Read Southern Dagaare Luk 24 Bible Online

Luk 24 - Southern Dagaare bible

Luk 24

¹A Koseɛraa bebi-dɛndɛŋ daare, bagu-pipi saŋ, a pɔgeba da taa la a turaali ba naŋ nare a gaa ne a yaa zie.

²Ba da te nyɛ la a yaa noɔre kuuri ka ba billi bare,

³kyɛ ba naŋ da te kpɛ a yaa poɔ, ba da ba nyɛ a Daana Yeezu eŋɛ.

⁴Ba nɔɛ naŋ da maa ka ba bugi are la ka dɔbɔ mine bayi deɛ wa uri sãã, a wa are peɛle ba. A dɔbɔ bonsuuri da pɛle la a zaa parepare lɛ.

⁵Dabeɛ̃ da kpɛ la a pɔgeba yaga zaa ka ba levɔgle teŋɛ. Ka a dɔbɔ soore ba, “Bonso ka yɛ boɔrɔ nenvore kuuni poɔ? O ba kye kyɛ, O leɛ-iri la a kuuni poɔ.

⁶Yɛ leɛ-teɛre lɛ O naŋ da yeli ko yɛ, a saŋ na O naŋ da be a Galili poɔ,

⁷ka a ferɛɛ la ka ba de a Nensaala Bie eŋ a nenfaare nuuriŋ ka ba kpa O dagaraa zu, kyɛ ka a beri ata daare ka O leɛ-iri a kuuni poɔ.”

⁸Lɛ la ka a pɔgeba leɛ-teɛre a Yeezu yɛlɛ O naŋ da yeli.

⁹Ba naŋ da leɛ yi a yaa zie gaa la, ka ba te manne a yɛlɛ na zaa ko a Yeezu potuuribo pie ne yeni na ane ba kyɛlɛɛ na zaa.

¹⁰Mareya Magdalina, Yuwana, Mareya a Gyimisi ma, a laŋne a pɔgeba banaŋ zaa naŋ da poɔ ba poɔ la da manne a yɛlɛ ama ko a Yeezu potuuribo.

¹¹Kyɛ a Yeezu potuuribo da de la a yɛlɛ ka a e pɔgeba yelfoglo, a lɛ zuiŋ ba da ba sage de.

¹²Kyɛ Piita da iri zo gaa la a yaa zie a te zuuni, a muuli kaa a yaa poɔ. O da nyɛ la a kũũ pɛmɛ ka a biŋ a yoŋ zie, ka o leɛ kuli ne nɔmaa ane lɛ a yɛlɛ naŋ e.

¹³A daare na zaa, a Yeezu potuuribo mine bayi da yi gɛrɛ la teŋɛ kaŋ naŋ di Emmawuse. A teŋɛ na ne Gyɛruzɛlɛm tɔɔre ta la mɛlɛ ayopoĩ.

¹⁴Ba da kyɛnɛ la kyɛ manna a yɛlɛ zaa naŋ e a korɔ taa.

¹⁵Ba naŋ da naŋ manna a yɛlɛ la ka Yeezu meŋ kyɛŋ wa ta ba, ka ba zaa laŋ kyɛnɛ.

¹⁶Kyɛ ba niŋe da ba vɛle ka ba na baŋ ka a Yeezu la.

¹⁷Ka a Yeezu soore ba, “Boŋ yɛlɛ la ka yɛ kyɛnɛ manna a ŋaa?” Ka ba leɛ are seretete, a sãã niŋe.

¹⁸Lɛ la ka ba kaŋ yuori naŋ di Kilopa leɛ soore a Yeezu, “Fo yoŋ la saana naŋ be a Gyɛruzɛlɛm poɔ a ba baŋ a yɛlɛ naŋ e a bebie ŋa poɔ be?”

¹⁹Ka a Yeezu soore ba, “Boŋ yɛlɛ?” Ka ba yeli sɔge, “A Yeezu naŋ yi a Naazɛrɛ yɛlɛ wɛ. A dɔɔ ŋa da e la Ŋmen-yelmanna naŋ e gandaa, O tontonne poɔ ane O kannoo poɔ a Naaŋmen niŋesogɔ ane a noba zaa niŋesogɔ,

²⁰ane lɛ a Naaŋmen bagmaalkare ane a teŋɛ nembɛrɛ naŋ da de O tere ka ba kpa O a dagaraa zu.

²¹Kyɛ te da teɛrɛ la ka Ona la na faa a Izerayɛl biiri. A beri ata la ŋaa a yɛlɛ ama naŋ e.

²²A gaŋ a zaa, pɔgeba mine naŋ be te poɔ vɛŋɛɛ la ka te noɔre maa. Ba da gaa la a yaa zie a bagu-pipi ŋa,

²³kyɛ ba naŋ da ba nyɛ a Yeezu eŋɛ a yaa poɔ, ba da leɛ wa yeli ko te la ka ba nyɛ la malekere ka ba yeli ko ba ka a Yeezu leɛ-iri la a kuuni poɔ.

²⁴Lɛ la ka te taaba mine da gaa a yaa zie a te nyɛ ka a sereŋ waa a lɛ a pɔgeba naŋ da yeli, kyɛ ba da ba nyɛ O meŋɛ.”

²⁵Lɛ la ka a Yeezu yeli ko ba, “Wola ka yɛ boli lɛ, kyɛ ba e nyagroŋ ka yɛ sage de a yɛlɛ zaa a Ŋmen-yelmanneba naŋ da yeli!

²⁶A da ba seŋ ka a Mɛzaaya[37] di a dɔgɛɛ ama kyɛ pãã kpɛ a O naaloŋ poɔ be?”

²⁷O pãã da piili ne la a Moozul yelsɛgre gama poɔ yɛlɛ ane a Ŋmen-yelmanneba sɛgre gama zaa, a manne yɛlɛ zaa naŋ kyaare ne O meŋɛ a gansonne poɔ a ko ba.

²⁸Ba naŋ da wa te peɛlɛ a teŋɛ na ba naŋ da gɛrɛ, a Yeezu da kyɛŋ de la ba weɛ aŋa O naŋ tɔlɔ gɛrɛ.

²⁹Ka ba sɔre O a yele, “Ta gaa, e ka te zaa be a kyɛ, bonso, zie sɔgrɔ la, ka saŋ faa.” Lɛ la ka a Yeezu da tu ba kpɛ die.

³⁰O naŋ da wa zeŋ ne ba ka ba di diibu, O da de la boroboro, a puori maale, kyɛ nyɔge ŋmaa, a de ko ba.

³¹Lɛ la ka ba nimie deɛ vɛle ka ba pãã baŋ ka a Yeezu la, kyɛ ka O deɛ more.

³²Ka ba yele korɔ taa, “A te sukyie da ba kpɛ dire ne vũũ a saŋ na O naŋ da manna a yɛlɛ korɔ te a sori poɔ a yi a ŋmen gama poɔ.”

³³Ba da iree la a paretɛloŋ na poɔ a leɛ gaa Gyɛruzɛlɛm a te nyɛ a potuuribo pie ne yeni na ka ba laŋne a ba taaba.

³⁴Ka ba da yele, “A Daana sereŋ leɛ-iri la a yi a kuuni poɔ. O de la O meŋɛ wuli Saamon!”

³⁵Lɛ la ka a sokyɛnemɛ da manne a yɛlɛ na zaa naŋ da e a sori poɔ ko a potuuribo a kyaare ne lɛ O naŋ da wa ŋmaa a boroboro ka ba niŋe pãã vɛle ka ba baŋ ka a Yeezu la.

³⁶Ba naŋ da naŋ manna a yɛlɛ la ka Yeezu meŋɛ la lɛ deɛ wa are a ba sogɔŋ, a yeli ko ba, “Ka maaroŋ be yɛ zie.”

³⁷Ba pɔlle da teɛɛ la ka ba miine yaga zaa, ka ba da teɛre ka nenseɛ la ka ba nyɛ.

³⁸Ka Yeezu da soore ba, “Bonso ka yɛ zoro dabeɛ̃ kyɛ ka bonnoo be yɛ teɛroŋ poɔ?

³⁹Yɛ kaa nyɛ a N nuuri ane a N gbɛɛ, a baŋ ka maa meŋɛ sereŋ la. Yɛ seene ma nyɛ; nenseɛ ba taa eŋnɛne ane kɔbɔ aŋa N naŋ taa lɛ.”

⁴⁰Kyɛ O naŋ wa yeli a lɛ baare la ka O da wuli ba a O nuuri ane O gbɛɛ.

⁴¹Ba naŋ da naŋ kyellɛ ne noɔ, a kyɛ bonnɔ a ba teɛroŋ poɔ la so ka Yeezu da soore ba, “Yɛ ba taa bonzaa kyɛ a na di be?”

⁴²Ba da de la zoma ba naŋ ɔnne ko a Yeezu,

⁴³ka O de ɔɔ a ba niŋesogɔ.

⁴⁴Lɛ la ka O da yeli ko ba, “A N yelbie N naŋ da yeli ko yɛ saŋ na N naŋ da naŋ be a yɛ zie la lɛ; ka a yɛlɛ zaa ba naŋ sɛge kyaare ne ma a Moozul sɛgre gane poɔ ane a Ŋmen-yelmanneba sɛgre gama poɔ ane a yiele gane poɔ na nyɛ la eebo.”

⁴⁵O pãã da vɛle la ba yɛŋ ka ba baŋ a ŋmen gane poɔ yɛlɛ velaa,

⁴⁶kyɛ ka O da yeli ko ba, “A lɛ la ka ba sɛge ka a Mɛzaaya na nyɛ la dɔgɛɛ kyɛ leɛ-iri a kuuni poɔ a beri ata daare.

⁴⁷Ba na piili la a Gyɛruzɛlɛm poɔ a moɔlɔ korɔ a tendaa nemboorɔ zaa ka ba leɛ ba eebo kyɛ nyɛ yelbebe sudi a Yeezu yuori eŋɛ.

⁴⁸Yɛnee la a yɛlɛ ama danseɛ deme.

⁴⁹Kyɛ yɛ nyɛ, N na e la ka bonna N Saa naŋ da eŋ noɔre ka O na tere la wa yɛ zie. Azuiŋ yɛ kpeɛrɛ a Gyɛruzɛlɛm poɔ a te ta saŋ na yɛ naŋ nyɛ a Vooroŋ Soŋ kpeɛ̃õ yi sazu.”

⁵⁰O pãã da taa ba la yi ne, a gaa te ta Bɛtani, a zɛge O nuuri a maale ba.

⁵¹O naŋ da naŋ maala ba, O da gyɛŋ yi la ba poɔ ka ba wa de O do ne tenvelaa[38]

⁵²Ba da puori O la ne emmo kyɛ leɛ gaa a Gyɛruzɛlɛm ane kyelloo kpoŋ,

⁵³a da te be a Naaŋmen die poɔ a puuro Naaŋmen tegitegilɛ.