Read Southern Dagaare Gyn 7 Bible Online

Gyn 7 - Southern Dagaare bible

Gyn 7

¹A ŋaa puoriŋ, Yeezu da yɔ yoɔrɔ la a Galili paaloŋ. O da ba sage ka O yɔ a Gyudiya poɔ, bonso, a Gyuumine da boɔrɔ la vuo ka ba ko O.

²A Gyuumine Sege Tigri[9] da tara la.

³Lɛ la ka O yɔɔmine da yeli ko O, “Yi a kyɛ a gaa Gyudiya poɔ ka a fo potuuribo meŋ te nyɛ a toma fo naŋ tonɔ.

⁴Bonso, neɛzaa naŋ boɔrɔ ka noba yaga baŋ o yɛlɛ ba maŋ erɛ o yɛlɛ sɔglɔ. Ka fõõ wa erɛ a yɛlɛ ama, de fo meŋɛ wuli a tendaa deme zaa.”

⁵(A O yɔɔmine meŋ gba da ba sage de O yɛlɛ)

⁶A Yeezu da yeli ko ba la, “A N saŋ naŋ ba ta sɛre, kyɛ yɛnee eŋ a yɛ saŋ maŋ ta la tegitegilɛ.

⁷A tendaa noba koŋ baŋ kyiiri yɛ, kyɛ ba kyiiri ma la, N naŋ dire danseɛ ka ba yel-erre waa la faa zuiŋ.

⁸Yɛnee yɛ gɛrɛ a tigri zie. Maa eŋ ba gɛrɛ a tigri ŋa zie, bonso, a N saŋ naŋ ba ta sɛre.”

⁹O naŋ da wa yeli a ŋaa baare, O da naŋ kyɛnɛ be la a Galili poɔ.

¹⁰Kyɛ a Yeezu yɔɔmine naŋ da wa gaa a tigri zie baare, O meŋ pãã da sɔgle gaa la a be.

¹¹A Gyuumine da yɔ boɔrɔ la a Yeezu a tigri zie, a soorɔ, “Yeŋ ka O be?”

¹²A noba yaga da zɔɔrɔ la yɛlɛ a O zuiŋ. A noba mine da yelee la, “O e la nemmeŋɛ,” ka ba mine meŋ yele, “Ai, O bɛllɛ la a noba.”

¹³Kyɛ neɛzaa da ba sage yeli O yɛlɛ ka a yi, bonso, ba da zoro la a Gyuumine dabeɛ̃.

¹⁴A tigri naŋ da wa te kpɛ sogɔ, Yeezu da te kpɛ la a Naaŋmen die poɔ a piili kanna a noba.

¹⁵A Gyuumine nɔɛ da maaɛ la ka ba da soorɔ, “Wola ka a dɔɔ ŋa e baŋ yɛlɛ ŋaa, kyɛ ka neɛzaa daŋ ba wuli O?”

¹⁶Lɛ la ka Yeezu da yeli sɔge ba, “A yɛlɛ N naŋ kanna ba waa N meŋɛ yɛlɛ, kyɛ a yi la a soba na naŋ toŋ ma zie.”

¹⁷Neɛ na zaa naŋ sereŋ boɔrɔ ka o erɛ Naaŋmen poboɔbo na baŋ ka a N kannoo yi la Naaŋmen zie bee ka N meŋɛ kannoo la.

¹⁸Banaŋ naŋ maŋ yele bamenne yɛlɛ maŋ boɔrɛɛ puubu korɔ bamenne, kyɛ neɛ naŋ boɔrɔ puubu korɔ a soba na naŋ toŋ o, ona la taa yelmeŋɛ, ka zirii zaa ba kye o zie.

¹⁹“Moozul mɔɔ naane ko yɛ a Naaŋmen begɛ be? Kyɛ ka yɛ kanzaa ba tuuro a begɛ. Boŋ la so ka yɛ boɔrɔ vuo ka yɛ ko ma?”

²⁰Ka a noba da yeli sɔge, “Fo taa la sefaa! Nembuo la boɔrɔ fo koobo?”

²¹Ka Yeezu da yeli sɔge ba, “Toŋyeni yoŋ ka N toŋ kyɛ ka yɛ zaa nɔɛ maa.

²²Moozul la da ko yɛ a bidɔbɔ dɛgre iruu noɔre (Moozul gba zie naane ka a da piili, kyɛ a yɛ sããkommine zie la ka a da piili), ka yɛ pãã maŋ iri a dɔɔ dɛgre a pɛnnoo bebiri daare.

²³Ka yɛnee maŋ iri bidɔbɔ dɛgre a pɛnnoo bebiri daare, a na tu a Moozul noɔre ŋa, boŋ la so ka yɛ suuri iri ne ma N naŋ saŋ dɔɔ kaŋ baaloŋ a pɛnnoo bebiri daare?

²⁴Yɛ ta maŋ kaa noba niŋe kyɛ di ba sɛrɛɛ kyɛ yɛ maŋ di noba sɛrɛɛ ne yelmennoŋ.”

²⁵Pampana a Gyɛruzɛlɛm noba mine da yele la, “A dɔɔ ŋa naane ka ba boɔrɔ ka ba ko be?

²⁶Kyɛ Ona la be kyɛ a yele yɛlɛ noba poɔ, kyɛ ka ba ba yeli yelzaa ko O! A nembɛrɛ mɔɔ tɔɔ wa baŋ ka a Mɛzaaya[10] la a ŋa wɛ?

²⁷Kyɛ te baŋ la zie a dɔɔ ŋa naŋ yi, kyɛ ka a Mɛzaaya wa wa, neɛzaa koŋ baŋ zie O naŋ yi wa.”

²⁸Lɛ la ka Yeezu da yeli ne kɔkɔkpeɛŋaa O naŋ da kanna a noba a Naaŋmen die poɔ, “Yɛ baŋ ma la ane zie N naŋ yi. N meŋɛ waabo naane ka N wa, kyɛ a neɛ na naŋ toŋ ma e la yelmeŋɛ soba, kyɛ ka yɛ ba baŋ O.

²⁹N baŋ O la, bonso O zie la ka N yi wa, Ona la toŋ ma.”

³⁰Lɛ la ka ba da mɔ ka ba nyɔge O, kyɛ neɛzaa da ba de o nu seene O, a O saŋ naŋ da naŋ ba ta sɛre zuiŋ.

³¹Kyɛ noba yaga naŋ da be a nembeɛoŋ poɔ da sage de la a O yɛlɛ a da yele, “Ka a Mɛzaaya wa te wa, O na e la yelwulii a gaŋ a dɔɔ ŋa naŋ e be?”

³²A Faraziimine da woŋ la a nembeɛoŋ naŋ waala yele a Yeezu yɛlɛ, ka a Naaŋmen bagmaalkare ane a Faraziimine da toŋ a Naaŋmen die polisiri ka ba te nyɔge O.

³³Lɛ la ka a Yeezu da yeli, “N koŋ la be a yɛ zie ka a kɔɔre yaga kyɛ ka N leɛ gaa a soba na naŋ toŋ ma zie.

³⁴Yɛ na bɔ ma la kyɛ yɛ koŋ nyɛ ma; bonso, a zie N naŋ na be yɛ kontoɔ̃ wa be.”

³⁵A Gyuumine da soorɔ la taa, “Yeŋ la ka a dɔɔ ŋa boɔrɔ ka O gaa ka te koŋ baŋ nyɛ O? O mɔɔ boɔrɔ la ka O gaa a Gyuumine naŋ yaare be a Giriki noba poɔ a te kanne a Giriki noba be?

³⁶A yɛlɛ ŋa O naŋ yele tɛgɛ la boŋ, ‘Yɛ na bɔ ma la kyɛ yɛ koŋ nyɛ ma’ kyɛ ‘zie na N naŋ be, yɛ koŋ baŋ wa be’?”

³⁷A tigri bebi-baaraa daare naŋ e a tigri bebi-kpoŋ, a Yeezu da iri are la a be a yeli yɛlɛ ne kɔkɔkpeɛŋaa, “Yɛ vɛŋ ka neɛzaa kɔŋnyuuri naŋ kpɛ wa N zie,

³⁸ka soba na naŋ sage de N yɛlɛ wa nyu. Aŋa lɛ a gansoŋ naŋ da yeli, ‘A yelderebɛ sukyie poɔ la ka bare naŋ taa nyɔvore koɔ̃ na zoro yire.’ ”

³⁹A ŋaa ka O da yeli kyaare ne a Vooroŋ Soŋ, Ona ka a yelderebɛ naŋ be O poɔ na nyɛ. Kyɛ a Vooroŋ Soŋ da naŋ ba wa sɛre, a Yeezu naŋ da naŋ ba nyɛ a O puubu zuiŋ.

⁴⁰Ba naŋ da wa woŋ a yelbie ama, a noba mine da yelee la, “A Ŋmen-yelmanna sereŋ la a ŋa.”

⁴¹Ka ba mine da yeli, “A Mɛzaaya la a ŋa.” Ka ba mine da soore, “A Mɛzaaya mɔɔ na baŋ yi la a Galili teŋɛ be?

⁴²A gansoŋ mɔɔ ba yeli ka a Mɛzaaya na e la a Davil bale neɛ kyɛ na yi Bɛtelɛhɛm tembile na poɔ a Davil naŋ da kpeɛrɛ be?”

⁴³Lɛ la ka wɛltaa da kpɛ a noba sogɔ a Yeezu zuiŋ.

⁴⁴A noba mine da boɔrɔ la ka ba nyɔge O, kyɛ neɛzaa da ba de o nu seene O.

⁴⁵Lɛ la ka a Naaŋmen die polisiri da leɛ gaa a Naaŋmen bagmaalkare ane a Faraziimine zie, ka ba da soore ba, “Bonso ka yɛ da ba nyɔge O?”

⁴⁶Ka a polisiri da yeli sɔge, “Neɛzaa daŋ ba yeli yɛlɛ aŋa lɛ a dɔɔ ŋa naŋ yeli!”

⁴⁷Lɛ la ka a Faraziimine da leɛ yeli, “Serɛzaa O tɔɔ wa bɛlle yɛ meŋ wɛ?

⁴⁸A nembɛrɛ bee a Faraziimine kanzaa da sage de la a Yeezu yɛlɛ be?

⁴⁹Kyɛ a neŋyaga bama naŋ ba baŋ a Naaŋmen begɛ nyɛ la kaa-emmo.”

⁵⁰A Nikodemu na naŋ da gaa a Yeezu zie daare kaŋ kyɛ meŋ da waa a Faraziimine kaŋ da soorɛɛ la:

⁵¹“A te bege poɔ te na baŋ yeli ka neɛ le la sɛrɛɛ poɔ, kyɛ ba daŋ ko o soba sori ka o tu o noɔre yɛlɛ ka te baŋ bonna o naŋ e be?”

⁵²Ka ba leɛ yeli, “Serɛzaa, fo meŋ yi la Galili be? Peɛre nyɛ, fo na nyɛ la ka Ŋmen-yelmanna zaa daŋ ba yi Galili teŋɛ poɔ.” [

⁵³Lɛ la ka ba yeni yeni zaa da iri kuli o yiri.]