Read Southern Dagaare Gyn 4 Bible Online

Gyn 4 - Southern Dagaare bible

Gyn 4

¹A Yeezu naŋ da wa baŋ ka a Faraziimine da woŋ ka O nyɛrɛ la potuuribo kyɛ korɔ noba yaga suobu a gaŋ Gyɔɔn,

²(Yeezu meŋɛ naane da terɛ a suobu, kyɛ O potuuribo la da terɛ);

³O da yi la a Gyudiya paaloŋ a leɛ gaa a Galili paaloŋ.

⁴Kyɛ a da ferɛɛ la ka O tu a Samareya paaloŋ poɔ gaa a be.

⁵Lɛ la ka O da wa a Samareya teŋkpoŋ kaŋ yuori naŋ di Sika, naŋ are peɛle a weɛ na Gyekɔb naŋ da da ko o bidɔɔ Yuzɛb.

⁶A Gyekɔb bulee da be la a be. Kyɛ a Yeezu naŋ da bale a O kyɛmmo poɔ la so ka O da wa zeŋ a bulee noɔreŋ. A da e ŋa ŋmenaa pozentaa saŋ.

⁷Samareya pɔge kaŋ da waɛ la ka o ɔŋ koɔ̃, ka Yeezu da yeli ko o, “Ko ma koɔ̃ ka N nyu.”

⁸(A Yeezu potuuribo da gaa la a teŋkpoŋ poɔ ka ba te da bondirii.)

⁹A Samareya pɔge da soore la a Yeezu, “Wola ka fõõ Gyuu neɛ na sɔre koɔ̃ maa naŋ e Samareya neɛ zie?” (A Gyuumine ane a Samareya noba da ba tuoro.)

¹⁰Ka a Yeezu da yeli sɔge O, “Ka fõõ da baŋ a Naaŋmen kyɔɔtaa, ane neɛ na naŋ la yele korɔ fo, ‘Ko ma koɔ̃ ka N nyu,’ fo da na sɔre O la ka O da ko fo koɔ̃ naŋ terɛ nyɔvore.”

¹¹Ka a pɔge da yeli ko O, “Daana, fo ba taa bon na ɔŋ ne a koɔ̃, kyɛ ka a bulee waa zuluŋ; yeŋ ka fo na nyɛ a kɔŋvore?

¹²Fo mɔɔ waa la kpoŋ gaŋ a te sããkoma Gyekɔb naŋ da ko te a bulee ŋa, ka o biiri ne ba donne zaa da nyuuro a bulee ŋa koɔ̃ be?”

¹³Ka Yeezu da leɛ yeli ko o, “Neɛzaa naŋ nyu a koɔ̃ ŋa, kɔŋnyuuri na leɛ kpɛ o la.

¹⁴Kyɛ banaŋ naŋ nyu a koɔ̃ N naŋ na ko ba, kɔŋnyuuri daŋ koŋ la kpɛ ba zaa. A koɔ̃ na N naŋ na tere, na leɛ la bulnimiri ba poɔŋ, ka a bullo yire a terɛ nyɔvore naŋ ba taa baaroo.”

¹⁵Ka a pɔge da yeli ko O, “Daana, ko ma a koɔ̃ ŋa, ka kɔŋnyuuri ta la kpɛ ma zaa, bee ka N ta la waana kyɛ ɔnnɔ koɔ̃.”

¹⁶Ka Yeezu da yeli ko o, “Gaa te boɔle fo serɛ, kyɛ leɛ wa.”

¹⁷Ka a pɔge da yeli sɔge O, “N ba taa serɛ.” Ka Yeezu da yeli ko o, “Yelmeŋɛ la ka fo yeli ka fo ba taa serɛ,

¹⁸bonso, serebɛ banuu la ka fo kuli, kyɛ a onaŋ fo naŋ taa pampana ŋa ba waa fo serɛ. A lɛ fo naŋ yeli e la yelmeŋɛ!”

¹⁹Ka a pɔge da yeli ko O, “Daana, N nyɛɛ la ka fo waa la Ŋmen-yelmanna.

²⁰Te sããkommine da maŋ puori la Naaŋmen a taŋ ŋa zu, kyɛ ka yɛnee Gyuumine yeli ka zie na a naŋ fere ka noba maŋ puori Naaŋmen la Gyɛruzɛlɛm teŋɛ poɔ.”

²¹Ka Yeezu da yeli ko o, “Pɔge, sage de N yɛlɛ. A saŋ waana la ka yɛ koŋ la puoro a Saa a taŋ ŋa zu bee Gyɛruzɛlɛm poɔ.

²²Yɛ Samareya noba puoro la bon yɛ naŋ ba baŋ, kyɛ tenee Gyuumine puoro la bon te naŋ baŋ, bonso, a Gyuumine zie la ka faabo yi.

²³Kyɛ a saŋ tara la, a saŋ gba taɛ la, ka banaŋ naŋ puoro ne ba poore zaa na puori a Saa ne a vooroŋ ane yelmennoŋ. Bonso, a bama taaba la ka a Saa boɔrɔ ka ba puori O.

²⁴Naaŋmen waa la vooroŋ, ka banaŋ naŋ puoro O, seŋ ka ba puori O a vooroŋ ane yelmennoŋ poɔ.”

²⁵Ka a pɔge da yeli ko O, “N baŋ ka a Mɛzaaya[5] waana la” (Ona la ka ba boɔlɔ Kirista). “Ka Onaŋ wa wa, O na manne la yelzaa ko te.”

²⁶Ka Yeezu yeli ko o, “Maa la a lɛ, a soba ŋa naŋ yele a yɛlɛ korɔ fo.”

²⁷A lɛ poɔŋ meŋ la ka O potuuribo da leɛ yi a teŋɛ poɔ wa. Ba nɔɛ zaa da maaɛ la ne ba naŋ wa nyɛ O ka O ne pɔge yele yɛlɛ. Kyɛ neɛzaa da ba soore, “Boŋ ka fo boɔrɔ?” bee, “Bonso ka fo yele yɛlɛ ne a pɔge?”

²⁸Lɛ la ka a pɔge da bare a o koɔ̃ yuori kyɛ da leɛ gaa a teŋkpoŋ poɔ a te yeli ko a noba:

²⁹“Yɛ wa nyɛ dɔɔ kaŋ naŋ yeli n nyɔvore yɛlɛ zaa N naŋ da e a ko ma! Ona mɔɔ tɔɔ wa la a Mɛzaaya wɛ?”

³⁰A noba da yi la a teŋɛ poɔ a gaa a Yeezu zie.

³¹Kyɛ a O potuuribo da sɔre O la a yele, “Daana, di bonkaŋ wɛ.”

³²Kyɛ ka O da yeli ko ba, “N taa la bondirii na di kyɛ ka yɛ naŋ ba baŋ a yɛlɛ.”

³³Lɛ la ka a potuuribo da leɛ soorɔ taa, “Neɛ kaŋ tɔɔ wa taa bondirii wa ko O wɛ?”

³⁴Ka Yeezu da yeli ko ba, “N bondirii la ka N toŋ a soba na naŋ toŋ ma poboɔbo; a toŋ ka a te baare.

³⁵Yɛ mɔɔ ba maŋ yeli, ‘Kyuuri anaare la kyɛre ka a weɛ boma deebo saŋ na ta’? Kyɛ maa yele korɔ yɛ, yɛ leɛ kaa a weɛ gyeere, a nyɛ lɛ a weɛ boma naŋ be seŋ deebo.

³⁶A weɛ bonkyeɛrɛ nyɛrɛ la o toma san-yɔɔ, a pãã wuoro tewɔmɔ laŋna taa a nyɔvore naŋ ba taa baaroo eŋɛ, ka a boreborɔ ane a weɛ bonkyeɛrɛ na lantaa kyellɛ.

³⁷Lɛ la ka a yeluu ŋa e yelmeŋɛ, ‘Neɛ kaŋ maŋ bore la, kyɛ ka kaŋ meŋ kyɛ.’

³⁸N toŋ yɛ la ka yɛ te kyɛ boma na yɛ naŋ ba toŋ ka a yi. Noba mine la toŋ ka a yi, ka yɛ te kpɛ a ba toma poɔ.”

³⁹A Samareya noba yaga naŋ da yi a teŋkpoŋ na poɔ da sage de la a Yeezu yɛlɛ a yi a danseɛ a pɔge naŋ da di zuiŋ, “O da yeli la yɛlɛ na zaa N naŋ da e n nyɔvore poɔ ko ma.”

⁴⁰Azuiŋ, a Samareya noba naŋ da wa a Yeezu zie, ba da sɔre O la ka O kpeɛrɛ ne ba. A Yeezu da kpɛ la a be beri ayi.

⁴¹Ka noba yaga da sage de O yɛlɛ a O kannoo zuiŋ.

⁴²Ba da yeli ko la a pɔge, “A ba la e ka fo yeluu la so ka te sage de O yɛlɛ, bonso, temenne woŋ la a O kannoo a baŋ ka serɛzaa, Ona la a andonɛɛ Faara.”

⁴³A beri ayi naŋ da wa tɔle, Yeezu da yi la a be gaa a Galili paaloŋ.

⁴⁴(Bonso a Yeezu meŋɛ da yeli ka Ŋmen-yelmanna ba nyɛrɛ gyeremɛ o meŋɛ teŋɛ poɔ).

⁴⁵O naŋ da wa a Galili, a teŋɛ deme da tuori de O la, ba naŋ da nyɛ bonna zaa O naŋ da e a tigri zie a Gyɛruzɛlɛm poɔ, bonso, ba meŋ da gaa la a tigri zie.

⁴⁶Lɛ la ka Yeezu da leɛ gaa a Keeina teŋɛ naŋ be Galili paaloŋ poɔ, a be O naŋ da e ka koɔ̃ leɛ dãã. A naayiri tonton-neŋkpoŋ kaŋ da be la a be, ka o bidɔɔ beɛrɛ gaŋ Kapanum teŋɛ poɔ.

⁴⁷O naŋ da wa woŋ ka Yeezu yi la a Gyudiya paaloŋ wa Galili, o da gaa te sɔre O la, ka O wa saŋ a o bidɔɔ, bonso a bie da tɔgle la kũũ.

⁴⁸Lɛ la ka Yeezu da yeli ko o, “Ka yɛnee ba nyɛ yelwulii ane nɔmaa toma, yɛ koŋ sage de.”

⁴⁹Ka a tonton-neŋkpoŋ da yeli ko O, “Neŋkpoŋ, naŋ sigi wa ka a n bie ta wa kpi.”

⁵⁰Ka Yeezu da yeli ko o, “Gɛrɛ, a fo bidɔɔ na nyɛ la laafeɛ.” A dɔɔ da sage de la yɛlɛ a Yeezu naŋ da yeli ko o, a da leɛ kulo.

⁵¹O naŋ da naŋ be a sobiriŋ kyɛnɛ kulo la ka a o gbaŋgbaare zo tuori o a da yeli ko o ka a o bie nyɛ la laafeɛ.

⁵²Lɛ la ka o da soore ba wagre na poɔ naŋ da la ka a bie da piili nyɛrɛ o meŋɛ. Ka ba da yeli ko O, “Zããmeŋ ŋmenaa gbel-yeni saŋ la ka a o entoloŋ da baare.”

⁵³A bie saa da baŋɛɛ la ka a saŋ ŋa poɔ la ka a Yeezu da yeli ko o, “A fo bidɔɔ na nyɛ la laafeɛ.” Lɛ la ka o ne o yideme zaa da sage de a Yeezu yɛlɛ.

⁵⁴A ŋa da la a yelwulaa ayi soba Yeezu naŋ da e, O naŋ da yi a Gyudiya leɛ gaa a Galili paaloŋ.