Read Southern Dagaare Mat 9 Bible Online

Mat 9 - Southern Dagaare bible

Mat 9

¹A Yeezu naŋ da wa kpɛ a gbori baare, O da ŋmaa la a mane a wa O meŋɛ teŋɛ.

²A lɛ poɔŋ la ka noba mine da tuo dɔɔ kaŋ naŋ gbɛre, ka o gaŋ pane zu ka ba de o wa ne a Yeezu zie. A Yeezu naŋ da wa nyɛ a ba yeldeebo, O da yeli ko la a dɔɔ gbɛre, “Nyɔge fo meŋɛ, N bidɔɔ, fo yelbebe nyɛ la sudi.”

³Lɛ la ka a Naaŋmen bege wulwulibo mine sɔgle yele ba pooreŋ, “A dɔɔ ŋa toorɔ la Naaŋmen zoma.”

⁴Kyɛ a Yeezu naŋ da baŋ a ba poteɛrɛ, lɛ la ka O soore ba, “Bonso ka yɛ teɛrɛ faaloŋ yɛ pooreŋ?

⁵Yɛ yeli ko ma, a ama buo yeluu la e mɔlɔ, ‘Ba di la a fo yelbebe suuri ko fo,’ bee N naŋ na yeli, ‘Vaa-iri dendeŋ a kyɛnɛ’?

⁶Kyɛ ka yɛ na sereŋ baŋ ka a Nensaala Bie taa la kpeɛ̃õ a teŋɛzu kyɛ ka O di yelbebe suuri ko noba,” O pãã da yeli ko la a dɔɔ gbɛre, “Vaa-iri de fo pane a kulo fo yiri.”

⁷Ka a dɔɔ vaa-iri a te kulo o yiri.

⁸A nembeɛoŋ naŋ da wa nyɛ a lɛ, dabeɛ̃ da kpɛ ba la yaga zaa, ka ba puuro Naaŋmen yuori, ane O naŋ de kpeɛ̃õ ŋa tɔ ko nensaalba.

⁹A Yeezu naŋ da wa kyɛnɛ gɛrɛ, O da nyɛ la dɔɔ kaŋ yuori naŋ di Matio, ka o zeŋ zuyɔɔ die poɔ, ka a Yeezu yeli ko o, “Iri tuuro ma,” ka o vaa-iri a tuuro O.

¹⁰Kyɛ O naŋ da wa te kpɛ a Matio die a zeŋ ka O di diibu la ka a zuyɔɔ-derebɛ ane yelbe-erebɛ yaga da wa laŋ zeŋ ne a Yeezu ane O potuuribo a diibu zie.

¹¹A Faraziimine naŋ da wa nyɛ a lɛ, ba da soore la a O potuuribo, “Bonso ka a yɛ Wulwullo laŋ dire ne zuyɔɔ-derebɛ ane yelbe-erebɛ?”

¹²Kyɛ a Yeezu naŋ da wa woŋ a lɛ, O da yeli ko ba la, “Noba naŋ taa laafeɛ ba boɔrɔ tegetegrɛ, kyɛ baalba la maŋ boɔrɔ tegetegrɛ.

¹³Yɛ gaa a te bɔ a yelbie ama tɛgɛ, ‘Nembaalonzoe la ka N boɔrɔ, a ba e bagmaale.’ N ba wa ka N boɔle nemmenne, kyɛ N waɛ la ka N boɔle yelbe-erebɛ.”

¹⁴Lɛ la ka Gyɔɔn Bati potuuribo da wa a Yeezu zie a wa soore O, “Bonso ka te ne a Faraziimine maŋ lenne noɔre boyi boyi kyɛ ka fo potuuribo ba lenne?”

¹⁵Ka Yeezu yeli ko ba, “Yɛ teɛrɛ ka a pɔgde tigri saama na toɔ̃ kono la kuori saŋ na a pɔgpaalaa serɛ naŋ be ba zie be? A beri waana la ka a serpaalaa koŋ la be ba zie, a lɛ saŋ la ka ba na maŋ leŋ noɔre.

¹⁶Neɛzaa daŋ ba de pɛmpaalaa liiri ne kpar-koraa, ka o naŋ e a lɛ a pɛmpaalaa na kyeɛ̃ yi la a kpar-koraa eŋɛ ka a lɛ vɛŋ ka a voɔre pãã maaleŋ waa kpoŋ lɛ.

¹⁷Kyɛ bee ka ba de dããpaala eŋ dããwo-korɔ poɔ. Ka anaŋ e a lɛ, ka a dãã wa fara, a woore na kyeɛ̃ la ka a dãã ne a woore zaa wɛ. Ba maŋ de la dããpaala eŋ wo-kpeɛne poɔ. Lɛ ka a dãã ne a woore zaa na are velaa.”

¹⁸A Yeezu naŋ da naŋ kyɛnɛ yele a yɛlɛ a korɔ ba la, ka a Naaŋmen die neŋkpoŋ kaŋ da wa o zie a wa gbi dumo, kyɛ yele, “Pampana ŋa ka n pɔgeyaa deɛ kpi, kyɛ wa de a fo nu pare o, o na leɛ-iri voorɔ la.”

¹⁹Ka a Yeezu ne O potuuribo iri a tuuro a dɔɔ.

²⁰A tɔntɔbaalɛ la ka pɔge kaŋ naŋ da taa pɔg-pɛge baaloŋ a maŋ kyire zẽẽ faa zaa yuomo pie ne ayi, la wa gyeere a Yeezu puori a te seene O kpar-nɔzoɔrɔ,

²¹bonso, a pɔge da yeli la o poɔŋ, “Ka maa seene O bonsuuri yoŋ gba kyɛ N na nyɛ la sammo”

²²A Yeezu naŋ wa leɛ kaa a nyɛ a pɔge la ka O yeli, “Nyɔge fo meŋɛ, N pɔgeyaa, fo yeldeebo eɛɛ la ka fo nyɛ sammo.” A tɔntɔbaalɛ ka a pɔge nyɛ sammo.

²³A Yeezu naŋ da wa ta a puoruudie neŋkpoŋ na yiri, O da nyɛ la koŋkonemo ka ba ŋmaara kolaŋne, kyɛ ka neŋyaga daara taa, ka a zie zaa e nyambalaŋ lɛ,

²⁴ka a Yeezu yeli, “Yɛ tage yi be; bonso, a pɔglee ba kpi, o gbire la.” O naŋ da yeli a ŋaa la ka a noba da laara O.

²⁵Kyɛ a nembeɛoŋ naŋ da wa yi are a yeŋ poɔ, a Yeezu da te kpɛ la a zie na a pɔglee naŋ gaŋ, a te nyɔge o nu, ka o vaa-iri.

²⁶A yɛlɛ ŋa pãã da yaare laare la a ba teŋɛ paaloŋ na zaa.

²⁷A Yeezu naŋ da wa yi a be gɛrɛ, zɔnne mine bayi da tuuro O la, a kyeerɛ yele, “Zo te nyonono, Davil Bidɔɔ!”

²⁸A Yeezu naŋ da wa te kpɛ a die, a dɔɔ zɔnne bama da wa la O zie; ka Yeezu soore ba, “Yɛ sage deɛ la ka N na toɔ̃ e la a yɛlɛ ama?” Ka ba yeli ko O, “Te sagɛɛ la Daana.”

²⁹Lɛ la ka a Yeezu seene ba nimie kyɛ yeli, “Ka a e ko yɛ a seŋ lɛ yɛ naŋ sage de.”

³⁰Ka a ba nimie da yuore. Lɛ la ka a Yeezu da kpãã ba nimizeɛ zaa, a yeli, “Yɛ ta wa manna a yeli ŋa korɔ neɛzaa.”

³¹Kyɛ ba da gaaɛ la a te ŋmɛ a Yeezu yɛlɛ yaare a ba teŋɛ paaloŋ zaa.

³²Ba naŋ da wa gaa baare, ba da taa la dɔɔ kaŋ sefaare naŋ vɛŋ ka o e muu wa ne a Yeezu zie.

³³A Yeezu naŋ wa digi a sefaa ka o yi baare la ka a muu ŋa da yele yɛlɛ, ka a lɛ maa a noba zaa noɔre, ka ba yele, “Te daŋ ba nyɛ a yeli ŋa tɔ a Izerayɛl teŋɛ poɔ.”

³⁴Kyɛ ka a Faraziimine da yele, “A sefaare naa la ko O a kpeɛ̃õ ka O digre ne a sefaare bara.”

³⁵Lɛ la ka a Yeezu da yoɔrɔ a teŋkponni ane a tembilii zaa poore a kanna a ba puoruuderi poore, a moɔlɔ a Ŋmen-yelnoore a kyaara ne a naaloŋ, kyɛ saŋna ba baaloŋ ane ba entol-boorɔ zaa.

³⁶O naŋ da wa nyɛ a nembeɛoŋ, ba nembaaloŋ da kpɛ O la, bonso, ba da be la woore poɔ kyɛ ba taa soŋnɔ zaa, aŋa peere naŋ ba taa kyeenɛ.

³⁷Lɛ la ka Yeezu yeli ko a O potuuribo, “A weɛ boma waa la yaga a seŋ kyeɛbo, kyɛ ka a kyɛkyeɛrebɛ waa fẽẽ lɛ.

³⁸Azuiŋ, yɛ puoro sɔrɔ a weɛ soba ka o toŋ tontonema ka ba gaa te de a weɛ boma ka a kpɛ die.”