Read Southern Dagaare Mak 11 Bible Online

Mak 11 - Southern Dagaare bible

Mak 11

¹Ba naŋ da wa te tara Gyɛruzɛlɛm, a peɛle Bɛtefage ane Bɛtani naŋ are a Oliva Taŋ lamboriŋ, a Yeezu da toŋ la O potuuribo bayi,

²a yeli ko ba, “Yɛ gaa a tembile na naŋ be yɛ niŋesogɔ, ka yɛnee wa te kpeɛrɛ a teŋɛ poɔ yɛ na nyɛ la boŋlee kaŋ neɛzaa naŋ daŋ ba zɔŋ zaa ka o leŋ are a be, yɛ lori o a taa wa ne.

³Ka neɛzaa wa soorɔ yɛ, ‘Bonso ka yɛ erɛ a ŋaa?’ yɛ deɛ yeli, ‘A Daana la boɔrɔ o, ka O naŋ wa baare, O na leɛ tere la ka ba wa ne o daadaalɛ.’ ”

⁴Ba da gaa te nyɛ la a boŋlee ka o leŋ are peɛle a dendɔre a yeŋe poɔ a sobiri zu. Ba naŋ da wa te loro o la

⁵ka noba mine naŋ are peɛle a be soore ba, “Bonso ka yɛ wa loro a boŋlee?”

⁶Ka ba da yeli ko ba lɛ a Yeezu naŋ da yeli; lɛ la ka a noba da vɛŋ ba ka ba taa a boŋlee gɛrɛ ne.

⁷Ba pãã da taa la a boŋlee wa ko a Yeezu, kyɛ yagre ba bonsuuri a yɛre dɔgle a boŋlee zu ka a Yeezu do zɔŋ.

⁸Noba yaga da yagre la ba bonsuuri yɛre a sobiri zu, ka ba mine meŋ kɔɔre vaare yi a wɛre poore a yɛre a sobiri zu.

⁹A noba banaŋ naŋ da de weɛ ane banaŋ naŋ da be a Yeezu puoriŋ, da kyaara la yaga zaa, a yele: “Hozaana! Soba na naŋ waana a Daana yuori eŋɛ nyɛ la maaloo!

¹⁰Te sããkoma Davil naaloŋ naŋ waana nyɛ la maaloo! Ka Naaŋmen naŋ be sazu nyɛ puubu!”

¹¹Lɛ la ka a Yeezu da gaa Gyɛruzɛlɛm a te kpɛ a Naaŋmen die; O naŋ da wa te kaa a boma zaa gyeere, O ne a potuuribo pie ne bayi da yi gaa la Bɛtani teŋɛ a saŋ naŋ da faa zuiŋ.

¹²Zie naŋ da wa nyaa ka ba leɛ yi a Bɛtani a waana, kɔŋ da kpɛ la a Yeezu.

¹³O da naŋ te be la tɔɔre kyɛ nyɛ kaŋkanteɛ naŋ te are a taa vaare. Lɛ la ka a Yeezu da gaa o pare ka O te nyɛ ka o taa la wɔmɔ be. O naŋ da ta a teɛ pare, O da ba nyɛ wɔne zaa, ka vaare yoŋ naane, bonso, a da ba waa kaŋkanne wɔmmo saŋ.

¹⁴Ka a Yeezu yeli ko a kaŋkanteɛ, “Fo daŋ koŋ la wɔŋ wɔne zaa ka neɛ di.” A O potuuribo da woŋ la a lɛ O naŋ da yeli.

¹⁵Lɛ la ka a Yeezu ne O potuuribo da wa Gyɛruzɛlɛm. Ka O da te kpɛ a Naaŋmen die poɔ a piili digre a noba banaŋ naŋ da koɔrɔ boma ane a banaŋ naŋ daara boma a Naaŋmen die poɔ. O da daa la a libi-tɛgrebɛ tabolɔ lɔɔ, a daa a banaŋ meŋ naŋ da koɔrɔ ŋmama dakogri lɔɔ;

¹⁶kyɛ da ba sage ka neɛzaa de bonzaa tu ne a Naaŋmen die tɔle.

¹⁷O da kanna la a noba a yele, “Ba da ba sɛge a Naaŋmen gane poɔ: ‘Ba na boɔlɔ la a N yiri nemboorɔ zaa puoruu yiri’? Kyɛ ka yɛ e ka o leɛ nannyig-kpeɛne sɔgloozie.”

¹⁸A Naaŋmen bagmaalkare ane a Naaŋmen bege wulwulibo naŋ da wa woŋ a yɛlɛ ama, ba da piili boɔrɔ la sori na ba naŋ na tu a ko a Yeezu. Kyɛ ba da zoro la O dabeɛ̃, bonso, a noba zaa nɔɛ da maaɛ la ne a O kannoo.

¹⁹Zie naŋ da wa maa, a Yeezu ane O potuuribo da yi la a teŋkpoŋ poɔ.

²⁰A baguo saŋ ba naŋ da wa kyɛnɛ tɔlɔ, a potuuribo da nyɛ la a kaŋkanteɛ na ka o ko o zaa a sigi tɔ o nyaga.

²¹Lɛ la ka Piita leɛ-teɛre a yeli ko a Yeezu, “Wulwullo, nyɛ! A kaŋkanteɛ na fo naŋ da kaa-eŋ la ko o zaa.”

²²Ka a Yeezu yeli sɔge ba, “Yɛ taa yeldeebo Naaŋmen eŋɛ.

²³Yelmeŋɛ zaa ka N yele korɔ yɛ, ka yɛnee yeli ko a taŋ ŋa, ‘Iri sigi te le a mane poɔ’; kyɛ ba bonnɔ togitogi zaa fo sukyiri poɔ, kyɛ sage de ka a lɛ yɛ naŋ yeli na nyɛ la eebo, a sereŋ na e la a lɛ.

²⁴Azuiŋ, N yele korɔ yɛ la, bonna zaa yɛ naŋ sɔre a yɛ puoruu poɔ, yɛ sage de ka yɛ nyɛɛ la, kyɛ a sereŋ na e la yɛ soobo.”

²⁵“Kyɛ saŋ na zaa yɛ naŋ wa are puoro, yɛ maŋ di suuri ko neɛzaa naŋ sãã yɛ, a lɛ na vɛŋ la ka yɛ Saa naŋ be tenvelaa[11] poɔ meŋ di yɛ yelbebe suuri ko yɛ.”

²⁶Kyɛ ka yɛnee ba di suuri ko yɛ taaba naŋ sãã yɛ, yɛ Saa naŋ be tenvelaa poɔ meŋ koŋ di suuri ko yɛ.

²⁷A Yeezu ne O potuuribo da laboreŋ wa la Gyɛruzɛlɛm. O naŋ da wa te yoɔrɔ a puoruudie poɔ la ka a Naaŋmen bagmaalkare, ane a Naaŋmen bege wulwulibo ane a teŋɛ nembɛrɛ da wa O zie,

²⁸a wa soore O, “Yeŋ la ka fo nyɛ a kpeɛ̃õ ŋa a tonɔ ne a toma ama? Nembuo la ko fo a kpeɛ̃õ ka fo tonɔ ne a?”

²⁹Ka a Yeezu yeli ko ba, “N meŋ na soore yɛ la soorebiri bon-yeni, ka yɛnee wa iri a noɔre ko ma, N meŋ na yeli ko yɛ la benee N naŋ nyɛ a kpeɛ̃õ erɛ ne a yɛlɛ ama.

³⁰Yɛ yeli ko ma: A Gyɔɔn suobu da yi la Naaŋmen zie bee nensaala zie?”

³¹Lɛ la ka ba leɛ ŋmeɛrɛ nɔkpeɛne ne taa a yele, “Ka tenee yeli, ‘Naaŋmen zie la,’ O na soore te la, ‘Boŋ pãã so ka yɛ da ba sage de o yɛlɛ?’

³²Kyɛ bee te yeli, ‘Nensaala zie la’?” Ba da zoro la a noba dabeɛ̃, bonso, a noba zaa da sage ka a Gyɔɔn sereŋ waa la Ŋmen-yelmanna.

³³Lɛ la ka ba yeli sɔge a Yeezu, “Te ba baŋ.” Ka a Yeezu meŋ yeli ko ba, “Ka lɛ N meŋ koŋ yeli ko yɛ neɛ na zie N naŋ nyɛ a kpeɛ̃õ a tonɔ ne a toma ama.”