Read Southern Dagaare Mat 7 Bible Online

Mat 7 - Southern Dagaare bible

Mat 7

¹“Ta di fo tɔ sɛrɛɛ, ka ba ta wa di fo meŋ sɛrɛɛ.

²A lɛ fo naŋ di fo tɔ sɛrɛɛ, lɛ ka ba na di fo meŋ sɛrɛɛ. Bonna fo naŋ manne ne ko fo tɔsoba, a bonna ne o zu ka ba na manne ne ko fo meŋ.

³Bonso ka fo nyɛ muri naŋ be fo tɔsoba nimiri poɔ, kyɛ ba nyɛ a wɛge naŋ be fo meŋɛ nimiri poɔ?

⁴Bee wola ka fo na toɔ̃ yeli ko fo tɔsoba, ‘Vɛŋ ka N iri muri bare fo nimiri poɔ,’ kyɛ ka wɛge be fo meŋɛ nimiri poɔ?

⁵Fõõ bampuori-kombampoɔ ŋa, daŋ iri a wɛge naŋ be fo meŋɛ nimiri poɔ bare, lɛ ka fo na nyɛrɛ velaa a pãã toɔ̃ iri a muri bare fo tɔsoba nimiri poɔ.

⁶“Ta de bonsoŋ eŋ baare, bee a de fo boma naŋ taa yuori lɔɔ eŋ dobaare. A na neɛ a la sãã bare, kyɛ nyɔge fo meŋ tage kyore.

⁷“Yɛ sɔre, ba na ko yɛ la; yɛ bɔ, yɛ na nyɛ la, yɛ kpaare a pane, ba na yuo ko yɛ la ka yɛ kpɛ.

⁸Bonso, neɛzaa naŋ maŋ sɔre ba maŋ ko o la, neɛzaa meŋ naŋ maŋ bɔ o maŋ nyɛ la, ka a pane maŋ yuo ko neɛzaa meŋ naŋ kpaare.

⁹Nembuo la be yɛ poɔ kyɛ, ka o bie na sɔre boroboro ka o de kuuri ko o?

¹⁰Bee ka o bie na sɔre zommo, ka o de waabo ko o?

¹¹Ka yɛnee gba naŋ waa nenfaare baŋ ka yɛ de bonsoŋ ko yɛ bibiiri, wola ka yɛ Saa naŋ be tenvelaa[14] poɔ koŋ ko banaŋ zaa naŋ maŋ sɔre bonveɛle O zie gaŋ lɛ!

¹²Yelzaa poɔ, yɛ maŋ erɛ korɔ yɛ taaba a seŋ lɛ yɛ naŋ boɔrɔ ka ba erɛ korɔ yɛ; bonso, a begɛ ane a Ŋmen-yelmanneba wuluu tɛgɛ la a lɛ.

¹³“Tu a dendɔre na naŋ e fogloo kpɛ, bonso, a dendɔre na naŋ gɛrɛ weɛbo poɔ e la yɛloŋ ka o sori tuubu e mɔlɔ, ka noba yaga tuuro o.

¹⁴Kyɛ a nyɔvore dendɔre waa la fogloo, ka o tuubu waa tuo, ka noba fẽẽ tuuro o.

¹⁵“Yɛ baŋna ne a kaŋwaa Ŋmen-yelmanneba yɛlɛ. Ba maŋ pilli la pegama a wa yɛ zie kyɛ ka ba pooreŋ ka ba waa gboŋgboe.

¹⁶Ba yel-erre la na wuli noba na ba naŋ waa. Ba mɔɔ maŋ pɔre la zemberemɛ gɔteere zu bee a pɔre kaŋkanne gɔzaŋaa teɛ zu?

¹⁷A lɛ ne o zu, teɛ zaa naŋ waa velaa maŋ wɔŋ la wɔŋ veɛle; ka teɛ naŋ waa faa meŋ wɔŋ wɔŋ faare.

¹⁸Teɛ naŋ waa velaa kontoɔ̃ wɔŋ wɔŋ faare, bee ka teɛ naŋ waa faa wɔŋ wɔŋ veɛle.

¹⁹Teɛ na zaa naŋ ba wɔnɔ wɔŋ veɛle, ba na kyɛ o la a lɔɔ eŋ vũũ poɔ.

²⁰Azuiŋ yɛ na baŋ ba la a yi ba yel-erre zie.

²¹“A ba e ka neɛzaa naŋ boɔlɔ ma ‘Daana, Daana,’ la na kpɛ a tenvelaa naaloŋ. Kyɛ soba na yoŋ naŋ erɛ a N Saa naŋ be tenvelaa poɔ poboɔbo yɛlɛ la na kpɛ a tenvelaa

²²A bebiri na daare, noba yaga na yeli ko ma la, ‘Daana, Daana, te mɔɔ naane da moɔlɔ a Naaŋmen yelbiri a fo yuori eŋɛ, a da digre sefaare fo yuoriŋ, a kyɛ da tonɔ toŋkpeɛne yaga a fo yuori eŋɛŋ?’

²³Kyɛ N pãã na leɛ yeli ko ba la, ‘Maa ba baŋ yɛ togitogi; yɛ tage yi be N zie, yɛnee yelfa-erebɛ ŋa.’

²⁴“Neɛ na zaa naŋ woŋ a N yelbie ama, a erɛ seŋ lɛ a naŋ wuli, na waa seŋ ŋa dɔɔ yɛmbaŋna kaŋ naŋ mɛ o yiri piiri zu.

²⁵Ka saa mi, ka kɔmpie ŋmɛ, ka saseɛ fu dɔ̃ɔ̃ a yiri kyɛ ka o ba le, bonso, piiri zu la ka o biŋ a yiri pare.

²⁶Neɛ na zaa meŋ naŋ woŋ a N yelbie ama, kyɛ ba erɛ seŋ lɛ a naŋ wuli, na waa seŋ ŋa dɔɔ damboli kaŋ naŋ mɛ o yiri biiree zu.

²⁷Ka saa mi, ka kɔmpie ŋmɛ, ka saseɛ fu dɔ̃ɔ̃ a yiri ka o zaa le vɔgle teŋɛ muro muro. A leebu da sereŋ waa la kpoŋ yaga!”

²⁸A Yeezu naŋ da wa yeli a yɛlɛ ama zaa baare, a nembeɛoŋ nɔɛ da maaɛ la ne a O wuluu,

²⁹bonso, O da kanne ba la aŋa neɛ naŋ taa kpeɛ̃õ. O ne a Naaŋmen bege wulwulibo kannoo da ba yi taa.