Read Southern Dagaare Mat 3 Bible Online

Mat 3 - Southern Dagaare bible

Mat 3

¹A bebie na poɔ, Gyɔɔn Bati da yi la a Gyudiya wɛgyɛŋ poɔ, a moɔlɔ yele:

²“Yɛ leɛ yɛ eebo, bonso, a tenvelaa[4] naaloŋ peɛlɛ la.”

³A Gyɔɔn yɛlɛ la ka a Ŋmen-yelmanna Azaaya da daŋ yeli: “Neɛ kaŋ kɔkɔre ŋmeɛrɛ la kpɛlle a wɛgyɛŋ poɔ: ‘Nare a Daana sori, maale O sobie ka a tori.’ ”

⁴A Gyɔɔn da su la bontaŋ kɔɔloŋ kparoo kyɛ seɛ gane kpagre o seɛŋ. Sensobo ane tammalaara da la o bondirii.

⁵Lɛ la ka Gyɛruzɛlɛm ane Gyudiya tenne noba ane Gyɔɔdan baa fɔŋ noba zaa da yire gɛrɛ o zie,

⁶a kyiire ba yelbebe kyɛ ka a Gyɔɔn ko ba suobu a Gyɔɔdan baa poɔ.

⁷Kyɛ o naŋ da wa nyɛ a Faraziimine ane Sadusiimine yaga naŋ waana ka o ko ba suobu, o da soore ba la, “Yɛnee dompane boorɔ ŋa! Nembuo la kpãã yɛ ka yɛ zo muri a Naaŋmen supuriyaaraa na naŋ waana?

⁸Yɛ wɔŋ wɔnveɛle naŋ wuli ka yɛ sereŋ leɛ la yɛ eebo.”

⁹Yɛ daŋ ta wa teɛre ŋaa yeluu yɛmenne zie, “Aboraham la te sããkoma”; maa yele korɔ yɛ, Naaŋmen na toɔ̃ e la ka kubo ama leɛ biiri a ko Aboraham.

¹⁰Haali pampana ŋa a lare tare la a teere seɛŋ. Azuiŋ teɛ na zaa naŋ ba wɔnɔ wɔnveɛle, ba na kyɛ o la ŋmaa lɔɔ eŋ vũũ poɔ.

¹¹“N korɔ yɛ la suobu ne koɔ̃, yɛ yelbebe poɔ leɛ yiibu zuiŋ, kyɛ a soba na naŋ tu n puori waana taa la kpeɛ̃õ gaŋ ma. N gba ba seŋ ne O nɔɔteɛ detaabo. O na ko yɛ la suobu ne a Vooroŋ Soŋ ane vũũ.

¹²O kayeɛl-ŋmane be la O nu poɔ, ka O na yeɛle O kyi a wuo eŋ bugo poɔ, kyɛ gbaale a ka-uri lantaa nyege vũũ naŋ ba kpiire poɔ.”

¹³Lɛ la ka a Yeezu da yi Galili a gaa Gyɔɔn zie a Gyɔɔdan baa poɔ ka o te ko O suobu.

¹⁴A Gyɔɔn da ba sagra ka o ko a Yeezu a suobu, kyɛ yele, “Maa la da seŋ ka fo ko ma suobu, kyɛ ka fo meŋ la wa n zie ka n ko fo suobu?”

¹⁵Kyɛ ka a Yeezu leɛ yeli sɔge o, “Vɛŋ ka a e a lɛ pampana ŋa; bonso, lɛ la ka a seŋ ka te e ka mennoŋ zaa tu a tuubu.” Lɛ la ka a Gyɔɔn da sage.

¹⁶A Yeezu naŋ da wa de a suobu baare, a wa yire a koɔ̃ poɔ, daadaalɛ ka a saluoni yuo, ka O nyɛ a Naaŋmen Vooroŋ ka o sigre waana aŋa ŋmanee, a wa dɔɔ O zuŋ.

¹⁷Ka kɔkɔre kaŋ yi sazu a yeli, “N Bidɔɔ la aŋa, N Poyɛŋ Bie, N poɔ pɛle ne O la yaga.”