Read Southern Dagaare Mak 7 Bible Online

Mak 7 - Southern Dagaare bible

Mak 7

¹A Faraziimine ane a Naaŋmen bege wulwulibo naŋ da yi Gyɛruzɛlɛm a wa ŋmaagyili a Yeezu,

²ba da nyɛ la a O potuuribo mine ka ba dire ne nudɛgɛ, bonso, ba da ba pɛge ba nuuri kyɛ dire.

³(A Faraziimine ane a Gyuumine daŋ koŋ sage di bonzaa ka ba naŋ ba daŋ pɛge ba nuuri velaa, aŋa ba sããkommine naŋ wuli ba lɛ;

⁴ba da koŋ sage di bonzaa ba naŋ yi ne daa wa ne ka ba naŋ ba daŋ pɛge o sɛre; a ba sããkommine yeltuuri yaga mine meŋ bebe la ka ba da maŋ tuuro, ŋmanbilii pɛgebo, dogre pɛgebo ane zɛdogebilii pɛgebo.)

⁵A lɛ la ka a Faraziimine ane a Naaŋmen bege wulwulibo da soore a Yeezu, “Bonso ka a fo potuuribo ba tuuro a sããkommine yeltuuri kyɛ dire ne nudɛgɛ?”

⁶Ka a Yeezu da yeli ko ba, “A Ŋmen-yelmanna Azaaya da yeli la a bogriŋ a kyaare ne yɛ, yɛnee bampuori-kombampoɔ mine, a seŋ ba naŋ sɛge lɛ: ‘A noba bama eŋnɛ ma la ne ba nɔɛ, kyɛ a ba sukyie waa la tɔɔre ne ma;

⁷ba puoro ma la weɛlɛ, a wullo nensaala begɛ aŋa a naŋ waa Naaŋmen begɛ.’

⁸Yɛ zagre la a Naaŋmen nɔɛ bare kyɛ nyɔge nensaala wuluu taa kpeɛŋaa.”

⁹Lɛ la ka a Yeezu da yeli ko ba, “Yɛ bɔ la sori na yɛ naŋ na tu a zagre a Naaŋmen nɔɛ, ka ka yɛ na toɔ̃ tuuro a yɛ sããkommine yeltuuri!

¹⁰Bonso, Moozul da yelee la, ‘Eŋnɛ fo saa ane fo ma; ka neɛzaa wa yeli o saa bee o ma yelfaa, a ferɛɛ la ka ba ko o soba.’

¹¹Kyɛ ka yɛnee yeli ka ka neɛzaa wa yeli o saa bee o ma, ‘Bonna zaa sommo fo naŋ da na nyɛ n zie waa la Koban’ (a tɛgɛ la, a sommo leɛ la Naaŋmen kyɔɔtaa),

¹²ka a lɛ vɛŋ ka yɛ maŋ sage ka a ba la fere ka neɛ e soŋ ko o saa bee o ma,

¹³a pãã maŋ e ka a Naaŋmen yelbiri ba la taa tɔnɔ a yɛ sããkommine yeltuuri zuiŋ. A yɛlɛ ama taaba yaga la ka yɛ erɛ.”

¹⁴Lɛ la ka a Yeezu da la boɔle a nembeɛoŋ a yeli ko ba, “Yɛ zaa, yɛ kyɛlle woŋ a baŋ a tɛgɛ:

¹⁵bonzaa kyebe naŋ na sigi nensaala poɔ a e ka o soba dɛge, kyɛ boma na naŋ yire o poɔŋ la maŋ e ka o dɛge.”

¹⁶[“Vɛŋ ka soba na zaa naŋ taa tobo na woŋ, kyɛlle woŋ.”]

¹⁷A Yeezu naŋ da wa bare a noba kyɛ kpɛ die, a O potuuribo da wa soore O la a sekpɔgre tɛgɛ.

¹⁸Ka a Yeezu yeli sɔge ba, “Ka lɛ yɛ meŋ naŋ ba baŋ a tɛgɛ be? Yɛ ba nyɛ ka bonzaa naŋ yire yeŋe a sigre nensaala poɔ kontoɔ̃ e ka o soba dɛge,

¹⁹bonso, a ba maŋ kpɛ o soba sukyiri poɔ, kyɛ a maŋ kpɛ la o soba puori ka o nyɛ bare.” (A Yeezu yeluu ŋa wulee la ka bondiraa zaa eɛɛ soŋ).

²⁰Ka O da yeli, “Bon naŋ yi a nensaala poɔ la maŋ dɛge a nensaala.

²¹Bonso, a neɛ sukyiri poɔ la ka teɛre-faare maŋ yire: peɛ̃mo toma, nannyigri, neŋko,

²²moɔrɔ toma, bombɔ-gaŋne, potuoloŋ, taaba bɛlloo, nemboŋyɛlɛ, nyuuri, yosãã, pɔloo, damboluŋ.

²³A yelfaare ama zaa la yire a nensaala poɔ kyɛ ana la maŋ e ka o soba dɛge.”

²⁴A Yeezu da yi la a zie ŋa a gaa Taaya paaloŋ. O da te kpɛ la yiri kaŋ poɔ a ba boɔrɔ ka neɛzaa baŋ O yɛlɛ. Kyɛ O da kontoɔ̃ sɔgle O meŋɛ a noba zie.

²⁵A daadaalɛ, pɔge kaŋ pɔg-yalee naŋ da taa sefaa da woŋ la O yɛlɛ, a da wa le gbi dumo O niŋesogɔŋ.

²⁶A pɔge da waa la a Nemboore-yobo[4] neɛ kaŋ a yi Sarofonisiya paaloŋ neɛ. O da wa sɔre la a Yeezu ka O digi a sefaa ka o yi a o pɔg-yalee eŋɛ.

²⁷Ka a Yeezu yeli ko o, “Vɛŋ ka a bibiiri daŋ di sɛre, bonso, a ba soma ka ba de a bibiiri bondirii lɔɔ eŋ baare.”

²⁸Ka a pɔge da yeli sɔge O, “Neŋkpoŋ, kyɛ a baare maŋ di la a bibiiri bondi-purimo naŋ maŋ le.”

²⁹Ka a Yeezu yeli ko a pɔge, “Fo naŋ yeli a ŋaa zuiŋ, kulo, a sefaa yi la a fo pɔgeyaa eŋɛ.”

³⁰Lɛ la ka a pɔge kuli te nyɛ a bie ka o gaŋ a gado zu, ka a sefaa yi kyɛ bare o.

³¹Lɛ la ka a Yeezu da leɛ yi a Taaya paaloŋ, a tu Sedɔŋ teŋɛ sobiri, a tori gɛrɛ Galili Mane naŋ be a Dekapoli paaloŋ.

³²Ba da taa la woŋ kaŋ naŋ da kontoɔ̃ yeli yɛlɛ wa ne a Yeezu zie, a wa sɔre ka O de O nu pare o zu.

³³Lɛ la ka a Yeezu da taa o gyɛŋ yi ne a noba poɔ, a da te de O nubie toŋ o tobo poɔ, kyɛ toore nentaare tɔ ne a o zele.

³⁴Lɛ la ka O da gbole kaara sazu, a voore fãã a kyɛ yeli ko o, “Efata,” a tɛgɛ la, “Yuo.”

³⁵A daadaalɛ ka a dɔɔ tobo deɛ yuore, kyɛ ka o zele meŋ lori ka o yele yɛlɛ weliweli.

³⁶Lɛ la ka a Yeezu da kpãã a noba ka ba ta wa yele a yɛlɛ ŋa korɔ neɛzaa; kyɛ a lɛ O naŋ da kpãã ba yaga seŋ, lɛ gba ka a noba da maaleŋ ŋmeɛrɛ a yɛlɛ yaara.

³⁷A noba nɔɛ da maaɛ la te zuo, ka ba yele, “O e la a yɛlɛ zaa velaa; O gba eɛɛ la ka a wonni wono kyɛ ka a muuni yele yɛlɛ.”