Read Southern Dagaare Luk 11 Bible Online

Luk 11 - Southern Dagaare bible

Luk 11

¹A Yeezu da be la zie kaŋ a puoro, kyɛ O naŋ da wa puori baare la ka O potuuribo kaŋ da wa yeli ko O, “Daana, wuli te lɛ te naŋ na maŋ puori aŋa Gyɔɔn naŋ da wuli o potuuribo lɛ.”

²Ka a Yeezu da yeli ko ba, “Ka yɛnee maŋ wa puoro, yɛ maŋ yeli: Te Saa, ka a fo yuori waa soŋ. Ka fo naaloŋ wa.

³Ko te bondirii bebiri zaa.

⁴Kyɛ di a te yelbebe suuri ko te, bonso, te maŋ di la suuri ko neɛzaa naŋ di te sane. Ta sage ka te kpɛ enyaabo poɔ.”

⁵Ka a Yeezu da yeli ko ba, “Yɛ de ka yɛ kaŋ la taa o ba, a gaa o zie tensogpozentaa a te yeli ko o, ‘N ba, pɛŋ ma boroboro ata,

⁶bonso, N ba kaŋ yi la sori wa, kyɛ ka N ba taa bonzaa na ko o ka o di.’

⁷Ka o leɛ yeli sɔge a die poɔ, ‘Ta dɔɔnɔ ma, a dendɔre larɛɛ la baare, kyɛ ka maa ne N bibiiri gaŋ. N kontoɔ̃ iri de bonzaa ko fo.’

⁸Maa yele korɔ yɛ, ka o naŋ koŋ iri a de bonzaa ko o, o naŋ waa o ba zuiŋ, kyɛ a dɔɔ naŋ dɔɔnɔ o zuiŋ, o na iri la a ko o bonzaa o naŋ boɔrɔ.”

⁹“Lɛnso ka N yele korɔ yɛ, Yɛ sɔre, ba na ko yɛ la, yɛ bɔ, yɛ na nyɛ la, yɛ kpaare a pane, ba na yuo ko yɛ la ka yɛ kpɛ.

¹⁰Bonso, neɛzaa naŋ maŋ sɔre, ba maŋ ko o la, neɛzaa meŋ naŋ maŋ bɔ maŋ nyɛ la, ka a pane maŋ yuo ko neɛzaa meŋ naŋ kpaare.

¹¹Nembuo la be yɛ poɔ ka o bie na sɔre zoma, ka o de waabo ko o?

¹²Bee ka o bie sɔre gyɛle ka o de naŋa ko o?

¹³Ka yɛnee gba naŋ waa nenfaare baŋ ka yɛ de bonveɛle ko yɛ bibiiri, bonso, ka a yɛ Saa naŋ be a tenvelaa[16] poɔ koŋ ko banaŋ zaa naŋ sɔre a Vooroŋ Soŋ yi O zie.”

¹⁴A Yeezu da digre la sefaa naŋ waa muu yire dɔɔ kaŋ eŋɛ, kyɛ a sefaa naŋ da wa yi baare, a dɔɔ muu da yelee yɛlɛ ka a noba nɔɛ da maa.

¹⁵Ka a noba mine da yeli, “A Bɛlezɛbu naŋ e a sefaare naa la ko O a kpeɛ̃õ ka O digre ne a sefaare.”

¹⁶Kyɛ a noba mine naŋ da boɔrɔ ka ba gyenne a Yeezu la so ka ba da yeli ka O e yelkpeɛŋaa naŋ yi tenvelaa ka ba nyɛ.

¹⁷Kyɛ a Yeezu da baŋ la ba poteɛrɛ, a da yeli ko ba, “Paaloŋ zaa deme naŋ leɛ zɔɔrɔ ne taa na leɛ la dalempoɔ, ka a yie le dɔgle taa.

¹⁸Azuiŋ ka Setaana naaloŋ wa kyataa a zɔɔrɔ ne taa, wola ka o naaloŋ na e are, yɛ naŋ pãã yeli ka Bɛlezɛbu kpeɛ̃õ la ka N de digre ne a sefaare?

¹⁹Ka anaŋ wa waa ka Bɛlezɛbu kpeɛ̃õ la ka N digre ne a sefaare, ka lɛ aŋ meŋ kpeɛ̃õ la ka a yɛ sefa-digribe meŋ digre ne a sefaare? A ŋaa zuiŋ ba na waa la yɛ sɛrediribe.

²⁰Kyɛ ka Naaŋmen kpeɛ̃õ wa la ka N digre ne a sefaare, a lɛ wuli ka Naaŋmen naaloŋ ta yɛ la.

²¹Ka gandaa wa gyere o logi kyɛ nyɔge o tammo a guuro ne o yiri, a o boma na are la zomm lɛ.

²²Kyɛ ka neɛ kpeɛ̃õ naŋ gaŋ o wa zɔɔtoɔ̃ o, o na faa la a o zɔɔzɔɔ-boma na o naŋ da dɛle, kyɛ de o boma poŋ noba.

²³Soba na zaa naŋ ba be N zie, zɔɔrɔ ne ma la, ka soba na meŋ naŋ ba boɔrɔ laŋna N deme poɔ, ŋmeɛrɛ yaara bara.”

²⁴“Ka sefaa wa yi neɛ eŋɛ, o maŋ yɔ yoɔrɔ la dondoli zu, a boɔrɔ pɛnnoo zie, kyɛ ka o naŋ ba wa nyɛ a pɛnnoo zie, o maŋ yeli la, ‘N na leɛ gaa la a yiri na poɔ N naŋ da yi na.’

²⁵Ka o naŋ wa leɛ wa, o maŋ nyɛ la a yiri ka o peere yi, a veɛlɛ o zaa.

²⁶O pãã maŋ leɛ gaa la, a te taa o taaba mine ayopoĩ naŋ waa faare gaŋ o meŋɛ wa ne, ka a zaa wa kpeɛrɛ be. A neɛ ŋa soba yɛlɛ pãã maŋ maaleŋ eɛɛ faa yaga gaŋ o dɛndɛŋ na.”

²⁷A Yeezu naŋ da naŋ yele a yɛlɛ ama la ka pɔge kaŋ naŋ be a noba poɔ da ŋmɛ kulinni eŋ O kyɛ yele, “A poɔ na naŋ dɔge fo ane berɛ na fo naŋ ɛnne nyɛ la maaloo.”

²⁸Ka a Yeezu leɛ yeli, “Banaŋ naŋ woŋ a Naaŋmen yelbiri a tuuro a yelbiri la nyɛ maaloo.”

²⁹A noba naŋ da wa te erɛ yaga, Yeezu da piili yele korɔ ba la, “A zenɛ noba kpɛ la faa yaga. Ba maŋ boɔrɔ la ka ba nyɛ yelmannaa, kyɛ ba koŋ nyɛ yelmannaa zaa, ka a Gyona yelmannaa na yoŋ naane.

³⁰Aŋa lɛ a Gyona naŋ da waa yelmannaa ko a Ninevɛ noba, lɛ meŋ la ka a Nensaala Bie meŋ na waa yelmannaa ko a zenɛ noba.

³¹A Kɔmpare paaloŋ pɔgenaa ne a zenɛ noba na laŋ iri la a kuuni poɔ a sɛrɛɛdiibu daare, ka o ko ba saanaa. Bonso, o da yi la tateŋɛ wa ka o woŋ a Solomɔn yɛŋ yɛlɛ, kyɛ yɛ nyɛ, neɛ kaŋ naŋ gaŋ Solomɔn be la a kyɛ!

³²A Ninevɛ noba ne a zenɛ noba na laŋ iri la a kuuni poɔ a sɛrɛɛdiibu daare, ka Ninevɛ noba ko a zenɛ noba saanaa. Bonso, a Ninevɛ deme da leɛ la ba eebo a saŋ na a Gyona naŋ kanne ba. Kyɛ nyɛ, neɛ kaŋ naŋ gaŋ a Gyona be la a kyɛ!

³³Neɛzaa ba maŋ kyɔŋ fentelɛ a de gbaale kyigi pɔge. O maŋ de pare la fentel-daa zu ka noba naŋ kpeɛrɛ a die na nyɛrɛ zie.

³⁴A fo nimiri la a fo eŋɛ fentelɛ. Ka a fo nimiri wa taa laafeɛ, fo eŋɛ zaa na paale ne la veɛloŋ. Kyɛ ka a fo nimiriŋ wa sãã, a fo eŋɛ zaa na paale ne la ligruŋ.

³⁵Azuiŋ, maaleŋ kaa velaa ka a veɛloŋ naŋ be fo eŋɛ ta wa e ligruŋ.

³⁶Ka a fo eŋɛ zaa gbuli wa taa veɛloŋ, ka o zie kanzaa ba kye lige poɔ, o zaa na nyɛrɛ la aŋa fentelɛ naŋ kyaane fo ane o veɛloŋ.”

³⁷Yeezu naŋ da naŋ yele a yɛlɛ, a Farazii neɛ kaŋ da wa boɔle O la ka O wa o yiri ka ba di. Lɛ la ka a Yeezu wa kpɛ te zeŋ a diibu zie.

³⁸A Farazii ŋa noɔre da maaɛ la ne o naŋ nyɛ ka a Yeezu ba pɛge O nuuri kyɛ dire a diibu.

³⁹Lɛ la ka a Yeezu da yeli ko o, “A yɛnee Faraziimine maŋ pɛge la a ŋmane ane a laa puori, kyɛ ka a yɛ poore kpɛ paale ne bombɔ-gaŋne ane potuoloŋ.

⁴⁰Yɛnee dambolo ŋa! A neɛ na soba naŋ maale a puori, ona naane maale a poɔ meŋ be?

⁴¹Azuiŋ yɛ de boma naŋ be a yɛ ŋmane ane a laa poore ko nembaalba, kyɛ nyɛ, bonzaa na eɛɛ velaa ko yɛ.”

⁴²“Kyɛ yɛ yuori la we, Faraziimine! Yɛ maŋ iri la badoge ane nyɛremaanyuu ane zɛva-boorɔ zaa a tere a Naaŋmen kyɔɔtaa kyɛ ba kyɛllɛ mennoŋ ane Naaŋmen nɔmmo yɛlɛ. A ama la ka a seŋ ka yɛ da erɛ a kyɛ ta bare a anaŋ meŋ eebo.

⁴³Yɛ yuori la we, Faraziimine! Yɛ maŋ nɔŋ ka yɛ zeŋ a nembɛrɛ zenziiri a puoruuderiŋ, kyɛ nɔnɔ ka noba puoro yɛ ne emmo a dare pooreŋ.

⁴⁴Yɛ yuori la we! Yɛ waa ŋa yaare[17] naŋ ba maŋ sãã, ka noba ba baŋ kyɛ maŋ do kyɛnɛ a zu.”

⁴⁵Ka a bege baŋna kaŋ da leɛ yeli sɔge a Yeezu, “Wulwullo, fo naŋ yeli a ŋaa, tenee meŋ la ka fo to.”

⁴⁶Ka a Yeezu yeli, “Yɛ meŋ yuori la we, yɛnee bege baŋnema! Yɛ maŋ tuo la noba tuotegrɛ naŋ gaŋ ba faŋ, kyɛ yɛmenne koŋ de nubiri seene ne a tuobu.

⁴⁷Yɛ yuori la we! Bonso, yɛnee la mɛ a Ŋmen-yelmanneba na a yɛ sããkommine naŋ ko yaare.

⁴⁸A ŋaa yɛ naŋ e wuli ka yɛ di la danseɛ kyɛ sage a lɛ a yɛ sããkommine naŋ e; bonso, banaŋ da ko a Ŋmen-yelmanneba kyɛ ka yɛ meŋ mɛ a ba yaare.

⁴⁹A lɛnso ka Naaŋmen yeli O yɛŋ poɔ, ‘N na toŋ la Ŋmen-yelmanneba ane apostoliimine ba zie, ka ba na ko ba mine kyɛ dɔgre ba mine.’

⁵⁰Azuiŋ a Ŋmen-yelmanneba zẽẽ ba naŋ kyiri, a yi a teŋɛ piiluu saŋ, na do la a zenɛ noba,

⁵¹a piili ne Abɛl te tɔ Zakareya ba naŋ da ko a Naaŋmen bagmaalkuuri ane a zisoŋ sogɔŋ. Serɛzaa ka N yele korɔ yɛ, a ba dɔgroŋ na dɔgle la a zenɛ noba zu.

⁵²Yɛ yuori la we, yɛnee bege baŋnema! Bonso, yɛ nyɔge la a bammo die saafebiri de; yɛmenne ba kpeɛrɛ kyɛ la pigi banaŋ meŋ naŋ boɔrɔ kpeɛbo sori.”

⁵³A Yeezu naŋ da wa yi yeŋ, a Naaŋmen bege wulwulibo ane a Faraziimine da piili zɔɔrɔ la yɛlɛ yaga, a soore O yɛlɛ yaga,

⁵⁴a boɔrɔ ka ba bɛre nyɔge O a O yɛlɛ yeluu poɔ.