Read Southern Dagaare Gyn 19 Bible Online

Gyn 19 - Southern Dagaare bible

Gyn 19

¹Lɛ la ka Pilato da de a Yeezu tere kyɛ e ka ba te feɛ O.

²A sogyɛre da de la goore, a wuo ne nazupili a vɔgle a Yeezu zu kyɛ de kpareze-kpoŋ kaŋ su O.

³Ba pãã da maŋ waana la O zie a yele, “Yaane, Gyuumine Naa!” kyɛ maŋ fale O.

⁴A Pilato da laboreŋ yi te yeli ko ba la, “Yɛ nyɛ, N taa O la yire waana ne yɛ zie ka N e ka yɛ baŋ ka N ba nyɛ O yelsaanaa zaa.”

⁵A lɛ la ka a Yeezu meŋ da yi wa, a vɔgle a goore nazupili kyɛ su a kpareze-kpoŋ. Ka a Pilato da yeli ko ba, “A dɔɔ la ŋa!”

⁶A Naaŋmen bagmaale wederebɛ nembɛrɛ ane a polisiri naŋ da nyɛ O, ba da kyeerɛɛ la a yele, “Kpa O dagaraa zu! Kpa O dagaraa zu!” Ka a Pilato da yeli ko ba, “Yɛ taa O yɛmenne te kpa a dagaraa zu. Maa eŋ ba nyɛ O yelsaanaa zaa.”

⁷Ka a Gyuumine da yeli sɔge a Pilato, “Te taa la noɔre kaŋ, ka a noɔre wuli ka O seŋ ne la kũũ, O naŋ yeli ka O waa la Naaŋmen Bie zuiŋ.”

⁸A Pilato naŋ da wa woŋ a ŋaa, dabeɛ̃ da la maaleŋ kpɛ o la yaga zaa.

⁹O da laboreŋ kpɛ la o nayikpoŋ poɔ a te soore a Yeezu, “Yeŋ la ka fo yi?” Kyɛ a Yeezu da ba yeli yelzaa sɔge o.

¹⁰Lɛ la ka a Pilato pãã da yeli ko O, “Fo zagrɛɛ la ka fo yeli yɛlɛ sɔge ma be? Fo ba baŋ ka N taa la kpeɛ̃õ ka N bare fo bee a e ka ba kpa fo dagaraa zu be?”

¹¹Ka a Yeezu da leɛ yeli ko o, “Fo da koŋ taa kpeɛ̃õ N zu, ka Naaŋmen da ba ko fo sori. A lɛ zuiŋ, a soba na naŋ de ma ko fo la e yelbieri naŋ e kpoŋ yaga.”

¹²A yi a lɛ puoriŋ, Pilato da moɔrɔ la ka o bare a Yeezu, kyɛ ka a Gyuumine da kyeerɛ a yele, “Ka fõõ wa bare a dɔɔ ŋa, fo ba waa a nakpoŋ Siiza ba. Neɛzaa naŋ de o meŋɛ boɔlɔ naa, zɔɔrɔ ne la a nakpoŋ Siiza.”

¹³A Pilato naŋ da wa woŋ a yelbie ama, o da taa la a Yeezu yi wa ne, a wa zeŋ a sɛredi dakogi zu, a zie na ba naŋ boɔlɔ Kusi-pane kyaaraa kyɛ ka a Hiburu kɔkɔre poɔ ka ba boɔlɔ Gabata.

¹⁴A da e la a Ista tigri Naroo bebiri daare, aŋa ŋmenaa pozentaa saŋ. A Pilato da yeli ko la a Gyuumine, “Yɛ nyɛ a yɛ Naa!”

¹⁵Ba da kyeerɛɛ la a yele, “Yɛ beɛle O bare! Yɛ beɛle O bare! Kpa O dagaraa zu!” Ka a Pilato da soore ba, “N kpa a yɛ Naa dagaraa zu be?” Ka a Naaŋmen bagmaale wederebɛ nembɛrɛ da leɛ yeli, “Te ba taa naa zaa ka a nakpoŋ Siiza naane.”

¹⁶Lɛ la ka Pilato da de O ko ba ka ba te kpa a dagaraa zu. Ba pãã da nyɔge la a Yeezu

¹⁷a e ka O da tuo a dagaraa O meŋɛ a gaa ne a zie na ba naŋ boɔlɔ Zukɔɛ zie, ka a Hiburu kɔkɔre poɔ ka ba boɔlɔ Golgota.

¹⁸A be la ka ba da kpa O a dagaraa zu ane dɔbɔ mine bayi, ka kaŋ be O nuduluŋ seŋ, ka kaŋ meŋ be O nugɔɔ seŋ, kyɛ ka a Yeezu da be ba sogɔ.

¹⁹A Pilato da eɛɛ la ka ba sɛge yelbie ama eŋ a dagaraa zu, “Yeezu Naŋ Yi Naazɛrɛ, A Gyuumine Naa.”

²⁰A zie ba naŋ da kpa a Yeezu a dagaraa zu da peɛle la a teŋkpoŋ, a lɛ zuiŋ a Gyuumine yaga da sɔre la a sɛgre ŋa. Ba da sɛge la a sɛgre ne Hiburu, Laatin ane Giriki kɔkɔɛ.

²¹Lɛ la ka a Gyuumine Naaŋmen bagmaale wederebɛ nembɛrɛ da yeli ko a Pilato, “Ta sɛge, ‘A Gyuumine Naa,’ kyɛ, sɛge, ‘A dɔɔ ŋa yeli ka, maa la a Gyuumine Naa.’ ”

²²Ka a Pilato da leɛ yeli, “Bon N naŋ sɛge, N sɛge baarɛɛ la.”

²³A sogyɛre naŋ da wa kpa a Yeezu a dagaraa zu baare, ba da de la O bonsuuri poŋ ziiri anaare ka kanzaa maŋ so ziyeni. Ba da de la O kpar-kpoŋ meŋ naŋ da ba taa seɛroŋ zaa a yi o zu te tɔ o pare.

²⁴Lɛ la ka ba da yeli ko taa, “Yɛ ta e ka te kyeɛ̃ o, kyɛ yɛ e ka te ŋmɛ gbaŋ nyɛ neɛ na naŋ na di.” A ŋaa da eɛɛ la ka ka a na tu lɛ a gansoŋ naŋ da yeli: “Ba da de la N bonsuuri poŋ taa, kyɛ ŋmɛ gbaŋ de N kparoo.”

²⁵A lɛ la ka a sogyɛre da e. Kyɛ a Yeezu ma ane a O ma yɔɔ, ane Kelopa pɔgɔ Mareya ane Mareya Magdalina da are peɛle la a Yeezu dagaraa.

²⁶A Yeezu naŋ da wa nyɛ a O ma ane a O potuuro na O naŋ da nɔŋ ka o are peɛle a O ma, O da yeli ko la a O ma, “Pɔge, nyɛ a fo bie.”

²⁷O pãã da yeli ko la a potuuro na, “Nyɛ a fo ma.” A yi a lɛ daare kyɛ gɛrɛ, a potuuro da de la a Mareya gaa ne o meŋɛ yiri poɔ.

²⁸A ŋaa puoriŋ, a Yeezu naŋ da wa baŋ ka a yɛlɛ zaa pãã da baarɛɛ la, O da yelee la: (ka a gansoŋ poɔ yɛlɛ na tu a tuubu) “Kɔŋnyuuri kpeɛrɛ ma la.”

²⁹Doge naŋ paale ne dããmiiruŋ da biŋ la a be. Lɛ la ka ba da de lɔrɔ toŋ a dãã poɔ, a de kyage dalee eŋɛ kyɛ de turi eŋ a Yeezu noɔre ka O nyu.

³⁰A Yeezu naŋ da wa lɛnne a dããmiiruŋ, O da yelee la, “A baarɛɛ la.” O pãã da suli la O zu kyɛ ŋmaa vooroŋ.

³¹A daare na naŋ da waa a Naroo bebiri naŋ na nyaazie e a pɛnnoo bebiri daare zuiŋ, a Gyuumine da ba boɔrɔ ka ba bare a kuuni a dagaraa zu ka zie nyaa a pɛnnoo bebiri. Bonso, a pɛnnoo bebiri ŋa da e la bebi-kpoŋ. Lɛ la ka ba da te sɔre Pilato ka o tere sori ka ba te kɔɔre a noba ba naŋ da kpa a dagaraa zu gbɛɛ kyɛ yage ba a dagaraa zu.

³²Lɛ la ka a sogyɛre da te kɔɔre a dɛndɛŋ soba gbɛɛ ane a o tɔsoba na ba naŋ laŋ kpa a dagaraa zu.

³³Kyɛ ba naŋ da wa te ta Yeezu a nyɛ ka O da kpi baare, ba da ba kɔɔre O gbɛɛ.

³⁴Kyɛ a sogyɛre kaŋ da de la kpane[18] kyɔge ne a Yeezu lambori puo ka zẽẽ ne koɔ̃ da lantaa wa yi a daadaalɛ.

³⁵(A soba na naŋ da nyɛ a yeli ŋa da di la danseɛ ka ka yɛ meŋ na sage de. A o danseɛ e la yelmeŋɛ, kyɛ ka o baŋ ka a yelmeŋɛ la ka o yele.)

³⁶A yɛlɛ ama da eɛɛ la ka ka a gansoŋ poɔ yɛlɛ na tu a tuubu, “Ba koŋ kɔɔ O kɔɔre kanzaa.”

³⁷Kyɛ a gansoŋ poɔ zie kaŋ meŋ laboreŋ yelee la, “Ba na kaara la a neɛ na ba naŋ kyɔge ne kyɔlmɔ.”

³⁸A yɛlɛ ama puoriŋ, Yuzɛb naŋ yi Aremateya da sɔre la Pilato ka o tere sori ka o te de a Yeezu eŋɛ. A Yuzɛb da waa la a Yeezu potuuro kaŋ, kyɛ da sɔgle o meŋɛ bonso o da zoro la a Gyuumine dabeɛ̃. A Pilato pãã da ko o la sori, ka o da te de a Yeezu eŋɛ.

³⁹A Nikodemu na naŋ da daŋ gaa a Yeezu zie tensogɔ kaŋ meŋ da waɛ la, a da taa turaali naŋ pulli ne tẽẽ mine wa ne ka a tegroŋ da ta ŋa kilori lezare ne pie.

⁴⁰Ba da de la a turaali sɔ ne a Yeezu eŋɛ kyɛ de pɛmɛ pilli page O, aŋa a Gyuumine kũũ ũũmu tuulo naŋ maŋ tu lɛ.

⁴¹Gaaden kaŋ da be la a be ba naŋ da kpa Yeezu a dagaraa zu, ka ya-paalaa kaŋ da be a gaaden poɔ ka ba daŋ ba ũũ neɛzaa o poɔ.

⁴²A be la ka ba da ũũ a Yeezu, bonso, a Gyuumine Naroo bebiri daare da la kyɛ ka a yaa na la da peɛle a be.