Read Southern Dagaare Luk 5 Bible Online

Luk 5 - Southern Dagaare bible

Luk 5

¹Daare kaŋ Yeezu naŋ da are peɛle a Gɛnnesarɛ baa, ka neŋyaga da daara taa, a wa te fogle O a boɔrɔ ka ba kyɛlle woŋ a Naaŋmen yelbiri.

²O da nyɛ la gboe ayi ka a be a baa noɔreŋ, ka a zonnyɔgrebɔ da yi are pɛgrɛ ba zonkyogri.

³O da kpɛ la a gbori kaŋ naŋ da waa Saamon deni, a yeli ko o ka o mɔŋ a gbori kpɛ a koɔ̃ belaa. Lɛ la ka a Yeezu da zeŋ a gbori poɔ a kyɛ da kanne a noba.

⁴O naŋ da wa te yeli a yɛlɛ baare, O da yeli ko la a Saamon Piita, “Mɔŋ a gbori kpɛ a koɔ̃ zizuluŋ zie kyɛ lɔɔ a yɛ zonkyogri, a nyɔge zoma.”

⁵Ka a Saamon Piita yeli sɔge, “Daana, te toŋɛɛ la a tensogɔ zaa, kyɛ ba nyɔge bonzaa. Kyɛ anealɛzaa, fo naŋ yeli zuiŋ, N na lɔɔ la a zonkyogri.”

⁶Ba naŋ da lɔɔ a zonkyogri, ba da nyɔge la zoma yaga, ka a zonkyogri da piili ka a kyeɛ̃.

⁷Lɛ la ka ba da boɔle a ba taaba mine naŋ be a gbori kaŋ poɔ ka ba wa soŋ ba. Ba da wa kyiri la a zoma paale a gboe zaa ayi, ka a gboe da piili linne.

⁸Kyɛ Saamon Piita naŋ da wa te nyɛ a lɛ, o da gbi la dumo a Yeezu niŋesogɔ a yele, “Sɛre yi N zie, Daana, bonso, N waa la yelbe-erɛ!”

⁹O ne a noba zaa naŋ da be a be nɔɛ da maaɛ la ne a zoma ba naŋ da nyɔge seŋ lɛ.

¹⁰Kyɛ lɛ meŋ la ka Gyimisi ane Gyɔɔn, a Zɛbɛdii bibiiri naŋ da waa a Saamon Piita tonton-taaba nɔɛ da maa. Lɛ la ka Yeezu yeli ko Saamon Piita, “Ta zoro dabeɛ̃; a naŋ yi zenɛ kyɛ gɛrɛ, fo na nyɔgrɔ la noba aŋa zoma.”

¹¹Ba naŋ da mɔŋ a ba gboe a te yi wa a baa noɔre, ba da bare la ba boma zaa a kyɛ tuuro a Yeezu.

¹²Saŋ kaŋ Yeezu da be la a teŋkpoŋ kaŋ poɔ, ka dɔɔ kaŋ naŋ da ŋma kɔnne meŋ da be a teŋɛ na poɔ. O naŋ da wa nyɛ a Yeezu la ka o le vɔgle teŋɛ O niŋesogɔ a sɔre O a yele, “Daana, ka fõõ boɔrɔ fo na toɔ̃ saŋ ma la.”

¹³Lɛ la ka a Yeezu da teɛ O nu a seene o kyɛ yeli, “N boɔrɔ la, nyɛ fo sammo.” A tɔntɔbaalɛ la ka a kɔnnoŋ deɛ baare a dɔɔ eŋɛ.

¹⁴Ka a Yeezu da kpãã o a yeli, “Gɛrɛ, ta wa manna a yeli ŋa korɔ neɛzaa, kyɛ gaa te de fo meŋɛ wuli a Naaŋmen bagmaala kyɛ iri a kyɔɔtaare boma na a Moozul naŋ wuli ka ba maŋ tere a peere ba enne, ka a e danseɛ ko ba ka fo baaloŋ baarɛɛ la.”

¹⁵Kyɛ lɛ ka a Yeezu yɛlɛ da maaleŋ yaare yaga a gaa tatenne, ka noba yaga da maŋ laŋ O zie ka ba woŋ O kannoo kyɛ ka O saŋ ba baaloŋ.

¹⁶Kyɛ O da maŋ tage la O meŋɛ yi gaa wɛgyɛŋ poɔ ka O te puori Naaŋmen.

¹⁷Daare kaŋ, a Yeezu naŋ da kanna noba la ka Faraziimine ane a Naaŋmen bege wulwulibo mine meŋ da wa zeŋ peɛle a be (ba da yi la a Galili paaloŋ tenne zaa poore, ane Gyudiya ane Gyɛruzɛlɛm); ka a Daana kpeɛ̃õ da be O zie ka O na saŋ na baalba.

¹⁸A lɛ poɔŋ la ka dɔbɔ mine da te tuo dɔɔ kaŋ eŋɛ zaa naŋ kpi ane pane a wa ne a Yeezu zie. Ba da moɔrɔ la ka ba taa o kpɛ ne a te biŋ a Yeezu niŋesogɔ,

¹⁹kyɛ a noba naŋ da e yaga zuiŋ, ba da ba nyɛ vuo na taa o kpɛ ne a die poɔ. Lɛ la ka ba da taa o do ne peɛzu a te puo sulee, a de o turi a sulee noɔreŋ, a biŋ o a Yeezu niŋesogɔ, a neŋyaga poɔ.

²⁰A Yeezu naŋ da wa nyɛ a ba yeldeebo naŋ seŋ lɛ, ka O yeli, “N ba, a fo yelbebe nyɛ la sudi.”

²¹Lɛ la ka a Naaŋmen bege wulwulibo ane a Faraziimine da sɔgle yele ba pooreŋ, “Aŋ mɔɔ la a ŋa, a toorɔ Naaŋmen? Aŋ na toɔ̃ di neɛ yelbebe suuri ko o, ka Naaŋmen yoŋ naane?”

²²A Yeezu naŋ da baŋ ba poteɛrɛ zuiŋ, O da soore ba la, “Bonso ka yɛ teɛrɛ a yɛlɛ ama yɛ sukyie poɔ?

²³A buo soba yeluu la e mɔlɔ, ‘Fo yelbebe nyɛ la sudi’, bee N naŋ na yeli, ‘Vaa-iri dendeŋ kyɛnɛ’?

²⁴Kyɛ ka yɛ na baŋ ka a Nensaala Bie taa la kpeɛ̃õ teŋɛzu a na toɔ̃ di yelbebe suuri ko noba”; O da yeli ko la a dɔɔ gbɛre, “Maa yeli fo, vaa-iri de a fo pane kulo fo yiri.”

²⁵A tɔntɔbaalɛ la ka a dɔɔ deɛ iri a noba zaa niŋesogɔ, a de o pane, a danna Naaŋmen kyɛ te kulo o yiri.

²⁶Nɔmaa da kpɛ la a noba zaa ka ba da danna Naaŋmen kyɛ ka dabeɛ̃ da kpɛ ba ka ba yele, “Te nyɛ la yelsaama zenɛ.”

²⁷A ŋaa puoriŋ, Yeezu da yi te nyɛ la zuyɔɔ-derɛ kaŋ yuori naŋ di Levi ka o zeŋ zuyɔɔ die poɔ, ka O yeli ko o, “Iri tuuro ma.”

²⁸Ka a Levi da iri, a bare bonzaa kyɛ tu O.

²⁹Lɛ la ka a Levi da maale tig-kpoŋ a ko Yeezu a o yiri poɔ; ka a zuyɔɔ-derebɛ yaga ane noba mine meŋ da be a tigri zie a zeŋ.

³⁰A Faraziimine ane ba Naaŋmen bege wulwulibo da ŋmoonɔ la yɛlɛ a Yeezu potuuribo zie a yele, “Bonso ka yɛ laŋna dire kyɛ nyuuro ne zuyɔɔ-derebɛ ane yelbe-erebɛ?”

³¹Ka a Yeezu yeli sɔge ba, “Banaŋ naŋ taa laafeɛ ba boɔrɔ tegetegrɛ, see banaŋ naŋ beɛrɛ.

³²N ba wa ka N boɔle nemmenne, kyɛ N waɛ la ka N boɔle yelbebe deme ka ba leɛ ba eebo.”

³³Lɛ la ka a noba da yeli ko Yeezu, “A Gyɔɔn potuuribo ane a Faraziimine potuuribo maŋ leŋ la noɔre kyɛ puoro boyi boyi, kyɛ ka a fo potuuribo dire kyɛ nyuuro.”

³⁴Ka a Yeezu da soore ba, “Yɛ na baŋ toɔ̃ vɛŋ la ka pɔgde tigri saama leŋ noɔre saŋ na a serpaalaa naŋ kyɛnɛ be ba zie be?.

³⁵A bebie tara la, ka ba na de a serpaalaa yi ba zie, lɛ saŋ la ka ba pãã na leŋ noɔre.”

³⁶A Yeezu da la lɔɔ la sekpɔgre ko ba, “Neɛzaa ba maŋ kyeɛ̃ kparre paalaa pɛne a liiri ne kparre koraa; ka onaŋ e a lɛ, a pɛmpaalaa na kyeɛ̃ yi la, ka a pɛmpaalaa ne a boŋkoraa koŋ baŋ kpɛ taa.

³⁷Neɛzaa ba derɛ dããpaala eŋnɛ dããwo-korɔ poɔ. Ka o naŋ e a lɛ, a dãã paalaa na e la ka a woore puri, ka a dãã yaare kyɛ ka a woore meŋ sãã.

³⁸Kyɛ a seŋ ka ba de dãã paalaa eŋ dããwo-paalaa poɔ.

³⁹Kyɛ neɛzaa ba maŋ nyu dããkorɔ, a la boɔrɔ dããpaalaa. O maŋ yeli la, ‘A dããkorɔ soma la.’ ”