Read Southern Dagaare Luk 13 Bible Online

Luk 13 - Southern Dagaare bible

Luk 13

¹A saŋ na meŋɛ poɔ la ka noba mine naŋ da be a be da yeli ko a Yeezu lɛnɛɛ Pilato naŋ da ko a Galili noba mine naŋ da maala bagre ka ba zẽẽ ne a donne zẽẽ da pulli taa.

²Ka a Yeezu soore ba, “Yɛ teɛre ka a Galili noba bama a zubie ŋa naŋ da pɔge da e la yelbe-erebɛ gaŋ a ba Galili taaba zaa be?

³Ai, maa yeli yɛ, ka yɛnee ba leɛ yɛ eebo, yɛ meŋ zaa na wɛ la aŋa ba naŋ da wɛ lɛ.

⁴Bee a noba pie ne banii na a Silom daŋkyinkpoŋ naŋ da le ko; yɛ teɛre ka ba da e la faa yaga gaŋ a banaŋ zaa naŋ da kpeɛrɛ a Gyɛruzɛlɛm poɔ be?

⁵Ai, maa yeli yɛ, ka yɛnee ba leɛ yɛ eebo, yɛ meŋ zaa na wɛ la aŋa ba naŋ da wɛ lɛ.”

⁶Lɛ la ka Yeezu da lɔɔ sekpɔgre ŋa, “Dɔɔ kaŋ la sɛle kaŋkanteɛ o dãã teere weɛ poɔ, a pãã da wa boɔrɔ wɔmɔ a teɛ zu kyɛ ba nyɛ wɔne zaa.

⁷Lɛ la ka o da yeli ko a neɛ na naŋ kaara a dãã teere weɛ zu, ‘Nyɛ! Yuomo ata la ŋaa ka N maŋ wa a na pɔre wɔmɔ a kaŋkanteɛ ŋa zu kyɛ daŋ ba nyɛ wɔne zaa. Kyɛ o lɔɔ bare! Bonso ka o na are pigi zie weɛlɛ.’

⁸Ka a neɛ naŋ kaara a teere zu yeli ko o, ‘Neŋkpoŋ, vɛŋ ka a teɛ naŋ are yuon-yeni, ka N tu gɔlle o, a eŋ kuoluŋ.

⁹Ka o naŋ wa wɔŋ a yuoni kaŋ, a na soma la, kyɛ ka o naŋ ba wɔŋ, ka fo pãã kyɛ o bare.’ ”

¹⁰A Yeezu da kanna la noba a puoruudie kaŋ poɔ a pɛnnoo bebiri daare.

¹¹A lɛ poɔ la ka pɔge kaŋ sefaare naŋ da e ka o gbɛre yuomo pie ne anii da be a be. O eŋɛ da kɔɔ guree la, ka o da kontoɔ̃ dɔle o meŋɛ.

¹²A Yeezu naŋ da wa nyɛ o, O da boɔle o la ka o wa O zie, ka O yeli ko o, “Pɔge, a fo baaloŋ baarɛɛ la.”

¹³A Yeezu naŋ da wa de O nuuri pare a pɔge zu la ka a o eŋɛ deɛ dɔle ka o iri are tori o zaa, a piili ire Naaŋmen yuori.

¹⁴Kyɛ a puoruudie neŋkpoŋ suuri da iree la yaga ne a Yeezu naŋ da saŋ a pɔge ŋa a pɛnnoo bebiri daare. Ka o da yele korɔ a noba, “Beri ayoɔbo la be a daa gbuli zaa poɔ ka neɛ na toɔ̃ toŋ toma. Azuiŋ, yɛ maŋ wa a bebie ama poɔ ka ba wa saŋ yɛ. Yɛ ta maŋ wa a pɛnnoo bebiri daare.”

¹⁵Ka Yeezu yeli sɔge o, “Yɛnee bampuori-kombampoɔ mine! Yɛ buo soba la ba maŋ yuo a o naadɛre bee a o boŋɔ ka o yi nyu koɔ̃ a pɛnnoo bebiri daare?

¹⁶A ba seŋ ka a Aboraham pɔgeyaa ŋa Setaana naŋ leŋ yuomo pie ne anii ŋa zaa na nyɛ o faabo a pɛnnoo bebiri be?”

¹⁷A Yeezu naŋ da wa yeli a ŋaa, vi da kpɛ la a noba na zaa naŋ da kyiiri O, kyɛ ka a noba da kyellɛ ne a nɔmaa toma na zaa O naŋ da tonɔ.

¹⁸A lɛ la ka Yeezu soore, “Wola ka a Naaŋmen naaloŋ waa? Boŋ ka N na de o manne ne?

¹⁹O waa ŋa tobiri ka neɛ de bore o weɛ poɔ. Ka o baa a te leɛ teɛ ka nuuli wa wuo a kyogri o ulli[19] zu.”

²⁰A Yeezu da la soorɛɛ la, “Boŋ ka N na de manne ne a Naaŋmen naaloŋ?

²¹O waa ŋa dããbilɛ pɔge naŋ de bu ne zɔŋ ŋmannɔɛ ata poɔ ka a zɔŋ zaa iri p.”

²²A Yeezu naŋ da gɛrɛ Gyɛruzɛlɛm, O da kpɛ la a teŋkponni ane a tembilii poore a kanna a noba gɛrɛ.

²³Neɛ kaŋ da soore O la, “Daana, noba belaa la na nyɛ faabo be?” Ka O yeli ko ba:

²⁴“Yɛ eŋ faŋ ka yɛ tu a dendɔre na naŋ e fogloo kpɛ; bonso, maa yele korɔ yɛ, noba yaga na e la a neɛ ka ba kpɛ kyɛ kontoɔ̃.

²⁵Ka a yiri soba wa iri pɔge a dendɔre baare, kyɛ ka yɛ naŋ are a yeŋ poɔ a piili kpaara a pane yele, ‘Daana, yuo a pane ka te kpɛ’, o na yeli ko yɛ la, ‘N ba baŋ zie na yɛ naŋ yi.’

²⁶Yɛ pãã na piili yele la, ‘Te ne fo la da laŋ di kyɛ nyu, kyɛ ka fo kanne a te teŋɛ poɔ.’

²⁷Kyɛ O na yeli la, ‘N ba baŋ zie na yɛ naŋ yi. Yɛ tage yi be N zie, yɛnee zaa naŋ waa yelbe-erebɛ!’

²⁸Konni ane nyemɛ nyeroo na bebe la ka yɛnee wa nyɛ Aboraham, Aziki ane Gyekɔb ane a Ŋmen-yelmanneba zaa ka ba be a Naaŋmen naaloŋ poɔ kyɛ ka ba daa yɛnee bare yeŋe poɔ.

²⁹Noba na yi la sapare, saniŋe, sapare nudoloŋ seŋ ane sapare nugɔɔ a wa kpɛ a Naaŋmen naaloŋ poɔ a di boma.

³⁰Serɛzaa, ba mine be la puoriŋ a na wa de weɛ kyɛ ka ba mine meŋ de weɛ kyɛ na leɛ wa be puoriŋ.”

³¹A gogo na poɔŋ la ka Faraziimine da wa a Yeezu zie a wa yeli ko O, “Yi a kyɛ gaa ziyuo, bonso, Hɛrɔde boɔrɔ la fo koobo.”

³²Ka a Yeezu yeli ko ba, “Yɛ gaa te yeli ko a badɛre[20] na ko ma, ‘N digre la sefaare bara kyɛ saŋ na baalba zenɛ ane bieu, kyɛ a beri ata daare N na baare la N toma.

³³Kyɛ zenɛ ne bieu a ferɛɛ la ka N be N sori poɔ gɛrɛ, bonso, ba kontoɔ̃ ko a Ŋmen-yelmanna zie zaa ka a Gyɛruzɛlɛm poɔŋ naane.’

³⁴Gyɛruzɛlɛm, Gyɛruzɛlɛm, a teŋkpoŋ na naŋ maŋ ko a Ŋmen-yelmanneba kyɛ za a noba na Naaŋmen naŋ toŋ o zie ne kubo! Gbɛre bowola ka N da boɔrɔ ka N laŋ a fo biiri taa, aŋa nɔnyaaŋaa naŋ maŋ laŋ o bilii taa a uuni lɛ, kyɛ ka fo da ba sagra!

³⁵Nyɛ, ba bare la a fo yiri ko fo. Maa yeli ko fo, fo koŋ la nyɛ ma kyɛ te ta saŋ na fo naŋ na yeli, ‘Soba na naŋ waana a Daana yuori eŋɛ nyɛ la maaloo.’ ”