Read Southern Dagaare Gyn 15 Bible Online

Gyn 15 - Southern Dagaare bible

Gyn 15

¹“Maa la a dããteɛ meŋɛ, kyɛ ka N Saa e a dããteɛ te-sɛllɛ.

²O maŋ kyɛ la ulee na zaa naŋ be N eŋɛ kyɛ ba wɔnɔ wɔmɔ bare. Ulee na zaa naŋ wɔnɔ wɔmɔ, O maŋ gbɛnne o la ka o na wɔŋ yaga.

³A N yelbiri N naŋ da yeli ko yɛ pɛge yɛ la ka yɛ yi baare.

⁴Yɛ be N poɔ aŋa lɛ N naŋ be yɛ poɔ. Aŋa lɛ teɛ ulee naŋ koŋ baŋ wɔŋ wɔmɔ ka o naŋ ba be a teɛ eŋɛ, a lɛ meŋ la ka yɛ kontoɔ̃ wɔŋ wɔmɔ ka yɛnee ba be N eŋɛ.

⁵Maa la a dããteɛ, kyɛ ka yɛ waa a ulli.[16] Banaŋ naŋ be N poɔ ka N meŋ be ba poore maŋ wɔŋ la wɔmɔ yaga, bonso, ka yɛnee ba be N eŋɛ, yɛ kontoɔ̃ e yelzaa.

⁶Soba na zaa naŋ ba be N poɔ, ba na lɔɔ o la bare aŋa teɛ ulee ka o ko. A ulli ama taaba, ba na wuo a la lantaa a lɔɔ eŋ vũũ poɔ ka a di.

⁷Ka yɛnee wa be N poɔ, ka a N yelbie be yɛ poore, yɛ sɔre bonzaa yɛ naŋ boɔrɔ, kyɛ ba na e ko yɛ la.

⁸Ka yɛnee wɔnɔ wɔmɔ yaga kyɛ waa N potuuribo, ŋaa la na e ka N Saa yuori na nyɛ puubu.

⁹Aŋa lɛ a Saa naŋ nɔŋ ma, lɛ la ka N meŋ nɔŋ yɛ. Yɛ be a N nɔmmo poɔ.

¹⁰Ka yɛnee wa sagra a N nɔɛ, yɛ na be la a N nɔmmo poɔ, aŋa lɛ N naŋ sagra a N Saa nɔɛ a be a O nɔmmo poɔ lɛ.

¹¹N da yeli la a yɛlɛ ama ko yɛ, ka N kyelloo na be yɛ zie, ka a yɛ kyelloo na nyɛ paaloo.”

¹²“A N noɔre la ŋa: yɛ nɔnɔ taa aŋa lɛ N naŋ da nɔŋ yɛ.

¹³Neɛzaa ba taa nɔmmo ka o gaŋ a ŋaa: ka neɛ na sage kpi o bamine zuiŋ.

¹⁴Ka yɛnee wa sagra N nɔɛ, yɛ waa la N bamine.

¹⁵N ba la kyɛnɛ boɔlɔ yɛ tontonema, bonso, tontonɔ ba maŋ baŋ bon a o neŋkpoŋ naŋ erɛ. Kyɛ N boɔlɔ yɛ la N bamine bonso, N eɛɛ la ka yɛ baŋ yɛlɛ na zaa N naŋ da woŋ yi a N Saa zie.

¹⁶Yɛnee naane kaa-iri ma, kyɛ maa la kaa-iri yɛ, a toŋ yɛ ka yɛ gaa te wɔnɔ wɔmɔ. Wɔmɔ na naŋ na bebe kɔɔre, ka a Saa pãã na ko yɛ bonna zaa yɛ naŋ sɔre yi O zie a N yuori eŋɛ.

¹⁷N korɔ yɛ la a nɔɛ ama ka ka yɛ na nɔnɔ taa.”

¹⁸“Ka a tendaa noba wa kyiire yɛ, yɛ baŋ velaa ka maa la ka ba da daŋ kyiiri kyɛ pãã wa kyiire yɛ.

¹⁹Ka yɛnee da poɔ a tendaa noba poɔ, ba da na nɔŋ yɛ la aŋa bamenne noba. N naŋ kaa-iri yɛ yi ne a tendaa noba poɔ, ka yɛ ba la poɔ ba poɔ la so ka a tendaa noba kyiire yɛ.

²⁰Yɛ leɛ-teɛre a yelbiri na N naŋ da yeli ko yɛ, ‘Tontonema ba ganna ba neŋkpoŋ.’ Ka ba naŋ da dɔgre ma, ba na dɔgre la yɛ meŋ. Ka ba naŋ da sage de a N yɛlɛ, ba na sage de la yɛ meŋ yɛlɛ.

²¹Kyɛ ba na e yɛ la a ama zaa a N yuori zuiŋ, bonso, ba ba baŋ a soba na naŋ toŋ ma.

²²Ba da koŋ taa yelsaanaa zaa ka maa da ba wa yeli yɛlɛ ko ba. Kyɛ ŋaa eŋ, ba ba taa gaafara zaa na tere kyaare ne a ba yelbebe.

²³Soba na zaa naŋ kyiiri ma, kyiiri la N Saa meŋ.

²⁴Ka maa da ba wa toŋ a toma ama neɛzaa naŋ daŋ ba toŋ zaa ba poɔ, ba da koŋ taa yelbieri zaa. Kyɛ pampana, ba nyɛɛ la kyɛ naŋ kyiiri ma ane a N Saa.

²⁵A yɛlɛ ama eɛɛ la ka ka a na tu a yelbiri ba naŋ da sɛge eŋ a Naaŋmen begɛ poɔ, ‘Ba kyiiri ma la kyɛ ka N ba sãã yelzaa.’ ”

²⁶“Ka a Soŋnɔ, a yelmeŋɛ Vooroŋ N naŋ na toŋ ka O yi a Saa zie wa, na wa di la N danseɛ.

²⁷Yɛ meŋ na di la a N danseɛ, bonso, yɛ da be la N zie a yi a piiluu saŋ.”