Read Southern Dagaare Gyn 6 Bible Online

Gyn 6 - Southern Dagaare bible

Gyn 6

¹A ŋaa puoriŋ, Yeezu da gaŋ gaa la a Galili Mane lambori kaŋ meŋ ba naŋ da boɔlɔ Tiberiya Mane.

²Noba yaga da tuuro O la, ba naŋ da nyɛ a yelwulii O naŋ erɛ korɔ a baalba zuiŋ.

³Yeezu ne O potuuribo da do la taŋ kaŋ zu a te zeŋ be.

⁵A Yeezu naŋ da wa zɛge O zu a nyɛ nembeɛoŋ ka ba waana O zie, O da soore la Filipi, “Yeŋ ka te na nyɛ bondirii da ko a noba bama ka ba di?”

⁶O da yeli la a lɛ ka O e a Filipi nyɛ, bonso, Yeezu da baŋ la lɛ O naŋ na e.

⁷Ka Filipi da yeli sɔge O, “Kyuuri ayoɔbo san-yɔɔ koŋ baŋ da bondirii ka ba yeni yeni zaa na nyɛ belaa di.”

⁸A O potuuro kaŋ yuori naŋ di Anduru, a Saamon Piita yɔɔ, da yeli ko la a Yeezu:

⁹“Bidɔɔlee kaŋ be la a kyɛ a taa boroboro anuu ane zoma ayi, kyɛ a ama pãã la boŋ ko a neŋyaga bama?”

¹⁰Ka Yeezu da yeli, “Yɛ e ka a noba zeŋ teŋɛ.” Moɔ yaga da be la a zie, ka a noba da zeŋ teŋɛ. A noba zaa da ta ŋa turi anuu.

¹¹Lɛ la ka Yeezu da de a boroboro a puori Naaŋmen bareka, kyɛ de poŋ a noba naŋ da zeŋ. A lɛ ne o zu la ka O da de a zommo meŋ e. Ka a noba kanzaa da di ka a seŋ o.

¹²Ba naŋ da wa di tege baare, Yeezu da yeli ko la a O potuuribo, “Yɛ wuo a bon ŋmaara a noba naŋ di kyɛ kyɛre lantaa ka a ta wɛ.”

¹³Ba pãã da wuo la a bon ŋmaara a noba naŋ da di kyɛ kyɛre ka a paale pɛre pie ne ayi.

¹⁴A noba naŋ da wa nyɛ a yelwulaa a Yeezu naŋ da e, ba da piili yele la, “A Ŋmen-yelmanna na naŋ waana a teŋɛzu sereŋ la a ŋa.”

¹⁵A Yeezu naŋ da wa baŋ ka a noba da boɔrɔ la ka ba wa fere nyɔge O a e ka O leɛ a ba naa, O da yi la ba poɔ a la te do a taŋ zu a te bebe O yoŋ.

¹⁶Zie naŋ da wa maa, a O potuuribo da sigi la a mane noɔre,

¹⁷a te kpɛ gbori a piili ka ba ŋmaa a mane gaa Kapanum. Zie da ligee la kyɛ ka Yeezu da naŋ ba wa ba zie sɛre.

¹⁸A mane da zɛlɛɛ la, bonso, sasekpeɛŋaa da fuuro la.

¹⁹Ba naŋ da mɔŋ a gbori te ta ŋa mɛlɛ ata bee anaare, ba da nyɛ la a Yeezu ka O kyɛnɛ a koɔ̃ zu a waana a ba gbori zie ka dabeɛ̃ da kpɛ ba yaga.

²⁰Kyɛ ka Yeezu da yeli ko ba, “Maa la, yɛ ta zoro dabeɛ̃.”

²¹Lɛ la ka ba da boɔrɔ ka ba de O eŋ a gbori poɔ, kyɛ ka a gbori deɛ ta a mane noɔre, a lambori na ba naŋ da gɛrɛ.

²²A nyaazie daare, a nembeɛoŋ na naŋ da be a mane lambori kaŋ na, da nyɛɛ la ka gbori yeni yoŋ la da be a be. Ba da nyɛɛ la meŋ ka Yeezu da ba kpɛ a gbori ne a O potuuribo, kyɛ a potuuribo yoŋ la da gaa kyɛ bare O.

²³Lɛ la ka gboe mine da yi Tiberiya a wa are peɛle a zie na a Daana naŋ da de a boroboro a puori Naaŋmen bareka, kyɛ de ko ba ka ba di.

²⁴Azuiŋ a noba naŋ da nyɛ ka a Yeezu bee a O potuuribo kanzaa da ba la kye a be, ba da kpɛ la a gboe a gaŋ gaa Kapanum a te yɔ boɔrɔ a Yeezu.

²⁵Ba naŋ da wa nyɛ O a mane lambori na, ba da soore O la, “Wulwullo, boŋ saŋ la ka fo wa a kyɛ?”

²⁶Ka Yeezu da yeli sɔge ba, “Serɛzaa ka N yele korɔ yɛ, yɛ naŋ di a bondirii tege la so ka yɛ boɔrɔ ma, a ba e ŋa yɛ naŋ nyɛ a yelwulii N naŋ e la so.

²⁷Yɛ ta tonɔ boɔrɔ bondirii naŋ na maŋ wɛ, kyɛ yɛ boɔrɔ anaŋ naŋ na terɛ nyɔvore naŋ ba taa baaroo. Ana la ka a Nensaala Bie na ko yɛ, bonso, Ona la ka a Saa Naaŋmen tere kpeɛ̃õ.”

²⁸Lɛ la ka a noba da soore O, “Boŋ ka te na e a toɔ̃ toŋ a Naaŋmen toma?”

²⁹Ka Yeezu da yeli sɔge ba, “A Naaŋmen toma la ŋa: ka yɛ sage de a neɛ na O naŋ toŋ yɛ zie yɛlɛ.”

³⁰Ka ba pãã da soore O, “Boŋ yelwulaa la ka fo na e ka te nyɛ, kyɛ pãã sage de fo yɛlɛ? Boŋ toma la ka fo tonɔ?

³¹A te sããkommine da di la a maana[7] a wɛgyɛŋ poɔ, aŋa lɛ ba naŋ da sɛge a gansoŋ poɔ, ‘O da ko ba la bondirii naŋ yi tenvelaa[8] ka ba di.’ ”

³²Lɛ la ka Yeezu da yeli ko ba, “Serɛzaa ka N yele korɔ yɛ, Moozul naane da ko yɛ a bondirii na naŋ da yi tenvelaa, kyɛ a N Saa la maŋ tere bondi serɛ naŋ yi tenvelaa.”

³³Bonso, a Naaŋmen bondirii la anaŋ naŋ yi tenvelaa, a maŋ korɔ a andonɛɛ nyɔvore.

³⁴Ka ba da yeli ko O, “Neŋkpoŋ, korɔ te a bondirii ŋa tegitegilɛ.”

³⁵Ka a Yeezu da yeli ko ba, “Maa la a nyɔvore bondiraa. Neɛ na zaa naŋ wa N zie, kɔŋ daŋ koŋ kpɛ o zaa, ka neɛ na zaa naŋ sage de N yɛlɛ, kɔŋnyuuri daŋ koŋ kpɛ o zaa.

³⁶Kyɛ N da yeli ko yɛ la ka yɛ da nyɛ ma la kyɛ da ba sage de N yɛlɛ.

³⁷Bonna zaa N Saa naŋ ko ma na wa la N zie, ka soba na zaa naŋ wa N zie, N koŋ digi o bare,

³⁸bonso, N yi la tenvelaa wa ka N toŋ a soba na naŋ toŋ ma poboɔbo, kyɛ a ba e N meŋɛ poboɔbo.

³⁹Kyɛ a ŋa la a soba na naŋ toŋ ma poboɔbo; ka N ta e ka a banaŋ kanzaa O naŋ ko ma bɔre, kyɛ na e ka ba leɛ-iri a bebi-baaraa daare.

⁴⁰A N Saa poboɔbo sereŋ la ŋa: ka ka banaŋ zaa naŋ nyɛ a Bidɔɔ, a sage de O yɛlɛ na nyɛ nyɔvore naŋ ba taa baaraa, kyɛ ka N e ka ba leɛ-iri a bebi-baaraa daare.”

⁴¹Lɛ la ka a Gyuumine da piili zɔɔrɔ yɛlɛ ne a Yeezu, bonso, O naŋ da yeli, “Maa la a bondiraa na naŋ yi tenvelaa wa.”

⁴²A Gyuumine da yelee la, “A Yuzɛb bidɔɔ Yeezu mɔɔ naane a ŋa be? Te baŋ la O saa ne O ma. Wola ka O na baŋ yeli, ‘N yi la tenvelaa sigi wa’?”

⁴³Ka Yeezu da yeli sɔge ba, “Yɛ ta ŋmoonɔ yɛlɛ yɛmenne zie.

⁴⁴Neɛzaa koŋ baŋ wa N zie, ka a Saa naŋ toŋ ma ba tage o soba wa ne, ka N pãã e ka o soba leɛ-iri a bebi-baaraa daare.

⁴⁵Ba da sɛge la a Ŋmen-yelmanneba gane poɔ, ‘Naaŋmen na wuli la ba zaa.’ Neɛzaa naŋ woŋ kyɛ zanne bon naŋ yi a Saa zie maŋ wa la N zie.

⁴⁶A ba e ŋa neɛzaa la nyɛ a Saa, ka a soba na naŋ yi Naaŋmen zie wa yoŋ naane, ona la nyɛ a Saa.

⁴⁷Yelmeŋɛ zaa ka N yele korɔ yɛ, neɛ na zaa naŋ wa sage de N yɛlɛ nyɛ la nyɔvore naŋ ba taa baaraa.

⁴⁸Maa la a nyɔvore bondiraa.

⁴⁹A yɛ sããkommine da di la maana a wɛgyɛŋ poɔ, kyɛ ba da kpie la.

⁵⁰A bondiraa naŋ yi tenvelaa sigi wa la a ŋa, ka ka neɛ na di a ta kpi.

⁵¹Maa la a nyɔvore bondiraa naŋ yi tenvelaa sigi wa. Neɛ na zaa naŋ di a bondiraa ŋa, na voorɔ la tegitegilɛ. Kyɛ a bondiraa na N naŋ na tere, ka o ko a teŋɛzu deme nyɔvore la a N meŋɛ eŋɛ.”

⁵²A Gyuumine pãã da ŋmeɛrɛ la nɔkpeɛne ne taa a yele, “Wola ka a dɔɔ ŋa na baŋ de O eŋɛ ko te ka te di?”

⁵³Ka Yeezu da yeli ko ba, “Yelmeŋɛ zaa ka N yele korɔ yɛ, ka yɛnee ba di a Nensaala Bie eŋɛ a kyɛ nyu O zẽẽ, yɛ koŋ taa nyɔvore.

⁵⁴Banaŋ naŋ di N eŋɛ kyɛ nyu N zẽẽ taa la nyɔvore naŋ ba taa baaraa, kyɛ N na e la ka ba leɛ-iri a bebi-baaraa daare.

⁵⁵Bonso, N eŋɛ waa la bondiraa meŋɛ, ka N zẽẽ waa bonnyuuraa meŋɛ.

⁵⁶Banaŋ naŋ maŋ di N eŋɛ kyɛ nyu N zẽẽ maŋ be la N poɔ kyɛ ka N meŋ be ba poɔ.

⁵⁷Aŋa lɛ a Saa vore naŋ toŋ ma, ka N voorɔ a Saa zuiŋ, lɛ meŋ la ka soba na zaa naŋ di N eŋɛ na voorɔ a N zuiŋ.

⁵⁸A bondiraa na naŋ da yi a tenvelaa sigi wa la ŋa. O ba waa seŋ ŋa a bondiraa na a yɛ sããkommine naŋ da di a kyɛ naŋ kpi. Kyɛ soba na naŋ di a bondiraa ŋa na voorɔ la tegitegilɛ.”

⁵⁹O da yeli la a yɛlɛ ama O naŋ da naŋ kanna a puoruudie poɔ a Kapanum teŋɛ poɔ.

⁶⁰A Yeezu potuuribo yaga naŋ da woŋ a O yelbiri ŋa da yelee la, “A O kannoo ŋa waa la kpeɛŋaa; aŋ la na baŋ sage de a?”

⁶¹Kyɛ Yeezu naŋ da baŋ ka O potuuribo da ŋmoonɛɛ yɛlɛ, O da soore ba la, “A yeli ŋa sãã la yɛ poɔ be?

⁶²Ka yɛnee pãã da nyɛ a Nensaala Bie ka O leɛ duoro a be O naŋ da be, wola ka yɛ na yeli?

⁶³A vooroŋ la maŋ tere nyɔvore; a eŋgane ba taa tɛgɛ. A yelbie na N naŋ da yeli ko yɛ waa la vooroŋ ane nyɔvore.

⁶⁴Kyɛ noba mine be la yɛ poɔ a ba sage de.” Bonso, a Yeezu da baŋɛɛ la a piiluu saŋ banaŋ naŋ da ba sage de a O yɛlɛ ane neɛ na naŋ na yi O puori.

⁶⁵Ka O da yeli, “A ŋaa zuiŋ la ka N da yeli ko yɛ ka neɛzaa kontoɔ̃ wa N zie, ka a Saa ba ko o soba sori.”

⁶⁶A ŋaa zuiŋ a O potuuribo yaga da leɛ la puori a ba la tuuro O.

⁶⁷Lɛ la ka Yeezu da soore a O potuuribo pie ne bayi na, “Yɛ meŋ boɔrɔ la ka yɛ leɛ gaa be?”

⁶⁸Ka Saamon Piita da yeli sɔge O, “Daana, aŋ zie ka te pãã na gaa? Fõõ la taa a nyɔvore naŋ ba taa baaroo yelbie.

⁶⁹Te sage deɛ la kyɛ baŋ ka fõõ la a Naaŋmen Nensoŋ.”

⁷⁰Ka Yeezu da yeli sɔge ba, “Maa naane kaa-iri a yɛ pie ne bayi be? Kyɛ a yɛ kaŋ waa la sebɛlbɛllɛ.”

⁷¹A Yeezu da yele kyaare ne la Gyudase, a Saamon Ezekarɔte bidɔɔ. Aneazaa ka a Gyudase da waa la a potuuribo pie ne bayi na kaŋ, kyɛ ona la na yi a Yeezu puori.