Read Southern Dagaare Gyn 14 Bible Online

Gyn 14 - Southern Dagaare bible

Gyn 14

¹“Yɛ ta vɛŋ ka yɛ sukyie dɔɔnɔ yɛ. Yɛ sage de Naaŋmen yɛlɛ, a sage de N meŋ yɛlɛ.

²A N Saa yiri poɔ deri yaga bebe la. Ka a naŋ da ba waa lɛ, yɛ teɛre ka N da na baŋ yeli ko yɛ la ka N gɛrɛ la ka N te nare zie bare yɛ be?

³Ka maa wa gaa te nare a zie bare yɛ, N na leɛ wa taa yɛ la gaa ne a zie N naŋ be, ka yɛ ne ma te be a be.

⁴Kyɛ yɛ baŋ la a sori na naŋ gɛrɛ a zie N naŋ gɛrɛ.”

⁵Ka Tɔmaase da soore a Yeezu, “Daana, te ba baŋ a zie fo naŋ gɛrɛ. Wola ka te na e baŋ a sori naŋ gɛrɛ a be?”

⁶Ka a Yeezu da yeli ko o, “Maa la a sori, ane a yelmeŋɛ, ane a nyɔvore. Neɛzaa kontoɔ̃ wa a Saa zie, ka a soba ba tu N zie.

⁷Ka yɛnee baŋ ma, yɛ na baŋ la a Saa meŋ. A yi ŋaa kyɛ gɛrɛ, yɛ baŋ O la kyɛ nyɛ O meŋ.”

⁸A Filipi da yeli ko la a Yeezu, “Daana, wuli te a Saa kyɛ a na seŋ te la.”

⁹Ka a Yeezu da soore o, “Filipi, N naŋ be a yɛ zie te kɔɔre seŋ a ŋaa, kyɛ ka yɛ naŋ ba baŋ ma? Neɛ na zaa naŋ nyɛ ma nyɛ la a Saa. Wola ka fo na yeli, ‘Wuli te a Saa’?

¹⁰Yɛ ba sage de ka N be la a Saa poɔ, ka a Saa meŋ be N poɔ be? A yelbie N naŋ yele korɔ yɛ ba e maa meŋɛ yɛlɛ ka N yele, kyɛ a Saa naŋ be a N poɔŋ la tonɔ O toma.

¹¹Yɛ sage de a N yɛlɛ ka N be la N Saa poɔ, ka a Saa meŋ be a N poɔ. Ka yɛnee ba sage de a N yelbie gba, kyɛ yɛ kaa a N toma kyɛ sage de.

¹²Yelmeŋɛ zaa ka N yele korɔ yɛ, soba na zaa naŋ sage de N yɛlɛ, o meŋ na toŋ la a toma N naŋ tonɔ. A soba sereŋ na toŋ la tombɛrɛ yaga gaŋ a ama, bonso, N gɛrɛ la a Saa zie.

¹³Bonna zaa yɛ naŋ na sɔre a N yuori eŋɛ, N na e ko yɛ la ka a Saa na nyɛ puubu a Bidɔɔ zie.

¹⁴Ka yɛnee wa sɔre bonzaa N zie a N yuori eŋɛ, N na e ko yɛ la.”

¹⁵Ka yɛnee wa nɔŋ ma, yɛ na sagra la a N nɔɛ.

¹⁶Kyɛ N na sɔre la a Saa ka O ko yɛ Soŋnɔ ka O wa be yɛ zie tegitegilɛ.

¹⁷Ona la a yelmeŋɛ Vooroŋ. Ona la ka a teŋɛzu deme kontoɔ̃ nyɛ bonso, ba ba nyɛrɛ O bee a baŋ O. Yɛnee eŋ baŋ O la, bonso, O kpeɛrɛ ne yɛ la, kyɛ na be yɛ poɔ.

¹⁸“N koŋ bare yɛ ka yɛ waa bikpeere. N leɛ waana la yɛ zie.

¹⁹A koŋ la kɔɔre yaga kyɛ ka a teŋɛzu deme koŋ la nyɛ ma, kyɛ yɛnee na nyɛ ma la, N naŋ voorɔ zuiŋ yɛ meŋ na voorɔ la.

²⁰A lɛ daare yɛ na baŋ ka N be la a N Saa poɔ, ka yɛ be N poɔ, kyɛ ka N meŋ be yɛ poɔ.

²¹Banaŋ naŋ taa a N nɔɛ kyɛ tuuro a la nɔŋ ma. Kyɛ a N Saa na nɔŋ la banaŋ naŋ nɔŋ ma, ka N meŋ nɔŋ ba kyɛ de N meŋɛ wuli ba.”

²²Lɛ la ka Gyudase (a ba e Gyudase Ezekarɔte) yeli ko O, “Daana, boŋ la so ka fo na de fo meŋɛ wuli te kyɛ koŋ de wuli a teŋɛzu noba?”

²³Ka a Yeezu da yeli sɔge o, “Banaŋ naŋ nɔŋ ma na tuuro la N yɛlɛ. A N Saa na nɔŋ ba la ka te wa laŋ kpeɛrɛ ne ba.

²⁴Soba na zaa naŋ ba nɔŋ ma, ba tuuro N yɛlɛ. Kyɛ a yelbie yɛ naŋ wono ka a yire N zie ba e N meŋɛ yelbie, kyɛ a yi la a Saa naŋ toŋ ma zie.”

²⁵“N da yeli la a yɛlɛ ama ko yɛ N naŋ da naŋ kyɛnɛ be a yɛ zie.

²⁶Kyɛ a yɛ Soŋnɔ, a Vooroŋ Soŋ, Ona la ka a Saa na toŋ a yɛ zie N yuori eŋɛ. O na wa wuli yɛ la yelzaa kyɛ leɛ-teɛre yɛ a yɛlɛ na zaa N naŋ da yeli ko yɛ.

²⁷N bara la emmaaroŋ korɔ yɛ. N korɔ yɛ la N emmaaroŋ. N ba korɔ yɛ aŋa lɛ a teŋɛzu deme naŋ maŋ terɛ lɛ. Yɛ ta vɛŋ ka yɛ sukyie dɔɔnɔ yɛ bee ka dabeɛ̃ kpɛ yɛ.

²⁸Yɛ woŋee la ka N da yeli ko yɛ, ‘N gɛrɛ la kyɛ na leɛ wa yɛ zie.’ Ka yɛnee da nɔŋ ma, yɛ da na kyellɛ la ne N naŋ gɛrɛ a Saa zie, bonso, a Saa taa la kpeɛ̃õ gaŋ ma.

²⁹Kyɛ pampana, N yeli la a yɛlɛ ŋa ko yɛ kyɛ ka a na wa e, ka ka anaŋ wa e, ka yɛ na sage de.

³⁰N koŋ la yeli yɛlɛ yaga ne yɛ, bonso, a teŋɛ ŋa zu naa waana la. O ba taa kpeɛ̃õ N zu.

³¹Kyɛ N erɛ la lɛ N Saa naŋ eŋ noɔre ko ma ka ka a teŋɛzu noba na baŋ ka N nɔŋ la a Saa. Yɛ iri ka te gaa.”