Read Southern Dagaare Mak 14 Bible Online

Mak 14 - Southern Dagaare bible

Mak 14

¹A da kyɛre la bebie ayi kyɛ ka a Ista tigri ane a Boroboro Dambo tigri na ta. A Naaŋmen bagmaalkare ane a Naaŋmen bege wulwulibo da boɔrɔ la sori ka ba nyɔge a Yeezu ko;

²bonso, ba da yelee la, “A ba seŋ ka a e a lɛ a tigri bebie ama poɔ, ka lɛ naane dɔɔne na dɔ̃ɔ̃ la a noba poɔ.”

³A Yeezu naŋ da naŋ be a Saamon naŋ e kɔŋkɔŋ yiri a Bɛtani teŋɛ poɔ, a da zeŋ dire diibu la ka pɔge kaŋ da taa turaali mine daaroŋ naŋ ba wono wa ne, a wa nyɔge a kããkolee ŋmɛre kyɛ de a kãã pore waare a Yeezu zu.

⁴Kyɛ a noba mine naŋ da be a be da yele ne la suuri korɔ taa, “A saamo ŋa tɛgɛ la boŋ?

⁵Ba da na toɔ̃ koɔre la a turaali ŋa ka a yi bebie kɔɔraata san-yɔɔ, ka ba de a libie ko nembaalba.” Lɛ la ka ba da nyare a pɔge zu.

⁶Kyɛ ka a Yeezu da yeli, “Yɛ bare a pɔge lɛ; bonso ka yɛ dɔɔnɔ o? O toŋ la tonsoŋ ko ma.

⁷Bonso, nembaalba na maŋ be la yɛ zie tegitegilɛ, ka yɛ na toɔ̃ soŋ ba saŋ na zaa yɛ naŋ boɔrɔ; kyɛ maa koŋ be yɛ zie tegitegilɛ.

⁸A pɔge ŋa e la yeli o naŋ na toɔ̃ e; o daŋ sɔ la N eŋɛ a kããsoŋ a gu ne o ũũmu.

⁹Yelmeŋɛ ka N yele korɔ yɛ, zie na zaa ba naŋ na manne a Ŋmen-yelnoore ŋa a tendaa zaa poɔ, ba na yeli la bonna a pɔge ŋa naŋ e, ka ba leɛ-teɛre o yɛlɛ.”

¹⁰Lɛ la ka Gyudase Ezekarɔte, naŋ da waa a potuuribo pie ne bayi na kaŋ, da gaa a Naaŋmen bagmaalkare zie ka ba te bɔ lɛ o naŋ na e a iri a Yeezu ko ba.

¹¹Ba naŋ da woŋ a lɛ, ba poore da pɛlɛɛ la yaga, ka ba eŋ noɔre ka ba na ko o la libie. Ka a Gyudase pãã da piili boɔrɔ vuo ka o iri a Yeezu tere.

¹²A Boroboro Dambo tigri bebi-dɛndɛŋ, a daare na ba naŋ maŋ ko a Ista tigri pilee, a O potuuribo da soore O la, “Yeŋ la ka fo boɔrɔ ka te gaa nare ka fo wa di a Ista tigri?”

¹³Lɛ la ka a Yeezu toŋ a O potuuribo bayi, a yeli ko ba, “Yɛ gaa a teŋkpoŋ poɔ, yɛ na tuori la dɔɔ kaŋ naŋ tuo koɔ̃ ne yuori; yɛ tuuro o,

¹⁴zie na zaa o naŋ wa te kpɛ, yɛ yeli ko a yidandɔɔ, ‘A Wulwullo soorɔ la, yeŋ ka N saama die be ka N ne N potuuribo na wa di a Ista tigri?’

¹⁵O na wuli yɛ la peɛzu die kaŋ naŋ e yɛloŋ ka bonzaa bebe, yɛ nare a be kyɛllɛ ne te.”

¹⁶Lɛ la ka a potuuribo da gaa a teŋkpoŋ poɔ, a te nyɛ a yɛlɛ zaa ka a e seŋ a lɛ a Yeezu naŋ da yeli ko ba; ka ba da nare a Ista tigri bondirii a be.

¹⁷Zie naŋ da wa maa a Yeezu ne a O potuuribo pie ne bayi da waɛ la.

¹⁸Ba naŋ da wa zeŋ ba zenziiri baare a dire, a Yeezu da yelee la, “Yelmeŋɛ zaa ka N yele korɔ yɛ, a yɛ kaŋ naŋ laŋ dire ne ma na yi la N puori, a iri ma tere.”

¹⁹Posãã-kpoŋ da piili kpɛ la a potuuribo ka ba kanzaa da soorɔ, “Serɛzaa, kyɛ maa eŋ naane wɛ?”

²⁰Ka a Yeezu yeli ko ba, “A soba waa la a pie ne bayi kaŋ, a onaŋ naŋ laŋ tonɔ a o nu a laa poɔ ne ma la.

²¹A Nensaala Bie erɛɛ yɛlɛ seŋ lɛ ba naŋ sɛge kyaare ne O, kyɛ soba na naŋ na iri a Nensaala Bie tere yuori la we! Ka ba naŋ da ba dɔge o soba gba anaŋ da seɛ.”

²²Ba naŋ da naŋ dire, a Yeezu da de la boroboro, a maale kyɛ nyɔge ŋmaa a de ko a O potuuribo, kyɛ yeli, “Yɛ de; a N eŋɛ la aŋa.”

²³Lɛ la ka O da la de ŋmanlee, a puori Naaŋmen bareka baare, kyɛ de ko ba, ka ba zaa da de nyu.

²⁴O da yeli ko ba la, “A N nɔpaalaa zẽẽ la ama naŋ kyiri yaare neŋyaga zuiŋ.

²⁵Yelmeŋɛ ka N yele korɔ yɛ, N daŋ koŋ la nyu a tewɔmɔ dãã, kyɛ te ta a daare na te zaa naŋ na laŋ nyu a dããpaala a Naaŋmen naaloŋ poɔ.”

²⁶Ba naŋ da wa yieli a puubu yieluŋ baare, ba da yi gaa la a Oliva Taŋzu.

²⁷A Yeezu da yeli ko ba la, “Yɛ zaa na zo yaare la a seŋ lɛ ba naŋ da sɛge, ‘N na ŋmɛ la a pekyeenɛ, ka a peere zaa zo yaare.’

²⁸Kyɛ ka maa wa leɛ-iri, N na de la yɛ weɛ gaa Galili.”

²⁹Ka Piita yeli ko O, “Haali ka ba zaa na zo yaare, kyɛ maa eŋ koŋ zo.”

³⁰Ka a Yeezu yeli ko o, “Yelmeŋɛ ka N yele korɔ fo, a zenɛ tensogɔ ŋa, nɔdaa koŋ koŋ gbɛre boyi sɛre, kyɛ ka fo kyiiri ka fo ba baŋ ma gbɛre bota.”

³¹Ka a Piita leɛ yeli kpeɛŋaa zaa, “Ka anaŋ na e feroo ka maa ne fo laŋ kpi gba, kyɛ N koŋ zagre fo bare.” Ka ba zaa yeli a lɛ ne o zu.

³²Ba da gaa la zie kaŋ ba naŋ boɔlɔ Gɛsamane; ka a Yeezu da yeli ko a O potuuribo, “Yɛ zeŋ a kyɛ, kyɛ ka N gaa te puori.”

³³O da taa la Piita, Gyimisi ane Gyɔɔn gaa ne, ka posãã-kpoŋ da piili kpɛ O, ka O da nyɔgrɔ O meŋɛ faana.

³⁴O da yeli ko ba la, “N poɔ sããɛ la yaga ka N te tɔgle kũũ; yɛ zeŋ kyɛ a ta wa gbire.”

³⁵A Yeezu naŋ da wa kyɛŋ gaa nimitɔɔre belaa, O da le vɔgle la teŋɛ a puoro yele, ka anaŋ da na taa eebo, vɛŋ ka a gogo ŋa wa pare ma bare.

³⁶O da yelee la, “N Ba, N Saa, yɛlɛ zaa na toɔ̃ nyɛ la eebo fo zie, de a zuŋmanekoɔ̃ ŋa yi N zie, ka a ta e seŋ lɛ maa naŋ boɔrɔ, kyɛ e seŋ fõõ naŋ boɔrɔ lɛ.”

³⁷O da leɛ wa nyɛ ba la ka ba gbire; ka O soore Piita, “Saamon, yɛ gbire la? Ka lɛ yɛ kontoɔ̃ bare goɔŋ gogo yeni?

³⁸Yɛ ta gbire, yɛ puoro ka yɛ ta wa kpɛ enyaabo poɔ; a seɛ eŋ sereŋ boɔrɔ la, kyɛ ka a eŋɛ ba taa faŋ.”

³⁹O da laboreŋ leɛ gaaɛ la a te puoro, a yele a yelbie na ne a zu.

⁴⁰O da leɛ wa nyɛ ba la ka ba da gbire, bonso ba nimie da pa ne la goɔŋ; ka ba da ba baŋ bon ba naŋ na yeli ko O.

⁴¹A Yeezu da leɛ wa la a gbɛre bota poɔ a wa soore ba, “Yɛ mɔɔ naŋ gbire la a pɛnnɛ? A seŋɛɛ la! A saŋ taɛ la, ka ba na iri a Nensaala Bie eŋ a yelbe-erebɛ nuuriŋ.

⁴²Yɛ iri ka te gaa. Yɛ nyɛ, a soba na naŋ na iri ma tere peɛlɛɛ la.”

⁴³A daadaalɛ, Yeezu naŋ da naŋ kyɛnɛ yele a yɛlɛ la ka Gyudase, a potuuribo pie ne bayi na kaŋ wa ta, ka nembeɛoŋ naŋ taa zɔɔzɔɔ-sɔre ane dabɔlɔ tuuro o. A Naaŋmen bagmaalkare ane a Naaŋmen bege wulwulibo ane a nembɛrɛ la da toŋ ba.

⁴⁴A soba na naŋ da iri a Yeezu tere da ko ba la yelwulaa kaŋ, a yele, “A soba na N naŋ na te nyɔge moore la a lɛ, yɛ nyɔge O a gu O velaa gɛrɛ ne.”

⁴⁵Azuiŋ a Gyudase naŋ da wa ta, o da gaa la a Yeezu zie daadaalɛ a te boɔle O, “Wulwullo!” kyɛ nyɔge O moore.

⁴⁶Lɛ la ka a noba pãã da ŋmore nyɔge O.

⁴⁷Kyɛ a neɛ kaŋ naŋ da are a be da voɔ la o zɔɔzɔɔ-soɔ a kyɛ ne a Naaŋmen bagmaalkare neŋkpoŋ gbaŋgbaa toori kpɛlle.

⁴⁸Lɛ la ka a Yeezu soore ba, “Yɛ yie la wa ka yɛ nyɔge ma ne zɔɔzɔɔ-sɔre ane dabɔlɔ aŋa ka fafaara kaŋ la ma, bee wola?

⁴⁹Bie la bie zaa ka maa ne yɛ da maŋ be a Naaŋmen die poɔ ka N kanna noba, kyɛ ka yɛ da ba nyɔge ma. Kyɛ a seŋ ka a Naaŋmen gane yɛlɛ tu a tuubu.”

⁵⁰A potuuribo zaa da bare O la kyɛ zo.

⁵¹Pɔlbile kaŋ da tuuro O la a vaare wagyɛ yoŋ. Ba da nyɔge o la,

⁵²ka o da fuori a wagyɛ eŋ ba nuuri poɔ kyɛ zo ne eŋkpoŋkpoli.

⁵³Ba da taa la a Yeezu gaa ne a Naaŋmen bagmaalkare neŋkpoŋ zie, ka a Naaŋmen bagmaalkare zaa ane a teŋɛ nembɛrɛ ane a Naaŋmen bege wulwulibo da lantaa a be.

⁵⁴Piita da be la tɔɔre zaa a tuuro a Yeezu, a te kpɛ a Naaŋmen bagmaalkare neŋkpoŋ davoro poɔ; ka o ne a guguribo te laŋ zeŋ uoro vũũ.

⁵⁵A Naaŋmen bagmaalkare ane a sɛrediribe zaa da boɔrɔ la yelsaanaa ka ba tuo a Yeezu ka ba e lɛ a ko O; kyɛ ba da ba nyɛ saanaa zaa.

⁵⁶Noba yaga da di la danse-zirii a kyaare ne a Yeezu kyɛ a ba danseɛ da ba maŋ tutaa.

⁵⁷Ka ba mine da iri are kyɛ di danse-zirii a kyaare a Yeezu, a yele:

⁵⁸“Te da woŋee la ka O yeli, ‘N na ŋmore la a Naaŋmen die ŋa ba naŋ mɛ ne nuuri, kyɛ a beri ata poɔ ka N leɛ mɛ o tɔ, ba naŋ koŋ de nuuri mɛ ne.’ ”

⁵⁹Kyɛ a saŋ ŋa poɔ gba, a ba danseɛ da ba tutaa.

⁶⁰Lɛ la ka a Naaŋmen bagmaalkare neŋkpoŋ da iri are ba niŋesogɔŋ kyɛ soore a Yeezu, “Fo ba taa noɔre iruu zaa be? Boŋ yɛlɛ la ama ba naŋ yele kyaare ne fo?”

⁶¹Kyɛ a Yeezu da taŋ la O noɔre a ba yeli yelzaa sɔge. Ka a Naaŋmen bagmaalkare neŋkpoŋ laboreŋ soore O, “Fõõ la a Mɛzaaya,[18] a Puubu Naaŋmen Bie na?”

⁶²Ka a Yeezu yeli, “Maa la; kyɛ: ‘yɛ na nyɛ la a Nensaala Bie ka o zeŋ a Kpeɛ̃õ Zaa Daana nuduluŋ seŋ,’ a ‘waana ne a sazu zunzugri.’ ”

⁶³Lɛ la ka a Naaŋmen bagmaalkare neŋkpoŋ deɛ tage o bonsuuri kyeɛre kyɛ yeli, “Boŋ danseɛ la ka te naŋ kyɛnɛ boɔrɔ?

⁶⁴Yɛ woŋ la a zone O naŋ to Naaŋmen! Wola ka yɛ teɛre?” Ka ba zaa yeli ka O lee la a seŋ ne kũũ.

⁶⁵Ka ba mine piili toorɔ nentaare waara O, a leŋ O niŋe pɔge, a kyɛ maŋ ŋmɛ O, a yele korɔ O, “Baŋna baŋna, aŋ la ŋmɛ fo!” A guguribo meŋ da tuori nyɔge O la a ŋmɛ.

⁶⁶Piita naŋ da naŋ kyɛnɛ sigi be a davoro poɔ la ka pɔgsarlee kaŋ naŋ da waa a Naaŋmen bagmaalkare neŋkpoŋ tontonɔ wa tɔlɔ.

⁶⁷O naŋ da wa nyɛ a Piita ka o uoro vũũ, o da vɔ la nimie eŋ o kyɛ yeli, “Fo meŋ da be la a Yeezu zie, a dɔɔ na naŋ yi a Naazɛrɛ.”

⁶⁸Ka a Piita da kyiiri, a yele, “N ba baŋ bonna fo naŋ yeli bee a baŋ a tɛgɛ.” O pãã da iri yi la yeŋ. Lɛ la ka a nɔdaa deɛ koŋ.

⁶⁹Ka a pɔgsarlee naŋ da waa a Naaŋmen bagmaalkare neŋkpoŋ tontonɔ, naŋ da wa nyɛ o, ka o laboreŋ piili yele korɔ a noba mine naŋ are a be, “A dɔɔ ŋa meŋ da waa la ba kaŋ.”

⁷⁰Ka a Piita laboreŋ kyiiri. Lɛ la ka a da la e belaa ka a ba mine naŋ da are a be laboreŋ yeli ko a Piita, “Serɛzaa fo meŋ waa la ba kaŋ; bonso, fo waa la Galili neɛ.”

⁷¹A Piita da piili kaara eŋnɛ la o meŋɛ kyɛ poɔrɔ yele, “Maa ba baŋ a dɔɔ ŋa yɛlɛ yɛ naŋ yele.”

⁷²A lɛ poɔ la ka a nɔdaa da koŋ a boyi soba. Lɛ la ka a Piita da leɛ-teɛre a yɛlɛ na Yeezu naŋ da yeli ko o, “Nɔdaa koŋ koŋ gbɛre boyi sɛre kyɛ ka fo kyiiri gbɛre bota ka fo ba baŋ ma.” Ka a Piita da ŋma nentaŋ yaga zaa.