Read Southern Dagaare Mak 9 Bible Online

Mak 9 - Southern Dagaare bible

Mak 9

¹A Yeezu da yeli ko ba la, “Yelmeŋɛ ka N yele korɔ yɛ, noba mine are la a kyɛ a koŋ kpi kyɛ te ta lɛ saŋ ba naŋ na nyɛ a Naaŋmen naaloŋ ka o waana ne kpeɛ̃õ.”

²A beri ayoɔbo puoriŋ, a Yeezu da taa la Piita, Gyimisi ane Gyɔɔn ka ba do taŋ wogi kaŋ zu O ne ba yoŋ. O da te kyilli la O meŋɛ ba niŋesogɔ,

³ka O bonsuuri pɛle parepare lɛ, ka bonzaa kyebe a teŋɛzu na e ka a pɛle gaŋ lɛ.

⁴Ba da nyɛ la Elaagya ane Moozul ka ba da daasaa ba zie, ka ba ne a Yeezu yele yɛlɛ.

⁵Lɛ la ka Piita yeli ko a Yeezu, “Wulwullo, a soma la ka te be a kyɛ, vɛŋ ka te ti sege ata, ka fo so kaŋ, ka Moozul so kaŋ, ka Elaagya meŋ so kaŋ.”

⁶A Piita da ba baŋ bonna o naŋ na yeli, bonso dabeɛ̃ da kpɛ ba la yaga zaa.

⁷Lɛ la ka zunzugri kaŋ wa luri pɔge a Yeezu, Elaagya ane a Moozul, kyɛ ka kɔkɔre kaŋ yi a zunzugri poɔ a yele, “N Bidɔɔ la aŋa, N Poyɛŋ Bie, yɛ kyɛllɛ O yɛlɛ!”

⁸A paretɛloŋ lɛ ba naŋ wa kaa gyeere ba da ba la nyɛ neɛzaa ba zie ka a Yeezu yoŋ naane.

⁹Ba naŋ da yi a taŋzu sigre waana, a Yeezu da kpãã ba la ka ba ta wa yele bonna ba naŋ nyɛ a korɔ neɛzaa, kyɛ te ta a daare na a Nensaala Bie naŋ na leɛ-iri yi a kũũ poɔ.

¹⁰Lɛ la ka ba da taa a yɛlɛ ŋa eŋ ba pooreŋ, a soorɔ taa bon naŋ la a kũũ poɔ leɛ-iruu O naŋ yele.

¹¹Lɛ la ka ba soore a Yeezu, “Bonso ka a Naaŋmen bege wulwulibo yeli ka a ferɛɛ la ka a Elaagya daŋ de weɛ wa sɛre?”

¹²Ka a Yeezu yeli ko ba, “Elaagya sereŋ na de la weɛ wa, a wa maale a yɛlɛ zaa eŋ a bogriŋ. Ka boŋ pãã la so ka ba sɛge a Naaŋmen gane poɔ, ka a ferɛɛ la ka a Nensaala Bie woŋ tuo, kyɛ ka ba e O nimikpɛ yɛlɛ?

¹³Kyɛ N yele korɔ yɛ la ka a Elaagya waɛ la ka ba e o yɛlɛ na zaa ba naŋ boɔrɔ, a seŋ ba naŋ sɛge a kyaare ne o lɛ.”

¹⁴Ba naŋ da leɛ wa a potuuribo zie, ba da nyɛ la nembeɛoŋ ka ba ŋmaagyili ba, ka a Naaŋmen bege wulwulibo ŋmeɛrɛ nɔkpeɛne ne ba.

¹⁵A noba zaa naŋ da wa nyɛ a Yeezu, a daadaalɛ ka nɔmaa naŋ ba taa mannoo da kpɛ ba, ka ba zo gaa ka ba te puori O.

¹⁶Ka a Yeezu da soore ba, “Boŋ nɔkpeɛne la ka yɛ ne ba ŋmeɛrɛ?”

¹⁷Ka neɛ kaŋ wa yi a nembeɛoŋ poɔ a yeli sɔge O, “Wulwullo, n bidɔɔlee la ka N taa wa ne fo zie, o taa la sefaa kaŋ naŋ vɛŋ ka o ba toɔnɔ yele yɛlɛ;

¹⁸ka a sefaa wa iri o, o maŋ zeɛ o la lɔɔ ka o foorɔ nentaare, kyɛ ɔɔrɔ o nyemɛ, ka o endaa zaa e daŋfaraŋ aŋa daa. N sɔre la a fo potuuribo ka ba digi a sefaa ka o yi, kyɛ ka ba digi fãã.”

¹⁹Ka a Yeezu yeli sɔge ba, “Yɛnee noba naŋ ba taa yeldeebo, N na be la yɛ zie kɔɔre seŋ wola? N na di la kannyiri ne yɛ te ta boŋ saŋ? Yɛ taa a bie wa ko ma.”

²⁰Ka ba da taa a bie wa ko O. A sefaa naŋ da wa nyɛrɛ a Yeezu, a paretɛloŋ lɛ ka o zeɛ a bie lɔɔ ka o miine, a gbara kyɛ foorɔ nentaare.

²¹Ka a Yeezu soore a bie saa, “O naŋ maŋ erɛ a ŋaa kɔɔre seŋ la wola?” Ka o yeli ko a Yeezu, “A yi o biiluŋ saŋ zaa la ka o erɛ a lɛ.

²²Gbɛɛ yaga ka a sefaa maŋ zeɛ o lɔɔ eŋ vũũ poɔ bee koɔ̃ poɔ a boɔrɔ ka o ko o. Kyɛ ka fõõ na e yeli zaa, zo te nembaaloŋ a kyɛ soŋ te.”

²³Ka a Yeezu da yeli ko o, “Ka fõõ na toɔ̃! Yeli zaa na baŋ nyɛ la eebo a ko neɛzaa naŋ sage de.”

²⁴A daadaalɛ ka a bie saa ŋmɛ kpɛlle a yeli, “N sage deɛ la, soŋ a n yeldeebo naŋ ba seŋ bon.”

²⁵A Yeezu naŋ wa nyɛ a nembeɛoŋ ka ba zoro laŋna taa, O da tanne la a sefaa, a yele korɔ o, “Fõõ sefaa naŋ e ka a bidɔɔlee ŋa kontoɔ̃ yeli yɛlɛ, kyɛ ba la wono meŋ, maa yeli ko fo, wa yi o eŋɛ a daŋ ta la leɛ wa kpeɛrɛ o zaa!”

²⁶A sefaa naŋ wa kyeere kyɛ zeɛ a bie lɔɔ, ka o miine faa zaa, o da wa yie la kyɛ bare a bie ka o gaŋ aŋa neɛ naŋ kpi, ka lɛ vɛŋ ka a noba yaga zaa yeli, “O kpie la.”

²⁷A Yeezu da nyɔge la a bie nu tage, ka o da toɔ̃ iri are.

²⁸A Yeezu naŋ da wa te kpɛ a die, a O potuuribo da wa soore O la, ba naŋ da e ba yoŋ, “Bonso ka tenee eŋ da kontoɔ̃ digi a sefaa ŋa ka o yi?”

²⁹Ka a Yeezu yeli ko ba, “Puoruu yoŋ tɛge la na toɔ̃ digi a sefaa ŋa tɔ bare.”[7]

³⁰A Yeezu ne a O potuuribo da yi la a be a te tu Galili teŋɛ poɔ a te gɛrɛ. O da ba boɔrɔ ka neɛzaa baŋ O yɛlɛ;

³¹bonso O da kanna la a O potuuribo, a yele korɔ ba, “Ba na de la a Nensaala Bie eŋ nensaalba nuuri poɔ, ka ba ko O, kyɛ a beri ata daare O na leɛ-iri yi la a kũũ poɔ.”

³²Kyɛ a potuuribo da ba baŋ a yɛlɛ O naŋ yele tɛgɛ kyɛ da zoro dabeɛ̃ ka ba soore O.

³³Lɛ la ka ba da wa Kapanum teŋɛ poɔ, ba naŋ da wa be a yiri poɔ la ka Yeezu da soore a O potuuribo, “Boŋ nɔkpeɛne la ka yɛ da ŋmeɛrɛ a sobiri poɔ?”

³⁴Ka ba zaa da taŋ ba nɔɛ, bonso, a sobiri poɔ ba da ŋmɛ la nɔkpeɛne ka ba baŋ buo soba naŋ la ba zaa poɔ neŋkpoŋ.

³⁵Ka a Yeezu da zeŋ teŋɛ, kyɛ boɔle a pie ne bayi, a yeli ko ba, “Soba na zaa naŋ boɔrɔ ka o waa danweɛ soba, feroo la ka o e a noba zaa parebaaraa ane ba zaa tontonɔ.”

³⁶Lɛ la ka O pãã da nyɔge bibile kaŋ a e ka o are a ba sogɔŋ. O naŋ wa nyɔge a bie eŋ O nuuri poɔ, O da yeli ko ba la:

³⁷“Soba na zaa naŋ de a bie ŋa tɔ saanoŋ N yuori zuiŋ, maa la ka o soba de a saanoŋ, neɛzaa meŋ naŋ de ma saanoŋ de la a neɛ na meŋ naŋ toŋ ma na saanoŋ.”

³⁸A Gyɔɔn da yeli ko O la, “Wulwullo, te nyɛ la neɛ kaŋ naŋ digre sefaare bara fo yuori eŋɛ, ka te da boɔrɔ ka te pigi o sori ka o ta erɛ a lɛ, bonso, o da ba waa te kaŋ.”

³⁹Ka a Yeezu da yeli, “Yɛ ta pigi o sori; bonso, neɛ kyebe a na toŋ toŋkpeɛŋaa a N yuori eŋɛ, kyɛ la sãã a N yuori a daadaalɛ.

⁴⁰Soba na zaa naŋ ba kyiiri te, poɔ la te poɔ.

⁴¹Yelmeŋɛ zaa ka N yele korɔ yɛ, soba na zaa naŋ na ko yɛ kɔmmaaroŋ ka yɛ nyu, yɛ naŋ waa a Kirista noba zuiŋ, koŋ baŋ fããŋ a o san-yɔɔ.”

⁴²Ka yɛ kanzaa wa de gbɛŋmɛ-le bon biŋ a bibiiri bama kaŋ naŋ sage de N yɛlɛ sobiriŋ, a da na seɛ la ka ba naŋ da de neɛre kuuri leŋ o soba kɔkɔreŋ a daa o lɔɔ eŋ mane poɔ ka o nyu koɔ̃ kpi a gaŋ o naŋ voorɔ.

⁴³Ka fo nu wa vɛŋ ka fo ŋmeɛrɛ gbɛɛ lere, kyɛ o ŋmaa bare. Ka fõõ kpɛ nyɔvore poɔ ane nu-ŋmaa, anaŋ seɛ fo naŋ na kpɛ dazugovũũ poɔ ane nuuri ayi. [

⁴⁴A be, a ba dandulo ba kpiire, ka a vũũ meŋ ba kpiire.]

⁴⁵Ka fo gbɛre wa vɛŋ ka fo ŋmeɛrɛ gbɛɛ lere, kyɛ o ŋmaa bare. Ka fõõ kpɛ nyɔvore poɔ ane gbɛ-ŋmaa, anaŋ seɛ fo naŋ na taa gbɛɛ ayi kyɛ ka ba de fo lɔɔ eŋ dazugovũũ poɔ. [

⁴⁶A be, a ba dandulo ba kpiire, ka a vũũ meŋ ba kpiire.]

⁴⁷Ka fo nimiri wa vɛŋ ka fo ŋmeɛrɛ gbɛɛ lere, nyɔge o logi iri bare. Ka fõõ taa nimi-yeni kpɛ ne a Naaŋmen naaloŋ poɔ, anaŋ seɛ fo naŋ na kpɛ dazugovũũ ane nimie ayi,

⁴⁸be la ka a ba dandulo ba kpiire, ka a vũũ meŋ ba kpiire.

⁴⁹“Bonso, ba na nyoɔ la neɛzaa ne vũũ aŋa nyɛnnoo naŋ maŋ tɛŋ kpɛ bondirii lɛ.

⁵⁰Nyɛnnoo soma la; kyɛ ka nyɛnnoo ba la wa taa noɔ, wola ka fo na la e ka a leɛ noma? Yɛ noma aŋa nyɛnnoo, kyɛ taa emmaaroŋ ne yɛ taaba.”