Read Southern Dagaare Mat 6 Bible Online

Mat 6 - Southern Dagaare bible

Mat 6

¹“Yɛ maaleŋ erɛ a ta wa tonɔ yɛ tonveɛle noba niŋeŋ ka ka ba nyɛ. Ka yɛnee wa erɛ ka noba nyɛ, a yɛ Saa naŋ be tenvelaa[10] poɔ koŋ la yɔɔ yɛ.

²“Azuiŋ, ka yɛnee maŋ wa soŋ nembaala, yɛ ta maŋ peɛlɛ eelɛ ka noba na baŋ, aŋa a bampuori-kombampoɔ mine naŋ maŋ erɛ a puoruuderi poore ane a sobɛrɛ zu, ka noba na nyɛ a puu ba. Yelmeŋɛ zaa ka N yele korɔ yɛ, ba nyɛ la ba san-yɔɔ baare.

³Kyɛ ka yɛnee maŋ wa korɔ nembaalba sommo, yɛ ta maŋ vɛŋ ka yɛ nugɔɔ baŋ bonna yɛ nuduluŋ naŋ erɛ,

⁴ka yɛ nembaalba sommo na ta sãã, kyɛ a yɛ Saa naŋ nyɛrɛ yelsɔglɔ zaa na yɔɔ yɛ la.

⁵Ka yɛnee maŋ wa puoro, yɛ ta maŋ erɛ aŋa a bampuori-kombampoɔ mine naŋ maŋ erɛ a lɛ. Ba maŋ nɔŋ ka ba are puoro a puoruuderi pooreŋ ane a sobɛrɛ zu ka noba na nyɛ ba. Serɛzaa ka N yele korɔ yɛ, ba de la a ba san-yɔɔ baare.

⁶Kyɛ ka yɛnee maŋ wa puoro, yɛ maŋ kpɛ yɛ deri poore, a page a pama, kyɛ puori a yɛ Saa naŋ be zisɔglaa poɔ; a yɛ Saa naŋ nyɛrɛ a yelsɔglɔ zaa na yɔɔ yɛ la.

⁷“Ka yɛnee maŋ wa puoro; yɛ ta maŋ yele yɛlɛ naŋ ba taa tɛgɛ dɔglɔ taa, aŋa a Nemboore-yobo[11] naŋ maŋ erɛ a lɛ. Ba maŋ teɛre ka, ka ba naŋ yele yelyaga, lɛ ka Naaŋmen na woŋ a ba puoruu.

⁸Yɛ ta tɔglɔ ba, bonso, a yɛ Saa maŋ daŋ baŋ la bon yɛ naŋ boɔrɔ ka yɛ naŋ ba sɔre O sɛre.

⁹“Azuiŋ yɛ maŋ puori ŋaa: Te Saa naŋ be tenvelaa poɔ, ka fo yuori waa soŋ,

¹⁰Ka fo naaloŋ wa. Ka fo poboɔbo nyɛ eebo a teŋɛzu, a seŋ a naŋ waa lɛ tenvelaa poɔ.

¹¹Ko te a te zenɛ bondirii.

¹²Di te saanaa suuri ko te, aŋa lɛ te naŋ dire suuri korɔ banaŋ naŋ sãã te.

¹³Ta e ka te kpɛ enyaabo poɔ, kyɛ faa te yi ne a nenfaa nuuri poɔ.[12]

¹⁴Ka yɛnee dire yɛ taaba yelfaare suuri korɔ ba, a yɛ Saa naŋ be tenvelaa poɔ na di la yɛ meŋ yelfaare suuri ko yɛ.

¹⁵Kyɛ ka yɛnee ba dire yɛ taaba yelfaare suuri korɔ ba, a yɛ Saa meŋ koŋ di yɛ meŋ yelfaare suuri ko yɛ.

¹⁶“Ka yɛnee maŋ wa leŋ noɔre, yɛ ta maŋ sãã yɛ niŋe aŋa a bampuori-kombampoɔ mine. Ba maŋ sãã la ba niŋe ka noba nyɛ a baŋ ka ba leŋ la noɔre. Yelmeŋɛ ka N yele korɔ yɛ, ba nyɛ la ba san-yɔɔ baare.

¹⁷Kyɛ ka yɛnee maŋ wa leŋ noɔre, yɛ maŋ pɛge yɛ niŋe, a sɔ yɛ zu kãã,

¹⁸ka lɛ vɛŋ ka noba ta baŋ ka yɛ leŋ la noɔre. Kyɛ a yɛ Saa naŋ nyɛrɛ yelsɔglɔ zaa na ko yɛ la a san-yɔɔ.

¹⁹“Yɛ ta boɔrɔ yɛ bondaaboma binne a teŋɛzu kyɛ, benee mɔgre ane zoɔ̃[13] naŋ na di a, bee nannyigri naŋ na kɔɔ a pane kyɛ kpɛ zu a;

²⁰kyɛ yɛ boɔrɔ yɛ bondaaboma binne tenvelaa poɔ, be ka mɔgre bee zoɔ̃ kontoɔ̃ di a, bee ka nannyigri kontoɔ̃ kɔɔ a pane kyɛ kpɛ zu a.

²¹Bonso, zie na fo bondaaboma naŋ be, be la ka fo sukyiri meŋ na be.

²²“A nimiri la a eŋɛ fentelɛ. Azuiŋ, ka fo nimiri wa taa laafeɛ, a fo eŋɛ zaa na paale ne la veɛloŋ.

²³Kyɛ ka fo nimiri wa sãã, a fo eŋɛ zaa na paale ne la ligruŋ, kyɛ ka a veɛloŋ naŋ be fo eŋɛ wa e ligruŋ, nyɛ lɛ a ligruŋ naŋ pãã na e kpoŋ seŋ!

²⁴“Neɛzaa kontoɔ̃ tonɔ korɔ nembɛrɛ bayi. O na kyiiri la kaŋ, kyɛ nɔŋ kaŋ; bee o na sagra la kaŋ noɔre kyɛ zagra kaŋ deni. Yɛ kontoɔ̃ tonɔ korɔ Naaŋmen kyɛ naŋ kpimare libi-bɔ meŋ.

²⁵“Azuiŋ, N yele korɔ yɛ la, yɛ ta vɛŋ ka yɛ nyɔvore yɛlɛ dɔɔnɔ yɛ, bon yɛ naŋ na di bee a nyu, bee ka bonsuuri yɛlɛ dɔɔnɔ yɛ. A nyɔvore ba gaŋ a bondiraa be, ka a eŋɛ meŋ gaŋ a bonsuuri be?

²⁶Yɛ leɛ kaa nyɛ a sazu bon-ɛgre, a ba borɔ bee a kyeɛrɛ, bee eŋnɛ boma bugri poɔ meŋ; kyɛ a yɛ tenvelaa Saa guolo a la. Yɛ ba seɛ a bon-ɛgre ama yaga zaa be?

²⁷A yɛ buo soba la na kyerɛ, ka a lɛ vɛŋ ka gogo-yeni la dɔgle a o yuomo zu?

²⁸Ka bonso, ka yɛ kyerɛ bonsuuri yɛlɛ? Yɛ kaa nyɛ a baa pɛmpɛllɛ naŋ maŋ baara lɛ. A ba tonɔ toma bee a wuoro pɛmɛ,

²⁹kyɛ anealɛzaa, N yele korɔ yɛ la, haali gba Solomɔn ne o naaloŋ veɛloŋ zaa daŋ ba su bonsuuri ka a veɛlɛ seŋ a ama kanzaa.

³⁰Kyɛ ka Naaŋmen pãã kaara a weɛ moɔ zu seŋ ŋaa, anaŋ are zenɛ ka zie wa nyaana ka ba de lɔɔ eŋ vũũ poɔ, O koŋ kaa yɛ a gaŋ a lɛ be, yɛnee yelde-fẽẽ deme?

³¹Azuiŋ, yɛ ta kyerɛ a yele, ‘Boŋ ka te na di?’ bee ‘Boŋ ka te na nyu?’ bee ‘Boŋ ka te na su?’

³²A Nemboore-yobo la yɔ zoro boɔrɔ a teŋɛzu boma ama. Serɛzaa, a yɛ Saa naŋ be tenvelaa poɔ baŋ ka yɛ boɔrɔ la a boma ama zaa.

³³Yɛ moɔ nimiri a daŋ bɔ a Naaŋmen naaloŋ ane O mennoŋ, kyɛ O pãã na de la a boma ama zaa naŋ kyɛre meŋ ko yɛ.

³⁴Azuiŋ, yɛ ta kyerɛ bieu yɛlɛ, bonso, a bieu meŋ taa la o meŋɛ deme. Bebiri zaa taa la o meŋɛ yɛlɛ.