Read Southern Dagaare Gyn 10 Bible Online

Gyn 10 - Southern Dagaare bible

Gyn 10

¹“Yelmeŋɛ zaa ka N yele korɔ yɛ, neɛ na zaa naŋ ba tu a pezage dendɔre kpɛ, kyɛ tu ziyuo do kpɛ, o soba e la nannyige ane fafaara.

²A soba na naŋ tu a dendɔre kpɛ la a peere kyeenɛ.

³A dendɔ-guuro maŋ yuo la a dendɔre ko o, ka a peere maŋ woŋ a o kɔkɔre. O maŋ boɔle la a o peere kanzaa yuori, a taa a yi ne.

⁴Ka o naŋ wa taa a o peere zaa yi ne baare, o maŋ de la a weɛ, ka a tuuro o, bonso, a baŋ la o kɔkɔre.

⁵A koŋ tu saana puori, kyɛ a na zo yi la a saana zie, bonso, a ba baŋ a saana kɔkɔre.”

⁶Bana la ka Yeezu da yele a yelseŋkpegɛ ŋa terɛ kyɛ ba da ba baŋ bonna O naŋ da yele korɔ ba tɛgɛ.

⁷Lɛ la ka Yeezu da laboreŋ yeli ko ba, “Yelmeŋɛ zaa ka N yele korɔ yɛ, maa la a dendɔre ko a peere.

⁸A banaŋ zaa naŋ daŋ de N weɛ wa, waa la nannyigri ane fafareba, kyɛ a peere da ba kyɛlle woŋ ba yɛlɛ.

⁹Maa la a dendɔre. Soba na zaa naŋ tu N zie kpɛ na nyɛ la faabo. O na maŋ kpɛ la kyɛ yi, a nyɛ mɔmaara.

¹⁰A nannyige maŋ wa la ka o zu, a ko, a kyɛ sãã yoŋ. Maa eŋ waɛ la ka ka noba na taa nyɔvore, a taa o ka o gore.”

¹¹“Maa la a pekyee-meŋɛ. A pekyee-meŋɛ maŋ de la o nyɔvore biŋ ko a peere.

¹²Kyɛ pekyeenɛ ba naŋ de ka o kyeenɛ a peere kyɛ ka ba yɔɔrɔ o, ka a peere ba e o soobo, maŋ zo la kyɛ bare a peere ka o naŋ wa nyɛ gboŋgbori ka o waana. A gboŋgbori pãã maŋ nyɔge la a peere ŋmɛyaare.

¹³A pekyeenɛ ba naŋ de maŋ zo la kyɛ bare a peere bonso, o ba taa a peere yɛlɛ.

¹⁴Maa la a pekyee-meŋɛ. N baŋ la N peere, ka a N peere meŋ baŋ ma,

¹⁵aŋa lɛ N Saa naŋ baŋ ma ka N meŋ baŋ O. Kyɛ N de la N nyɔvore tere a N peere zuiŋ.

¹⁶N taa la a peere mine naŋ ba e a zage ŋa peere. A ferɛɛ la ka N taa a meŋ wa poɔ a zage ŋa peere poɔ, ka a na kyɛlle woŋ a N kɔkɔre. A lɛ la ka a pãã na e zage yeni peere ane pekyee-yeni.

¹⁷A ŋaa zuiŋ la ka a Saa nɔŋ ma, bonso, N de la N nyɔvore tere ka ka N na leɛ de o.

¹⁸Neɛzaa kontoɔ̃ de a N nyɔvore, kyɛ maa meŋɛ la boɔrɔ a de o tere. N taa la kpeɛ̃õ ka N de o tere, kyɛ la taa a kpeɛ̃õ ka N la leɛ de o. N nyɛ la a noɔre ŋa yi a N Saa zie.”

¹⁹Wɛltaa da la maaleŋ kpɛ la a Gyuumine sogɔ a Yeezu yelbie ama zuiŋ.

²⁰A noba yaga da yele la, “O taa la sefaa ka O zu ba kyebe. Bonso ka yɛ kyɛllɛ o yɛlɛ?”

²¹Ka a noba mine meŋ da yele, “A yɛlɛ ama ba e neɛ naŋ taa sefaa yelbie. Sefaa na toɔ̃ yuo la zɔŋ nimie be?”

²²A saŋ na poɔ ba da dire la a Naaŋmen die Maaloo tigri. A ɔɔkpoŋ saŋ poɔ da la,

²³ka a Yeezu da yɔ kyɛnɛ a Naaŋmen die poɔ, a kyaaraa na ba naŋ da boɔlɔ a Solomɔn Kyaaraa.

²⁴Lɛ la ka a Gyuumine da wa ŋmaagyili O kyɛ da soore O, “Fo mɔɔ boɔrɔ la ka te be bonnoo poɔ a kɔɔre seŋ wola? Ka fõõ wa la a Mɛzaaya,[13] yeli weliweli ko te wɛ.”

²⁵Ka a Yeezu da yeli sɔge, “N da yeli ko yɛ la kyɛ ka yɛ ba sage de. A toma N naŋ tonɔ a N Saa yuori eŋɛ dire la N danseɛ.

²⁶Kyɛ yɛ ba sage de, yɛ naŋ ba poɔ a N peere poɔ zuiŋ.

²⁷A N peere maŋ woŋ la a N kɔkɔre. N baŋ a la, ka a maŋ tuuro ma.

²⁸N ko a la nyɔvore naŋ ba taa baaroo, ka a daŋ koŋ kpi zaa. Neɛzaa koŋ baŋ faa a yi ne a N nuuri poɔ.

²⁹Bonna N Saa naŋ ko ma waa la kpoŋ gaŋ ama zaa, ka neɛzaa koŋ baŋ faa o yi a Saa nuuri poɔ.

³⁰Maa ne a Saa waa la yeni.”

³¹A Gyuumine da laboreŋ de la kubo ka ba za ne a Yeezu.

³²Ka a Yeezu da soore ba, “N toŋ la tonsonne yaga naŋ yi a Saa zie wuli yɛ. A toma ŋa buo soba eŋɛ la ka yɛ na za ma ne a kubo?”

³³Ka a Gyuumine da yeli sɔge, “A ba e a toŋ soŋ fo naŋ toŋ la so ka te na za fo ne kubo, kyɛ fo naŋ to Naaŋmen zone zuiŋ la. Fo waa la nensaala yoŋ, kyɛ de fo meŋɛ boɔlɔ Naaŋmen.”

³⁴Ka Yeezu da yeli sɔge, “Ba ba sɛge ŋaa eŋ a yɛ Naaŋmen begɛ poɔ be, ‘N da yelee la, yɛ waa la ŋmemɛ’?

³⁵Ka ba naŋ da boɔlɔ a banaŋ zie a Naaŋmen yelbiri naŋ da wa, ‘ŋmemɛ’, kyɛ ka neɛ kontoɔ̃ leɛre a gansoŋ poɔ yɛlɛ bare,

³⁶wola ka yɛ na baŋ yeli ka a soba na a Saa naŋ maale ka O waa soŋ, ka O toŋ O a teŋɛzu, toorɔ la Naaŋmen zone. N naŋ da yeli, ‘N waa la Naaŋmen Bie zuiŋ’?

³⁷Ka maa ba tonɔ a N Saa toma, ka lɛ yɛ ta sage de N yɛlɛ.

³⁸Kyɛ ka maa wa tonɔ a N Saa toma, aneazaa ka yɛ ba sage de N yɛlɛ, kyɛ yɛ sage de a N tontonne, ka a lɛ vɛŋ ka yɛ woŋ kyɛ baŋ a tɛgɛ ka a Saa be la N poɔ ka N meŋ be a Saa poɔ.”

³⁹Lɛ la ka ba da la boɔrɔ ka ba nyɔge O kyɛ ka O da faa yi ba nuuri poɔ gaa.

⁴⁰A Yeezu da la leɛ gaŋ gaa la a Gyɔɔdan maŋgaŋne, a lambori benee a Gyɔɔn naŋ da korɔ noba suobu, a da te be a be.

⁴¹Noba yaga da wa la O zie, a da yele, “A Gyɔɔn da ba e yelwulaa zaa, kyɛ yɛlɛ na zaa a Gyɔɔn naŋ da yeli kyaare ne a dɔɔ ŋa waa la yelmeŋɛ.”

⁴²Noba yaga da sage de la a Yeezu yɛlɛ a be.