Read Southern Dagaare Luk 20 Bible Online

Luk 20 - Southern Dagaare bible

Luk 20

¹Daare kaŋ, Yeezu naŋ da be a Naaŋmen die poɔ a kanna a noba kyɛ manna a Ŋmen-yelnoore, a Naaŋmen bagmaalkare ane a Naaŋmen bege wulwulibo ne a nembɛrɛ

²da wa soore O la, “Yeli ko te, yeŋ la ka fo nyɛ a kpeɛ̃õ ŋa tonɔ ne a toma ama? Aŋ mɔɔ la ko fo a kpeɛ̃õ ŋa?”

³Ka Yeezu yeli sɔge ba, “N meŋ na soore yɛ la soorebi-yenaa, ka yɛ yeli ka N nyɛ:

⁴A Gyɔɔn suobu da yi la Naaŋmen zie bee nensaalba zie?”

⁵Ka ba da soorɔ taa a yele, “Ka tenee yeli ka, Naaŋmen zie la, O na soore te la, ‘Bonso ka yɛ da ba de a Gyɔɔn yɛlɛ?’

⁶Kyɛ ka tenee yeli, ‘Nensaalba zie la,’ a noba zaa na za te la ne kubo; bonso, ba zaa da sage deɛ la ka a Gyɔɔn waa la Ŋmen-yelmanna.”

⁷Lɛ la ka ba da yeli sɔge ka ba ba baŋ zie a Gyɔɔn kpeɛ̃õ naŋ yi.

⁸Ka a Yeezu pãã yeli ko ba, “Ka lɛ N meŋ koŋ yeli ko yɛ zie na N naŋ nyɛ a kpeɛ̃õ tonɔ ne a toma ama.”

⁹A Yeezu pãã da lɔɔ la sekpɔgre ŋa ko a noba, “Dɔɔ kaŋ la da kɔ weɛ, a sɛle dãã teere. O da de la a weɛ ko noba ka ba kaara kyɛ da gaa teŋɛ kaŋ a te kɔɔre yaga zaa.

¹⁰A tewɔmɔ pɔroo saŋ naŋ da wa ta, o da toŋ la o gbaŋgbaa ka o gaa a wɛkaareba zie ka ba pɔre a o deme tere. Kyɛ a wɛkaareba da nyɔge la a gbaŋgbaa ŋmɛ, kyɛ bare o ka o leɛ gaa ne nuzaglaa.

¹¹Ka o la toŋ a gbaŋgbaa kaŋ, ka a wɛkaareba la ŋmɛ o meŋ, a to o zoma, kyɛ e ka o leɛ gaa ne nuzaglaa.

¹²Ka o da la toŋ a bata soba, ka ba te ŋmɛ o meŋ pere kyɛ daa o yi ne a weɛ poɔ te bare.

¹³Lɛ la ka a dãã teere weɛ soba yeli, ‘Wola ka N na e? N na toŋ la n poyɛŋ bie, ka a pɔge, ba na ko la ona eŋ gyeremɛ.’

¹⁴Kyɛ a wɛkaareba naŋ da wa te nyɛ a bie, ka ba da yeli ko taa, ‘A gbandire la a ŋa. Yɛ e ka te ko o kyɛ ka a gbandi-boma na e te soobo.’

¹⁵Ba pãã da tage o la yi ne a weɛ poɔ, a te ko o. Wola ka a weɛ soba pãã na e a wɛkaareba bama?

¹⁶O na wa ko la a wɛkaareba bama kyɛ de a weɛ ko neŋyobo.” Ba naŋ da woŋ a ŋaa la ka ba da yeli, “Ŋmen ta sage!”

¹⁷Ka Yeezu leɛ kaa ba kyɛ yeli, “A yeli ŋa ba naŋ sɛge eŋ a ŋmen gane poɔ tɛgɛ la boŋ: ‘A kuuri na a mɛmeɛrebɛ naŋ zagre bare la leɛ a yiri pare kuuri’?

¹⁸Neɛzaa naŋ le a kuuri ŋa zu na kɔɔre la puropuro, kyɛ neɛ na meŋ zu a kuuri naŋ na le na ŋmore la.”

¹⁹A Naaŋmen bege wulwulibo ane a Naaŋmen bagmaalkare naŋ da wa baŋ ka bana la ka a Yeezu lɔɔ a sekpɔgre kyaare ne, ba da boɔrɔ la ka ba eŋ O nuuriŋ a vuo na poɔ, kyɛ ba da zoro la a noba dabeɛ̃.

²⁰Azuiŋ ba da pigre la a Yeezu gbɛkyɛnne, a kyɛ toŋ bampuori-kombampoɔ noba mine ka ba na bɔ faaloŋ dɔgle a Yeezu, a pãã toɔ̃ nyɔge O te ko a gɔbena ane a teŋɛ nembɛrɛ.

²¹Lɛ la ka a noba wa soore a Yeezu, “Wulwullo, te baŋ ka a fo yeluu ane fo kannoo zaa e la yelmeŋɛ. Fo ba gyegre noba a kyaare ne ba naŋ waa lɛ, kyɛ fo maŋ wulee noba a Naaŋmen sori ne yelmeŋɛ.

²²A seŋɛɛ la ka te yɔɔrɔ zuyɔɔ korɔ Naa Siiza bee a ba seŋ?”

²³Kyɛ Yeezu da baŋ la a ba nyaayɛlɛ a pãã da yeli ko ba:

²⁴“Yɛ wuli ma a warbiri. Nembuo zu ne o yuori la be a warbiri zu?” Ka ba yeli, “A Naa Siiza la.”

²⁵Ka Yeezu yeli ko ba, “Ka lɛ yɛ de boma naŋ e Naa Siiza soobo a ko Naa Siiza, kyɛ de boma meŋ naŋ e Naaŋmen soobo ko Naaŋmen.”

²⁶Ba da ba toɔ̃ nyɔge a Yeezu a noba niŋesogɔ a yi a lɛ O naŋ da yeli. Ba nɔɛ zaa da maaɛ la ne a yɛlɛ O naŋ da yeli sɔge ba, ka ba deɛ taŋ ba nɔɛ.

²⁷A Sadusii noba mine naŋ da maŋ yeli ka kuuni leɛ-iruu ba kyebe, da wa la Yeezu zie,

²⁸a wa soore O, “Wulwullo, Moozul da sɛge la noɔre ko te ka ka dɔɔ wa kpi kyɛ bare o pɔgɔ, kyɛ ba taa biiri ne o, a o yɔɔ na de la a kopɔge a dɔge biiri ko a o yɔɔ naŋ ba kyebe.

²⁹Yɔɔmine bayopoi la da bebe, ka a danweɛ soba de pɔgɔ, a ba dɔge bie ne o kyɛ kpi.

³⁰Lɛ la ka a bayi soba de a kopɔge,

³¹ka a bata soba meŋ da la de o. Ka a ba zaa bayopoi da de a kopɔge ŋa te tɔ. Ba kanzaa da ba dɔge bie ne o kyɛ kpi.

³²A baaraa zaa a pɔge meŋ da wa kpie la.

³³A kuuni leɛ-iruu poɔ, buo soba pɔgɔ pãã na la a pɔge ŋa? Ba zaa bayopoi naŋ pãã da de o.”

³⁴Ka Yeezu yeli ko ba, “A teŋɛzu kyɛ la ka pɔgde ane serkuli yɛlɛ be,

³⁵kyɛ banaŋ naŋ seŋ ne ka ba leɛ-iri a kuuni poɔ, ka a saŋ wa ta, ba koŋ derɛ pɔgeba, bee a kulo serebɛ.

³⁶Serɛzaa, ba koŋ la baŋ kpi, bonso, ba na waa seŋ ŋa malekere. Ba na waa la Naaŋmen bibiiri, ba naŋ leɛ-iri a kuuni poɔ zuiŋ.

³⁷Kyɛ a kuuni leɛ-iruu yɛlɛ, Moozul gba wuli yɛ la weliweli ka a kuuni na leɛ-iri la a yi a ŋmen gane poɔ, benee o naŋ manne a moɔ diibu yɛlɛ. A be la ka o yeli ka a Daana waa la Aboraham Naaŋmen, Aziki Naaŋmen ane a Gyekɔb Naaŋmen.

³⁸A lɛ wulee la ka O waa la a voba Naaŋmen, O ba waa kuuni Naaŋmen, bonso, a O eŋɛ la ka ba zaa voorɔ.”

³⁹Lɛ la ka a Naaŋmen bege wulwulibo mine yeli sɔge, “Wulwullo, fo yelee soŋ.”

⁴⁰Ba da ba la sage na soore O yeli zaa.

⁴¹Lɛ la ka Yeezu da soore ba, “Wola ka ba na baŋ yeli ka a Mɛzaaya[28] waa la Davil bie?

⁴²Bonso, a Davil meŋɛ yelee la a Yiele Gane poɔ: ‘A Daana Naaŋmen da yeli ko la n Daana, “Zeŋ a n nuduluŋ seŋ,

⁴³te ta lɛ saŋ N naŋ biŋ a fo dɔndɔnne a fo gbɛɛ puliŋ.” ’

⁴⁴Ka a Davil pãã da boɔle O Daana; wola ka O na la waa a Davil bie meŋ?”

⁴⁵A noba zaa da kyɛllɛ wono la a Yeezu naŋ da yele korɔ a O potuuribo,

⁴⁶“Yɛ gu yɛmenne velaa yi a Naaŋmen bege wulwulibo zie. Ba maŋ nɔŋ ka ba su kpar-wogri yoɔrɔ ne, a nɔŋ ka noba puoro ba ane emmo a dare poore. Ba maŋ nɔŋ ka ba zenɛ a kog-veɛle zu a puoruuderiŋ, a nɔŋ ka ba zenɛ a nembɛrɛ zenziiri a tige lammo ziiri.

⁴⁷Ba maŋ faa la pɔg-kɔbɔ yie, kyɛ maŋ puori kɔɔre yaga zaa a na wuli ka ba waa la nemmenne. Ba dɔgroŋ na waa la kpoŋ yaga.”