Read Southern Dagaare Luk 16 Bible Online

Luk 16 - Southern Dagaare bible

Luk 16

¹Lɛ la ka Yeezu da yeli ko a O potuuribo, “Bondaana kaŋ la da bebe a taa o tontonema zukaara. Ka ba da wa yeli ko a bondaana ŋa ka a o tontonema zukaara saana la a o boma bara.

²Lɛ la ka o da boɔle o a soore o, ‘Boŋ la ka N wono kyaare ne fo ya? Wa tu a toma gbɛɛ zaa nɛnɛ ka N nyɛ, bonso, fo koŋ la baŋ kaara a n boma zu.’

³Lɛ la ka a tontonema zukaara yeli o teɛroŋ poɔ, ‘Wola ka N na e, a n daana naŋ derɛ a toma yire n nuuriŋ? N ba taa faŋ a na kɔ, kyɛ ka vi meŋ koŋ sage ka N sɔrɔ.

⁴N baŋ la lɛ N naŋ na e, ka ba naŋ wa iri ma bare a toma poɔ, ka noba na maŋ sage de ma ba yie poɔ.’

⁵Lɛ la ka o boɔle a o daana sandiribe zaa ka ba wa, ka o soore a dɛndɛŋ soba, ‘A N daana awola sane la ka fo di?’

⁶Ka o yeli sɔge, ‘Kãã dogre kɔɔ la.’ Ka a tontonema zukaara yeli ko o, ‘De a fo sane gane, a te zeŋ wieouŋ zaa kyɛ sɛge eŋ ka lezaayi ne pie la.’

⁷Lɛ la ka o la soore kaŋ meŋ, ‘Kyɛ fo meŋ, awola sane la ka fo di?’ Ka o yeli, ‘Kyi boɔre kɔɔ la.’ Ka o yeli sɔge, ‘Ŋmaa eŋ a fo sane gane poɔ ka lezaanaare la.’

⁸A tontonɔ ŋa naŋ da ba taa yelmeŋɛ daana da puu o la, ne a nyaayɛlɛ o naŋ da e, bonso, a teŋɛ ŋa zu biiri nyaa gaŋ la a veɛloŋ biiri a ne lɛ ba na maŋ e ko ba boorɔ noba.

⁹Kyɛ maa yeli ko yɛ, yɛ de yɛ libi-finni a nyɔge ne baaloŋ, ka a daare na a naŋ na wa yi yɛ nuuri poɔ, ka ba sage tuori de yɛ kpɛ ne nyɔvore naŋ ba taa baaroo yie poɔ.”

¹⁰“Neɛ na zaa naŋ taa yelmennoŋ ne bonfee, na taa la yelmennoŋ ne bon-yaga meŋ. Kyɛ soba na zaa naŋ ba taa yelmennoŋ ne bonfee, o koŋ taa yelmennoŋ ne bon-yaga meŋ.

¹¹Ka fõõ pãã ba taa yelmennoŋ a libi-finni eŋɛ, aŋ na sage de a yelmennoŋ bondaaboma eŋ fo nuuriŋ?

¹²Ka fõõ ba taa yelmennoŋ ne fo tɔsoba bon eŋɛ, aŋ na ko fo a fo meŋɛ bon?

¹³Gbaŋgbaa zaa kontoɔ̃ tonɔ korɔ nembɛrɛ bayi. O na kyiiri la kaŋ kyɛ nɔŋ kaŋ, bee ka o kpimare kaŋ kyɛ gyegri kaŋ. Yɛ kontoɔ̃ tonɔ korɔ Naaŋmen kyɛ naŋ kpimare libi-bɔ meŋ.”

¹⁴A Faraziimine naŋ da woŋ a yɛlɛ ama zaa, ba da erɛ la a Yeezu laara bonso, ba da nɔŋ la libie yaga zaa.

¹⁵A Yeezu pãã da yeli ko ba la, “Yɛ waa la banaŋ naŋ maŋ erɛ ka ka noba na nyɛ yɛ naŋ waa nemmenne lɛ, kyɛ Naaŋmen baŋ la a yɛ sukyie. Bonna nensaala naŋ maŋ nyɛ ka o e bon-yuori, Naaŋmen zie o maŋ waa la kyiiruŋ faa.”

¹⁶“A Naaŋmen begɛ ane a Ŋmen-yelmanneba sɛgre da bebe la te ta a Gyɔɔn Bati waabo saŋ. A pãã yi a lɛ saŋ waana, ba moɔle la a Naaŋmen naaloŋ yelnoore yɛlɛ, ka neɛzaa moɔrɔ ka o fere kpɛ.

¹⁷Kyɛ a na e la mɔlɔ ka ka sazu ne teŋɛ baare a gaŋ a Naaŋmen begɛ yelbi-bile kaŋ naŋ na iri bare.”

¹⁸“Dɔɔ zaa naŋ bare o pɔgɔ kyɛ de pɔge yuo, toŋ la moɔrɔ toma. Ka dɔɔ na meŋ naŋ de pɔge na o serɛ naŋ bare meŋ toŋ la moɔrɔ toma.”

¹⁹“Bondaana kaŋ la da bebe a maŋ su kpar-veɛle, kyɛ dire bondi veɛle bebiri zaa.

²⁰Dɔɔ baala kaŋ eŋɛ zaa naŋ da e felɛ ka o yuori di Lazario da maŋ zeŋ la a bondaana ŋa yiri dendɔre noɔre.

²¹A Lazario da maŋ wa boɔrɔ la a bondi-purimo naŋ maŋ ŋmaara lere a bondaana diibu zie ka ka o maa ne o kɔŋ. Haali, baare da maŋ wa lɛnnɛ la a o felɛ.

²²A nembaala ŋa da kpie la ka malekere da wa de o gaa ne ka o te be Aboraham zie. A bondaana na meŋ da kpie la ka ba ũũ o.

²³A bondaana ŋa naŋ da be a dazugovũũ poɔ a nyɛrɛ dɔgɛɛ la ka o da gbole kaa nyɛ Aboraham tɔɔre zaa, ka a Lazario are o lamboriŋ.

²⁴Lɛ la ka o boɔle, ‘N saa Aboraham, zo N nembaaloŋ kyɛ e ka Lazario de o nubiri tuŋ koɔ̃ poɔ a wa tɔ ne n zele ka o yɛŋ buri belaa lɛ, bonso, N nyɛrɛ la woore yaga a vũũ zele ŋa poɔ.’

²⁵Ka Aboraham da yeli, ‘N bie, leɛ-teɛre nyɛ a fo nyɔvore saŋ, fo da nyɛ la a bonsonne na zaa fo naŋ da maŋ boɔrɔ, kyɛ ka Lazario eŋ da nyɛrɛ woore yoŋ. Pampana ŋa, o dire la noɔ a kyɛ, kyɛ ka fo dire tuo.

²⁶Kyɛ a lɛ meŋ yoŋ naane, te ne fo sogɔŋ, ba eŋ la bogzuluŋ kaŋ ka neɛzaa koŋ baŋ yi te zie a gaŋ wa yɛ zie, bee a yi yɛ zie a gaŋ wa te zie.’

²⁷Ka a bondaana yeli, ‘N saa Aboraham, ka lɛ eŋ, N sɔrɔ fo la, toŋ a Lazario ka o gaa n saa yiri,

²⁸bonso, N taa la yɔɔmine banuu. E ka o te kpãã ba, ka ba meŋ ta wa kpɛ a woore ŋa poɔ.’

²⁹Ka Aboraham yeli sɔge, ‘Ba taa la Moozul ane a Ŋmen-yelmanneba, ba kyɛllɛ a ba yɛlɛ.’

³⁰Ka a bondaana yeli, ‘Ai, n saa Aboraham, ka neɛŋ leɛ yi a kuuni poɔ a gaa te yeli ba, ba na leɛ la ba eebo.’

³¹Ka a Aboraham yeli ko o, ‘Ka banaŋ koŋ kyɛlle a Moozul ane a Ŋmen-yelmanneba yɛlɛ, ka neɛŋ yi a kuuni meŋ poɔ gba a gaa te yeli ko ba, kyɛ ba naŋ koŋ de.’ ”