Read Southern Dagaare Luk 10 Bible Online

Luk 10 - Southern Dagaare bible

Luk 10

¹A ŋaa puoriŋ, a Daana da iri la noba lezaata ne pie mine meŋ, a da toŋ ba bayi bayi ka ba daŋ gaa a tenne ane a ziiri na zaa o meŋɛ naŋ boɔrɔ gaabo.

²O da yeli ko ba la, “A weɛ boma maalɛɛ la yaga, kyɛ ka a tontonema ba seŋ bon, azuiŋ, yɛ sɔre a weɛ boma Daana ka o toŋ tontonema ka ba gaa te de a weɛ boma.

³Yɛ gɛrɛ. Yɛ nyɛ, N tonɔ yɛ la aŋa pebilii ka yɛ yi te kpɛ gboŋgboe poɔ.

⁴Yɛ ta de ganlɔge, bee woɔ, bee nɔɔteɛ, a kyɛ ta puori neɛzaa a sobiriŋ.

⁵Yiri na zaa poɔ yɛ naŋ wa kpɛ, yɛ daŋ yeli, ‘Ka maaroŋ be a yiri ŋa poɔ!’

⁶Ka neɛzaa wa bebe a seŋ ne a maaroŋ nyaabo, a yɛ maaroŋ na be la o soba zie, kyɛ ka lɛ naane a yɛ maaroŋ na leɛ wa la yɛ zie.

⁷Yɛ maŋ kpeɛrɛ a yiri na poɔ a dire kyɛ nyuuro bonna a yideme naŋ korɔ yɛ, bonso, tontonɔ zaa seŋ ne la o san-yɔɔ. Yɛ ta lɔŋnɔ yie.

⁸Ka yɛnee maŋ wa kpɛ teŋɛ zaa ka a noba wa tuori de yɛ, yɛ kpeɛrɛ a be a dire bonna zaa ba naŋ ko yɛ.

⁹Yɛ saŋna a baalba naŋ be a be, kyɛ yeli ko ba, ‘A Naaŋmen naaloŋ wa peɛle yɛ la.’

¹⁰Kyɛ ka yɛnee wa te kpɛ teŋɛ kanzaa, ka o noba ba de yɛ saanoŋ, yɛ yi gaa a sobie zu te yeli:

¹¹‘A yɛ teŋɛ uuruŋ naŋ mɔge a te gbɛɛ, te piŋ a la ane posãã bare ka a do yɛ. Kyɛ yɛ baŋ ka: a Naaŋmen naaloŋ taɛ la.’

¹²Maa yeli ko yɛ, a bebiri na daare, a Sodom teŋɛ deme na nyɛ la nembaalonzoe gaŋ a teŋɛ na deme.”

¹³“Fo yuori la we, Korazen! Fo yuori la we, Bɛsaada! Ka a yelkpeɛne ama naŋ e yɛ poɔ da e Taaya ane Sedɔŋ poore, aŋa a tenne ama noba da leɛ la ba eebo saŋ zaa, a su kparre ba naŋ sɛ ne boɔre, a kyɛ zɛ tɛmpɛloŋ a zeŋ ne.[13]

¹⁴Kyɛ a sɛrɛɛdiibu daare Naaŋmen na zo la a Taaya ane Sedɔŋ nembaaloŋ gaŋ yɛ.

¹⁵Kyɛ fõõ Kapanum, fo teɛre ka ba na zɛge fo la do ne saa be? Ai, ba na sigri fo la te eŋ dazugovũũ poɔ.”

¹⁶“Soba na zaa naŋ kyɛlle yɛ yɛlɛ, kyɛllɛ la N yɛlɛ, kyɛ soba na zaa naŋ zagre yɛ, zagre la N yɛlɛ, kyɛ ka soba na zaa naŋ zagre ma zagre la neɛ na naŋ toŋ ma.”

¹⁷A potuuribo lezaata ne pie da leɛ waɛ la ne kyelloo a wa yele, “Daana, a fo yuoriŋ, haali a sefaare sage la te noɔre!”

¹⁸Ka O yeli ko ba, “N nyɛ la Setaana ka o yi sazu a le teŋɛ a ŋa saa naŋ nyegre.

¹⁹Yɛ nyɛ, N ko yɛ la kpeɛ̃õ ka yɛ na neɛrɛ weere ane nanne, kyɛ taa faŋ a dɔndɔmɔ kpeɛ̃õ zaa zu, ka yelfaa zaa koŋ pɔge yɛ.

²⁰Anealɛzaa, yɛ ta kyellɛ ne yɛ naŋ nyɛ faŋ sefaare zu, kyɛ yɛ kyellɛ ne yɛ yoe naŋ sɛge a tenvelaa[14] gane poɔ.”

²¹A gogo na poɔŋ, Yeezu da taa la popeɛloŋ a Vooroŋ Soŋ poɔ a pãã yeli, “N Saa, a sazu ne teŋɛ Daana, N puoro fo la bareka ne fo naŋ sɔgle a yɛlɛ ama a yɛndeme ane baŋnema zie, kyɛ iri a wuli bilɛɛre. Õõ, N Saa, a fo poboɔbo sereŋ la a lɛ.

²²A N Saa de la a boma zaa ko ma. Neɛzaa ba baŋ neɛ na a Bidɔɔ naŋ waa, ka a Saa yoŋ naane. Neɛzaa meŋ ba baŋ neɛ na a Saa naŋ waa, ka a Bidɔɔ yoŋ naane ane banaŋ a Bidɔɔ naŋ boɔrɔ ka O de a Saa wuli ba.”

²³A Yeezu pãã da leɛ kyaare la a O potuuribo yoŋ kyɛ yeli ko ba, “Banaŋ naŋ nyɛrɛ a yɛlɛ ama yɛ naŋ nyɛrɛ nyɛ la maaloo!

²⁴Bonso, maa yele korɔ yɛ, Ŋmen-yelmanneba ane namine yaga da boɔrɔ la ka ba nyɛ a yɛlɛ ama yɛ naŋ nyɛrɛ kyɛ da ba nyɛ a, a da boɔrɔ ka ba woŋ a yɛlɛ ama yɛ naŋ wono, kyɛ da ba woŋ a.”

²⁵Lɛ la ka a bege baŋna kaŋ da vaa-iri are ka o gyenne a Yeezu. O da soore la a Yeezu, “Wulwullo, boŋ ka a fere ka N e a nyɛ nyɔvore naŋ ba taa baaroo?”

²⁶Ka Yeezu soore o, “Boŋ la ka ba sɛge eŋ a Naaŋmen begɛ poɔ? Fo maŋ sɔre ka boŋ?”

²⁷Ka a dɔɔ yeli sɔge, “Nɔŋ a Daana fo Naaŋmen ne fo sukyiri zaa, ane fo seɛ zaa, ane fo faŋ zaa, ane fo yɛŋ zaa, kyɛ nɔŋ fo tɔ a seŋ lɛ fo naŋ nɔŋ fo meŋɛ.”

²⁸Ka a Yeezu yeli ko o, “A yelmeŋɛ la a lɛ fo naŋ yeli. Erɛ a lɛ kyɛ fo na nyɛ la a nyɔvore naŋ ba taa baaroo.”

²⁹Kyɛ a dɔɔ naŋ da boɔrɔ ka o wuli o mennoŋ la ka o da soore a Yeezu, “N tɔ la nembuo?”

³⁰Ka Yeezu da yeli sɔge o, “Dɔɔ kaŋ la da yi Gyɛruzɛlɛm a sigre a Gyɛreko teŋɛ. Nannyig-kpeɛne mine da yi ŋmaa la a dɔɔ ŋa a faa o boma zaa, a yagre o bonsuuri bare a kyɛ ŋmɛ o gbɛre kyɛ te gɛrɛ.

³¹Ka Naaŋmen bagmaala kaŋ meŋ la lɛ a da tu a sori na waana, kyɛ o naŋ da wa nyɛ a dɔɔ naŋ gaŋ, o da bale o la bare kyɛ te gɛrɛ.

³²A lɛ ne o zu la ka Levi boorɔ neɛ kaŋ meŋ te wa ta a zie na a dɔɔ naŋ gaŋ, ka o da bale a dɔɔ baala ŋa bare kyɛ te gɛrɛ.

³³Kyɛ Samareya dɔɔ kaŋ meŋ da tu la a sori na waana, a wa nyɛ a dɔɔ ka o gaŋ, ka o nembaaloŋ zaa kpɛ o.

³⁴O da gaa la a dɔɔ ŋa zie a te pore kãã ane tedãã waare a o felɛ,[15] a de pɛmɛ leŋ ne. O da de o la pare a doŋɔ o naŋ zɔ̃ɔ̃ zu, a taa o gaa ne zie kaŋ saama naŋ maŋ gaŋ ka ba te kaa o zie.

³⁵A nyaazie daare, a Samareya dɔɔ da iri la warbie ayi ko a neɛ naŋ da kaara a zie a saama naŋ maŋ gaŋ kyɛ yeli, ‘De kaara ne a dɔɔ baala ŋa zu, ka maa wa leɛ wa, N na wa yɔɔ fo la sane na zaa fo naŋ na ŋmɛ o eŋɛ.’

³⁶A Yeezu pãã da soore la a nɔbaŋna: A noba bama bata poɔ, buo soba la waa a dɔɔ ŋa naŋ le a nannyig-kpeɛne nuuriŋ tɔ?”

³⁷Ka a nɔbaŋna yeli, “A soba na naŋ zo o nembaaloŋ.” Ka a Yeezu yeli o, “Meŋ gaa te erɛ a lɛ.”

³⁸A Yeezu ane O potuuribo naŋ da be a sobiriŋ gɛrɛ la ka ba da wa te kpɛ teŋɛ kaŋ poɔ, be ka pɔge kaŋ yuori naŋ di Maata da yi tuori de O gaa ne o yiri.

³⁹A Maata da taa la yɔɔ ka o yuori di Mareya. A Mareya da wa zeŋ la a Yeezu zie a kyɛlle a yɛlɛ O naŋ yele.

⁴⁰Kyɛ Maata naŋ da nyɛ ka o toma waa yaga o zie, lɛ la ka o da yeli ko a Yeezu, “Daana, fo ba nyɛ ka Mareya bare la a toma zaa ko N yoŋ be? Yeli ko o ka o wa soŋ ma”

⁴¹Kyɛ ka a Daana yeli sɔge o, “Maata, Maata, fo dɔɔnɔ la fo meŋɛ, a vɛŋ ka yɛlɛ yaga pigre fo;

⁴²yeli yenaa yoŋ la ferɛ. A bonvelaa la ka Mareya kaa-iri, ka ba koŋ baŋ faa o yi o zie.”