Read Southern Dagaare Mak 15 Bible Online

Mak 15 - Southern Dagaare bible

Mak 15

¹Zie naŋ deɛ da wa te nyaa, a Naaŋmen bagmaalkare ane a teŋɛ nembɛrɛ ane a Naaŋmen bege wulwulibo ane a sɛrediribe zaa da laŋ la taa a bo. Ba da leŋ la a Yeezu a taa O te ko Pilato.

²A Pilato da soore O la, “Fõõ la a Gyuumine Naa be?” Ka a Yeezu yeli sɔge o, “Fõõ la yeli a lɛ.”

³Lɛ la ka a Naaŋmen bagmaalkare da de yelsaane yaga dɔgle O.

⁴Ka a Pilato laboreŋ soore O, “Fo ba taa yelzaa na yeli be? Nyɛ yelsaane yaga ba naŋ de dɔgle fo seŋ lɛ.”

⁵Kyɛ a Yeezu da ba la yeli yelzaa sɔge o, ka a Pilato noɔre da maa.

⁶A Gyuumine tigri saŋ a Pilato da maŋ iri la a noba ba naŋ pɔge kaŋ bare. Soba na zaa a noba poɔ naŋ pɛle ne la ka o maŋ iri bare.

⁷Dɔɔ kaŋ ba naŋ da boɔlɔ Baraba da be la a nempagdie poɔ ane neŋkooreba mine naŋ da ko noba a saŋ na ba naŋ da dɔ̃ɔ̃ a teŋɛ.

⁸Lɛ la ka a noba da wa piili yele korɔ Pilato ka o e ko ba lɛ o naŋ da maŋ e a tigri saŋ.

⁹Lɛ la ka a Pilato soore ba, “Yɛ boɔrɔ la ka N bare a Gyuumine Naa be?”

¹⁰Bonso, o da baŋ ka nyuuri la so ka a Naaŋmen bagmaalkare taa a Yeezu wa ko o.

¹¹Kyɛ a Naaŋmen bagmaalkare pãã da tɔ la a noba eŋ ka ba sɔre a Pilato ka o iri Baraba ko ba.

¹²Ka a Pilato laboreŋ soore ba, “Ka lɛ boŋ ka yɛ boɔrɔ ka N e ne a neɛ na yɛ naŋ boɔlɔ a Gyuumine Naa?”

¹³Ka a noba kyeere, “Kpa O dagaraa zu!”

¹⁴Ka a Pilato soore ba, “Wola, boŋ yelfaa la ka O e?” Kyɛ a noba da maaleŋ kyeere ne la kɔkɔkpeɛne yaga zaa, “Kpa O dagaraa zu!”

¹⁵A Pilato naŋ da boɔrɔ ka o pɛle a noba poɔ zuiŋ, o da iri la a Baraba ko ba, kyɛ e ka ba feɛ a Yeezu yaga, kyɛ pãã da de O ko ba ka ba te kpa a dagaraa zu.

¹⁶Lɛ la ka a sogyɛre da taa a Yeezu te kpɛ ne a naa yiri davoro poɔ (a be da waa la a gɔbena yikpoŋ), kyɛ pãã da boɔle ba taaba zaa lantaa.

¹⁷Ba pãã da de la kpareze-kpoŋ kaŋ su a Yeezu, kyɛ de goore ŋmeɛle maale ne zupili a vɔgle O.

¹⁸Ba pãã da piili erɛ O la laara, “Yaane, Gyuumine Naa!”

¹⁹Ba da de la mupilaa va ne o zu, a toorɔ nentaare waara O, kyɛ gbi dumo O niŋe a puori O ne seɛ.

²⁰Ba naŋ da wa e O la baare, ba da la nyɔge la a kpareze-kpoŋ yage kyɛ de O meŋɛ kparoo leɛ su O. Ba pãã da taa O la yi ne ka ba te kpa a dagaraa zu.

²¹Ba da tuori la dɔɔ kaŋ ka o da yi weɛ waana ka ba da fere o ka o tuo a Yeezu dagaraa. A dɔɔ ŋa da e la Saarin teŋɛ neɛ, ka o yuori da di Saamon. Ona da la Alɛzanda ane Urufuse saa.

²²Lɛ la ka ba da taa a Yeezu gaa ne zie kaŋ ba naŋ boɔlɔ Golgota (a Golgota tɛgɛ la zukoɔre zie).

²³Ba da de la tẽẽ naŋ na e ka O eŋɛ dare a pulli ne dãã ko a Yeezu ka O nyu, kyɛ O da ba nyu.

²⁴Ba da kpa O la a dagaraa zu, kyɛ de O bonsuuri a ŋmɛ gbaŋ, a poŋ taa. Ba da ŋmɛ la a gbaŋ ka ba nyɛ bonna kanzaa naŋ na de.

²⁵A da e la baguo gbelli awae saŋ ba naŋ da kpa a Yeezu a dagaraa zu.

²⁶A O yelsaanaa ba naŋ da sɛge la, “A Gyuumine Naa.”

²⁷Ba da laŋ kpa la fafareba mine bayi ne a Yeezu, kaŋ O duluŋ seŋ, kaŋ meŋ O gɔɔ seŋ. [

²⁸Lɛ ka a gansoŋ yelbie tu a tuubu, “Ba da sɔre O la eŋ yelbe-erebɛ poɔ.”]

²⁹Noba naŋ da waana tɔlɔ da toorɔ O la kyɛ gɔgrɔ ba zuri, kyɛ yele, “Ahaa! Fõõ naane da yeli ka fo na toɔ̃ ŋmore la a Naaŋmen die kyɛ leɛ mɛ o beri ata poɔ,

³⁰faa fo meŋɛ, a wa sigi a dagaraa zu wɛ!”

³¹A lɛ ne o zu ka a Naaŋmen bagmaalkare ane a Naaŋmen bege wulwulibo meŋ da erɛ O laara, kyɛ yele, “O faa la ba mine kyɛ kontoɔ̃ faa O meŋɛ.

³²Vɛŋ ka a Mɛzaaya,[19] a Izerayɛl Naa, wa sigi a dagaraa zu pampana ŋa, ka te nyɛ kyɛ pãã sage de a O yɛlɛ.” A banaŋ ba naŋ da laŋ ne a Yeezu kpa a dagarre zu meŋ da erɛ O la laara.

³³A ŋmenaa naŋ da wa te pozentaa saŋ, ligruŋ da luri pɔge la a tendaa zaa, a te ta ŋmenaa gbelli ata saŋ.

³⁴A ŋmenaa gbelli ata saŋ, a Yeezu da ŋmɛ la kpɛlle yaga zaa, a yele, “Eloi, Eloi, lema sabatani?” A yeluu ŋa a Hiburu kɔkɔre poɔ tɛgɛ la, “N Naaŋmen, N Naaŋmen, bonso, ka fo gyɛ ma bare?”

³⁵A noba mine naŋ da are a be a woŋ a lɛ, da yelee la, “Yɛ kyɛllɛ, O boɔlɔ la Elaagya.”

³⁶Ka neɛ kaŋ da zo te de lɔrɔ toŋ ne dããmiiruŋ poɔ ka o paale o zaa a de daa kyage ne a de teɛ ko a Yeezu ka O nyu, kyɛ yele, “Te kyɛllɛ la ka a Elaagya na wa yage O la sigi a dagaraa zu bee?”

³⁷Lɛ la ka a Yeezu da la maaleŋ kyeere yaga zaa, kyɛ ŋmaa vooroŋ.

³⁸A lɛ poɔ la ka a Naaŋmen die patiisa da kyeɛ̃, a wɛle ziiri ayi, a yi o zu a sigi te tɔ o pare.

³⁹A sogyɛre kɔɔ neŋkpoŋ kaŋ naŋ da are tori a Yeezu, a nyɛ lɛ O naŋ da ŋmaa vooroŋ, da yelee la, “Serɛzaa, a dɔɔ ŋa da waa la Naaŋmen Bie!”

⁴⁰Pɔgebɔ mine meŋ da be la a be, a te are tɔɔre zaa kyɛ kaara. A pɔgeba mine naŋ da poɔ ba poɔ la, Mareya Magdalina, Mareya a Gyimisi ane Gyose ma, ane Salome.

⁴¹A pɔgeba bama da waa la noba naŋ da tuuro a Yeezu a soŋnɔ O a Galili poɔ. A pɔgeba yaga mine meŋ da tu la a Yeezu a wa Gyɛruzɛlɛm poɔ.

⁴²Zie naŋ da wa te maa, kyɛ ka a da waa a Naroo bebiri, a lɛ tɛgɛ la, zie naŋ na nyaa a pɛnnoo bebiri daare,

⁴³Yuzɛb naŋ da waa a Aremateya teŋɛ neɛ da ba zo dabeɛ̃ kyɛ gaa a Pilato zie a te sɔre a Yeezu eŋɛ. A Yuzɛb da poɔ la a sɛrediribe poɔ, ka noba zaa eŋnɛ o. O da waa la neɛ naŋ da kyɛllɛ a Naaŋmen naaloŋ waabo.

⁴⁴A Pilato pãã da bonnɔ la ka a Yeezu da sereŋ kpie la wieouŋ lɛ. O da boɔle la a sogyɛre kɔɔ neŋkpoŋ a soore o, ka a Yeezu naŋ kpi kɔɔrɛɛ la be.

⁴⁵O naŋ da wa woŋ yi a sogyɛre kɔɔ neŋkpoŋ zie ka a Yeezu sereŋ kpie la, o da ko la a Yuzɛb sori ka o te de a Yeezu eŋɛ.

⁴⁶Lɛ la ka a Yuzɛb de pɛmpelaa, a wa yage a Yeezu eŋɛ, a da da pɛmpelaa pilli ne. Kyɛ pãã de O te ũũ yaa kaŋ poɔ ba naŋ nyɛ piiri zu, a billi kukpoŋ pɔge a yaa noɔre.

⁴⁷Mareya Magdalina ane Mareya a Gyose ma da nyɛ la zie na ba naŋ da ũũ a Yeezu.