Read Southern Dagaare Mak 8 Bible Online

Mak 8 - Southern Dagaare bible

Mak 8

¹A beri na poɔ, nembeɛoŋ naŋ da la wa lantaa a Yeezu zie kyɛ ka bonzaa da ba kyebe ka ba na di, O da boɔle la a O potuuribo a yeli ko ba:

²“N nyɛ la a noba ka ba nembaaloŋ erɛ ma, bonso, beri ata la ŋaa ba naŋ be N zie kyɛ ba di bonzaa.

³Ka maa bare ba ne a kɔŋ ka ba kulo, ba na yĩĩe la a sobiriŋ, bonso, ba mine yi la tentɔbɔ a wa.”

⁴Ka a O potuuribo da soore O, “Yeŋ ka neɛ na nyɛ bondirii a dalempoɔ ŋa poɔ a ko a noba bama zaa ka ba di?”

⁵Ka O soore ba, “Boroboro awola la ka yɛ taa?” Ka ba yeli, “Ayopoi”

⁶Lɛ la ka O e ka a noba zeŋ teŋɛ; kyɛ ka O de a boroboro ayopoĩ na a puori Naaŋmen bareka, kyɛ nyɔge a ŋmaare, a de ko a potuuribo ka ba de poŋ ko a noba. Ka a potuuribo da de a poŋ ko a noba.

⁷Ba da taa la zoma meŋ belaa; kyɛ a Yeezu naŋ da wa puori baare, O da yeli ko la a potuuribo ka ba de a meŋ poŋ ko a noba.

⁸A noba zaa da di tegɛɛ la kyɛ ka ba wuo a boŋkpaa ka a pa pɛre ayopoĩ.

⁹A noba da ta la turi anaare. O pãã da bare ba la ka ba kuli ba yie.

¹⁰A daadaalɛ la ka a Yeezu ne a O potuuribo da kpɛ gbori a gaa a Dalemanuta paaloŋ.

¹¹A Faraziimine da wa la a Yeezu zie a wa piili ŋmeɛrɛ nɔkpeɛne ne O a yele, toŋ toŋkpeɛŋaa naŋ yi tenvelaa[5] ka te nyɛ. Ba da boɔrɔ la ka ba e O nyɛ.

¹²Ka a Yeezu voore fãã kyɛ yeli, “Bonso ka a zenɛ noba boorɔ boɔrɔ toŋkpeɛne ka ba nyɛ? Yelmeŋɛ ka N yele korɔ yɛ, a zenɛ noba boorɔ ŋa koŋ nyɛ toŋkpeɛŋaa zaa.”

¹³A Yeezu da bare ba la kyɛ leɛ kpɛ a gbori a ŋmaa a mane gaa a lambori kaŋ na.

¹⁴A Yeezu potuuribo da innee la ka ba de boroboro a kyɛnɛ ne, kyɛ ba da taa la boroboro bon-yeni yoŋ a gbori poɔ.

¹⁵Ka a Yeezu da kpãã ba a yele, “Yɛ gu yɛmenne velaa, a baŋ ne a Faraziimine ane a Hɛrɔde gagarre yɛlɛ.”

¹⁶Ka a potuuribo leɛ yeli ko taa, “Te naŋ ba taa boroboro la so ka O yeli a ŋaa.”

¹⁷A Yeezu naŋ wa baŋ bonna yɛlɛ ba naŋ yele, O da soore ba la, “Bonso ka yɛ yele yɛ naŋ ba taa boroboro yɛlɛ? Yɛ niŋe naŋ ba vɛle ka yɛ na baŋ a yɛlɛ ŋa tɛgɛ be? A yɛ sukyie darɛɛ la be?

¹⁸Yɛ mɔɔ taa la nimie kyɛ zagre ka yɛ nyɛ be? Yɛ taa la tobo kyɛ zagre ka yɛ kyɛlle woŋ be? Yɛ ba leɛ-teɛrɛ yɛlɛ be?

¹⁹Saŋ na N naŋ da ŋmaa a boroboro anuu ko a noba turi anuu, pɛre awola la ka yɛ da wuo a bon ŋmaara ka a pa?” Ka ba yeli ko O, “Pie ne ayi.”

²⁰Ka O la soore ba, “Kyɛ a saŋ na meŋ N naŋ da ŋmaa a boroboro ayopoĩ ko a noba turi anaare, pɛre awola meŋ la ka yɛ da wuo a bon ŋmaara ka a pa?” Ka ba la yeli ko O, “Ayopoi.”

²¹Lɛ la ka O da soore ba, “Yɛ mɔɔ naŋ ba baŋ a tɛgɛ?”

²²A Yeezu ne O potuuribo naŋ da wa ta Bɛsaada teŋɛ, noba mine da te taa la dɔɔ zɔŋ kaŋ wa ne O zie a wa sɔre O ka O de O nu seene ne a dɔɔ.

²³Ka a Yeezu nyɔge a dɔɔ nu a tage o yi ne a teŋɛ poɔ. O naŋ da wa toore nentaare eŋ a dɔɔ nimie poɔ, O da de la O nuuri pare o zu, kyɛ soore o, “Fo na toɔ̃ nyɛ la bonkaŋ be?”

²⁴Ka a dɔɔ zɛge o zu a kyɛ yeli, “N nyɛ la noba, kyɛ ba waa ŋa teere, a kyɛnɛ.”

²⁵Lɛ la ka a Yeezu laboreŋ de O nuuri seene a dɔɔ nimie ka a dɔɔ kaa kpeɛŋaa zaa ka a o zɔnnoŋ deɛ baare, kyɛ ka o nyɛrɛ weliweli.

²⁶Lɛ la ka a Yeezu bare a dɔɔ ka o kulo o yiri, kyɛ yeli ko o, “Tɔɔ wa leɛ gɛrɛ a tembile na poɔ.”

²⁷A Yeezu ne a O potuuribo da kyɛnɛ gɛrɛ la a Sezaareya Filipae tembilii; ba naŋ da be a sobiriŋ kyɛnɛ gɛrɛ la ka O da soore a O potuuribo, “A noba yeli ka aŋ la ma?”

²⁸Ka ba yeli sɔge O, “Ba mine yeli ka fo waa la Gyɔɔn Bati, ka ba mine meŋ yeli, Elaagya, ka ba mine meŋ yeli ka fo waa la a Ŋmen-yelmanneba na kaŋ.”

²⁹Ka O soore ba, “Kyɛ yɛ meŋ yeli ka nembuo la ma?” Ka Piita yeli sɔge O, “Fõõ la a Mɛzaaya.”[6]

³⁰Ka a Yeezu kpãã ba ka ba ta wa yele O yɛlɛ korɔ neɛzaa.

³¹Lɛ la ka a Yeezu da piili kanna ba, ka a ferɛɛ la ka a Nensaala Bie di dɔgɛɛ yaga, ka a nembɛrɛ ane a Naaŋmen bagmaalkare ane a Naaŋmen bege wulwulibo zagre O bare, ka ba ko O kyɛ a beri ata puoriŋ ka O leɛ-iri yi a kũũ poɔ.

³²O da yeli la a yɛlɛ ama ka a sãã weliweli lɛ. Ka Piita da taa O gyɛŋ yi ne a te nyare O zu.

³³A Yeezu da leɛ kaa la a O potuuribo kyɛ tanne a Piita a yeli, “Tage yi be N zie, Setaana! Fo ba de fo teɛroŋ eŋ Naaŋmen boma eŋɛ, kyɛ nensaala boma eŋɛ la ka fo teɛroŋ be.”

³⁴A Yeezu pãã da boɔle la a nembeɛoŋ ane a O potuuribo lantaa a yeli ko ba, “Ka neɛzaa wa boɔrɔ ka o leɛ N potuuro, a seŋ ka o soba ta taa o meŋɛ yɛlɛ a kyɛ de o dagaraa tuo tuuro ne ma.

³⁵Bonso, banaŋ zaa naŋ boɔrɔ ka ba faa bamenne nyɔvoɛ, na kɔŋaa la, kyɛ banaŋ zaa meŋ naŋ sage ka ba kɔŋ ba nyɔvoɛ N zuiŋ ane a Ŋmen-yelnoore zuiŋ na leɛ nyɛ la a ba nyɔvoɛ.

³⁶Boŋ tɔnɔ ka neɛ na nyɛ, ka o naŋ so a tendaa boma zaa, kyɛ kɔŋ o nyɔvore?

³⁷Serɛzaa, boŋ ka neɛ na baŋ de leɛre ne o nyɔvore?

³⁸Banaŋ zaa naŋ zoro N vi ane N yelbie vi a zenɛ noba naŋ ba zoro Naaŋmen ane yelbe-erebɛ zie, a Nensaala Bie meŋ na zo la ba vi ka O naŋ wa leɛ waana ne a O maleke sonne a O Saa veɛloŋ poɔ.”