Read Southern Dagaare Gyn 20 Bible Online

Gyn 20 - Southern Dagaare bible

Gyn 20

¹A koseɛraa bebi-dɛndɛŋ daare, bagu-pipi saŋ, zie naŋ da naŋ waa lige, Mareya Magdalina da gaa la a yaa zie. O da te nyɛ la a yaa noɔre kuuri ka ba billi bare.

²Lɛ la ka o da leɛ zo gaa Saamon Piita ane a potuuro na Yeezu naŋ da nɔŋ na zie, a te yeli ko ba, “Ba de la a Daana yi ne a yaa poɔ, kyɛ te ba baŋ zie na ba naŋ biŋ O.”

³Lɛ la ka Piita ane a potuuro na da yi gaa a yaa zie.

⁴A ba bayi da laŋ zoro gɛrɛ la, kyɛ a potuuro onaŋ da zo gaŋ la Piita, a daŋ te ta a yaa zie.

⁵O da te zuunee la a muuli kaa a yaa poɔ, a da nyɛ a pɛmɛ na ba naŋ da ũũ ne a Yeezu ka a gaŋ a be, kyɛ o da ba kpɛ a yaa poɔ.

⁶Lɛ la ka Saamon Piita meŋ da tu o puori wa, a te kpɛ a yaa poɔ. O da nyɛ la a pɛmɛ ba naŋ da ũũ ne a Yeezu ka a gaŋ a be,

⁷kyɛ ka a pɛne na ba naŋ da pɔge ne a Yeezu zu ka o ba poɔ a taaba poɔ kyɛ gbuli gaŋ o yoŋ zie.

⁸Lɛ la ka a potuuro na naŋ da daŋ ta a yaa zie meŋ pãã da te kpɛ. O da nyɛɛ la a sage de.

⁹Kyɛ anealɛzaa, ba da naŋ ba baŋ a gansoŋ poɔ yɛlɛ tɛgɛ naŋ da yeli ka a ferɛɛ la ka O leɛ-iri a kuuni poɔ.

¹⁰A potuuribo pãã da leɛ gaa la ba yie.

¹¹A Mareya Magdalina da are la a yaa zie a kono. O naŋ da naŋ kono, o da zuunee la a kaa a yaa poɔ

¹²a da nyɛ Malekere bayi ka ba da su kparpeɛle a zeŋ a be ba naŋ da gaale a Yeezu eŋɛ. Kaŋ da zeŋ la O zu zie ka kaŋ meŋ zeŋ O gbɛɛ zie.

¹³Ba da soore o la. “Pɔge, bonso ka fo kono?” Ka o da leɛ yeli sɔge ba, “Ba de la N Daana yi ne a yaa poɔ kyɛ N ba baŋ be ba naŋ te biŋ O.”

¹⁴O naŋ da wa yeli a ŋaa baare, o da leɛrɛ la a nyɛ a Yeezu ka O are a be, kyɛ o da ba baŋ ka a Yeezu la.

¹⁵A Yeezu da soore o la, “Pɔge, bonso ka fo kono? Aŋ la ka fo boɔrɔ.?” A Mareya Magdalina naŋ da teɛre ka a gaaden tontonɔ la so ka o da yeli ko O, “Neŋkpoŋ, ka fõõ la wa de O yi ne, yeli ko ma be fo naŋ te biŋ O, ka N te de O.”

¹⁶Ka a Yeezu da boɔle o, “Mareya!” Ka a Mareya da leɛ tori O kyɛ sage ne a Hiburu kɔkɔre, “Uraboni!” (a tɛgɛ la Wulwullo).

¹⁷Ka a Yeezu da yeli ko o, “Ta nyɔge ma taa, bonso, N naŋ ba do a N Saa zie sɛre. Kyɛ gaa a N yɔɔmine zie, a te yeli ko ba, ‘N duoro la a N Saa ane a yɛ Saa, a N Naaŋmen ane a yɛ Naaŋmen zie.’ ”

¹⁸A Mareya Magdalina da gaa te manne la a yɛlɛ ko a potuuribo, “N nyɛ la a Daana”. A Mareya da yeli ko ba la ka a yelbie ama la ka O da yeli ko o.

¹⁹A koseɛraa na bebi-dɛndɛŋ daare, zie naŋ da wa te maa, ka a potuuribo da lantaa die poɔ kyɛ lare a pama, ba naŋ da zoro a Gyuumine dabeɛ̃ zuiŋ, a Yeezu da wa are la ba sogɔŋ kyɛ yeli, “Ka maaroŋ be yɛ zie.”

²⁰O naŋ da wa yeli a ŋaa baare, O da wuli ba la O nuuri ane O lambori. A potuuribo poore da pɛllɛɛ la yaga ne ba naŋ da nyɛ a Daana.

²¹A Yeezu da laboreŋ yeli ko ba la, “Ka maaroŋ be yɛ zie. Aŋa lɛ N Saa naŋ da toŋ ma, lɛ la ka N meŋ tonɔ yɛ.”

²²O naŋ da wa yeli a ŋaa, O da voore eŋ ba la kyɛ yeli ko ba, “Yɛ de a Vooroŋ Soŋ.

²³Ka yɛnee wa di neɛzaa yelbebe suuri ko o, a o yelbebe nyɛ la sudi, kyɛ neɛ na yɛ naŋ koŋ di suuri ko, a o soba yelbebe koŋ nyɛ sudi.”

²⁴Kyɛ Tɔmaase (ba naŋ da boɔlɔ Yeebaa) naŋ da waa a apostoliimine pie ne bayi na kaŋ da ba kye ba poɔ a saŋ na a Yeezu naŋ da wa ba zie.

²⁵A lɛ la ka a potuuribo banaŋ da yeli ko o, “Te nyɛ la a Daana.” Kyɛ ka a Tɔmaase da yeli ko ba, “Ka maa ba nyɛ a pimbie bogri a O nuuri poɔ, a de n nubiri toŋ a bogri poɔ, a la de n nu toŋ a O lambori poɔ, N koŋ sage de.”

²⁶A daa gbuli puoriŋ, a Yeezu potuuribo da la be la a die poɔ, ka Tɔmaase meŋ da be ba poɔ. Aneazaa ka a dendɔɛ da larɛɛ la, kyɛ a Yeezu da wa are la ba sogɔŋ kyɛ yeli, “Ka maaroŋ be yɛ zie.”

²⁷Lɛ la ka O da yeli ko a Tɔmaase, “De a fo nubiri eŋ kyɛ, kyɛ kaa nyɛ N nuuri. De a fo nu eŋ a N lambori. Ta bonnɔ, kyɛ sage de.”

²⁸Ka a Tɔmaase da leɛ yeli sɔge O, “N Daana ane N Naaŋmen!”

²⁹Ka Yeezu da yeli ko o, “Fo naŋ nyɛ ma la so ka fo sage de wɛ? Banaŋ naŋ ba nyɛ kyɛ sage de nyɛ la maaloo.”

³⁰A Yeezu da la e la yelwulii yaga a O potuuribo niŋesogɔ kyɛ ka ba ba sɛge a eŋ a gane ŋa poɔ.

³¹Kyɛ ba sɛge la a ama ka ka yɛ na sage de ka Yeezu la a Mɛzaaya,[19] a Naaŋmen Bie. A yɛ sagedeebo zie la ka yɛ na tu a nyɛ nyɔvore a O yuori eŋɛ.