Read Southern Dagaare Gyn 21 Bible Online

Gyn 21 - Southern Dagaare bible

Gyn 21

¹A yɛlɛ ama puoriŋ, Yeezu da la de la O meŋɛ wuli a potuuribo a Tiberiya mane noɔre. Ŋaa la ka O da de O meŋɛ wuli.

²Saamon Piita ane Tɔmaase ba naŋ boɔlɔ Yeebaa, ane Nataneɛl naŋ yi Keeina teŋɛ naŋ be a Galili paaloŋ poɔ, a Zɛbɛdii bibiiri, a de ne a potuuribo mine bayi da laŋ la taa.

³Ka a Saamon Piita da yeli ko ba, “N gɛrɛ la zoma nyɔgebo.” Ka ba da yeli ko o, “Te ne fo la na gaa.” Ba da yi gaa te kpɛ la gbori, kyɛ ba da ba nyɔge bonzaa a tensogɔ na zaa poɔ.

⁴Zie naŋ da wa te nyaana, Yeezu da wa are la a mane noɔre kyɛ ka a potuuribo da ba baŋ ka Ona la.

⁵A Yeezu pãã da soore ba la, “N Bibiiri, yɛ ba taa zoma be?” Ka ba da yeli sɔge, “Ai.”

⁶Ka O da yeli ko ba, “Yɛ lɔɔ a yɛ zonkyogi a gbori duluŋ seŋ, yɛ na nyɔge la a mine.” Lɛ la ka ba da lɔɔ a zonkyogi, kyɛ ba da ba toɔ̃ tage a zonkyogi eŋ a gbori poɔ, bonso, zoma yaga da be la o poɔ.

⁷Ka a potuuro na a Yeezu naŋ da nɔŋ da yeli ko a Piita, “A Daana la!” A Saamon Piita naŋ da wa woŋ ka a Daana la, o da de la o kparoo su, o naŋ da taa eŋkpoŋkpoli zuiŋ, kyɛ ɛge le a mane koɔ̃ poɔ.

⁸Kyɛ a potuuribo banaŋ naŋ kyɛre da kpɛ la a gbori, a te tage a zonkyogi naŋ paale ne zoma yi ne dondoli, bonso, ba ne a dondoli da ba la e tɔɔre; a da waa ŋa mitare kɔɔ.

⁹Ba naŋ da wa yi a gbori poɔ, ba da nyɛ la saala vũũ a be, ka zoma ane boroboro dɔgle a zu.

¹⁰Ka a Yeezu da yeli ko ba, “Yɛ taa a zoma mine yɛ naŋ nyɔge wa ne.”

¹¹Ka a Saamon Piita da te kpɛ a gbori poɔ a tage a zonkyogi wa yi ne, ka o paale ne zombɛrɛ, kɔɔ ne lezaayi ne pie ne ata. Aneazaa ka a zoma da waa la yaga, kyɛ a zonkyogi da ba kyeɛ̃.

¹²A Yeezu da yeli ko ba la, “Yɛ wa di baguo diibu.” A potuuribo kanzaa da ba sage soore O, “Aŋ la fo?” bonso, ba da baŋ ka a Daana la.

¹³A Yeezu da wa de la a boroboro ko ba, kyɛ la de a zoma meŋ ko ba.

¹⁴A gbɛre bota soba la ŋaa a Yeezu naŋ da de O meŋɛ wuli a potuuribo, a O kũũ leɛ-iruu puoriŋ.

¹⁵Ba naŋ da wa di a baguo diibu baare, Yeezu da soore la Saamon Piita, “Saamon, Gyɔɔn bidɔɔ, fo nɔŋ ma la gaŋ a bama be? Ka a Piita da yeli sɔge O: Õõ, Daana, fo baŋ ka N nɔŋ fo la.” Ka a Yeezu da yeli ko o, “Guolo a N pebilii.”

¹⁶Ka a Yeezu la soore o a boyi soba, “Saamon, Gyɔɔn bidɔɔ, fo nɔŋ ma laa?” Ka o da yeli sɔge O, “Õõ, Daana, fo baŋ ka N nɔŋ fo la.” Ka Yeezu da yeli ko o, “Kyeenɛ a N peere.”

¹⁷A Yeezu da la soore o la a gbɛre bota soba, “Saamon, Gyɔɔn bidɔɔ, fo nɔŋ ma laa?” A Piita da taa la posaanaa ne a Yeezu naŋ da soore o a gbɛre bota soba, “Fo nɔŋ ma laa?” Ka o da yeli ko O, “Daana, fo baŋ la bonzaa. Fo baŋ ka N nɔŋ fo la.” Ka a Yeezu da yeli ko o, “Guolo a N peere.”

¹⁸Yelmeŋɛ zaa ka N yele korɔ fo, fo naŋ da e pɔlbile, fo da maŋ leŋ la fo meŋɛ kpagre, a yɔ gaa zie na zaa fo naŋ boɔrɔ. Kyɛ ka fõõ wa kore, fo na maŋ teɛ la fo nuuri ka neɛ kaŋ leŋ a fo seɛ ne kpagre, a taa fo gaa ne zie na fo naŋ ba boɔrɔ ka fo gaa.

¹⁹(O da yeli la a ŋaa a na wuli kũũ na tɔ a Piita naŋ na kpi a iri Naaŋmen yuori.) A Yeezu naŋ da wa yeli a ŋaa baare, O da yeli ko la a Piita, “Tuuro ma.”

²⁰A Piita da leɛ kaa la puori a nyɛ a potuuro na Yeezu naŋ da nɔŋ ka o tuuro ba. A potuuro ŋa la da zeŋ kɔge a Yeezu a bondi parebaaraa daare kyɛ da soore O, “Daana, aŋ la na yi fo puori, a de fo tere?”

²¹A Piita naŋ da wa nyɛ o, o da yeli ko la a Yeezu, “Daana, ka a neɛ ŋa soba meŋ?”

²²Ka Yeezu da yeli ko o, “Ka anaŋ e N poboɔbo ka o bebe te ta saŋ N naŋ na leɛ wa, fo boŋ yeli la bebe? Tuuro ma!”

²³Azuiŋ a yeli ŋa da ŋmɛ yaare la a gbandige na poɔ ka a potuuro ŋa koŋ kpi. Kyɛ a Yeezu da ba yeli ko o ka o koŋ kpi. O da yelee la, “Ka anaŋ e N poboɔbo ka o bebe te ta saŋ N naŋ na leɛ wa, fo boŋ yeli la bebe?”

²⁴A potuuro ŋa la dire a yɛlɛ ama danseɛ kyɛ sɛge a biŋ, ka te baŋ ka a o danseɛ e la yelmeŋɛ.

²⁵Kyɛ yɛlɛ yaga mine meŋ bebe la ka a Yeezu da e. Ka ba naŋ da sɛge a yɛlɛ zaa nɛnɛ biŋ, N teɛre ka a tendaa zaa da kontoɔ̃ taa zie ka ba na biŋ a gansɛgre zaa.