Read Southern Dagaare Luk 2 Bible Online

Luk 2 - Southern Dagaare bible

Luk 2

¹A bebie na poɔ a Nakpoŋ Ɔgɔtu da tere la noɔre ka ba sɛge a o paaloŋ noba zaa yoe.

²A noba yosɛge dɛndɛŋ da la a ŋa a saŋ na Kirino naŋ da waa a Siiriya gɔbena.

³A noba zaa da leɛ gaa la ba tenne poore ka ba na te sɛge ba yoe.

⁴A Yuzɛb meŋ da yi la a Naazɛrɛ teŋɛ naŋ be a Galili paaloŋ, a gaa Gyudiya teŋɛ kaŋ naŋ di Bɛtelɛhɛm, a Davil teŋkpoŋ, bonso, o da waa la a Davil yiri neɛ ane o bale.

⁵O ne Mareya da gaaɛ la ka ba na te sɔre ba. O ne a Mareya da eŋ la noɔre ka ba kuli taa, kyɛ a Mareya da taa la poɔ a seŋ dɔgebo.

⁶Ba naŋ da naŋ be a be la ka a Mareya dɔgebo saŋ da ta.

⁷Ka o da dɔge o bidɔɔ dɛndɛŋ, a pilli O ne pɛmɛ, a gaale O donne bondi gbori poɔ, zie naŋ da ba kyebe a saama kpɛzie zuiŋ.

⁸A fɔŋ na poɔ, pekyeemɛ da kpeɛrɛ la a duoraa poɔ a guuro ba peere tensogɔ saŋ.

⁹Lɛ la ka a Daana maleke da wa are ba niŋesogɔ, ka a Daana veɛloŋ da puri laare ba, ka dabeɛ̃ da kpɛ ba yaga.

¹⁰Kyɛ a maleke da yeli ko ba la, “Yɛ ta zoro dabeɛ̃, yɛ nyɛ, N waana la ka N yeli yelnoore ko yɛ, yelnoore naŋ na e kyelloo kpoŋ ko a noba zaa.

¹¹A zenɛ ŋa, ba dɔge la a yɛ Faara a Davil teŋkpoŋ poɔ, Ona la a Mɛzaaya,[2] a Daana.

¹²A yelwulaa yɛ naŋ na nyɛ la ŋa: yɛ na nyɛ la bie ba naŋ pilli ne bipɛmɛ a gaale O donne bondi gbori poɔ.”

¹³A tɔntɔbaalɛ ka maleke beɛoŋ deɛ daa yi wa are ane a maleke na, ka ba puuro Naaŋmen, a yele:

¹⁴“Ka Naaŋmen nyɛ puubu a sazu tɔɔre zaa, kyɛ ka teŋɛzu kyɛ ka banaŋ O poɔ naŋ pɛle ne nyɛ emmaaroŋ!”

¹⁵A malekere naŋ da wa bare ba kyɛ leɛ gaa tenvelaa,[3] a pekyeemɛ da yeli ko la taa, “Yɛ e ka te gaa a Bɛtelɛhɛm pampana ŋa, a te nyɛ a yeli ŋa naŋ e, ka a Daana iri wuli te.”

¹⁶A lɛ la ka ba page wieouŋ zaa gaa te nyɛ Mareya ane Yuzɛb ane a bie naŋ gaŋ donne bondi gbori poɔ.

¹⁷Ba naŋ da wa nyɛ a ŋaa, ba da manne la a yɛlɛ na a maleke naŋ da yeli ko ba a kyaare ne a bie ŋa.

¹⁸Ka banaŋ zaa naŋ da woŋ a yɛlɛ a pekyeemɛ naŋ yeli ko ba nɔɛ da maa yaga.

¹⁹Kyɛ Mareya eŋ da taa la a yɛlɛ ama zaa o sukyiri poɔ a teɛrɛ.

²⁰A pekyeemɛ da leɛ kulee la, a danna Naaŋmen kyɛ ire O yuori ane a yɛlɛ na zaa ba naŋ da woŋ kyɛ nyɛ, ka a tu a lɛ ba naŋ da yeli ko ba.

²¹Beri anii naŋ da wa tɔle, a saŋ da taɛ la ka ba iri a bie dɛgre, ba da pore la O yuori ka Yeezu, a yuori na a maleke naŋ da tere kyɛ ka O ma wa ŋmaa seɛ.

²²A saŋ naŋ da wa ta ka ba tu a maaloo tuuluŋ a seŋ lɛ a Moozul begɛ naŋ wuli, ba da taa la a Yeezu wa ne a Gyɛruzɛlɛm poɔ, ka ba de O ko a Daana

²³(aŋa ba naŋ sɛge a Daana begɛ poɔ lɛ, “Bidɔɔ dɛndɛŋ zaa na waa la a Daana soobo”),

²⁴kyɛ ka ba da tere kyɔɔtaa a seŋ lɛ a Daana nɔɛ naŋ biŋ, “Ŋmama ayi bee naŋmambilii ayi.”

²⁵A saŋ na dɔɔ kaŋ da be la a Gyɛruzɛlɛm poɔ ka o yuori di Simeon. A dɔɔ ŋa da waa la nemmeŋɛ naŋ puoro Naaŋmen ne o poɔ zaa, a da kyɛllɛ a Izerayɛl faabo bebiri yɛlɛ kyɛ ka a Vooroŋ Soŋ da be o zie.

²⁶A Vooroŋ Soŋ da iri wuli o la ka o koŋ kpi kyɛ te ta lɛ saŋ o nimiri naŋ na nyɛ a Daana Mɛzaaya.

²⁷A Vooroŋ Soŋ da taa la a Simeon wa ne a Naaŋmen die poɔ, saŋ na a bie dɔgrebɔ naŋ da taa a bie wa ne ka ba wa tu ne O a tuuluŋ a seŋ lɛ a puoruu nɔɛ naŋ biŋ.

²⁸A Simeon da de la a bie eŋ o nuuri poɔ, a kyɛ puori Naaŋmen ameseɛrɛ a yele:

²⁹“Daana, ŋaa fo pãã bara la a fo tontonɔ ka o gɛrɛ ne emmaaroŋ, a seŋ fo yelbiri naŋ yeli;

³⁰bonso, a n nimie nyɛ la a fo faabo na,

³¹fo naŋ nare biŋ a andonɛɛ zaa niŋesogɔ,

³²a e kyaane ko a Nemboore-yobo[4] yɛŋ, kyɛ e puubu ko a Izerayɛl noba.”

³³A bie saa ne O ma nɔɛ da maaɛ la yaga ne a lɛ a Simeon naŋ da yeli kyaare ne a bie.

³⁴A Simeon pãã da maale ba la, kyɛ yeli ko a O ma Mareya, “Naaŋmen iri la a bie ŋa ka ka noba yaga na le bee a iri a Izerayɛl poɔ, kyɛ na e yelwulaa ba naŋ na de ŋmeɛrɛ ne nɔkpeɛne,

³⁵ka lɛ na e ka noba yaga poteɛrɛ sãã gbaŋgbale, kyɛ ka soɔ na kyɔge a fo meŋɛ sukyiri meŋ.”

³⁶Ŋmen-yelmanna kaŋ yuori naŋ da di Ana, naŋ da waa a Fanuwɛl naŋ yi a Asɛ bale pɔgeyaa, meŋ da be la a be. A pɔge ŋa da korɛɛ la yaga. O da kuli la serɛ yuomo ayopoĩ kyɛ ka a serɛ kpi.

³⁷Lɛ la ka o da leɛ pɔgekoɔre te ta yuomo lezaanaare ne anaare. O da ba yire a Naaŋmen die poɔ, kyɛ da maŋ leŋ noɔre, a puoro Naaŋmen ŋmenaa ane tensogɔ.

³⁸A wagre na poɔ la ka o da wa, a piili puuro Naaŋmen a kyɛ manna a bie yɛlɛ korɔ banaŋ zaa naŋ da kyɛllɛ a Gyɛruzɛlɛm faabo.

³⁹A Yuzɛb ne a Mareya naŋ da wa te tu a tuuluŋ zaa naŋ seŋ a Daana begɛ naŋ wuli lɛ baare, ba da leɛ kuli la a ba teŋɛ Naazɛrɛ naŋ be Galili poɔ.

⁴⁰A bie da baaɛ la, a taa faŋ ane yɛŋ kyɛ ka Naaŋmen maaloo da be O zie.

⁴¹Yuoni zaa poɔ a Yeezu dɔgrebɔ da maŋ gaa la Gyɛruzɛlɛm a te di a Ista tigri.

⁴²A Yeezu naŋ da wa ta yuomo pie ne ayi, ba da gaa la a tigri a Gyɛruzɛlɛm poɔ a seŋ ba naŋ da maŋ erɛ lɛ.

⁴³A tigri naŋ da wa di baare, ka ba da leɛ kulo, a ba bie Yeezu da zeŋ la a Gyɛruzɛlɛm poɔ kyɛ ka O saa ne O ma da ba baŋ ne a.

⁴⁴Ba da teɛre ka O be la a noba poɔ ka ba zaa kyɛnɛ a sori poɔ. Ba da kyɛŋ la bebi-gbuli zaa baare kyɛ pãã da piili soorɔ O yɛlɛ a ba noba ane ba nembaŋne zie.

⁴⁵Ba naŋ da ba nyɛ O, ba da leɛ gaa la a Gyɛruzɛlɛm ka ba te bɔ O.

⁴⁶A beri ata puoriŋ la ka ba da nyɛ O a Naaŋmen die poɔ, ka O ne a wulwulibo laŋ zeŋ ka O kyɛllɛ ba yɛlɛ kyɛ meŋ soorɔ ba soorebie.

⁴⁷Banaŋ zaa naŋ da woŋ a O yɛlɛ nɔɛ da maaɛ la yaga ne O yelbammo ane lɛ O naŋ maŋ iri a ba soorebie nɔɛ.

⁴⁸A O saa ne O ma naŋ da wa nyɛ O, ba nɔɛ zaa da maaɛ la, ka O ma da soore O, “N bie, wola ka fo e te lɛ? Nyɛ! Maa ne fo saa bɔ fo la ne pɔlteɛ.”

⁴⁹Ka O yeli sɔge ba, “Bonso ka yɛ yɔ boɔrɔ ma? Yɛ ba baŋ ka a seŋ ka N be N Saa yiri poɔ be?”

⁵⁰Kyɛ ba da ba baŋ a yɛlɛ O naŋ yeli ko ba tɛgɛ.

⁵¹A Yeezu pãã da tu ba la gaa a Naazɛrɛ, a da sagra ba wuluu. A O ma da taa la a yɛlɛ ama zaa o teɛroŋ poɔ ne nimizeɛ.

⁵²A Yeezu da baara la, ka O yɛŋ meŋ yɛllɛ, kyɛ ka O nyɛrɛ yuori Naaŋmen ane nensaalba zie.