Read Southern Dagaare Luk 4 Bible Online

Luk 4 - Southern Dagaare bible

Luk 4

¹Yeezu da paale ne la a Vooroŋ Soŋ, O naŋ da yi a Gyɔɔdan baa poɔ la ka a Vooroŋ Soŋ da taa O te kpɛ ne wɛgyɛŋ poɔ.

²Be la ka a sebɛlbɛllɛ da te e O nyɛ beri lezaayi. O da ba di bonzaa a bebie na zaa poɔ, kyɛ O naŋ da wa te baare, kɔŋ da kpɛ O la yaga.

³A sebɛlbɛllɛ da yeli ko O la, “Ka fõõ sereŋ waa Naaŋmen Bie, e ka a kuuri ŋa leɛ boroboro.”

⁴Ka Yeezu leɛ yeli sɔge o, “Ba sɛgɛɛ la, ‘Bondiraa yoŋ naane guolo nensaala.’ ”

⁵Lɛ la ka a sebɛlbɛllɛ da taa O daadaalɛ te do ne zie naŋ zɛge do a te wuli O a tendaa naaloŋ zaa,

⁶kyɛ yeli ko O, “N na de la a puubu ane a kpeɛ̃õ ŋa zaa ko fo, bonso, ba de a la ko ma, ka N meŋ na toɔ̃ de a ko neɛzaa N poɔ naŋ pɛle ne.

⁷Ka fooŋ na gbi dumo puori ma, a zaa na e la fo soobo.”

⁸Ka Yeezu yeli sɔge o, “Ba sɛgɛɛ la, ‘Puoro a Daana a fo Naaŋmen, kyɛ tonɔ korɔ O yoŋ tɛgɛ.’ ”

⁹Lɛ la ka a sebɛlbɛllɛ da la taa O gaa ne Gyɛruzɛlɛm, a te do ne O a Naaŋmen die peɛzu, a yeli ko O, “Ka fõõ wa waa Naaŋmen Bie, yi a kyɛ ɛge kyinni,

¹⁰bonso, ba sɛgɛɛ la: ‘Naaŋmen na toŋ la O malekere fo zuiŋ, ka ba gu fo,’

¹¹kyɛ la sɛge: ‘Ba na sogi nyɔge fo la eŋ ba nuuri poɔ, ka fo gbɛre na ta wa ŋmɛ kuuri.’ ”

¹²Ka Yeezu yeli sɔge o, “Ba yelee la, ‘Ta e a fo Daana fo Naaŋmen nyɛ.’ ”

¹³A sebɛlbɛllɛ naŋ da e a o bammo zaa baare, o da bare la a Yeezu kyɛ gaa, a te kyɛllɛ saŋ na o naŋ na la nyɛ vuo.

¹⁴A Yeezu pãã da paale ne la a Vooroŋ Soŋ kpeɛ̃õ, a da leɛ gaa a Galili paaloŋ, ka a O yɛlɛ da yaare a paaloŋ zaa poɔ.

¹⁵O da piili kanna la a noba a ba puoruuderi poore, ka neɛzaa da puuro O.

¹⁶A Yeezu naŋ da wa a Naazɛrɛ teŋɛ poɔ, be O naŋ baa, O da gaa kpɛ la a puoruudie poɔ a pɛnnoo bebiri daare, a seŋ O naŋ da maŋ erɛ lɛ. O da iri arɛɛ la ka O sɔre,

¹⁷ka ba de a Ŋmen-yelmanna Azaaya gansɛgraa ko O. O da yuo la a gane, a nyɛ zie na ba naŋ sɛge:

¹⁸“A Daana Vooroŋ sigi ma la, bonso, O sɔ ma la ne kããsoŋ ka N moɔle a Ŋmen-yelnoore ko a nembaalba. O toŋ ma la ka N moɔle a faabo yɛlɛ ko a gbaŋgbaare kyɛ vɛŋ ka zɔnne nimie yuo, a e ka noba ba naŋ dɔgrɔ so bamenne,

¹⁹a kyɛ moɔle a yuoni na a Daana naŋ na maale a O noba.”

²⁰O da nyɔge la a gane pɔge kyɛ de ko a puoruudie tontonɔ, kyɛ te zeŋ. A noba zaa naŋ da be a puoruudie poɔ da yage la ba nimie kaara ne O.

²¹Lɛ la ka O da piili yele korɔ ba, “A gansoŋ ŋa yɛlɛ N naŋ sɔre ka yɛ woŋ nyɛ la eebo a zenɛ.”

²²A noba zaa da pore la O yosoŋ kyɛ ka ba nɔɛ zaa da maa ane a yelveɛle naŋ yi O noɔreŋ, ka ba yeli, “A Yuzɛb bidɔɔ mɔɔ naane a ŋa be?”

²³Ka Yeezu yeli ko ba, “A ba e bonnoo ka yɛ na lɔɔ la a sekpɔgre ŋa ko ma, ‘Tegetegrɛ, saŋ fo meŋɛ!’ Kyɛ naŋ yeli, ‘Toŋ a fo toŋkpeɛne a fo teŋɛ kyɛ meŋ aŋa lɛ te naŋ woŋ ka fo da toŋɛɛ la a Kapanum teŋɛ poɔ.’ ”

²⁴Ka Yeezu yeli, “Serɛzaa ka N yele korɔ yɛ, Ŋmen-yelmanna zaa ba kyebe ka ba sage de o yɛlɛ o meŋɛ teŋɛ poɔ.

²⁵Kyɛ a yelmeŋɛ la ŋa, pɔg-kɔbɔ yaga da be la a Izerayɛl poɔ a Elaagya saŋ, a saŋ na a ware naŋ da le yuomo ata ane kyuuri ayoɔbo, ka kɔŋ kpoŋ da le a teŋɛ na zaa poɔ.

²⁶Kyɛ ba da ba toŋ Elaagya ka o gaa a pɔg-kɔbɔ bama kanzaa zie, ka a pɔgekoɔre na naŋ be a Zarefa, a Sedɔŋ paaloŋ poɔ yoŋ naane.

²⁷Kɔŋkɔnne yaga meŋ da be la a Izerayɛl teŋɛ poɔ, a Ŋmen-yelmanna Eliisa saŋ na, kyɛ kanzaa da ba nyɛ sammo, ka Neeman naŋ yi a Seeriya paaloŋ yoŋ naane.”

²⁸A banaŋ zaa naŋ da be a puoruudie poɔ naŋ da woŋ a ŋaa, ba suuri da iree la yaga.

²⁹Ka ba da vaa-iri a digi a Yeezu yi ne a teŋɛ poɔ, a taa O te do ne taŋ wogi kaŋ, ba teŋɛ naŋ are o zu, a na te daa O lɔɔ.

³⁰Kyɛ O da kyɛŋ tu la a ba poɔ a yi te gɛrɛ.

³¹A Yeezu da sigi gaa la Kapanum, teŋkpoŋ kaŋ naŋ be Galili paaloŋ, a da te kanna noba a pɛnnoo bebiri daare.

³²A noba zaa nɔɛ da maaɛ la ne a O kannoo, bonso, O da kanna la ne kpeɛ̃õ.

³³Dɔɔ kaŋ da be la a puoruudie poɔ a da taa sefaare. O da ŋmɛ la kpɛlle ne kɔkɔkpeɛŋaa, a yele:

³⁴“Naŋ bare te! Yeezu naŋ yi Naazɛrɛ, boŋ ka fo boɔrɔ ka fo e te? Fo waɛ la ka fo sãã te be? N baŋ la neɛ na fo naŋ waa. Fõõ la a Naaŋmen Nensoŋ na.”

³⁵Ka Yeezu tanne o a yele, “Bare gɔnne kyɛ wa yi be a dɔɔ eŋɛ!” A sefaa naŋ da wa zeɛ a dɔɔ lɔɔ teŋɛ a ba niŋesogɔ, o da wa yie la, kyɛ da ba ko a dɔɔ woloŋ zaa.

³⁶A noba zaa nɔɛ da maaɛ la ka ba da yele korɔ taa, “Boŋ yelbie la ama? O deɛ maŋ tanne la a sefaare ne faŋ ane kpeɛ̃õ ka a deɛ wa yi!”

³⁷Ka a Yeezu yɛlɛ da piili yaara a paaloŋ ziiri zaa poɔ.

³⁸Yeezu naŋ da wa yi a puoruudie poɔ, O da gaa la Saamon yiri. A Saamon deɛmpɔge da beɛrɛ la ne entol-faa ka ba da yeli ko Yeezu.

³⁹Lɛ la ka Yeezu te are o zie a kyɛ tanne a entoloŋ, ka o deɛ bare o. Ka a pɔge deɛ iri a daadaalɛ a piili ka o kaa ba zie.

⁴⁰A ŋmenaa naŋ da wa te kpeɛrɛ, banaŋ zaa naŋ da taa noba ka ba beɛrɛ baaloŋ boorɔ zaa, da taa ba la wa ne O zie, ka O de O nu pare ba yeni yeni zaa zu, a saŋ ba.

⁴¹Sefaare meŋ da yi la noba enneŋ, a kyeerɛ yele, “Fõõ la a Naaŋmen Bie!” Kyɛ Yeezu da tanne a la, a da ba sage ka a yeli yɛlɛ, bonso, a da baŋ ka Ona la a Mɛzaaya.[7]

⁴²Zie naŋ da wa te nyaa, Yeezu da yi gaa la zie kaŋ a te be a be O yoŋ. Neŋyaga da yɔ boɔrɔ O la, kyɛ ba naŋ da wa te nyɛ O, ba da boɔrɔ ka ba pigi O sori ka O na ta bare ba kyɛ gaa.

⁴³Kyɛ ka O da yeli ko ba, “A ferɛɛ la ka N moɔle a Naaŋmen naaloŋ yelnoore ko a tenne anaŋ meŋ; bonso, a lɛ zuiŋ la ka ba toŋ ma.”

⁴⁴Lɛ la ka O pãã da naŋ yɔ moɔlɔ a yelbiri a puoruuderi poore a Gyudiya paaloŋ poɔ.