Read Southern Dagaare Mak 16 Bible Online

Mak 16 - Southern Dagaare bible

Mak 16

¹A pɛnnoo bebiri daare naŋ da wa di yi baare, Mareya Magdalina, ane Mareya a Gyimisi ma, ane Salome da da la turaali ka ba te sɔ a Yeezu eŋɛ.

²A koseɛraa bebi-dɛndɛŋ daare bagu-pipi saŋ, ŋmenaa naŋ da wa puro, a pɔgeba da iri gaa la a yaa zie.

³Ba da yele korɔ la taa, “Aŋ mɔɔ na billi a kuuri bare a yaa noɔreŋ ko te?”

⁴Ba naŋ da wa doɔ ba zuri kaara, ba da nyɛ la a kukpoŋ na naŋ da pɔge a yaa noɔre ka ba billi bare.

⁵Ba naŋ da wa te kpɛ a yaa poɔ, ba da nyɛ la pɔlbile kaŋ ka o zeŋ a duluŋ seŋ a su kparpelaa, ka dabeɛ̃ da kpɛ ba yaga zaa.

⁶Kyɛ ka a pɔlbile da yeli ko ba, “Yɛ ta zoro dabeɛ̃; a Yeezu naŋ yi Naazɛrɛ, ka ba da kpa a dagaraa zu la ka yɛ boɔrɔ. O ba kye kyɛ, ba eɛɛ la ka O leɛ-iri yi a kuuni poɔ. Yɛ nyɛ zie ba naŋ da gaale O.

⁷Kyɛ yɛ gaa te yeli ko a O potuuribo ane Piita, ka O de la yɛ weɛ a gɛrɛ Galili teŋɛ; be la ka yɛ na te nyɛ O, a seŋ O naŋ da yeli ko yɛ lɛ.”

⁸A lɛ la ka ba da zo wa yi a yaa poɔ, bonso, pɔlteɛ ane nɔmaa da kpɛ ba la; ka ba da ba yeli yelzaa ko neɛzaa, dabeɛ̃ naŋ da kpɛ ba zuiŋ.

⁹[A Yeezu naŋ da leɛ-iri yi a kuuni poɔ puoriŋ, a koseɛraa bebi-dɛndɛŋ daare bagu-pipi saŋ, O daŋ de la O meŋɛ wuli Mareya Magdalina, ona eŋɛ la ka a Yeezu da digi sefaare ayopoĩ bare.

¹⁰A Mareya Magdalina da yi te manne la a yɛlɛ ko a banaŋ zaa naŋ da tuuro a Yeezu, ba naŋ da naŋ kono ŋmaara nentaŋ.

¹¹Kyɛ ba naŋ da wa woŋ ka a Yeezu leɛ voorɔ la ka a Mareya Magdalina nyɛ O, ba da ba sage de a o yɛlɛ.

¹²A ŋaa puoriŋ, Yeezu da la de la O meŋɛ wuli a O potuuribo mine bayi, ba naŋ da kyɛnɛ gɛrɛ teŋɛ kaŋ.

¹³Ba da leɛ kuli te manne la a yɛlɛ ko ba taaba na, kyɛ ba da ba sage de a ba yɛlɛ.

¹⁴A lɛ puoriŋ, Yeezu da de la O meŋɛ wuli a O potuuribo pie ne yeni, a saŋ na ba naŋ da lantaa a zeŋ dire. O da wa nyare la ba zu ba naŋ da ba taa yeldeebo ane ba zukuoŋ-yɛlɛ zuiŋ. Bonso, ba da ba sage de a banaŋ zaa naŋ da wa yeli a O kuuni poɔ leɛ-iruu yɛlɛ ko ba.

¹⁵A Yeezu pãã da yeli ko ba la, “Yɛ gaa a tendaa zaa a te moɔle a Ŋmen-yelnoore ko a Naaŋmen bon-iri zaa.

¹⁶Soba na zaa naŋ sage de a yelbiri, a de suobu na nyɛ la faabo. Kyɛ soba na zaa naŋ ba sage de a yelbiri na wɛ la.

¹⁷A yelwulii ama la na tuuro a banaŋ naŋ sage de a yelbiri: A N yuori eŋɛ ba na digre la sefaare bara, kyɛ yele kɔkɔsaama;

¹⁸ba na maŋ nyɔge la weere ane ba nuuri, ka ba naŋ nyu logi kyɛ yelfaa zaa koŋ pɔge ba. Ba na maŋ de la ba nuuri pare baalba zu ka ba nyɛ sammo.”

¹⁹A Daana Yeezu naŋ da wa yeli a yɛlɛ ko ba baare, ba da de O la do ne tenvelaa[20] ka O te zeŋ Naaŋmen nuduluŋ seŋ.

²⁰Ba da yi te moɔle la a Ŋmen-yelnoore a ziiri zaa, ka a Daana da de ba tonɔ ne, ka a yelwulii ba naŋ da erɛ da waa danseɛ kyaare ne a Ŋmen-yelnoore ba naŋ da moɔlɔ.]