Read Southern Dagaare Mat 5 Bible Online

Mat 5 - Southern Dagaare bible

Mat 5

¹A Yeezu naŋ da wa nyɛ a neŋyaga, O da do la taŋ kaŋ zu; O naŋ da wa te zeŋ baare, a O potuuribo da wa la O zie.

²Lɛ la ka O da piili kanna ba, a yele:

³“Banaŋ naŋ dire naŋ a Naaŋmen puoruu eŋɛ nyɛ la maaloo, bonso, bana la so a tenvelaa[8] naaloŋ.

⁴“Banaŋ naŋ kono nyɛ la maaloo, bonso, Naaŋmen na maa la ba suuri.

⁵“Banaŋ naŋ waa sumaaroŋ deme nyɛ la maaloo, bonso, ba na nyɛ la a teŋɛ na Naaŋmen naŋ eŋ noɔre ka O na ko ba la.

⁶“Banaŋ yelmennoŋ kɔŋ ane kɔnnyuuri naŋ kpɛ nyɛ la maaloo, bonso, bana la na nyɛ ba bomboɔre zaa.

⁷“Banaŋ naŋ zoro nembaaloŋ nyɛ la maaloo, bonso, Naaŋmen na zo la ba meŋ nembaaloŋ.

⁸“Banaŋ naŋ taa sukyiri peɛle nyɛ la maaloo, bonso, bana la na nyɛ Naaŋmen.

⁹“Banaŋ naŋ boɔrɔ ka maaroŋ be noba zie nyɛ la maaloo, bonso, bana la ka ba na boɔlɔ Naaŋmen biiri.

¹⁰“Banaŋ ba naŋ dɔgrɔ, ba naŋ e nemmenne zuiŋ nyɛ la maaloo, bonso, bana la na so a tenvelaa naaloŋ.

¹¹“Banaŋ noba naŋ toorɔ, a dɔgrɔ ba, kyɛ derɛ yelfa-boorɔ zaa duoro ba, a ŋmaara zirii dɔglɔ ba N zuiŋ nyɛ la maaloo.

¹²Yɛ kyellɛ, kyɛ taa popeɛloŋ, bonso, yɛ san-yɔɔ waa la kpoŋ a tenvelaa poɔ. A lɛ ne o zu la ka ba da dɔgre a Ŋmen-yelmanneba na naŋ da de yɛ weɛ.

¹³Yɛnee la a teŋɛzu nyɛnnoo, kyɛ ka a nyɛnnoo noɔŋ wa yi, wola ka ba na e ka a leɛ noma? A ba la taa tɔnɔ, see ka ba de lɔɔ bare yeŋeŋ ka ba neɛrɛ ne gbɛɛ.

¹⁴Yɛnee la a teŋɛzu veɛloŋ. Teŋkpoŋ naŋ are taŋzu koŋ baŋ sɔgle.

¹⁵Neɛzaa koŋ kyɔŋ fentelɛ a la de laa vɔgle pɔge, kyɛ o maŋ de dɔgle la fentel-daa zu ka o kyaane zie ko a die deme zaa.

¹⁶A lɛ ne o zu, yɛ vɛŋ ka yɛ veɛloŋ kyaana yɛ taaba zie ka ba na nyɛ a yɛ tonveɛle kyɛ de puubu ko a yɛ Saa naŋ be tenvelaa poɔ.

¹⁷“Yɛ ta teɛrɛ ka N waɛ la ka N wa iri a Naaŋmen begɛ ane a Ŋmen-yelmanneba wuluu lɔɔ bare. N ba wa ka N iri a bare, kyɛ N waɛ la ka N vɛŋ ka a tu a tuubu.

¹⁸Yelmeŋɛ zaa la ka N yele korɔ yɛ, sazu ne teŋɛ daŋ na baare la, kyɛ yelbi-yenaa zaa koŋ yi a begɛ poɔ a bɔre, kyɛ te ta a saŋ a yɛlɛ zaa naŋ na e baare.

¹⁹Azuiŋ, soba na zaa naŋ na zagre a Naaŋmen nɔɛ yelbi-bile ŋa kanzaa, a wullo o taaba meŋ ka ba erɛ a lɛ, na waa la a tenvelaa naaloŋ noba zaa nembile soba. Kyɛ soba na zaa meŋ naŋ sagra N nɔɛ, a wullo o taaba meŋ a lɛ, o na waa la neŋkpoŋ a tenvelaa naaloŋ poɔ.

²⁰Maa yele korɔ yɛ, ka yɛ yelmennoŋ ba wa zuo a Naaŋmen bege wulwulibo ane a Faraziimine, yɛ daŋ koŋ kpɛ a tenvelaa naaloŋ poɔ.

²¹“Yɛ woŋee la ka ba da yeli ko la a dakoroŋ noba, ‘Ta ko neɛ’; kyɛ ‘onaŋ soba zaa naŋ wa ko neɛ, ba na di la o sɛrɛɛ.’

²²Kyɛ maa meŋ yele korɔ yɛ la, ka neɛzaa suuri wa iri ne o yɔɔ bee o yɔɔpuulee, a seŋ ka ba di o sɛrɛɛ. Ka fõõ wa to fo yɔɔ bee fo yɔɔpuulee, a seŋ ka ba zeŋ ne fo nembɛrɛ niŋesogɔ. Ka fõõ boɔle fo tɔsoba, ‘Neŋlaane ŋa’, a seŋ ka ba de fo lɔɔ eŋ dazugovũũ poɔ.

²³Azuiŋ, ka fõõ wa taa kyɔɔtaa waana ne Naaŋmen zie kyɛ wa leɛ-teɛre baŋ ka fo ne fo tɔsoba taa la saanaa,

²⁴bare a fo kyɔɔtaa a Naaŋmen bagmaalkuuri niŋeŋ kyɛ daŋ gaa ka fo ne a fo tɔsoba na te maale taa sɛre, kyɛ ka fo pãã leɛ wa tere a fo kyɔɔtaa.

²⁵Vɛŋ ka fo ne neɛ naŋ taa yelbawontaa leɛ maale taa wieouŋ lɛ, ka yɛnee naŋ wa be a sobiriŋ gɛrɛ a sɛrɛɛdiibu zie. Ka lɛnaane o na te de fo la ko a sɛredire, ka a sɛredire meŋ leɛ de fo ko a polisiri ka ba de fo lɔɔ eŋ nempage die poɔ.

²⁶Yelmeŋɛ ka N yele korɔ fo, fo koŋ yi a nempagdie poɔ, te ta lɛ saŋ fo naŋ yɔɔ a sane zaa baare.

²⁷Yɛ woŋee la ka ba da yeli, ‘Ta gaŋ ne fo tɔ pɔge bee serɛ.’

²⁸Kyɛ maa yele korɔ yɛ la, ka neɛzaa wa kaa pɔge ne peɛ̃mo vɔlaa, o soba gaŋ ne o la o sukyiri poɔ.

²⁹Ka fo duluŋ nimiri wa vɛŋ ka fo e yelbieri, nyɔge o logri iri lɔɔ bare. Ka fõõ taa nimi-yeni anaŋ seɛ fo naŋ taa nimie ayi kyɛ ka fo endaa zaa te kpɛ dazugovũũ poɔ.

³⁰Ka fo nuduluŋ wa vɛŋ ka fo e yelbieri, kyɛ o ŋmaa lɔɔ bare; a seɛɛ la yaga zaa ka fo kɔŋ fo eŋɛ zie kaŋ, a gaŋ ka ba de a fo zaa gbole lɔɔ eŋ dazugovũũ poɔ.

³¹“Ba da yelee la meŋ, ‘Dɔɔ zaa naŋ wa boɔrɔ ka o bare o pɔge, a seŋɛɛ la ka o sɛge pɔg-bare gane ko o kyɛ bare o.’

³²Kyɛ maa yele korɔ yɛ la ka ka neɛzaa wa bare o pɔge, ka a ba e moɔrɔ yɛlɛ zuiŋ, o soba vɛŋɛɛ la ka a pɔge toŋ moɔrɔ toma. Dɔɔ zaa meŋ naŋ de pɔge o serɛ naŋ bare meŋ toŋ la moɔrɔ toma.

³³“Laboriŋ, yɛ woŋee la ka ba da yeli ko la a dakoroŋ noba, ‘Yɛ ta wa poɔrɔ pɔ-zirii, kyɛ yɛ maŋ iri a pɔɛ zaa yɛ naŋ pɔ ko a Daana.’

³⁴Kyɛ maa yele korɔ yɛ la, ‘Yɛ ta wa poɔrɔ togitogi zaa. Yɛ ta wa poɔrɔ sazu, bonso, o e la Naaŋmen nakogi,

³⁵bee a poɔrɔ a teŋɛ, bonso, o meŋ waa la a Naaŋmen gbɛɛ-bimmu zie. Yɛ ta wa poɔrɔ Gyɛruzɛlɛm meŋ, bonso, a Nakpoŋ teŋkpoŋ la a be.

³⁶Yɛ ta wa poɔrɔ yɛ zuri, bonso, yɛ kontoɔ̃ e ka a yɛ zukɔɔloŋ kanzaa pɛle bee a sɔɔ.

³⁷Yɛ vɛŋ ka yɛ yelbie waa, ‘Õõ, Õõ’ bee ‘Ai, Ai.’ A ama puoriŋ, yeli zaa yɛ naŋ wa yele dɔglɔ yi la a sebɛlbɛllɛ zie.’

³⁸Yɛ woŋee la ka ba da yeli, ‘Ka neɛŋ wa iri fo nimiri ka fo meŋ iri o meŋ nimiri, bee ka ka neɛŋ wa kɔɔ fo nyenee, meŋ kɔɔ o meŋ nyenee.’

³⁹Kyɛ maa yele korɔ yɛ la: Ta yɔɔ neɛ naŋ e fo faa ne faaloŋ. Kyɛ ka neɛ wa va fo duluŋ lampɛgreŋ, leɛ a gɔɔ meŋ ko o ka o fale;

⁴⁰ka neɛzaa wa boɔrɔ ka o sɛ fo naayiri poɔ, a de fo kparbile, de a fo kpar-kpoŋ meŋ ko o poɔ.

⁴¹Ka neɛzaa meŋ wa fere fo ka fo tuo o boma kyɛŋ ne mɛle yeni, tuo kyɛŋ ne mɛlɛ ayi.

⁴²Yɛ maŋ ko neɛzaa naŋ sɔre bon yɛ zie. Yɛ ta wa mɔŋnɔ neɛ naŋ boɔrɔ pɛmmo yɛ zie.

⁴³“Yɛ da woŋee la ka ba yeli, ‘Nɔŋ fo tɔsoba, kyɛ kyiiri fo dɔndɔmɔ.’

⁴⁴Kyɛ maa yele korɔ yɛ, yɛ nɔŋ yɛ dɔndɔnne, a puoro korɔ banaŋ naŋ dɔgrɔ yɛ,

⁴⁵ka yɛ na toɔ̃ waa a yɛ Saa naŋ be tenvelaa poɔ biiri. Bonso, ona la maŋ e ka ŋmenaa puri eŋ a nenfaare ane a nemmenne; a kyɛ e ka saa mi eŋ a nemmenne ane a nenfaare zaa.

⁴⁶Ka yɛneŋ nɔŋ a banaŋ naŋ nɔŋ yɛ yoŋ, boŋ tɔnɔ ka yɛ na nyɛ? A zuyɔɔ-derebɛ meŋ gba nɔnɔ la ba nɔneba wɛ!

⁴⁷Ka yɛneŋ puoro yɛ yɔɔmine ane yɛ yɔɔpuuli yoŋ, boŋ yeli kpoŋ la ka yɛ erɛ gaŋ yɛ taaba? A Nemboore-yobo[9] meŋ ba maŋ erɛ a lɛ be?

⁴⁸Azuiŋ yɛ e noba naŋ tori aŋa a yɛ Saa naŋ be tenvelaa poɔ naŋ tori lɛ.”