Read Southern Dagaare Luk 8 Bible Online

Luk 8 - Southern Dagaare bible

Luk 8

¹A lɛ puoriŋ, Yeezu da gaa la a teŋkponni ane a tembilii poore, a moɔlɔ a Naaŋmen naaloŋ yɛlɛ. A O potuuribo pie ne bayi da be la O zie,

²a de ne pɔgeba mine naŋ da taa sefaare ane baaloŋ ka O da saŋ ba: A pɔge kaŋ yuori da la Mareya, ka o yuori kaŋ meŋ da la di Magdalina[10]; O eŋɛ la ka sefaare Ayopoĩ da yi,

³ane Yuwana, a Hɛrɔde tontonɔ Kyuza pɔgɔ, ane Suzaana ane pɔgeba yaga naŋ da soŋnɔ ba ne ba boma.

⁴A nembeɛoŋ naŋ da wa te lantaa ka noba yire tatenne waana a Yeezu zie, O da lɔɔ la sekpɔgre ko ba:

⁵“Boreborɔ kaŋ la da yi gaa ka o te bore boma[11]; kyɛ o naŋ da borɔ, a bombie mine da le la sobiri zu, ka ba neɛ ne gbɛɛ, ka sazu nuuli wa de di.

⁶Amine da le la piiri zu a buli wieouŋ zaa kyɛ leɛ kpi, a naŋ da ba nyɛrɛ maaroŋ zuiŋ.

⁷Amine meŋ da le la goore poɔ, a buli kyɛ ka a goore fogle a.

⁸Amine meŋ da le la tɛnnoɔ poɔ, a buli, a maale eŋ bie kɔɔ.” O naŋ da yeli a ŋaa, O da zɛge la O kɔkɔre a yeli, “Vɛŋ ka neɛzaa naŋ taa tobo kyɛlle woŋ.”

⁹Lɛ la ka a Yeezu potuuribo da soore O a sekpɔgre pare.

¹⁰Ka O da yeli, “Yɛnee eŋ ba ko yɛ la a Naaŋmen naaloŋ yelsɔgle bammo, kyɛ a banaŋ naŋ kyɛre, sekpɔgɔ la ka N na maŋ lɔɔ ko ba, ka ba na: ‘maŋ kaara kyɛ koŋ baŋ nyɛ, a kyɛllɛ wono kyɛ koŋ baŋ a tɛgɛ.’ ”

¹¹“A sekpɔgre pare la ŋa: A bombie la a Naaŋmen yelbiri.

¹²A bombie anaŋ naŋ le a sobiri zu la a noba naŋ woŋ a Naaŋmen yelbiri kyɛ ka a sebɛlbɛllɛ wa nyɔge iri bare ba sukyie poɔ, ka ba na ta sage de a nyɛ faabo.

¹³A bombie na naŋ le a piiri zu la a banaŋ naŋ maŋ woŋ a Naaŋmen yelbiri, a de ne popeɛloŋ. Kyɛ a yelbiri naŋ ba tɛ nyaga ba sukyie poɔ zuiŋ, ba maŋ sage de la a yɛlɛ kyɛ ka toɔrɔ wa kpɛ ba ka ba le.

¹⁴A bombie na naŋ le a goore poɔ la banaŋ naŋ maŋ woŋ a yelbiri; kyɛ a ba yeldeebo poɔ, a teŋɛzu bombɔ yɛlɛ ane a bondaa-yɛlɛ maŋ fogle la a ba yeldeebo ko.

¹⁵Kyɛ a bombie anaŋ naŋ le a tɛnnoɔ poɔ la a banaŋ naŋ maŋ woŋ a Naaŋmen yelbiri, a de eŋ ba sukyie poɔ, a wɔŋ wɔmɔ ba kannyiri zuiŋ.”

¹⁶“Neɛzaa daŋ ba kyɔŋ fentelɛ a de gbaale vɔgle pɔge, bee a de biŋ gado puliŋ, kyɛ o maŋ de pare la fentel-daa zu ka banaŋ zaa naŋ kpɛ a die poɔ na nyɛrɛ a veɛloŋ.

¹⁷Bonzaa ba kyebe naŋ sɔgle, a koŋ daasaa, kyɛ bee yelsɔglaa zaa ba kyebe naŋ koŋ yi veɛloŋ poɔ ka ba baŋ.

¹⁸Yɛ kyɛlle woŋ velaa; banaŋ naŋ taa boma, ba na la ko ba la amine poɔ; kyɛ banaŋ naŋ ba taa, haali a belaa na banaŋ taa ba na de a la yi ba zie.”

¹⁹Lɛ la ka Yeezu ma ne O yɔɔmine da wa O zie, kyɛ da kontoɔ̃ ta O, a noba naŋ da waa yaga zuiŋ.

²⁰Ka ba da yeli ko O, “A fo ma ne fo yɔɔmine are la yeŋ poɔ a boɔrɔ ka ba nyɛ fo.”

²¹Kyɛ ka a Yeezu yeli ko ba, “N ma ane N yɔɔmine la banaŋ naŋ woŋ a Naaŋmen yelbiri, a erɛ seŋ lɛ a yelbiri naŋ wuli.”

²²Daare kaŋ Yeezu ne O potuuribo da kpɛ la gbori, ka O yeli ko ba, “Yɛ e ka te ŋmaa a mane gaa a konkoori kaŋ na.” Lɛ la ka ba de gɛrɛ,

²³kyɛ ba naŋ da mɔnɔ a gbori gɛrɛ la ka Yeezu da faa gbiri. Sasekpeɛŋaa kaŋ da iri fuuro la yaga zaa a mane zu, ka a koɔ̃ piili kpeɛrɛ a gbori poɔ, ka ba da be toɔrɔ poɔ.

²⁴Ba da te seŋ la a Yeezu a yele, “Daana, Daana, te weɛrɛ la!” Ka Yeezu da iri a goɔŋ poɔ a tanne a saseɛ ane a kɔmmie ka a ŋmaa vooroŋ, ka a zie e kyerekyere.

²⁵Ka O soore ba, “A yɛ yeldeebo bɛ?” Dabeɛ̃ da kpɛ ba la ka ba nɔɛ zaa da maa, ka ba yele korɔ taa, “Nembo-tɔ la a neɛ ŋa, ka saseɛ ane koɔ̃ sagra O noɔre?”

²⁶A Yeezu ne O potuuribo pãã da ŋmaa la a mane gaa a Gerasene paaloŋ naŋ tori a Galili.

²⁷O naŋ da wa yire a gbori poɔ la ka dɔɔ kaŋ naŋ yi a teŋkpoŋ poɔ, a taa sefaare da tuori O. A da kɔɔrɛɛ la ka a dɔɔ ŋa da ba su boma, a da ba kpeɛrɛ die, kyɛ da maŋ gana yaare poɔ.

²⁸O naŋ da wa nyɛ a Yeezu, o da le gbi la dumo O niŋesogɔŋ, a kyeere yaga zaa a yele, “Boŋ ka fo boɔrɔ N zie, Yeezu, a Naaŋmen Kpeɛ̃õ Zaa Daana Bie? N sɔrɔ fo la, ta dɔgre ma,”

²⁹bonso, a Yeezu da tanne la a sefaa ka o yi a dɔɔ eŋɛ. (Gbɛɛ yaga ka a sefaa da maŋ iri a dɔɔ ka ba eŋ o kpule kyɛ leŋ o ne bɔnzɔlɔ, kyɛ guuro o, kyɛ o da maŋ ŋmaare la a zaa bare kyɛ zo kpɛ wɛgyɛŋ poɔ.)

³⁰A Yeezu pãã da soore la a dɔɔ, “Fo yuori la boŋ?” Ka a dɔɔ yeli, “N yuori la Ligyin”; bonso, sefaare yaga la da be o eŋɛŋ.

³¹A sefaare da sɔre la a Yeezu ka O ta digi a ka a leɛ gaa a bogzuluŋ na naŋ ba taa baaraa poɔ.

³²Dobasugo da be la a taŋ seɛŋ a dire boma, ka a sefaare sɔre a Yeezu ka O vɛŋ ka a te kpɛ a dobaare poɔ. Ka a Yeezu da ko a sori.

³³A sefaare pãã da yi la a dɔɔ eŋɛ a te kpɛ a dobaare, ka a dobaare da yi a taŋ seɛ a ŋmore sigi kpɛ a mane koɔ̃ poɔ a kpi.

³⁴A dobakyeenemɛ naŋ da nyɛ lɛ a yɛlɛ naŋ e, ba da zo gaa te manne ko la a noba naŋ be a teŋkpoŋ poɔ ane a paaloŋ lamboe zaa.

³⁵Lɛ la ka a noba da yi gaa ka ba te nyɛ bonna naŋ e, kyɛ ba naŋ da wa a Yeezu zie, ba da nyɛ la a dɔɔ a sefaare naŋ yi o eŋɛ ka o zeŋ a Yeezu puliŋ a su boma, a nyɛ o meŋɛ ka dabeɛ̃ da kpɛ ba.

³⁶A banaŋ naŋ da nyɛ lɛ a yɛlɛ naŋ da e, da manne ko la a noba lɛ a dɔɔ naŋ da taa a sefaare naŋ nyɛ o sammo.

³⁷Lɛ la ka a Gerasene paaloŋ noba zaa da yeli a Yeezu ka O yi a teŋɛ poɔ kyɛ bare ba; bonso, dabeɛ̃ da kpɛ ba la yaga. Lɛ la ka a Yeezu te kpɛ gbori a leɛ gaa.

³⁸A dɔɔ na eŋɛ a sefaare naŋ da yi da sɔre la a Yeezu ka O vɛŋ ka o tuuro O; kyɛ a Yeezu da ba sage kyɛ yeli ko o:

³⁹“Leɛ kuli a te manne ko a fo noba, bonna Naaŋmen naŋ e ko fo.” Lɛ la ka a dɔɔ da gaa, a te moɔlɔ a teŋkpoŋ zaa poɔ bonna zaa a Yeezu naŋ da e ko o.

⁴⁰A Yeezu naŋ da leɛ ŋmaa a mane wa, a nembeɛoŋ da tuori de O la, bonso, ba zaa da kyɛllɛ O la.

⁴¹A be poɔŋ la ka a puoruudie neŋkpoŋ kaŋ yuori naŋ di Gyaruse da wa a be. O da wa gbi la dumo a Yeezu puliŋ a kyɛ sɔre O, ka O wa o yiri,

⁴²bonso, o pɔgeya-yeni o naŋ taa, ka o e ŋa yuomo pie ne ayi, da beɛrɛ la a te tɔgle kũũ. O naŋ da gɛrɛ, a nembeɛoŋ da fogle O la.

⁴³Pɔge kaŋ da be la a noba poɔ a da taa pɔge pɛge baaloŋ kaŋ a maŋ kyire zẽẽ faa zaa. O da taa la a baaloŋ ŋa yuomo pie ne ayi, a da sãã o libie zaa ka o saŋ o meŋɛ kyɛ tegetegrɛ zaa da ba toɔ̃ na saŋ o.

⁴⁴A pɔge da wa are la a Yeezu puori a seene O kparoo nɔzoɔrɔ, ka a zẽẽ deɛ ŋmaa daadaalɛ.

⁴⁵Lɛ la ka Yeezu soore, “Aŋ la seene ma?” A noba zaa naŋ da kyiiri la ka Piita yeli, “Daana, nyɛ lɛ a noba naŋ ŋmaa-gyili fo, a fogle fo lɛ.”

⁴⁶Kyɛ ka a Yeezu yeli, “Neɛ kaŋ seene ma la, bonso, N nyɛɛ la ka kpeɛ̃õ yi la N eŋɛ.”

⁴⁷A pɔge naŋ da nyɛ ka o koŋ la baŋ sɔgle, o da miine la a wa le a Yeezu niŋeŋ, a yeli a noba zaa niŋeŋ, bon naŋ so ka o seene a Yeezu ane lɛ o naŋ nyɛ sammo a paretɛloŋ na poɔ.

⁴⁸Ka Yeezu da yeli ko a pɔge, “N pɔgeyaa, a fo yeldeebo saŋ fo la; gɛrɛ ne emmaaroŋ.”

⁴⁹O naŋ da naŋ kyɛnɛ yele a yɛlɛ la ka neɛ kaŋ yi a neŋkpoŋ yiri a wa yeli, “A fo pɔgeyaa kpie la; ta la dɔɔnɔ a wulwullo weɛ lɛ.”

⁵⁰A Yeezu naŋ da woŋ ŋaa, ka O da yeli sɔge, “Ta zoro dabeɛ̃. Fõõ eŋ sage de, kyɛ a fo pɔgeyaa na nyɛ la faabo.”

⁵¹A Yeezu naŋ da wa te ta a yiri, O da ba sage ka neɛzaa na tu O kpɛ, ka Piita, Gyɔɔn, Gyimisi ane a bie saa ne o ma yoŋ naane.

⁵²A noba zaa da kono la a bie, a ŋmeɛrɛ kpɛlle, kyɛ ka Yeezu yeli, “Yɛ ta kono, bonso, o ba kpi, o gbiree la.”

⁵³A noba da laara la a Yeezu, bonso, ba da baŋ ka a bie kpie la.

⁵⁴Kyɛ Yeezu da nyɔge la a bie nu kyɛ boɔle o, “Bie, vaa-iri!”

⁵⁵A bie vooroŋ da leɛ waɛ la, ka o vaa-iri dayeni. Lɛ la ka Yeezu da yeli ka ba ko a bie bondirii ka o di.

⁵⁶A bie dɔgrebɔ nɔɛ da maaɛ la yaga; kyɛ ka Yeezu da kpãã ba ka ba ta wa yele a yɛlɛ naŋ e ko neɛzaa.