Read Southern Dagaare Luk 21 Bible Online

Luk 21 - Southern Dagaare bible

Luk 21

¹A Yeezu da zɛge la O zu a nyɛ bondaanema naŋ eŋnɛ ba kyɔɔtaare a kyɔɔtaare daga poɔ.

²O da nyɛ la kopɔg-nembaala kaŋ meŋ ka o taa neeneene ayi wa eŋ a kyɔɔtaa daga poɔ.

³Ka a Yeezu yeli, “Yelmeŋɛ zaa ka N yele korɔ yɛ, a kopɔg-nembaala ŋa tere gaŋ la a noba zaa,

⁴bonso, a bama zaa, a ba bon-yaga ba naŋ taa poɔ la ka ba iri mine tere, kyɛ a kopɔge ŋa ne o nandaanoŋ zaa tere la bonna zaa o naŋ taa.”

⁵A noba mine naŋ da yele a Naaŋmen die yɛlɛ, a manna lɛ ba naŋ mɛ a o daŋkyime ne kuveɛle, ane a kyɔɔtaare ba naŋ maŋ korɔ Naaŋmen la ka Yeezu da yeli:

⁶“A boma ama zaa yɛ naŋ nyɛrɛ, bebiri kaŋ waana la ka a kuuri kanzaa koŋ la dɔgle o tɔ zu. A zaa pabo ka ba na daalɔɔ.”

⁷Ba da soore la a Yeezu, “Wulwullo, boŋ saŋ la ka a yɛlɛ ama na e? Boŋ la na wuli ka a yɛlɛ ama eebo saŋ tara la?”

⁸Ka O yeli, “Yɛ gu yɛmenne velaa ka ba ta wa bɛlle yɛ. Bonso, noba yaga na wa la N yuori eŋɛ, a wa yeli, ‘Maa la o!’ kyɛ la yeli, ‘A saŋ peɛlɛɛ la!’ Yɛ ta wa tuuro ba.”

⁹“Ka yɛnee wa woŋ zɔɔre ane zie naŋ dɔɔnɔ yɛlɛ, yɛ ta zoro dabeɛ̃. Bonso, a ama zaa seŋ ka a daŋ e, kyɛ a teŋɛ baaroo koŋ ta a daadaalɛ.”

¹⁰Lɛ la ka O da yeli ko ba, “Paaloŋ na iri zɔɔrɔ ne la o tɔ paaloŋ, ka naaloŋ ŋa noba iri zɔɔrɔ ne naaloŋ kaŋ noba.

¹¹A teŋɛ na gbigre la yaga, kyɛ ka kɔŋkpoŋ ane baaloŋ faa le a tendaa ziiri yaga. Pɔlteɛ yɛlɛ na e la kyɛ ka yelwulii sãã a sazu poɔ.”

¹²“A yɛlɛ ama zaa koŋ e sɛre, kyɛ ka ba nyɔgre yɛ, a dɔgre yɛ yaga. Ba na de yɛ la eŋ a puoruuderi ane a nempɔgderi poore. Ba na taa yɛ la wa ne a namine ane a gɔbena mine zie a N yuori zuiŋ.

¹³A ŋaa na ko yɛ la vuo ka yɛ toɔ̃ di N danseɛ.

¹⁴Azuiŋ, yɛ ta nare a yɛ teɛroŋ poɔ bonna yɛ naŋ na yeli faa yɛmenne;

¹⁵bonso, maa la na ko yɛ a yelbie ane a yɛŋ ka a yɛ dɔndɔnne kanzaa koŋ baŋ yeli lɔɔ yɛ.

¹⁶Haali gba, yɛ dɔgrebɔ ane yɛ yɔɔmine, yɛ noba ane yɛ bamine na nyɔge yɛ la eŋ dɔndɔnne nuuriŋ, kyɛ ko yɛ mine.

¹⁷A noba zaa na kyiire yɛ la a N yuori zuiŋ.

¹⁸Kyɛ yɛ zukɔɔloŋ kanzaa koŋ wɛ.

¹⁹A yɛ kannyiri diibu zuiŋ, yɛ na nyɛ la nyɔvore.”

²⁰“Ka yɛnee wa nyɛ noba ka ba yi tammo a lɔɔ gyili a Gyɛruzɛlɛm, yɛ baŋ ka o leebu saŋ taɛ la.

²¹A saŋ na poɔ, a ferɛɛ la ka banaŋ naŋ be Gyudiya paaloŋ zo kpɛ a tanne poore, ka banaŋ naŋ be a teŋkpoŋ poɔ zo yi o poɔ, kyɛ banaŋ naŋ be wɛre poore ta wa leɛrɛ kulo.

²²Bonso, a bebie ama na waa la woore bebie, ka a yɛlɛ na zaa ba naŋ da sɛge eŋ a ŋmen gane poɔ na tu a tuubu.

²³Pɔgpoore ane banaŋ naŋ taa bilɛɛre ka ba ɛnnɛ a bebie na poɔ yuori la we! Bonso, dɔgɛɛ kpoŋ na wa la a teŋɛzu, kyɛ ka Naaŋmen suuri iri ne a noba ŋa.

²⁴Ba na ko ba la ne zɔɔzɔɔ-soɔ, kyɛ nyɔge ba gaa ne tatenne ka ba te leɛ gbaŋgbaare. Ka Nemboore-yobo[29] di kpeɛ̃õ a Gyɛruzɛlɛm noba zu a te ta saŋ na a Nemboore-yobo naaloŋ naŋ na baare.”

²⁵“Yelwulii na be la a ŋmenaa, a kyuu ane a ŋmarbie poore, kyɛ ka dɔgɛɛ page a nemboorɔ zaa, ka buriburi kpɛ ba, a mane ane a kɔmmie naŋ hoorɔ erɛ gɔmɔ zuiŋ.

²⁶Noba na yĩĩe la ne dabeɛ̃, kyɛ pɔnne poore ne yɛlɛ naŋ waana ka a e a teŋɛzu, bonso, ba na zɛŋ la a sazu boŋkpeɛne zaa.

²⁷Ba pãã na nyɛ la ‘a Nensaala Bie ka O yi a sagama poɔ waana’ ne kpeɛ̃õ ane puubu.

²⁸Ka a yɛlɛ ama wa piili erɛ, yɛ iri are, a zɛge yɛ zuri, bonso, a yɛ faabo saŋ tara la.”

²⁹A Yeezu pãã da lɔɔ la sekpɔgre ko ba, “Yɛ leɛ kaa a kaŋkanteɛ ane a teere zaa nyɛ;

³⁰ka anaŋ wa te bɔrɔ vapaala, yɛ maŋ baŋ ka sẽɛ kpeɛrɛ la.

³¹A lɛ meŋ la, ka yɛnee wa nyɛ a yɛlɛ ama ka a erɛ, yɛ baŋ ka a Naaŋmen naaloŋ peɛlɛɛ la.

³²Serɛzaa ka N yele korɔ yɛ, a zenɛ noba ŋa koŋ kpi baare sɛre kyɛ ka a yɛlɛ ama zaa e.

³³A sazu ne teŋɛ na wa tɔle gaa la, kyɛ a N yelbie koŋ baŋ tɔle gaa togitogi.”

³⁴“Yɛ gu yɛmenne velaa, a ta wa vɛŋ ka yɛ teɛroŋ zaa kyaare ne tige diibu ane dããnyukuoli, kyɛ bee a vɛŋ ka a teŋɛzu nyɔvore yɛlɛ dɔɔnɔ yɛ, ka a bebiri ta wa uri yɛ aŋa bɛraa.

³⁵Bonso, a yɛlɛ ama na page la a noba zaa naŋ be a tendaa zaa zu.

³⁶Yɛ gu yɛmenne wagre zaa, a puoro ka ka yɛ na taa faŋ a muri yi a yɛlɛ ama zaa naŋ na wa e poɔ, a kyɛ are a Nensaala Bie niŋesogɔ.”

³⁷A Yeezu da maŋ kanna la a noba a Naaŋmen die poɔ bebiri zaa, kyɛ ka tensogɔ saŋ ka O yi gaa a zie na ba naŋ boɔlɔ Oliva Taŋ a te bebe a tensogɔ zaa.

³⁸A noba zaa da maŋ daŋ iri la baguo saŋ a gaa a Naaŋmen die ka ba te woŋ a O kannoo.