Read Southern Dagaare Mat 26 Bible Online

Mat 26 - Southern Dagaare bible

Mat 26

¹A Yeezu naŋ da wa yeli a yɛlɛ ama zaa baare, O da yeli ko la O potuuribo:

²“Yɛ baŋ ka beri ayi la kyɛre ka a Ista tigri[50] diibu na ta, ka ba na de a Nensaala Bie tere ka ba kpa dagaraa zu.”

³Lɛ la ka a Naaŋmen bagmaalkare ane a teŋɛ nembɛrɛ da te lantaa a Naaŋmen bagmaalkare neŋkpoŋ na yuori naŋ da di Kayefa naayiri poɔ,

⁴ka ba da laŋ bo ka ba sɔgle nyɔge a Yeezu ko.

⁵Kyɛ ka ba da yeli, “A ba seŋ ka a e a tigri bebie ŋa poɔ, ka lɛ naane dɔɔne na dɔ̃ɔ̃ la a noba poɔ.”

⁶A Yeezu naŋ da naŋ be Saamon kɔŋkɔŋ yiri a Bɛtani teŋɛ poɔ la

⁷ka pɔge kaŋ da taa turaali mine daaroŋ naŋ ba wono, a wa kyiri eŋ a Yeezu zu, O naŋ da zeŋ dire diibu.

⁸Kyɛ a potuuribo naŋ da wa nyɛ a lɛ, ba suuri da iree la ka ba yeli, “A saamo ŋa tɛgɛ la boŋ?

⁹A turaali ŋa da na toɔ̃ koɔre yi la libi-kpoŋ ka ba de soŋ ne nembaalba.”

¹⁰Kyɛ a Yeezu naŋ da baŋ ba poteɛrɛ zuiŋ, O da soore ba la, “Bonso ka yɛ dɔɔnɔ a pɔge? O toŋ la tonsoŋ a ko ma.

¹¹Bonso, a nembaalba na be la yɛ poɔ tegitegilɛ, kyɛ maa koŋ be yɛ zie tegitegilɛ.

¹²O naŋ sɔ ma a turaali ŋa, N ũũmu naroo la ka o e a lɛ.

¹³Yelmeŋɛ ka N yele korɔ yɛ, zie na zaa ba naŋ na manne a Ŋmen-yelnoore ŋa a tendaa zaa poɔ, ba na yeli la bonna a pɔge ŋa naŋ e, ka ba leɛ-teɛre o yɛlɛ.”

¹⁴Lɛ la ka O potuuribo pie ne bayi na kaŋ yuori naŋ di Gyudase Ezekarɔte da gaa a Naaŋmen bagmaalkare zie

¹⁵a te yeli, “Boŋ ka yɛ na ko ma, ka maa na iri a Yeezu ko yɛ?” Ba da yɔɔ o la warbie lezare ne pie.

¹⁶A yi a lɛ puoriŋ la ka o da yɔ boɔrɔ vuo ka o iri a Yeezu tere.

¹⁷A Boroboro Dambo tigri bebi-dɛndɛŋ daare, a potuuribo da wa la a Yeezu zie a wa yeli, “Yeŋ la ka fo boɔrɔ ka te nare ka fo di a Ista tigri?”

¹⁸Ka O yeli, “Yɛ gaa a teŋkpoŋ poɔ, dɔɔ kaŋ zie, a te yeli ko o, ‘A Wulwullo yeli ka N saŋ peɛlɛɛ la, N ne N potuuribo na di la a Ista tigri fo yiri poɔ.’ ”

¹⁹Lɛ la ka a potuuribo da nare a Ista tigri bondirii a seŋ lɛ a Yeezu naŋ yeli ko ba.

²⁰Zie naŋ da wa maa O da laŋ zeŋ ne la a O potuuribo pie ne bayi;

²¹kyɛ ba naŋ da naŋ dire la, ka O yeli, “Yelmeŋɛ zaa ka N yele korɔ yɛ, a yɛ kaŋ na yi la N puori a iri ma tere.”

²²Posãã-yaga da kpɛ la a potuuribo, ka ba kanzaa maŋ soore, “Kyɛ maa eŋ naane wɛ, Daana?”

²³Ka O yeli sɔge, “A soba na maa ne o naŋ laŋ toŋ a laalee poɔ la na iri ma tere.

²⁴A Nensaala Bie gɛrɛ la a seŋ lɛ ba naŋ sɛge kyaare ne O, kyɛ weɛbo la a ko a soba na naŋ yi a Nensaala Bie puori! Ka ba naŋ da ba dɔge o soba gba a naŋ seɛ.”

²⁵Ka Gyudase, a onaŋ naŋ yi O puori meŋ da soore O, “Wulwullo, serɛzaa maa eŋ naane wɛ?” Ka a Yeezu leɛ yeli, “Fõõ la yeli a lɛ.”

²⁶Ba naŋ da naŋ dire la ka Yeezu da de boroboro, a maale kyɛ nyɔge ŋmaa a de ko a O potuuribo, kyɛ yeli, “Yɛ de di, a N eŋɛ la aŋa.”

²⁷Lɛ la ka O da la de ŋmanlee, a puori Naaŋmen bareka baare, kyɛ de ko ba, a yele, “Yɛ zaa yɛ de a ŋmanlee ŋa poɔ boma nyu;

²⁸a N nɔpaalaa zẽẽ la ama, a na kyiri yaare la neŋyaga zuiŋ ka ba yelbebe nyɛ sudi.

²⁹N yele korɔ yɛ la: N daŋ koŋ la nyu a tewɔmɔ dãã ŋa kyɛ te ta daare na te naŋ na laŋ nyu a dããpaala a N Saa Naaloŋ poɔ.”

³⁰Ba naŋ da wa yieli a puubu yieluŋ baare, ba da yi gaa la a Oliva Taŋzu.

³¹Lɛ la ka a Yeezu da yeli ko ba, “Yɛ zaa na zo yaare la a tensogɔ ŋa N zuiŋ: bonso, ba sɛgɛɛ la: ‘N na ŋmɛ la a pekyeenɛ, ka a peere zaa zo yaare.’

³²Kyɛ a N kũũ leɛ-iruu puoriŋ, N na de la yɛ weɛ a gaa Galili.”

³³Ka Piita yeli ko O, “Haali ka ba zaa na zo yaare a fo zuiŋ, maa eŋ koŋ zo kyɛ bare fo.”

³⁴Ka a Yeezu yeli ko O, “Yelmeŋɛ ka N yele korɔ fo, a tensogɔ ŋa, nɔdaa koŋ koŋ sɛre, kyɛ ka fo kyiiri gbɛre bota ka fo ba baŋ ma.”

³⁵Ka Piita yeli ko O, “Ka a naŋ na e feroo ka maa ne fo laŋ kpi gba, kyɛ N koŋ zagre fo bare.” Ka a potuuribo zaa meŋ yeli a lɛ.

³⁶Lɛ la ka Yeezu ne a O potuuribo da yi gaa zie kaŋ ba naŋ boɔlɔ Gɛsamane; ka O yeli ko a O potuuribo, “Yɛ zeŋ kyɛ, kyɛ ka N tɔle gaa nimitɔɔre te puori.”

³⁷O da taa la Piita ane a Zɛbɛdii biiri bayi a poɔ O eŋɛ. Posãã-kpoŋ da piili kpɛ O la ka O da taa O meŋɛ faana.

³⁸Lɛ la ka O pãã da yeli ko ba, “N poɔ sããɛ la yaga, ka N te tɔɔle kũũ; yɛ zeŋ kyɛ, a ta wa gbire.”

³⁹A Yeezu naŋ da wa kyɛŋ tɔle nimitɔɔre belaa, O da le vɔgle la teŋɛ a puoro yele, “N Saa, ka a naŋ da na taa eebo, vɛŋ ka a zuŋmanekoɔ̃ ŋa wa pare ma bare, kyɛ anealɛzaa, ka a ta e seŋ lɛ maa naŋ boɔrɔ, kyɛ lɛ fõõ naŋ boɔrɔ.”

⁴⁰Lɛ la ka O da leɛ wa a potuuribo zie, a wa nyɛ ka ba gbire, ka O soore Piita, “Ka lɛ yɛ kontoɔ̃ laŋne ma a bare goɔŋ gogo yeni?

⁴¹Yɛ ta gbire, yɛ puoro, ka yɛ ta wa kpɛ enyaabo poɔ; a seɛ eŋ sereŋ boɔrɔ la, kyɛ ka a eŋɛ ba taa faŋ.”

⁴²A Yeezu da la maaleŋ gaa la a boyi soba a te puori a yele, “N Saa, ka a zuŋmanekoɔ̃ ŋa kontoɔ̃ wa pare ma bare, kyɛ ka a ferɛ ka N nyu o, ka a e seŋ lɛ fo naŋ boɔrɔ.”

⁴³O naŋ da laboreŋ wa, O da wa nyɛ ba la ka ba gbire, bonso, ba nimie da pa ne la goɔŋ.

⁴⁴Azuiŋ O da bare ba la kyɛ leɛ gaa te puori a bota soba, a yele a yelbie na ne a zu.

⁴⁵Lɛ la ka O da leɛ wa a potuuribo zie a wa soore ba, “Yɛ naŋ kyɛnɛ gbire la a pɛnnɛɛ? Yɛ nyɛ, a saŋ taɛ la ka ba iri a Nensaala Bie eŋ a yelbe-erebɛ nuuriŋ.

⁴⁶Yɛ iri ka te gaa. Yɛ nyɛ, a soba na naŋ iri ma tere peɛlɛɛ la.”

⁴⁷A Yeezu naŋ da naŋ kyɛnɛ yele a yɛlɛ la ka Gyudase, a potuuribo pie ne bayi na kaŋ la lɛ wa ta, ka nembeɛoŋ taa zɔɔzɔɔ-sɔre ane dabɔlɔ tuuro ne o. A Naaŋmen bagmaalkare ane a noba nembɛrɛ la da toŋ ba.

⁴⁸A soba na naŋ da na iri a Yeezu tere, da ko ba la yelwulaa kaŋ a yele, “A soba na N naŋ na te nyɔge moore la a lɛ, yɛ nyɔge O.”

⁴⁹Daadaalɛ a Gyudase da wa la a Yeezu zie a wa yeli, “Wulwullo, N puoro fo la!” kyɛ te nyɔge O moore.

⁵⁰Ka a Yeezu yeli ko O, “N ba, e yeli na fo naŋ wa kyɛ ka fo e.” Lɛ la ka a noba wa nyɔge a Yeezu.

⁵¹A tɔntɔbaalɛ, ka a Yeezu potuuro na kaŋ da voɔ o zɔɔzɔɔ-soɔ, a kyɛ ne a Naaŋmen bagmaalkare neŋkpoŋ gbaŋgbaa toori kpɛlle.

⁵²Ka a Yeezu yeli ko o, “Leɛ su a fo zɔɔzɔɔ-soɔ a sɔteɛ[51] poɔ, bonso, banaŋ zaa naŋ zɔɔrɔ ne soɔ, a soɔ la na ko ba.

⁵³Fo teɛrɛ ka N da kontoɔ̃ sɔre N Saa ka O ko ma malekere naŋ gaŋ turi pie ne ayi be?

⁵⁴Kyɛ wola ka a yɛlɛ ba naŋ sɛge eŋ a ŋmen gane poɔ na tu a tuubu, a naŋ yeli ka a ferɛɛ la ka a yɛlɛ ama e a ŋaa?”

⁵⁵A gogo na poɔ Yeezu da soore la a nembeɛoŋ, “Zɔɔzɔɔ-sɔre ane dabɔlɔ la ka yɛ yi ne ka yɛ wa nyɔge ma aŋa N naŋ waa fafaara be? Bie la bie zaa ka N da maŋ zeŋ a Naaŋmen die poɔ a wullo noba, kyɛ ka yɛ ba nyɔge ma.

⁵⁶A yɛlɛ ama zaa da eɛɛ la ka a Ŋmen-yelmanneba yɛlɛ na ba naŋ sɛge a gane poɔ na tu a tuubu.” Lɛ la ka a O potuuribo zaa bare O kyɛ zo.

⁵⁷A banaŋ naŋ da nyɔge a Yeezu pãã da taa O la gaa ne Kayefa, a Naaŋmen bagmaalkare neŋkpoŋ yiri, be la ka a Naaŋmen bege wulwulibo ne a nembɛrɛ da te lantaa.

⁵⁸Kyɛ Piita da be la tɔɔre zaa a tuuro a te kpɛ a Naaŋmen bagmaalkare neŋkpoŋ davoro poɔ. O naŋ da wa te kpɛ a davoro la ka o te lanzeŋ ne a guguribo, a na nyɛ a baaroo zie.

⁵⁹A Naaŋmen bagmaalkare ane a sɛrediribe zaa pãã da boɔrɔ la danse-zirii a na duori a Yeezu, ka ba e lɛ a ko O.

⁶⁰A zirii danseɛ deme da waa la yaga kyɛ ba da ba nyɛ yelsaanaa zaa a kyaara ne a Yeezu. Kyɛ a baaraa zie la ka zirii danseɛ deme mine bayi da yi wa

⁶¹yeli, “A soba ŋa yelee la, ‘N na toɔ̃ ŋmore la a Naaŋmen die ŋa kyɛ leɛ mɛ o beri ata poɔ.’ ”

⁶²Lɛ la ka a Naaŋmen bagmaalkare neŋkpoŋ vaa-iri kyɛ soore O, “Fo ba taa yelzaa na yeli sɔge be? Boŋ yɛlɛ la ama ba naŋ yeli kyaara ne fo?”

⁶³Kyɛ a Yeezu da taŋ la O noɔre. Lɛ la ka a Naaŋmen bagmaalkare neŋkpoŋ yeli ko O, “Pɔ a Naaŋmen-vore, a yeli ko te, ka fõõ wa la a Mɛzaaya,[52] a Naaŋmen Bie”

⁶⁴Ka a Yeezu yeli ko o, “Fõõ la yeli a lɛ. Kyɛ N yele korɔ fo la, A yi a ŋaa gɛrɛ, yɛ na nyɛ la a Nensaala Bie ka O zeŋ a Kpeɛ̃õ Zaa Daana nuduluŋ seŋ a yi a sazu sagama poɔ waana.”

⁶⁵Lɛ la ka a Naaŋmen bagmaalkare neŋkpoŋ deɛ tage o bonsuuri kyeɛre kyɛ yeli, “O to la Naaŋmen! Boŋ danseɛ la ka te naŋ kyɛnɛ boɔrɔ? Ŋaa yɛ woŋ la a zone O naŋ to Naaŋmen.

⁶⁶Boŋ ka yɛ taa na yeli a poɔ?” Ka ba yeli sɔge o, “O seŋ ne la kũũ.”

⁶⁷Lɛ la ka ba da toore nentaare waare O niŋe, a tɔ O daa yaga; ka ba mine meŋ fale O lampɛgreŋ,

⁶⁸a yele, “Baŋna baŋna, fõõ Mɛzaaya! Aŋ la ŋmɛ fo?”

⁶⁹A Piita da yi be la a davoro poɔ a zeŋ, lɛ la ka a pɔglee kaŋ naŋ da waa tontonɔ a yiri na poɔ wa a Piita zie a wa yeli, “Fo meŋ da be la a Yeezu naŋ yi a Galili zie.”

⁷⁰Kyɛ ka a Piita da kyiiri a noba zaa niŋeŋ a yele, “N ba baŋ bonna yɛlɛ fo naŋ yele.”

⁷¹A Piita naŋ da la yi te are a yiri dendɔreŋ la ka a tonton-pɔglee kaŋ meŋ nyɛ o, a yeli ko a banaŋ naŋ are a be, “A dɔɔ ŋa meŋ da be la a Yeezu naŋ yi Naazɛrɛ zie.”

⁷²Ka a Piita laboreŋ pɔ a kyiiri, “N ba baŋ a dɔɔ ŋa.”

⁷³A da ba la kɔɔre kyɛ ka a banaŋ naŋ da are a be, wa yeli ko a Piita, “Yelmeŋɛ, fo meŋ e la ba kaŋ, bonso, fo yɛlɛ yeluu gba wuo fo la.”

⁷⁴Lɛ la ka a Piita da piili poɔrɔ pɔgalma, “N ba baŋ a dɔɔ!” A saŋ na poɔ la ka nɔdaa da koŋ a paretɛloŋ lɛ.

⁷⁵Lɛ la ka Piita da leɛ-teɛre a Yeezu yelbiri na O naŋ da yeli, “Nɔdaa koŋ koŋ sɛre kyɛ ka fo kyiiri gbɛre bota ka fo ba baŋ ma.” Ka a Piita da yi yeŋ a te ŋma nentaŋ yaga zaa.