Read Southern Dagaare Gyn 11 Bible Online

Gyn 11 - Southern Dagaare bible

Gyn 11

¹Dɔɔ kaŋ da bebe la a beɛrɛ, ka o yuori di Laazoro. O da yi la Bɛtani, a Mareya ane o yɔɔ Maata teŋɛ.

²A Mareya ŋa la da sɔ a Yeezu ne kãã-nyunoɔ kyɛ da de o zukɔɔloŋ meele ne a Yeezu gbɛɛ. A o yɔɔdɔɔ Laazoro da beɛrɛ la.

³Lɛ la ka a Laazoro yɔɔpuuli da toŋ ka ba te yeli a Yeezu, “Daana, a soba na fo naŋ nɔŋ beɛrɛ la.”

⁴Kyɛ Yeezu naŋ da wa woŋ a duoro, O da yelee la, “A baaloŋ ŋa ba e o kũũ baaloŋ, kyɛ o beɛrɛ la ka Naaŋmen yuori na nyɛ puubu, ka a Naaŋmen Bie na tu a be a nyɛ puubu.”

⁵Aneazaa ka Yeezu da nɔŋ la Maata ane o yɔɔ Mareya ane a Laazoro,

⁶kyɛ O naŋ da wa woŋ a Laazoro baaloŋ yɛlɛ, O da naŋ be la a be O naŋ be beri ayi.

⁷A ŋaa puoriŋ la ka a Yeezu da yeli ko a O potuuribo, “Yɛ e ka te la gaa a Gyudiya paaloŋ.”

⁸A potuuribo da yeli ko O la, “Wulwullo, daare yɛŋyɛŋ ŋa naane ka a Gyuumine da boɔrɔ ka ba za fo ne kubo, kyɛ ka fo la maaleŋ gɛrɛ a be?”

⁹Ka a Yeezu da yeli sɔge, “Gbelli pie ne ayi naane be a ŋmenaa saŋ be? Banaŋ naŋ kyɛnɛ ŋmenaa saŋ ba ŋmeɛrɛ gbɛɛ, bonso, ba maŋ nyɛrɛ la a teŋɛ ŋa zu kyaane.

¹⁰Kyɛ banaŋ naŋ kyɛnɛ tensogɔ saŋ maŋ ŋmeɛrɛ la gbɛɛ, bonso, a kyaane ba kye ba poɔ.”

¹¹A Yeezu naŋ da wa yeli a ŋaa baare, O da yeli ko ba la, “A te ba Laazoro gbiree la, kyɛ N gɛrɛ la a be ka N te seŋ o.”

¹²Ka a potuuribo da yeli ko O, “Daana, ka o naŋ wa gbiri, o na leɛ nyɛ la laafeɛ wɛ.”

¹³A Laazoro kũũ yɛlɛ la ka a Yeezu da yele korɔ a potuuribo kyɛ ka ba da teɛre ka goɔŋ la ka o sereŋ gbiri.

¹⁴Lɛ la ka Yeezu da yeli weliweli ko ba, “A Laazoro kpie la.

¹⁵Kyɛ a yɛ zuiŋ, a e ma la noɔ ne N naŋ da ba kyebe, ka a lɛ na vɛŋ ka yɛ na sage de a N yɛlɛ. Yɛ e ka te gaa o zie.”

¹⁶A Tɔmaase ba naŋ da boɔlɔ Yeebaa da yeli ko la a o potuur-taaba, “Yɛ e ka te meŋ gaa, ka te ne O te laŋ kpi.”

¹⁷A Yeezu naŋ da wa ta, O da nyɛɛ la ka ba ũũ a Laazoro ka a ta beri anaare.

¹⁸A Bɛtani teŋɛ da peɛle la Gyɛruzɛlɛm, a e ŋa mɛlɛ ayi.

¹⁹A Gyuumine yaga da yi la a Gyɛruzɛlɛm a wa ka ba moore ko a Maata ane Mareya a ba yɔɔdɔɔ kũũ eŋɛ.

²⁰A Maata naŋ da wa woŋ ka a Yeezu waana la, o da yi te tuori O la, kyɛ ka Mareya eŋ da be a yiri poɔ.

²¹A Maata da yeli ko la Yeezu, “Daana, ka fõõ da be kyɛ, a N yɔɔdɔɔ da koŋ kpi.

²²Kyɛ a pampana ŋa, N baŋ ka Naaŋmen na ko fo la bonzaa fo naŋ sɔre yi O zie.”

²³A Yeezu da yeli ko o la, “A fo yɔɔdɔɔ na leɛ-iri la.”

²⁴Ka a Maata da yeli ko O, “N baŋɛɛ la ka a n yɔɔdɔɔ na leɛ-iri la a kuuni leɛ-iruu poɔ a bebi-baaraa daare.”

²⁵Ka a Yeezu da yeli ko o, “Maa la a kuuni poɔ leɛ-iruu ane a nyɔvore. Banaŋ naŋ sage de N yɛlɛ, ka ba naŋ kpi gba, ba na leɛ voorɔ la,

²⁶ka neɛzaa naŋ voorɔ kyɛ sage de N yɛlɛ daŋ koŋ kpi zaa. Fo sage de la a ŋaa bee?”

²⁷Ka a Maata da yeli ko O, “Õõ, Daana, N sage deɛ la ka fõõ la a Mɛzaaya,[14] a Naaŋmen Bie na naŋ waana a teŋɛzu.”

²⁸A Maata naŋ da wa yeli a ŋaa, o da leɛ gaa te boɔle la o yɔɔ Mareya a waale yeli ko o, “A wulwullo be la kyɛ, a boɔlɔ fo.”

²⁹A Mareya naŋ da wa woŋ a ŋaa, o da vaa-iree la wieouŋ zaa a gaa a Yeezu zie.

³⁰A Yeezu da naŋ ba kpɛ a teŋɛ poɔ sɛre. O da naŋ kyɛnɛ be la a be a Maata naŋ da tuori O.

³¹A Gyuumine na naŋ da be a Mareya zie a yiri poɔ a moorɔ korɔ o da nyɛ o la ka o vaa-iri wieouŋ zaa a te yi yeŋ. Ba da iri tuuro o la, bonso, ba da teɛre ka o gɛrɛ la a yaa zie ka o te koŋ.

³²A Mareya naŋ da wa ta a be a Yeezu naŋ be, a da nyɛ O, o da gbi la dumo a Yeezu gbɛɛ puliŋ kyɛ da yeli ko O, “Daana, ka fõõ da be kyɛ, a N yɔɔdɔɔ da koŋ kpi.”

³³A Yeezu naŋ da wa nyɛ a Mareya ka o kono, ka a Gyuumine na naŋ da tuuro o meŋ da kono, a da dɔ̃ɔ̃ la O sukyiri yaga zaa ka O da nyɔge O meŋɛ fãã.

³⁴A Yeezu da soore ba la, “Yeŋ la ka yɛ ũũ o?” Ka ba da yeli ko O, “Daana, wa nyɛ.”

³⁵A Yeezu da piili ŋmaara la nentaŋ.

³⁶A lɛ la ka a Gyuumine da yeli, “Yɛ nyɛ O naŋ nɔŋ o lɛ!”

³⁷Kyɛ ka a noba mine da yeli, “Ka lɛ O naŋ da toɔ̃ yuo a dɔɔ zɔŋ nimie, O mɔɔ da kontoɔ̃ e ka a dɔɔ ŋa da ta kpi be?”

³⁸Lɛ la ka a Yeezu sukyiri da la dɔ̃ɔ̃ O, ka O da la gaa a yaa zie. A yaa da waa la taŋ bogi ka kuuri furi o noɔre.

³⁹A Yeezu da yelee la, “Yɛ billi a kuuri bare.” Ka Maata, a kũũ yɔɔpuulee da yeli ko a Yeezu, “Daana, o faa nyuuro la, bonso, ba naŋ ũũ o a beri anaare la zenɛ.”

⁴⁰A Yeezu da leɛ yeli ko o la, “N da ba yeli ko fo ka ka fõõ wa sage de, fo na nyɛ la a Naaŋmen puubu be?”

⁴¹Lɛ la ka ba da billi a kuuri bare. A Yeezu pãã da gbole kaa la sazu kyɛ yeli, “N Saa, N puori fo la bareka ne fo naŋ kyɛlle woŋ a N puoruu.

⁴²N baŋɛɛ la ka fo maŋ kyɛlle woŋ la N puoruu tegitegilɛ, kyɛ a noba bama naŋ are a kyɛ zuiŋ la so ka N yeli a ŋaa ka ka ba na sage de ka fõõ la toŋ ma.”

⁴³O naŋ da wa yeli a ŋaa, O da ŋmɛ la kpɛlle ne kɔkɔkpeɛŋaa a yeli, “Laazoro, iri yi wa!”

⁴⁴A kũũ da iri yi waɛ la, ka pɛmɛ leŋ o gbɛɛ ne o nuuri, ka pɛne vili pɔge o niŋe. Ka a Yeezu da yeli ko ba, “Yɛ lori a pɛmɛ kyɛ bare o ka o gɛrɛ.”

⁴⁵A Gyuumine yaga naŋ da tu a Mareya wa, a da wa nyɛ bonna a Yeezu naŋ da e, da sage de la O yɛlɛ.

⁴⁶Kyɛ a noba mine da leɛ gaa la a Faraziimine zie a te manne ko ba bonna a Yeezu naŋ e.

⁴⁷Lɛ la ka a bagmaalkare ane a Faraziimine da boɔle a sɛrediribe lantaa a soore ba, “Wola ka te na e? A dɔɔ ŋa erɛ la yelwulii yaga.

⁴⁸Ka tenee bare O ka O naŋ erɛ a ŋaa, a noba zaa na sage de la a O yɛlɛ, ka a lɛ vɛŋ ka a Uroma noba wa sãã a te zisoŋ ane a te teŋɛ bare.”

⁴⁹Kyɛ a ba kaŋ yuori naŋ da di Kayefa kyɛ da e a Naaŋmen bagmaalkare neŋkpoŋ a yuoni na poɔ, da yelee la, “Yɛ deɛ ba baŋ yelzaa togitogi!

⁵⁰Yɛ ba baŋ a tɛgɛ ka a na soma la ka yɛ e ka neŋyeni kpi a noba zuiŋ a gaŋ a noba zaa naŋ na kpi.”

⁵¹O meŋɛ naane da baŋ a yeli ŋa a yele, kyɛ o naŋ da e a Naaŋmen bagmaalkare neŋkpoŋ a yuoni na poɔ la so ka o da yele a Ŋmen-yelmanna yelyelii a kyaare ne a Yeezu, ka Ona la na kpi a faa a paaloŋ noba.

⁵²A paaloŋ faabo yoŋ naane, kyɛ O waɛ la ka O laŋ a Naaŋmen biiri naŋ yaare ziiri zaa taa ziyeni.

⁵³Azuiŋ, a yi a lɛ daare gɛrɛ, ba da narɛɛ la ka ba ko a Yeezu.

⁵⁴A lɛ zuiŋ, Yeezu da ba la sagra kpeɛrɛ a Gyuumine poɔ. O da yi la a be gaa teŋɛ kaŋ ba naŋ boɔlɔ Eferem naŋ be a paaloŋ kaŋ naŋ peɛle a wɛgyɛŋ ka O ne a O potuuribo da te be a be.

⁵⁵A Gyuumine Ista tigri da peɛlɛ la, ka noba yaga da yi a tembilii poore gaa Gyɛruzɛlɛm ka ba te peere bamenne kyɛ ka a tigri pãã ta.

⁵⁶Ba da yɔ boɔrɔ la a Yeezu, a soorɔ taa, ba naŋ da are a Naaŋmen die poɔ, “Wola ka yɛ teɛre? Yelmeŋɛ zaa, O na wa la a tigri zie be?”

⁵⁷A Naaŋmen bagmaalkare ane a Faraziimine da tere la noɔre ka neɛzaa naŋ baŋ zie na a Yeezu naŋ be, o wa yeli ko ba ka ba te nyɔge O.