛ noba boorɔ ŋa koŋ kpi baare kyɛ ka a yɛlɛ ama zaa e.

³⁵Sazu ne teŋɛ na wa tɔle gaa la, kyɛ N yelbie koŋ baŋ tɔle gaa togitogi.”

³⁶“Kyɛ neɛzaa ba baŋ a bebiri, bee a saŋ a Nensaala Bie naŋ na wa. A tenvelaa[47] malekere bee a Bidɔɔ meŋ gba ba baŋ a saŋ, ka a Saa yoŋ naane.

³⁷Aŋa a Nowa bebie naŋ da waa lɛ, lɛ ka a Nensaala Bie meŋ waabo bebiri na waa.

³⁸Aŋa a bebie na poɔ a kɔmpiiri naŋ da ba wa sɛre, ka noba da dire kyɛ nyuuro, ka dɔbɔ derɛ pɔgeba, ka pɔgeba meŋ kulo serebɛ, a te ta daare na a Nowa naŋ kpɛ a gbori,

³⁹ka ba da ba baŋ yeli naŋ erɛ a te ta saŋ na a kɔmpiiri naŋ wa ŋmɛ, a wuo ba zaa gaa ne. Lɛ meŋ ka a na waa a Nensaala Bie waabo saŋ.

⁴⁰A lɛ saŋ, noba bayi na be la weɛ poɔ, ka ba wa taa kaŋ gaa ne kyɛ bare kaŋ.

⁴¹Pɔgebɔ bayi na laŋ ɛrɛ la zɔŋ, ka ba wa taa kaŋ gaa ne kyɛ bare kaŋ.

⁴²Azuiŋ, yɛ gu yɛmenne velaa, a kaara soŋ, bonso, yɛ ba baŋ a daare na yɛ Daana naŋ waana.

⁴³Kyɛ yɛ baŋ a ŋaa tɛgɛ: ka a yidandɔɔ da baŋ bonna saŋ a nannyige naŋ na wa, o da na gu la a yiri velaa, o da koŋ vɛŋ ka a nannyige wa ŋma a yiri.

⁴⁴Azuiŋ, yɛ meŋ nare yɛmenne, bonso, a Nensaala Bie na wa la saŋ na yɛ naŋ ba baŋ ne a.”

⁴⁵“Aŋ pãã la a gbaŋgba-bivelaa ane yɛmbaŋna, ka o daana na de o eŋ ka o kaara o yiri zu, a korɔ a o gbaŋgba-taaba ba bondirii a saŋ na a naŋ seŋ ne?

⁴⁶A gbaŋgbaa na o daana naŋ leɛ kulo waana a wa nyɛ o ka o tonɔ nyɛ la maaloo.

⁴⁷Yelmeŋɛ zaa ka N yele korɔ yɛ, a o daana na e la ka o kaara o boma zaa zu.

⁴⁸Kyɛ ka a gbaŋgba-faa ŋa wa yeli ko o meŋɛ, ‘A n daana kɔɔrɛɛ waabo,’

⁴⁹kyɛ pãã piili ŋmeɛrɛ a o gbaŋgba-taaba, a dire kyɛ nyuuro ne dããnyukuolibo,

⁵⁰a gbaŋgbaa ŋa daana na uri wa la daare na o naŋ ba nare ane gogo na o naŋ ba baŋ.

⁵¹A gbaŋgbaa ŋa daana na wa kyɛ o la ŋmaare puropuro, a de o poɔ a bampuori-kombampoɔ mine poɔ, be ka ba na be kono kyɛ nyerɛ nyemɛ.”