Read Southern Dagaare Gyn 8 Bible Online

Gyn 8 - Southern Dagaare bible

Gyn 8

²A bagu-pipi saŋ, a Yeezu da leɛ wa la a Naaŋmen die poɔ. A noba zaa da wa la O zie, ka O da zeŋ a piili kanna ba.

³A Naaŋmen bege wulwulibo ane a Faraziimine da taa la pɔge kaŋ ba naŋ da nyɔge ka o tonɔ peɛ̃mo toma wa ne, a e ka o are a noba niŋesogɔ,

⁴kyɛ ka ba da yeli ko a Yeezu, “Wulwullo, te nyɔge la a pɔge ŋa ka o tonɔ peɛ̃mo toma.

⁵Kyɛ a bege poɔ, Moozul da tere la noɔre ka te za a pɔge ŋa tɔ ne kubo ko. Pampana wola ka fo meŋ yeli?”

⁶Ba da yeli la a ŋaa ka ba e O nyɛ, a pãã na toɔ̃ nyɛ saanaa tuo O. A Yeezu da zuunee la kyɛ sɛgrɛ boma teŋɛŋ ne O nubiri.

⁷Ba naŋ da pullo soorɔ O la ka O da vaa-iri kyɛ yeli ko ba, “Yɛ vɛŋ ka soba na zaa naŋ be yɛ poɔ a ba e yelbieri zaa daŋ de kuuri za ne a pɔge.”

⁸A tɔntɔbaalɛ ka O da leɛ zuuni a sɛgrɛ boma a teŋɛŋ.

⁹Ba naŋ da wa woŋ a lɛ, ba da leɛ gɛrɛ la, yeni yeni, a piili ne a ba nembɛrɛ, kyɛ te kyɛre a Yeezu yoŋ ne a pɔge ka o are O niŋesogɔ.

¹⁰A Yeezu da vaa-iree la kyɛ soore a pɔge, “Pɔge, a noba bɛ? Neɛzaa ba nyɛ fo saanaa ka fo seŋ ne la kũũ be?”

¹¹Ka a pɔge da yeli, “Daana, neɛzaa ba kyebe.” Ka a Yeezu da yeli, “N meŋ koŋ yeli ka fo taa la saanaa seŋ ne kũũ. Gɛrɛ fo gaabo zie, kyɛ a naŋ yi a ŋaa gɛrɛ, tɔɔ la wa erɛ yelbieri.”]

¹²A Yeezu da laboreŋ yeli la yɛlɛ ko a noba, a yele, “Maa la a andonɛɛ kyaane. Soba na zaa naŋ tuuro ma daŋ koŋ baŋ kpɛ lige poɔ, kyɛ o na taa la nyɔvore kyaane.”

¹³Lɛ la ka a Faraziimine da yeli ko O, “Fo leɛ dire la fo meŋɛ danseɛ; a fo danseɛ ba e yelmeŋɛ.”

¹⁴Ka a Yeezu da yeli sɔge, “Ka maa leɛ dire N meŋɛ danseɛ gba, a N danseɛ e la yelmeŋɛ, bonso, N baŋ la zie na N naŋ yi wa ane zie na N naŋ gɛrɛ. Kyɛ yɛnee ba baŋ zie na N naŋ yi wa bee zie na N naŋ gɛrɛ.

¹⁵Yɛ maŋ tu la nensaaloŋ sobie kyɛ di sɛrɛɛ; kyɛ maa eŋ ba dire neɛzaa sɛrɛɛ.

¹⁶Ka maa dire noba sɛrɛɛ gba, a N sɛrɛɛdiibu e la yelmeŋɛ, bonso, N yoŋ naane dire a sɛrɛɛ, kyɛ maa ne a N Saa naŋ toŋ ma la dire a sɛrɛɛ.

¹⁷A yɛ Naaŋmen begɛ poɔ, ba sɛgɛɛ la ka noba bayi danseɛ la waa yelmeŋɛ.

¹⁸N dire la N meŋɛ danseɛ, ka a N Saa naŋ toŋ ma meŋ dire N danseɛ.”

¹⁹Lɛ la ka ba soore O, “Yeŋ ka a fo Saa be?” Ka a Yeezu da yeli sɔge ba, “Yɛ ba baŋ ma bee a N Saa. Ka yɛnee da baŋ ma, yɛ da na baŋ la a N Saa meŋ.”

²⁰A Yeezu da yeli la a yɛlɛ ama O naŋ da are a libie emmo zie a Naaŋmen die poɔ a kanna noba, kyɛ neɛzaa da ba nyɔge O, a O saŋ naŋ da naŋ ba ta sɛre zuiŋ.

²¹A Yeezu da la yeli ko ba la, “N gɛrɛ la, ka yɛ na bɔ ma, kyɛ yɛ na kpi la a yɛ yelbebe poɔ. Zie na N naŋ gɛrɛ yɛ kontoɔ̃ wa be.”

²²Lɛ la ka a Gyuumine da yeli, “O mɔɔ boɔrɔ la ka O ko O meŋɛ be? A lɛ mɔɔ la so ka O yele, ‘Zie N naŋ gɛrɛ yɛ kontoɔ̃ wa be’?”

²³Ka a Yeezu da yeli ko ba, “Yɛ yi la teŋɛzu, kyɛ ka N yi sazu. Yɛ e la teŋɛzu noba, kyɛ ka maa ba e a teŋɛzu neɛ.

²⁴N da yeli ko yɛ la ka yɛ na kpi la a yɛ yelbebe poɔ, bonso, yɛ sereŋ na kpi la a yɛ yelbebe poɔ ka yɛnee ba sage de ka maa la a soba na.”

²⁵Ka a noba da soore O, “Aŋ la fo?” Ka a Yeezu da yeli ko ba, “Boŋ mɔɔ la so ka N yele yɛlɛ korɔ yɛ?

²⁶N taa la yɛlɛ yaga na yeli kyaare ne yɛ ane yɛlɛ yaga naŋ naŋ na e ka yɛ le sɛrɛɛ poɔ. Kyɛ a soba na naŋ toŋ ma e la yelmeŋɛ soba, ka a yɛlɛ N naŋ woŋ yi O zie la ka N yele korɔ a teŋɛzu noba.”

²⁷Ba da ba baŋ a tɛgɛ ka a Saa yɛlɛ la ka O da yele korɔ ba.

²⁸Lɛ la ka a Yeezu da yeli, “Ka yɛnee wa te zɛge a Nensaala Bie ka O do saa, lɛ la ka yɛ na baŋ ka maa la a soba na. Yɛ pãã na baŋ ka N meŋɛ yɛlɛ naane ka N da erɛ, kyɛ yɛlɛ na a Saa naŋ ko ma noɔre la ka N da yele.

²⁹Kyɛ a soba na naŋ toŋ ma be la N zie. O ba bare ma N yoŋ, bonso, N maŋ erɛ la yɛlɛ naŋ pɛllɛ O poɔ tegitegilɛ.”

³⁰O naŋ da yele a yɛlɛ ama, noba yaga da sage de la O yɛlɛ.

³¹Lɛ la ka Yeezu da yeli ko a Gyuumine na naŋ da sage de O yɛlɛ, “Ka yɛnee wa sage de a N yɛlɛ a ba leɛrɛ puori, yɛ sereŋ waa la N potuuribo.

³²Yɛ na baŋ la a yelmeŋɛ, ka a yelmeŋɛ e ka yɛ so yɛmenne.”

³³Ka a noba da leɛ yeli ko O, “Te waa la a Aboraham boorɔ, a daŋ ba e neɛzaa gbaŋgbaare. A fo yɛlɛ ŋa fo naŋ yele, ‘Yɛ na so la yɛmenne tɛgɛ la boŋ’?”

³⁴Ka a Yeezu da yeli sɔge ba, “Yelmeŋɛ zaa ka N yele korɔ yɛ, neɛzaa naŋ e yelbieri waa la a yelbieri gbaŋgbaa.

³⁵A gbaŋgbaa ba maŋ taa zie a yiri poɔ tegitegilɛ, kyɛ a yiri bie eŋ maŋ taa la zie a yiri poɔ tegitegilɛ.

³⁶Azuiŋ, ka a Bidɔɔ wa e ka yɛ so yɛmenne, yɛ sereŋ na so la yɛmenne.

³⁷N baŋ ka yɛ waa la Aboraham boorɔ, kyɛ ka yɛ boɔrɔ sobiri ka yɛ tu kyɛ ko ma, yɛ naŋ ba taa zie a na ko a N yelbiri a yɛ nyɔvore poɔ zuiŋ.

³⁸Bon N naŋ nyɛ yi a N Saa zie la ka N yele korɔ yɛ, kyɛ yɛnee eŋ, yɛ erɛ bonna yɛ naŋ woŋ yi a Saa zie.”

³⁹Ba da yeli sɔge la a Yeezu, “Aboraham la te Saa.” Ka O da yeli ko ba, “Ka yɛnee da waa Aboraham biiri, yɛ da na erɛ la yɛlɛ na Aboraham naŋ da e.

⁴⁰Kyɛ pampana ŋa, yɛ moɔrɔ la ka yɛ ko ma, neɛ naŋ yeli a yelmeŋɛ O naŋ woŋ yi a Naaŋmen zie ko yɛ. Ŋaa naane ka Aboraham da e.

⁴¹Yɛ sereŋ erɛ la yɛlɛ na a yɛ saa naŋ da maŋ erɛ.” Ka ba da yeli ko a Yeezu, “Te ba waa sɛnsɛmbiiri.[11] Saa yeni yoŋ la ka te taa; Ona la a Naaŋmen meŋɛ.”

⁴²Ka a Yeezu da yeli ko ba, “Ka Naaŋmen da waa yɛ Saa, yɛ da na nɔŋ ma la, bonso, Naaŋmen zie la ka N yi, kyɛ pampana, maa la be kyɛ. N ba wa N meŋɛ waabo, kyɛ Ona la toŋ ma.

⁴³Boŋ la so ka yɛ ba baŋ a yɛlɛ N naŋ yele tɛgɛ? Yɛ naŋ kontoɔ̃ sage de N yɛlɛ la so.

⁴⁴Yɛ yi la a yɛ saa a sebɛlbɛllɛ zie. A yɛ saa poboɔbo la ka yɛ boɔrɔ ka yɛ e. O da e la neŋkoorɔ a yi a piiluu saŋ zaa, a ba taa yelmeŋɛ, bonso, yelmeŋɛ zaa ba kye o zie. Ka o naŋ wa ŋmaara zirii, o maŋ yele kyaare ne la o meŋɛ waaloŋ, bonso, o e la zirŋmaara ane zirŋmaareba zaa saa.

⁴⁵Kyɛ N naŋ yele a yelmeŋɛ zuiŋ la so ka yɛ ba sage de a N yɛlɛ.

⁴⁶Yɛ buo soba la na toɔ̃ wuli ma yelbieri N naŋ e? Ka maa yele a yelmeŋɛ korɔ yɛ, bonso ka yɛ ba sage de a N yɛlɛ?

⁴⁷Soba na zaa naŋ yi Naaŋmen zie maŋ kyɛlle woŋ la a Naaŋmen yelbie. Yɛ naŋ ba yi Naaŋmen zie la so ka yɛ ba wono a yɛlɛ.”

⁴⁸A Gyuumine da yeli sɔge la a Yeezu, “A bogriŋ mɔɔ naane ka te yeli ka fo waa la Samareya neɛ kyɛ taa sefaa be?”

⁴⁹Ka a Yeezu da yeli sɔge, “N ba taa sefaa, kyɛ N Saa la ka N eŋnɛ, kyɛ ka yɛnee ba eŋnɛ ma.

⁵⁰Kyɛ N ba boɔrɔ N meŋɛ puubu. Neɛ kaŋ naŋ waa a sɛredire, ona la boɔrɔ ka N nyɛ puubu.

⁵¹Yelmeŋɛ zaa ka N yele korɔ yɛ, soba na zaa naŋ tuuro a N yɛlɛ daŋ koŋ kpi.”

⁵²Ka a Gyuumine da yeli ko O, “Ŋaa te pãã baŋ ka fo taa la sefaa. A Aboraham kpie la, ka a Ŋmen-yelmanneba meŋ da kpi, kyɛ ka fo yeli, ‘Neɛzaa naŋ sage de a N yɛlɛ daŋ koŋ kpi.’

⁵³Fo e la kpoŋ gaŋ a te saa Aboraham naŋ kpi be? A Ŋmen-yelmanneba meŋ da kpie la. Fo mɔɔ teɛre ka fo waa la boŋ?”

⁵⁴Ka Yeezu da yeli sɔge: Ka maa korɔ N meŋɛ puubu, a N puubu koŋ taa tɛgɛ. A N Saa la korɔ ma puubu. Ona la ka yɛ yeli, ‘O waa la te Naaŋmen,’

⁵⁵kyɛ ka yɛ ba baŋ O. Kyɛ maa eŋ baŋ O la. Ka maa na yeli ka N ba baŋ O, N na e la zirŋmaara aŋa yɛnee. N baŋ O la, a sagra O yɛlɛ.

⁵⁶A yɛ Sããkoma Aboraham da kyellɛ la ka o nyɛ a N waabo bebiri. O da nyɛ o la ka a da e o noɔ.

⁵⁷Lɛ la ka a Gyuumine da yeli ko O, “Fo naŋ ba ta yuomo lezaayi ne pie sɛre, kyɛ nyɛ Aboraham?”

⁵⁸Ka Yeezu da yeli ko ba, “Yelmeŋɛ zaa ka N yele korɔ yɛ, ba naŋ wa dɔgrɔ Aboraham ka N daŋ bebe la.”

⁵⁹Lɛ la ka a noba da wuo kubo a na za ne a Yeezu, ka O da sɔgle muri yi a Naaŋmen die poɔ.